ཡེ་ཤ་ཡཱ 66 - Tibetan Old Testament 2011

གཙོ་བོ་དཀོན་མཆོག་གིས་མི་རིགས་ཚོར་ཁྲིམས་ཞིབ་གནང་བ།

¹ གཙོ་བོ་དཀོན་མཆོག་གིས་བཀའ་གནང་བ། མཐོ་རིས་ནི་ངའི་ཁྲི་ཡིན་པ་དང་། ས་གཞི་ནི་ངའི་ཞབས་སྟེགས་ཡིན་ནོ། དེ་ཡིན་ཙང་ཁྱོད་ཚོས་ངའི་ཆེད་དུ་ཁང་པ་ཇི་འདྲ་ཞིག་བཞེངས་ཐུབ་བམ། ང་སྡོད་པའི་ས་གནས་ག་འདྲ་ཞིག་བཟོ་ཐུབ་བམ།

² ང་རང་རང་ཉིད་ནས་ས་གཞི་ཡོངས་སུ་བཀོད་པ་ཡིན། ཉམས་ཆུང་དང་འགྱོད་སེམས་ཅན་དང་ང་ལ་འཇིགས་མཁན་དང་ངའི་བཀའ་ལ་ཉན་མཁན་ལ་ང་མཉེས་པ་ཡིན་ནོ།

³ མི་མང་གིས་རང་གི་འདོད་པ་ལྟར་བྱེད་དོ། དམར་མཆོད་འབུལ་སྐབས་དེ་ཚོས་གླང་གོག་ཞིག་བསད་པ་ཡང་ན་མི་བསད་པ། ལུ་གུ་དམར་མཆོད་དུ་ཕུལ་བ་ཡང་ན་ཁྱིའི་སྐེ་བཅད་པ། འབྲུའི་མཆོད་པ་ཕུལ་བ་ཡང་ན་ཕག་པའི་ཁྲག་ཕུལ་བ། སྤོས་བདུག་པ་ཡང་ན་སྐུ་འདྲར་སྨོན་ལམ་འདེབས་པ། དེ་ཚོའི་ཆེད་དུ་དེ་ཚོ་ཚང་མ་འདྲ་མཉམ་ཡིན་ནོ། དེ་ཚོས་ཞེན་ལོག་ཅན་གྱི་ལམ་ནས་མཆོད་པ་ཕུལ་རྒྱུར་དགའོ།

⁴ དེ་འདྲ་སོང་ཙང་དེ་ཚོས་གང་ཞིག་ལ་འཇིགས་པའི་རྐྱེན་ངན་དེ་ཆོའི་སྟེང་དུ་འབེབས་པར་བྱའོ། གང་ལ་ཟེར་ན། ངས་འབོད་སྐབས་སུས་ཀྱང་ལན་འདེབས་བྱས་མེད། ཡང་ན་ངས་སྨྲ་སྐབས་སུས་ཀྱང་ཉན་མེད། དེ་ཚོས་ང་ལ་མི་ཉན་པ་དང་ངན་ལས་བྱ་རྒྱུར་འདམས་སོ།

⁵ གཙོ་བོ་དཀོན་མཆོག་ལ་འཇིག་མཁན་དང་། ཁོང་གྱི་བཀའ་ལ་ཉན་མཁན་རྣམས་ཁྱོད་ཚོ་ཁོང་གིས་ཇི་ལྟར་བཀའ་གནང་བར་ཉོན་ཞིག ཁྱོད་ཚོ་ང་ལ་དམ་ཚིག་ལྡན་པ་ཡིན་སྟབས། ཁྱོད་ཚོ་ལ་ཁྱོད་ཚོ་རང་གི་མི་འགའ་ཞིག་གིས་སྡང་པོ་བྱེད་པ་དང་། ཁྱོད་ཚོར་འབྲེལ་བར་གང་ཡང་མི་བྱེད་དོ། དེ་ཚོས་ཁྱོད་ཚོར་ཁྱད་གསོད་བྱེད་ནས་འདི་ལྟར་སྨྲས་པར་འགྱུར། ང་ཚོས་ཁྱོད་ཚོ་དགའ་བདེར་སྤྱོད་པ་མཐོང་བའི་ཆེད་གཙོ་བོ་དཀོན་མཆོག་གིས་རང་གི་མཐུ་སྟོབས་བརྟན་ནས་ཁྱོད་ཚོ་སྐྱོབ་ཏུ་འཇུག། འོན་ཀྱང་དེ་ཚོ་རང་ཉིད་ལ་ངོ་ཚ་ཡོང་བར་འགྱུར་རོ།

⁶ ཁྱོད་ཚོ་ཉོན་ཞིག། གྲོང་ཁྱེར་གྱི་སྒྲ་ཤུགས་ཆེན་པོ་དེ། མཆོད་ཁང་ནང་དུ་ཡོད་པའི་སྒྲ་དེ་གཙོ་བོ་དཀོན་མཆོག་གིས་ཁོང་གི་དགྲ་བོ་ཚོར་ཆད་པ་གཏོང་བའི་སྒྲ་ཡིན་ནོ།

⁷ ངའི་གྲོང་ཁྱེར་དམ་པ་འདི་བཞིན་སྐྱེས་གཟེར་མེད་པར་བློ་བུར་དུ་ཕྲུ་གུ་ཞིག་སྐྱེས་པའི་བུད་མེད་ཞིག་དང་འདྲའོ།

⁸ སུ་ཞིག་གིས་དེ་ལྟར་མཐོང་བ་དང་ཐོས་ཡོད་དམ། མི་རིགས་ཤིག་ཉིན་གཅིག་ལ་སྐྱེས་ཡོད་དམ། མི་རིགས་དེ་སྐྱེས་པའི་སྔོན་དུ་ཛི་ཡོན་གྱི་སླར་སྡུག་བསྔལ་མྱོང་མི་དགོས་སོ།

⁹ ཁྱོད་ཚོའི་བསམ་བློར་ངས་ངའི་མི་མང་ཕྲུ་གུ་སྐྱེ་རན་པར་བཞག་ནས་དེ་ཚོར་སྐྱེར་འཇུག་གི་མ་རེ་མ་བསམ་ཞིག ཅེས་གཙོ་བོ་དཀོན་མཆོག་གིས་བཀའ་གནང་ངོ།

¹⁰ ཡེ་རུ་ཤ་ལེམ་མཉམ་དུ་དགའ་ངོམ་གྱིས། མོའི་ཆེད་དུ་དགའ་ངོམ་བྱོས། གྲོང་ཁྱེར་འདི་ལ་བརྩེ་བ་བྱ་མཁན་རྣམས། མོ་ཡི་ཆེད་དུ་མྱ་ངན་བྱེད་མཁན་རྣམས། ད་ལྟ་མོ་དང་མཉམ་དུ་དགའ་ངོམ་བྱོས།

¹¹ ཕྲུ་གུ་མ་ཡི་ནུ་གཞུར་ཡོད་པ་ལྟར། ཁྱོད་ཀྱིས་མོ་ཡི་ལམ་ལྷོང་སྤྱོད་པར་འགྱུར།

¹² གཙོ་བོ་དཀོན་མཆོག་གིས་བཀའ་གནང་བ། ངས་ཁྱོད་ཚོར་གཏན་གྱི་ཕལ་རྒྱས་སྤྲད་པར་བྱ། མི་རིགས་ཚོའི་རྒྱུ་ནོར་རྣམས་ནམ་ཡང་མི་སྐམ་པའི་རྒྱུག་ཆུ་ལྟར་ཁྱོད་ཚོའི་སར་ཡོང་བར་འགྱུར། ཁྱོད་ཚོ་མས་རང་གི་ཕྲུ་གུར་འོ་མ་སྤྲད་པ་དང་ལག་པར་འཁྱེར་ནས་བརྩེ་བསྟན་པའི་ཕྲུ་གུ་ལྟ་བུ་ཡོང་ངོ།

¹³ མས་རང་གི་ཕྲུ་གུར་སེམས་གསོ་བྱས་པ་ལྟར། ངས་ཁྱོད་ཚོར་ཡེ་རུ་ཤ་ལེམ་དུ་སེམས་གསོ་བྱེད་དོ།

¹⁴ ཁྱོད་ཀྱིས་དེ་ལྟར་མཐོང་སྐབས་ཁྱོད་དགའ་བར་འགྱུར། དེས་ཁྱེད་ཚོ་ཤུགས་ཆེན་པོ་དང་བདེ་ཐང་བཟོ་བར་བྱའོ། དེ་ནས་ཁྱོད་ཚོས་ང་གཙོ་བོ་དཀོན་མཆོག་གིས་ངའི་བཀའ་ལ་ཉན་མཁན་རྣམས་ལ་རོགས་བྱེད་པ་དང་། ངའི་དགྲ་བོ་ཚོར་ཁྲོ་བ་སྟོན་པ་དེ་ཁྱོད་ཚོས་ཤེས་པར་འགྱུར་རོ།

¹⁵ གཙོ་བོ་དཀོན་མཆོག་མེ་དང་མཉམ་དུ་ཕེབས་ཡོང། ཁོང་ཐུགས་ཁྲོས་ཡོད་པ་རྣམས་ལ་ཆད་པ་གཏོང་བའི་ཆེད་རླུང་གི་ཤོག་པར་འཆིབས་པ་གནང་ངོ།

¹⁶ ཁོང་གིས་མེ་དང་རལ་གྲིས་འཛམ་གླིང་གི་མི་མང་ཉེས་ཅན་གཟིགས་པ་རྣམས་ལ་ཆད་པ་གནང་བ་དང་མང་པོ་ཞིག་གསོད་པ་གནང་ངོ།

¹⁷ གཙོ་བོ་དཀོན་མཆོག་གིས་བཀའ་གནང་བ། ཕྱི་པའི་མཆོད་པ་བྱ་རྒྱུར་དག་བྱང་བྱ་མཁན་དང་། ལྡུམ་ར་དམ་པའི་ནང་དུ་སྒྲིག་ཏེ་འགྲོ་མཁན་དང་ཕག་ཤ་དང་རྩི་རྩི་དང་གཞན་སྐྱུག་བྲོའི་ཟས་ཟ་མཁན་ཚོའི་མཐའ་ཉེ་བར་ཡོད་དོ།

¹⁸ ངས་དེ་ཚོའི་བསམ་བློ་དང་ངན་ལས་རྣམས་ཤེས་སོ། ང་མི་རིགས་ཡོངས་ཀྱི་མི་མང་རྣམས་བསྡུ་བར་ཡོང་བཞིན་ཡོད། དེ་ཚོ་མཉམ་དུ་འཛོམས་སྐབས་དེ་ཚོས་ངའི་མཐུ་སྟོབས་ཀྱིས་ཇི་འདྲ་བྱེད་ཐུབ་པ་མཐོང་བར་འགྱུར་རོ།

¹⁹ དེ་ཚོ་ལ་ཆད་པ་གཏོང་མཁན་དེ་ང་ཡིན་པ་ཤེས་པར་འགྱུར་རོ། འོན་ཀྱང་ངས་དེ་ཚོ་འགའ་ཤས་ཐར་བར་བྱེད་པ་དང་། དེ་ཚོས་ངའི་སྙན་གྲགས་མི་ཐོས་པ་དང་ཡང་ན་ངའི་རླབས་ཆེན་དང་མཐུ་སྟོབས་ལ་མི་མཐོང་བའི་མི་རིགས་རྣམས་དང་གླིང་ཕྲན་ཨིསི་པེན་དང་ལིབ་ཡ་དང་ལི་ཌི་ཡ་བཅས་པར་དེས་རྩལ་དང་ལྡན་པའི་མདའ་པ་མཉམ་དུ། ཏུ་བྷལ་དང་གྷིརིསི་བཅས་པར་མངགས་པར་བྱའོ། དེ་ཚོས་མི་རིགས་དེ་ཚོའི་ཁྲོད་དུ་ངའི་ཆེ་མཐོང་ཁྱབ་སྒྲགས་བྱའོ།

²⁰ དེ་ཚོས་ཁྱོད་ཚོའི་ཡུལ་གཅིག་པའི་མི་རྣམས་ལ་མི་རིགས་རྣམས་ནས་ངའི་འབུལ་བའི་ཚུལ་དུ་འཁྲིད་ཡོང་བར་བྱའོ། ཇི་ལྟར་ཨིསི་རཱཨེལ་པ་ཚོས་ཆོ་ག་ལྟར་སྣོད་གཙང་མའི་ནང་ངའི་མཆོད་ཁང་དུ་འབྲུའི་མཆོད་པ་འཁྱེར་ཡོང་བ་ལྟར། དེ་ཚོས་ཡེ་རུ་ཤ་ལེམ་གྱི་ངའི་དམ་པའི་རི་བོར་རྟ་དང་དྲེལ་དང་རྔ་མོང་དང་ཤིང་རྟ་འཁོར་ལོ་དང་འཁྱོག་དཔྱང་བཅས་པའི་ནང་དེ་ཚོར་འཁྱེར་ཡོང་བར་བྱའོ།

²¹ ངས་དེ་ཚོ་ནས་འགའ་ཤས་བླ་མ་རྣམས་དང་ལེ་ཝི་པ་རྣམས་བཟོ་བར་བྱའོ།

²² ཇི་ལྟར་ངའི་མཐུ་སྟོབས་ཀྱིས་ས་གཞི་གསར་པ་དང་མཐོ་རིས་གསར་པ་གནས་པ་ལྟར། ཁྱོད་ཚོའི་རིགས་བརྒྱུད་དང་ཁྱོད་ཚོའི་མིང་གནས་པར་འགྱུར་རོ།

²³ ཟླ་བ་གསར་པའི་དུས་སྟོན་དང་ངལ་གསོ་བའི་ཞག་རེ་བཞིན་མི་རིགས་ཡོངས་རྫོགས་ཀྱི་མི་མང་རྣམས་ཡེ་རུ་ཤ་ལེམ་དུ་ང་ལ་མཆོད་པར་ཡོང་བར་འགྱུར་ཞེས་གཙོ་བོ་དཀོན་མཆོག་གི་བཀའ་གནང་ངོ།

²⁴ དེ་ཚོ་ལོག་ནས་འགྲོ་སྐབས་དེ་ཚོས་ང་ལ་ངོ་ལོག་བྱ་མཁན་ཚོའི་རོ་རྣམས་མཐོང་བར་འགྱུར། དེ་ཚོ་ཟ་མཁན་གྱི་འབུ་རྣམས་ནམ་ཡང་མི་འཆི་བ་དང་། དེ་ཚོ་སྲེག་པའི་མེ་ནམ་ཡང་གསོད་པར་མི་བྱ། དེ་ཚོའི་མཐོང་ཚུལ་དེ་བཞིན་འགྲོ་བ་མི་ཡོངས་ལ་ཞེན་ལོག་ཅན་དུ་འགྱུར་རོ༎