ཡེར་མི་ཡཱ 12 - Tibetan Old Testament 2011

ཡེར་མི་ཡཱའི་གཙོ་བོ་དཀོན་མཆོག་ལ་དྲི་བ་ཞུས་པ།

¹ གཙོ་བོ་དཀོན་མཆོག་ཁྱེད་མཉམ་ང་ཡི་རྩོད་པས་ན། ཁྱེད་ཉིད་བདེན་པ་ཡིན་པར་ཁུངས་བསྐྱེལ་གནང། འོན་ཀྱང་ཁྲིམས་དྲང་སྐོར་ལ་ངས་དྲིས་པས། སྤྱོད་ངན་མི་རྣམས་ཅིའི་ཕྱིར་ཕུན་སུམ་ཚོགས། དྲང་མིན་མི་རྣམས་ཅི་ལ་ལམ་ལྷོང་བྱུང།

² ཁྱེད་ཀྱི་དེ་རྣམས་བཙུགས་པས་རྩ་བ་རྒྱས། དེ་ཚོ་སྐྱེས་ནས་འབྲས་བུ་བཏགས་པར་འགྱུར། དེ་ཚོས་རྒྱུན་དུ་ཁྱེད་སྐོར་བཟང་པོ་བརྗོད། དངོས་སུ་ཁྱེད་ལ་བརྩི་མཐོང་བྱེད་མི་འགྱུར།

³ འོན་ཀྱང་གཙོ་བོ་དཀོན་མཆོག་ཁྱེད་ཀྱིས་ང་ངོ་མཁྱེན། ང་ཡིས་ཇི་གྱིས་པ་ཁྱེད་ཀྱིས་མཐོང། ང་ཡི་ཁྱེད་ལ་ཇི་འདྲའི་སེམས་བརྩེ་བ། གསོད་པར་འཁྲིད་པའི་ལུག་ལྟར་མི་ངན་དེ་ཚོར་དྲུད་ནས་འཁྲིད་ཅིག གསོད་པའི་དུས་སྐབས་མ་སླེབས་བར་དུ་དེ་ཚོར་སྲུང་བར་མཛོད།

⁴ དུས་ཡུན་ཇི་རིང་ང་ཚོའི་ས་སྐམ་ཞིང་། ང་ཚོའི་ཞིང་གི་རྩ་རྣམས་མེད་པར་འགྱུར། ང་ཚོས་ཇི་གྱིས་དཀོན་མཆོག་གིས་མི་གཟིགས། མཛོད་མཁན་མི་ཚོས་སྤྱོད་ངན་གྱིས། སེམས་ཅན་དང་ནི་འདབ་ཆགས་རྣམས་ནི་འཆི་བཞིན་འདུག།

⁵ གཙོ་བོ་དཀོན་མཆོག་ཁོང་གིས་བཀའ་གནང་བ། ཡེར་མི་ཡཱ་མི་མཉམ་རྒྱུགས་ཆད་ན། རྟ་དང་མཉམ་དུ་ཇི་ལྟར་རྒྱུགས་ཐུབ་བམ། ཁྱོད་ནི་ཐང་སྟོང་ཁུལ་དུ་ལངས་ཀྱང་མ་ནུས་ན། ཇི་ལྟར་ཡོར་དན་འགྲམ་གྱི་ནགས་སུ་ཁྱོད་ལངས་ཐུབ་བམ།

⁶ ཁྱོད་ཀྱི་གཉན་ཚན་ཚོ་དང་ནང་མི་ཚོས། ཁྱོད་ལ་བསླུ་འཁྲིད་འཐབ་རྩོད་མཉམ་བཞུགས་ཡོད། དེ་ཚོས་ཁྱོད་ལ་ཉེ་བའི་གཏམ་སྨྲས་ཀྱང་། དེ་ཚོར་ཁྱོད་ཀྱིས་བློ་བཅོལ་མ་བྱེད་ཅིག།

ཁོང་གི་མི་མང་གི་རྐྱེན་གྱིས་གཙོ་བོ་དཀོན་མཆོག་ལ་མྱ་ངན།

⁷ གཙོ་བོ་དཀོན་མཆོག་ཁོང་གིས་བཀའ་གནང་བ། ང་ཡིས་ཨིསི་རཱཨེལ་པ་ཚོ་སྤངས་པ་ཡིན། ང་ཡིས་འདམས་པའི་མི་རིགས་དོར་བ་ཡིན། བརྩེ་བའི་མི་མང་དེ་ཚོའི་དགྲའི་དབང་སྤྲད།

⁸ ང་ཡི་འདམས་པའི་མི་ཚོས་ང་རྒོལ་ནས། ནགས་ཀྱི་སེང་གེ་ལྟར་དུ་ང་ལ་ངར་སྐད་འདོན། དེའི་རྐྱེན་ང་ཡིས་དེ་ཚོར་སྡང་བར་བྱེད།

⁹ ང་ཡི་འདམས་པའི་མི་མང་བྱིའུ་བཞིན། ཁྲ་ཚོས་ཕྱོགས་ལ་ཡོང་ནས་འཐབ་པ་ལྟར། གཅན་གཟན་རྣམས་ནི་ཐུགས་སྤྲོ་སྤྱོད་པར་འབོད།

¹⁰ ཕྱི་རྒྱལ་སྲིད་སྐྱོང་པ་མང་པོས་ང་ཡི་རྒུན་ཚལ་བཤིགས། དེ་ཚོས་ང་ཡི་ཞིང་ཁར་རྡོག་བརྫིས་བཏང་། ང་ཡི་ཡིད་འོང་ཡུལ་དེ་བྱེ་ཐང་བཟོས།

¹¹ དེ་ཚོས་དེ་ནི་མི་མེད་ལུང་སྟོང་བཟོས། དེ་ནི་ལུང་སྟོང་ཞིག་ཏུ་ངའི་མདུན་གནས། ཡུལ་ནི་ཡོངས་རྫོགས་བྱེ་ཐང་ཞིག་ཏུ་འགྱུར། སུ་ཞིག་གིས་ཀྱང་དོ་སྣང་མི་བྱེད་དོ།

¹² བྱེ་ཐང་ནང་གི་རྩེ་མཐོ་པོར། མི་ཚོས་བཅོམ་པའི་ཆེད་དུ་ཡོང་ཡོད་དོ། ཡུལ་རྣམས་མེད་པར་བཟོ་ཆེད་ཡོང་ཡོད་དོ། སུ་ཞིག་ཀྱང་ནི་ཞི་བདེར་གནས་མི་ཐུབ།

¹³ ང་ཡི་མི་ཚོས་གྲོ་བཏབ་རྩ་ཡན་བསྡུ། ཧུར་ཐག་ལས་ཀྱང་གང་ཡང་མི་ཐོབ་བོ། གང་ལ་ཟེར་ན་ང་ཡི་ཁྲོ་བ་དེས། དེ་ཚོའི་སྟོན་ཐོག་དོན་འབྲས་མ་བྱུང་ངོ་༎

ཨིསི་རཱཨེལ་གྱི་ཁྱིམ་མཚེས་ཚོར་གཙོ་བོ་དཀོན་མཆོག་གི་ཞལ་ཆད།

¹⁴ གཙོ་བོ་དཀོན་མཆོག་གིས་བཀའ་གནང་བ། ངས་ཨིསི་རཱཨེལ་མི་མང་ཚོར་སྤྲད་པའི་ཡུལ་མེད་པར་བཟོ་མཁན་གྱི་ཨིསི་རཱཨེལ་གྱི་ཁྱིམ་མཚེས་ཚོའི་སྐོར་ཕྲན་བུའི་བརྗོད་རྒྱུ་ཡོད། ངས་མི་ངན་དེ་ཚོ་རྩེ་ཤིང་རྩ་བཀོག་བཏང་བ་ལྟར་དེ་ཚོའི་ཡུལ་ནས་འདོན་རྒྱུ་དང་། དེ་ཚོ་ནས་ཡ་ཧུ་དཱ་པ་རྣམས་སྐྱོབས་རྒྱུ་ཡིན་ནོ།

¹⁵ འོན་ཀྱང་དེ་ཚོ་བཏོན་པའི་རྗེས་ལ་དེ་ཚོ་ལ་ངས་སྙིང་རྗེ་བྱ་རྒྱུ་ཡིན། ངས་མི་རིགས་དེ་ཚོ་རེ་རེ་བཞིན་དེ་ཚོའི་ཡུལ་དང་ལུང་པར་འཁྲིད་ཡོང་རྒྱུ་ཡིན་ནོ།

¹⁶ དེ་ཚོས་སེམས་ཀྱི་གཏིང་ནས་ངའི་མི་མང་གི་ཆོས་ཁས་ལེན་ནས། དེ་ཚོས་ངའི་མི་མང་ལ་བྷལ་གྱི་མིང་ནས་མནའ་བསྐྱེལ་སྟངས་བསླབ་པ་བཞིན་གཙོ་བོ་དཀོན་མཆོག་གསོན་པོ་ཡིན་སྟབས་སྨྲ་བཞིན་མནའ་བསྐྱེལ་བ་ཡིན་ན། དེ་ཚོ་ངའི་མི་མང་གི་ཆ་ཤས་སུ་འགྱུར་བ་དང་དེ་ཚོ་ལ་ཕུན་སུམ་ཚོགས་པ་ཡོང་བར་འགྱུར་རོ།

¹⁷ འོན་ཀྱང་མི་རིགས་ཤིག་གིས་ང་ལ་མ་ཉན་པ་ཡིན་ན། ངས་དེའི་རྩ་བཀོག་ཆ་ཚང་གཏོང་རྒྱུ་དང་དེ་མེད་པ་བཟོ་རྒྱུ་ཡིན་ཞེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎