བཀོད་པ 7 - Tibetan Old Testament 2011

ཆུ་ལོག་ཡོང་བ།

¹ གཙོ་བོ་དཀོན་མཆོག་གིས་ནོ་ཨ་ལ་གསུངས་པ། ཁྱོད་དང་ཁྱོད་ཀྱི་ནང་མི་མཉམ་དུ་གྲུའི་ནང་དུ་སོང་ཞིག འཛམ་གླིང་ཀུན་གྱི་ནང་དྲང་བདེན་གྱི་ལས་བྱས་མཁན་ངས་ཁྱོད་གཅིག་པུར་རྙེད་བྱུང་།

² ཆོ་ག་ལྟརསེམས་ཅན་གཙང་བའི་རིགས་ཐམས་ཅད་ནས་ཕོ་མོ་ཆ་བདུན་དང་། འོན་ཀྱང་སེམས་ཅན་མི་གཙང་བ་སྣ་ཚོགས་ནས་ཆ་གཅིག་གཅིག་པུ་འདམས་ཤིག

³ བྱ་བྱིའུའི་རིགས་སྣ་ཚོགས་ནས་ཆ་བདུན་ཡང་འཁྱེར་ཞིག སེམས་ཅན་སྣ་ཚོགས་དང་། བྱ་བྱིའུའི་རིགས་སྣ་ཚོགས་ས་གཞི་ནང་གསོན་པོར་ལུས་ནས་ཡང་སྐྱེས་པའི་ཕྱིར་དེ་ལྟར་བྱོས་ཤིག

⁴ ངས་བཟོས་པའི་སྲོག་དང་ལྡན་པའི་རིགས་ཐམས་ཅད་མེད་པར་བྱ་བའི་ཕྱིར། ཞག་བདུན་གྱི་རྗེས་སུ་ཉིན་ཚན་བཞི་བཅུ་བར་ཆར་པ་གཏོང་རྒྱུ་ཡིན།

⁵ དཀོན་མཆོག་གིས་བཀའ་གནང་བ་བཞིན་ནོ་ཨས་ཚང་མ་སྒྲུབ་པར་བྱས་སོ།

⁶ ནོ་ཨ་ལོ་ ༦༠༠ ལོན་སྐབས་ས་གཞིར་ཆུ་ལོག་བྱུང་ངོ་།

⁷ ཆུ་ལོག་ནས་ཐར་བའི་ཕྱིར་ནོ་ཨ་དང་ཁོའི་ཆུང་མ་དང་བུ་རྣམས་དང་དེ་ཚོའི་ཆུང་མ་རྣམས་གྲུའི་ནང་ཕྱིན་ནོ།

⁸ ཚོ་ག་ལྟར་སེམས་ཅན་དང་བྱ་བྱིའུ་གཙང་དང་མི་གཙང་བའི་རིགས་སྣ་ཚོགས་ནས་ཕོ་མོ་ཆ་རེ་བྱས་ཏེ།

⁹ དཀོན་མཆོག་གིས་བཀའ་གནང་བ་ལྟར་ནོ་ཨ་དང་མཉམ་དུ་གྲུའི་ནང་འཛུལ་ལོ།

¹⁰ ཞག་བདུན་གྱི་རྗེས་སུ་ཆུ་ལོག་འབབ་བོ།

¹¹ ནོ་ཨ་ལོ་ ༦༠༠ ལོན་པའི་ཟླ་བ་གཉིས་པའི་ཚེས་བཅུ་བདུན་གྱི་ཉིན་མོར་འཛམ་གླིང་གི་ཆུ་མིག་ཆེན་པོ་ཐམས་ཆད་རྡོལ་ཏེ། ནམ་མཁའི་ཆར་ཆུའི་སྒོ་ཚང་མ་ཡང་ཕྱེས་སོ།

¹² ཡང་ཉིན་ཚན་བཞི་བཅུའི་བར་ཆར་པ་ཆེན་པོ་འབབ་བོ

¹³ ཉིན་དེ་རང་ལ་ནོ་ཨ་དང་ཁོའི་ཆུང་མ་དང་ཁོའི་བུ་གསུམ་ཤེམ་དང་ཧམ་དང་ཡ་ཕེད་དང་དེ་དག་གི་ཆུང་མ་རྣམས་གྲུའི་ནང་འཛུལ་ལོ།

¹⁴ ཁོང་ཚོ་མཉམ་དུ་ནགས་དང་ཁྱིམ་གྱི་དུད་འགྲོ་ཆེ་ཆུང་ཐམས་ཅད་དང་། བྱ་བྱིའུ་སྣ་ཚོགས་ཕྱིན་ནོ།

¹⁵ སྲོག་དང་ལྡན་པའི་སེམས་ཅན་ཐམས་ཅད་ལས་ཕོ་མོ་ཆ་རེ་རེ་ཡང་ནོ་ཨ་དང་མཉམ་དུ་གྲུའི་ནང་ཕྱིན་ནོ། དཀོན་མཆོག་གིས་གསུངས་པ་ལྟར་བྱུང་ངོ་།

¹⁶ དེ་ནས་གཙོ་བོ་དཀོན་མཆོག་གིས་གྲུའི་སྒོ་དེ་རྒྱབ་པར་གནང་ངོ་།

¹⁷ ཉིན་བཞི་བཅུ་བར་མུ་མཐུད་ནས་ཆུ་ལོག་བྱུང་བ་དང་། ཆུ་གཏིང་རིང་པོ་ཆགས་ནས་གྲུ་གཟིང་ལྡིང་བ་ཡིན་ནོ།

¹⁸ ད་དུང་ཆུ་གཏིང་རིང་དུ་སོང་བས། གྲུ་དེ་ཆུའི་སྟེང་དུ་ལྡིང་ངོ་།

¹⁹ ཆུ་དེ་ཤིན་ཏུ་གཏིང་རིང་བས། ཧ་ཅང་ཐོན་པོའི་གངས་རི་རྣམས་བཀབ་བོ།

²⁰ གངས་རིའི་རྩེ་ལས་མི་ཊར་བདུན་ཙམ་མཐོ་པོར་འཕར་བར་གྱུར་ཏོ།

²¹ འཛམ་གླིང་ནང་ཡོད་པའི་སྲོག་དང་ལྡན་པའི་སེམས་ཅན་ཐམས་ཅད་དང་བྱ་བྱིའུ་ཐམས་ཅད་དང་མིའི་རིགས་ཐམས་ཅད་ཤིའོ།

²² འཛམ་གླིང་ནང་ཡོད་པའི་དབུགས་གཏོང་མཁན་ཚང་མ་ཤིའོ།

²³ འཛམ་གླིང་ནང་ཡོད་པའི་སྲོག་དང་ལྡན་པའི་མི་རིགས་དང་དུད་འགྲོ་དང་བྱ་བྱིའུ་ལ་སོགས་པ་ཐམས་ཅད། དཀོན་མཆོག་གིས་མེད་པར་མཛད་དོ། ནོ་ཨ་དང་མཉམ་དུ་གྲུའི་ནང་ཡོད་པ་དེ་ཚོ་གཅིག་པུ་གསོན་པོར་ལུས་སོ།

²⁴ ཉིན་ ༡༥༠ བར་སའི་སྟེང་དུ་ཆུ་གནས་སོ༎