ཡེར་མི་ཡཱ 10 - Tibetan Old Testament 2011

སྐུ་འདྲ་མཆོད་སྲོལ་དང་དྲང་བདེན་གྱི་མཆོད་པ།

¹ ཨིསི་རཱཨེལ་ཡུལ་གྱི་མི་མང་ཁྱོད་ཚོ་ནི། གཙོ་བོ་དཀོན་མཆོག་ཁོང་གིས་ཁྱོད་ཆོའི་ཆེད་དུ་གནང་བའི་གསུང་འཕྲིན་ཉོན།

² དཀོན་མཆོག་ཁོང་གིས་ཁྱོད་ཚོར་བཀའ་གནང་ལྟར། མི་རིགས་གཞན་གྱི་ལམ་ལ་མ་འགྲོ་ཞིག། མི་རིགས་གཞན་ཞིག་འཇིགས་ཤིང་སྐྲག་ན་ཡང་། ཁྱོད་ཚོ་སྔོན་དུ་བྱུང་མེད་ནམ་མཁའ་ལ། མཐོང་ཚུལ་དེ་ཚོས་བར་ཆད་བྱེད་མ་འཇུག།

³ མི་མང་དེ་ཚོའི་ཆོས་ནི་ཕན་མེད་ཡིན། ནགས་ཚལ་ནང་དུ་ཤིང་སྡོང་ཞིག་བཅད་ཡོང་། ཤིང་བཟོའི་ལག་ཆས་དེ་ལ་བརྐོད་རྒྱབ་ཅིང་།

⁴ གསེར་དང་དངུལ་གྱི་དེ་ལ་རྒྱན་སྤྲོད་བྱས། དེ་ནི་མར་ལ་ཟག་པར་སྐྱོབས་པའི་ཆེད། གཟེར་ཞིག་རྒྱབ་ནས་བརྟན་པོར་བཟོས་ནས་ཡོད།

⁵ སྐུ་འདྲ་དེ་ཚོ་ཆུའི་ཤིང་ཏོག་གི་ཞིང་གར་ཡོད་པའི་ཞིང་སྲུང་མི་གསོབ་འདྲ། དེ་ཚོ་གཏམ་སོགས་གཤོད་མི་ཐུབ། དེ་ཚོ་འགྲོ་མི་ཐུབ་པ་འཁུར་དགོས་སོས། དེ་ཚོས་ཁྱོད་ལ་གནོད་པ་མི་བྱེད་ཅིང་། ཁྱོད་ལ་ཕན་ཐོག་ལ་སོགས་བྱེད་མི་ཐུབ། དེ་ཚོར་ཁྱོད་ནི་འཇིགས་པར་མ་བྱོས་ཤིག།

⁶ གཙོ་བོ་དཀོན་མཆོག་ཁྱེད་དང་འདྲ་བ་སུ་ཡང་མེད། ཁྱེད་ནི་མཐུ་སྟོབས་ལྡན་པ་ཡིན། ཁྱེད་མཚན་རླབས་ཆེན་དང་ནི་སྟོབས་ཆེན་ཡིན།

⁷ མི་རིགས་ཡོངས་ཀྱི་རྒྱབ་པོ་ཁྱེད་ཉིད་ལ། སུ་འདྲ་ཞིག་གིས་གུས་བཀུར་མི་ཞུའམ། ཁྱེད་ལ་གུས་བཀུར་ཞུས་པ་འོས་པ་ཡིན། མི་རིགས་ནང་ནས་ཤེས་རབ་ཅན་ཡོངས་དང་། དེ་ཚོའི་རྒྱལ་པོ་ཚང་མའི་ཁྲོད་དུ་ཡང་། ཁྱེད་དང་འདྲ་བ་སུ་ཞིག་ཡོད་མི་འགྱུར།

⁸ དེ་ཚོ་རྣམས་ནི་རྨོངས་ཤིང་གླེན་པ་ཡིན། དེ་ཚོས་ཤིང་གི་སྐུ་ལས་ཅི་ཞིག་སྦྱོངས།

⁹ དེ་ཚོའི་སྐུ་འདྲར་ཨིསི་པན་དངུལ་གྱི་གཡོག། ཨུ་ཕཛ་ཡུལ་གྱི་གསེར་གྱི་གཏུམ་ནས་ཡོད། དེ་ཚོ་ཚང་མ་ལག་ཤེས་མཁས་པས་བཟོས་ནས་སྒྲུབ་པའོ། དེ་རྣམས་འཐག་པར་ལག་རྩལ་མཁས་པ་ཡིས། གོས་ནི་སྔོ་ནག་མུ་མན་གཡོགས།

¹⁰ འོན་ཀྱང་གཙོ་བོ་དཀོན་མཆོག་ཁྱེད་ནི་བདེན་པ་ཡིན། འཚོ་ཞིང་གསོན་པོར་བཞུགས་པའི་དཀོན་མཆོག་དང་། དུས་མཐའ་མེད་པའི་རྒྱལ་པོ་ཁྱེད་ཡིན་ནོ། ཁྱོད་ནི་ཁྲོ་སྐབས་འཛམ་བུ་གླིང་འདར་ཞིང་། ཁྱེད་ཀྱི་ཐུགས་ཁྲོ་མི་རིགས་རྣམས་ཀྱིས་བཟོད་མི་ཐུབ།

¹¹ (མི་མང་ཁྱོད་ཚོས་ངེས་པར་དུ་ས་གཞི་དང་ནམ་མཁའ་མི་བཟོ་མཁན་གྱི་ལྷ་རྣམས་མེད་པར་བཟོ་བ་དང་། ས་གཞི་འདིའི་ཐོག་དེ་ཚོ་ནམ་ཡང་གནས་མི་འཇུག་ཅེས་དེ་ཚོ་ལ་ཤོད་དགོས་སོ།)

དཀོན་མཆོག་ལ་བསྟོད་པའི་མགུར་མ་ཞིག།

¹² གཙོ་བོ་དཀོན་མཆོག་ཁོང་གི་མཐུ་ཡིས་ས་གཞི་བཀོད། ཁོང་གི་མཁྱེན་རྒྱས་འཛམ་གླིང་བཟོས་གནང་ངོ་། དེ་རྗེས་ཁོང་གིས་མཐོ་རིས་བརྐྱངས་པར་མཛད།

¹³ ཁོང་གི་བཀའ་ཡིས་ནམ་མཁའི་སྟེང་དུ་ནི། ཆུ་བོ་རྣམས་ནི་འུར་སྒྲ་སྒྲོགས་པར་བྱེད། ས་གཞིའི་མཐའ་ནས་སྤྲིན་པ་འཁྱེར་བ་དང་། ཁོང་གིས་ཆར་ནང་གློག་ནི་འཁྱུགས་པར་མཛད། རང་གི་བང་མཛོད་ནང་ནས་རླུང་གཏོང་མཛད།

¹⁴ མཐོང་སྣང་དེ་ཡིས་མི་གླེན་བསམ་མེད་འཚོར། སྐུ་འདྲ་བཟོས་མཁན་རྣམས་ནི་ངོ་འཚའི་ནང་དུ་ཚུད། གང་ལ་ཟེར་ན་དེ་ཚོས་བཟོས་པའི་ལྷ། རྫུན་མ་དང་ནི་སྲོག་མེད་འབའ་ཞིག་ཡིན།

¹⁵ དེ་རྣམས་ཕན་ཐོག་མེད་པར་སྨད་ར་གཏོང་། གཙོ་བོ་དཀོན་མཆོག་དེ་ཚོར་ཁྲིམས་གཅོད་གནང་ཕེབས་སྐབས། ཁོང་གིས་དེ་རྣམས་མེད་པར་བཟོ་གནང་ངོ་།

¹⁶ ཡ་ཀོབ་ཁྱོད་ཀྱི་དཀོན་མཆོག་གཞན་མི་འདྲ། ཁོང་ནི་ཚང་མ་བཟོ་བ་གནང་མཁན་ཡིན། ཁོང་གིས་ཨིསི་རཱཨེལ་མི་མང་དེ་ཚོ་ལ། ཁོང་གི་འབངས་སུ་འདམས་པར་མཛད་པ་ཡིན། ཁོང་གི་མཚན་ནི་ཀུན་དབང་ཅན་གྱི་གཙོ་བོ་དཀོན་མཆོག་ཡིན༎

བཙན་བྱོལ་དུ་འགྲོ་གྲབ་ཡོད་པ།

¹⁷ ཡེ་རུ་ཤ་ལེམ་གྱི་མི་མང་ཚོ་ཁྱོད་རྣམས་ཀྱི་མཐའ་ནས་བསྐོར་ནས་ཡོད་དོ། ཁྱོད་ཚོའི་རང་དངོས་རྣམས་བསྡུས་ཤིག།

¹⁸ གཙོ་བོ་དཀོན་མཆོག་གིས་ཁྱོད་རྣམས་ཡུལ་དེ་ནས་མཐར་སྐྲོད་གནང་རྒྱུ་ཡིན། ཁོང་གིས་ཁྱོད་ཚོ་གཅིག་ཀྱང་མ་ལྷག་པར་གཅོག་པར་མཛད་རྒྱུ་རེད། གཙོོ་བོ་དཀོན་མཆོག་གིས་བཀའ་གནང་བ་ཡིན་ནོ།

¹⁹ ཡེ་རུ་ཤ་ལེམ་པ་ཡི་སྨྲེ་ངག་འདོན། ང་ཚོར་རྨས་སྐྱོན་ཚབ་ཆེ་ཇི་ལྟར་བྱུང་། ང་ཚོའི་རྨ་རྣམས་གསོ་བར་མི་ཡོང་ངོ་། ང་ཚོས་དེ་རྣམས་བཟོད་སྲན་ཐུབ་ཡོང་བསམ།

²⁰ ང་ཚོའི་གུར་རྣམས་འཕྲོ་སླག་ཏུ་འགྱུར་རོ། དེ་རྣམས་འཐེན་པའི་ཐག་པ་རྣམས་ཆད་ཡོད། ང་ཚོའི་བུ་ཕྲུག་རྣམས་ནི་ཐག་རིང་སོང་། ང་ཚོའི་གུར་རྣམས་སྐྱར་དུ་ཕུབ་མཁན་མེད། དེ་ཡི་ཡོལ་བ་གཏོང་མཁན་སུ་ཞིག་མེད།

²¹ ངས་ལན་ཞུས་པར་ང་ཚོའི་འགོ་འཁྲིད་རྣམས། གླེན་པ་ཡིན་པས་གཙོ་བོ་དཀོན་མཆོག་ལ། དེ་ཚོས་ལམ་སྟོན་གནང་རོགས་ཤེས་ཞུས་མེད། དེའི་རྐྱེན་དེ་ཚོ་གོ་མ་ཆོད་པར་འགྱུར། ང་ཚོའི་མི་མང་རྣམས་ནི་ཁ་འཐོར་གནས།

²² གསར་འགྱུར་འབྱོར་བས་དེ་ལ་ཚང་མས་ཉོན། བྱང་དུ་མི་རིགས་ཞིག་ནང་སྐད་ཆེན་འདུག། དེ་ཡི་དམག་དཔུང་ཡ་ཧུ་དཱའི་གྲོང་ཚོ་ལ། ཁྱི་སྤྱང་སྡོད་ཡུལ་བྱེ་ཐང་དུ་འགྱུར་རོ།

²³ སུ་ཡང་རང་གི་མདུན་ལམ་ཁོ་ཡི་ལག་པར་མེད། རང་གི་མི་ཚེར་དབང་བསྒྱུར་མི་ཐུབ་པ། བཅས་ངས་ཤེས་སོ་གཙོ་བོ་དཀོན་མཆོག།

²⁴ གཙོ་བོ་དཀོན་མཆོག་ཁྱེད་ཀྱི་མི་མང་རྣམས། ལེགས་བཅོས་མཛོད་ལ་ཧ་ཅང་བཙེན་པོ་མ་མཛོད་ཅིག། ཡང་ན་ཐུགས་ཁྲོའི་སྐབས་སུ་ང་ཚོར་ཆད་པ་མ་གནང་ཞིག དེ་མིན་ང་ཚོའི་མཐའ་མར་འགྱུར་རྒྱུ་ཡིན།

²⁵ ཁྱེད་ལ་མི་མཆོད་མཁན་གྱི་མི་རིགས་དང་། ཁྱེད་ལ་ཁས་མི་ལེན་པའི་མི་མང་ལ། ཁྱེད་ཀྱི་ཐུགས་ཁྲོ་དེ་ཚོར་འབེབས་པར་མཛོད། དེ་ཚོས་ཁྱེད་ཀྱི་མི་མང་ཚོ་བསད་ཅིང་། ང་ཚོ་ཚང་མ་མེད་པར་བཟོ་བ་དང་། ང་ཚོའི་ལུང་པ་གྱང་གོག་བཏང་ཡོད་དོ༎