ཡེ་ཤ་ཡཱ 15 - Tibetan Old Testament 2011

དཀོན་མཆོག་གིས་མོ་ཨབ་མེད་པར་མཛད་རྒྱུ།

¹ མོ་ཨབ་པའི་སྐོར་ལ་གསུང་འཕྲིན་འདི་ལྟར་ཡིན་ནོ། ཨར་དང་ཀིར་གྱི་གྲོང་ཁྱེར་མཚན་གཅིག་ལ་འཇིགས་པར་མཛད་པ་དང། མོ་ཨབ་པའི་ཡུལ་ནི་ཁ་ཁུ་སིམ་པོར་ཆགས་སོ།

² དྷི་བྷོན་གྱི་མི་མང་རྣམས་ངུ་བའི་ཆེད་རི་བོའི་སྟེང་མཆོད་ཁང་དུ་འཛེགས་སོ། མོ་ཨབ་ཀྱི་མི་མང་རྣམས་ནེ་བྷོ་དང་མེ་དྷེ་བྷ་གྲོང་ཁྱེར་གྱི་ཆེད་དུ་མྱ་ངན་གྱིས་ངུ་བ་དང། དེ་ཚོའི་མྱ་ངན་ངང་སྐྲ་དང་རྨ་ར་གཉིས་བྲེགས་སོ།

³ ལམ་དུ་ཡོད་པའི་མི་མང་རྣམས་རྩ་རས་ཀྱི་གོས་གྱོནཡོད་པ་དང། གྲོང་ཁྱེར་གྱི་ཁྱམས་ར་དང་ཁང་པའི་ཐོག་ཁར་བཅས་པར་མི་མང་རྣམས་མྱ་ངན་བྱེད་ཅིང་བསྡད་ཡོད་དོ།

⁴ ཧེཤ་བྷོན་དང་ཨེ་ལི་ལཱེའི་མི་མང་རྣམས་སྐད་འབོད་བྱེད་པ་དང་དེ་ཚོའི་སྐད་ཐག་རིང་ཡ་ཧཛ་བར་དུ་གོ་བ་དང། དམག་མི་ཚོ་ཡང་འདར་བ་དང་དེ་ཚོའི་སྙིང་སྟོབས་ཡང་རླག་པར་ཡོད་དོ།

⁵ ངའི་སེམས་ནི་མོ་ཨབ་ཀྱི་ཆེད་དུ་ངུ་འབོད་བྱེད་དོ། མི་མང་རྣམས་ཛོ་ཨར་དང་ཨེག་ལད་ཤེ་ལི་ཤི་ཡཱའི་གྲོང་དུ་བྲོས་སོ། འགའ་ཤས་ལུ་ཧིདའི་ལམ་དུ་འཛེགས་སྐབས་ངུ་བཞིན་ཡོད་པ་དང། འགའ་ཤས་མྱ་ངན་གྱི་སྐད་ཆེན་པོ་འདོན་བཞིན་ཧོ་རོ་ནེམ་དུ་བྲོས་སོ།

⁶ ནིམ་རིམ་གྱི་རྒྱུགས་ཆུ་སྐམ་ཡོད་པ་དང། དེའི་ཉེ་འགྲམ་གྱི་རྩ་སྐམ་ནས་སྔོ་རིགས་གང་ཡང་ལྷག་མེད་དོ།

⁷ མི་མང་རང་གི་རྒྱུ་དངོས་ཡོངས་རྫོགས་འཁྱེར་ནས་བྲོས་ཐབས་ཀྱིས་ཝི་ལོའི་ལུང་གཤོང་རྒལ་ནས་ཕྱིན་ནོ།

⁸ མོ་ཨབ་ཀྱི་ས་མཚམས་ཡོངས་སུ་ངུ་སྐད་གོ་བ་དང། དེ་ཨེག་ལེམ་དང་བྷིར་ཨེ་ལིམ་གྱི་གྲོང་དུ་ཡང་གོའོ།

⁹ དྷི་བྷོན་གྱི་གྲོང་གི་རྒྱུགས་ཆུ་ཁྲག་གིས་དམར་པོ་ཆགས་ཡོད་པ་དང། ད་དུང་དེ་ཁུལ་གྱི་མི་མང་རྣམས་ཀྱི་ཆེད་དུ་གཙོ་བོ་དཀོན་མཆོག་ལ་དེ་ལས་ཆེ་བ་སྡུག་བསྔལ་གྱི་བྱ་བ་ཞིག་ཟུར་དུ་འཇོག་གནང་ཡོད་པ་དང། མོ་ཨབ་ཏུ་ལྷག་ལུས་གསོན་པོ་ཚང་མ་ཧ་ཅང་སྡུག་རྩུབ་ཅན་གྱི་འདེབས་གསོད་བྱེད་པར་འགྱུར་རོ༎