བཀོད་པ 46 - Tibetan Old Testament 2011

ཡ་ཀོབ་དང་ཁོང་གི་ནང་མི་རྣམས་ཨི་ཇིབ་དུ་འགྲོ་བ།

¹ ཡ་ཀོབ་ཀྱིས་རང་དང་མཉམ་དུ་གང་ཡོད་པ་ཚང་མ་འཁྱེར་ནས་འགྲུལ་སྐྱོད་བྱེད་དོ། བྷིར་ཤེ་བྷ་རུ་བསླེབས་ཚར་ནས་ཁོང་གིས་རང་གི་ཕ་ཨི་སཱག་གི་དཀོན་མཆོག་ལ་དམར་མཆོད་ཕུལ་ལོ།

² མཚན་མོའི་དུས་སུ་དཀོན་མཆོག་གིས་ཞལ་གཟིགས་ཀྱི་ནང་ཡ་ཀོབ། ཡ་ཀོབ་ཞེས་འབོད་པ་དང་། ཡ་ཀོབ་ཀྱི་ལན་དུ། ང་འདི་རུ་ཡོད་ཞུས་སོ།

³ དེ་ནས་དཀོན་མཆོག་གིས་ཁོང་ལ། ང་དཀོན་མཆོག། ཁྱོད་ཀྱི་ཕའི་དཀོན་མཆོག་ཡིན། ཁྱོད་ཨི་ཇིབ་དུ་འགྲོ་བར་མ་འཇིགས་ཤིག། ངས་དེ་རུ་ཁྱོད་ཀྱི་བུ་བརྒྱུད་རྣམས་མི་རིགས་ཆེན་པོ་ཞིག་བཟོ་བར་བྱའོ།

⁴ ང་ཁྱོད་དང་མཉམ་དུ་ཨི་ཇིབ་དུ་འགྲོ་རྒྱུ་ཡིན་པ་དང་། ཁྱོད་ཀྱི་མི་བརྒྱུད་རྣམས་ལ་ཡུལ་འདིར་ཕྱིར་སློག་འཁྲིད་པར་བྱའོ། ཁྱོད་ཤི་བའི་དུས་སུ་ཡོ་སེབ་ཁྱོད་དང་མཉམ་དུ་ཡོད་པར་འགྱུར་ཞེས་གསུངས་སོ།

⁵ དེའི་རྗེས་སུ་ཡ་ཀོབ་བྷིར་ཤེ་བྷ་ནས་ཐོན་ནོ། ཁོང་གི་བུ་རྣམས་ཀྱིས་ཨི་ཇིབ་ཀྱི་རྒྱལ་པོས་བཏང་བའི་ཤིང་རྟ་རྣམས་ལ་རང་གི་ཕ་དང་ཕྲུ་གུ་ཆུང་ཆུང་རྣམས་དང་། ཆུང་མ་རྣམས་ལ་བཞོན་བཅུག་གོ།

⁶ ཡུལ་ཀ་ནན་དུ་གསོག་འཇོག་བྱེད་པའི་ཕྱུགས་ཟོག་དང་ནོར་རྫས་རྣམས་མཉམ་དུ་འཁྱེར་ནས་ཨི་ཇིབ་དུ་ཕྱིན་ནོ། ཡ་ཀོབ་ཀྱིས་རང་གི་རིགས་བརྒྱུད་ཚང་མ་མཉམ་དུ་འཁྲིད་དོ།

⁷ ཁོང་གི་བུ་ཕྲུག་རྣམས་དང་ཚ་བོ་ཚ་མོ་རྣམས་དང་བཅས་པ་ཚང་མ་ཨི་ཇིབ་དུ་མཉམ་དུ་འཁྲིད་དོ།

⁸ ཡ་ཀོབ་དང་མཉམ་དུ་ཨི་ཇིབ་དུ་འགྲོ་མཁན་ཚང་མ་འདི་ཚོ་ཡིན་ནོ། ཁོང་གི་བུ་རྒན་ཤོས་རུ་བྷེན་དང་།

⁹ རུ་བྷེན་གྱི་བུ་རྣམས་ནི་ཧ་ནོག། པལ་ལུ། ཧེཛ་རོན་དང་ཀར་མི།

¹⁰ སིམ་ཨོན་དང་ཁོའི་བུ་རྣམས་ནི་ཡེ་མུ་ཨེལ། ཡ་མིན། ཨོ་ཧད། ཡ་ཀིན། ཛོ་ཧར་དང་ཀ་ནན་པའི་བུད་མེད་ཀྱི་བུ་ཤ་ཨུལ།

¹¹ ལེ་ཝི་དང་ཁོའི་བུ་རྣམས་ནི་གྷེར་ཤོན། ཀོ་ཧད་དང་མེ་ར་རི།

¹² ཡ་ཧུ་དཱ་དང་ཁོའི་བུ་རྣམས་ནི་ཤེ་ལཱ། པེ་རེཛ་དང་ཛེ་རཱ་དང་། ཡ་ཧུ་དཱའི་བུ་གཞན་རྣམས་ནི་ཨེར་དང་ཨོ་ནན་ནི་ཡུལ་ཀ་ནན་དུ་གྲོངས་ཚར་ཡོད་པ་ཡིན་ནོ། པེ་རེཛ་ཀྱི་བུ་རྣམས་ནི་ཧེཛ་རོན་དང་ཧ་མུལ།

¹³ ཨི་ས་ཀར་དང་ཁོའི་བུ་རྣམས་ནི་ཏོ་ལ། པུ་ཨ། ཡ་ཤུབ་དང་ཤིམ་རོན།

¹⁴ ཛེ་བུ་ལུན་དང་ཁོའི་བུ་རྣམས་ནི་སེ་རེད། ཨེ་ལོན་དང་ཡ་ལིལ།

¹⁵ དེ་ཚོ་ནི་ལེ་ཨས་མེ་སོ་པོ་ཊ་མི་ཡ་རུ་སྐྱེས་པའི་བུ་རྣམས་ཡིན། བུ་མོ་དྷི་ནཱའང་ལེ་ཨ་ལས་སྐྱེས་སོ། ལེ་ཨ་ལས་བྱུང་བའི་ཡ་ཀོབ་ཀྱི་རིགས་བརྒྱུད་ཚོའི་གྲངས་ནི་གསུམ་བཅུ་སོ་གསུམ་ཡིན་ནོ།

¹⁶ གྷཌ་དང་ཁོའི་བུ་རྣམས་ནི་ཛེ་ཕོན། ཧག་གི། ཤུ་ནི། ཨེཛ་བྷོན། ཨེ་རི། ཨ་རོད་དང་ཨ་རེ་ལི།

¹⁷ ཨ་ཤེར་དང་ཁོའི་བུ་རྣམས་ནི་ཨེམ་ནཱ། ཨིཤ་ཝ། ཨིཤ་ཝི། བྷེ་རི་ཡཱ་དང་དེ་ཚོའི་སྲིང་མོ་སེ་རཱ། བྷེ་རི་ཡཱའི་བུ་རྣམས་ནི་ཧེ་བྷེར་དང་མལ་ཀི་ཨེལ་ཡིན་ནོ།

¹⁸ དེ་ཚོ་ནི་ལ་བན་གྱིས་རང་གི་བུ་མོ་ལེ་ཨ་དང་མཉམ་དུ་བཏང་བའི་བྲན་མོ་ཛིལ་པཱ་ལས་བྱུང་བའི་ཡ་ཀོབ་ཀྱི་རིགས་བརྒྱུད་བཅུ་དྲུག་རྣམས་དེ་ཚོ་ཡིན།

¹⁹ ཡ་ཀོབ་ཀྱི་ཆུང་མ་ར་ཧེལ་ལས་བུ་གཉིས་སྐྱེས་པས། དེ་གཉིས་ནི་ཡོ་སེབ་དང་བྷེན་ཡ་མིན་ཡིན་ནོ།

²⁰ ཡོ་སེབ་ལ་ཨི་ཇིབ་དུ་ཧེ་ལི་ཨོ་པོ་ལིསེ་ཡུལ་གྱི་བླ་མ་པོ་ཏི་ཕེ་ར་གྱི་བུ་མོ་ཨ་སི་ནད་ནས་སྐྱེས་པའི་བུ་གཉིས་ནི་མ་ནསེ་སཱེ་དང་ཨེཕ་ར་ཡིམ་ཡིན་ནོ།

²¹ བྷེན་ཡ་མིན་གྱི་བུ་རྣམས་ནི་བེ་ལ། བྷེ་ཀེར། ཨཤ་བྷེལ། གྷེ་ར། ན་མན། ཨེ་ཧི། རོཤེ། མུ་པིམ། ཧུ་པིམ་དང་ཨ་རད།

²² དེ་ཚོ་ནི་ཡ་ཀོབ་ཀྱི་ཆུང་མ་ར་ཧེལ་ལས་བྱུང་བའི་རིགས་བརྒྱུད་བཅུ་བཞི་ཡིན།

²³ དཱན་དང་ཁོའི་བུ་ཧུ་ཤིམ།

²⁴ ནཕ་ཏ་ལི་དང་ཁོའི་བུ་ཡཱ་ཛིལ། གྷུ་ནི། ཡེ་ཛེར་དང་། ཤི་ལེམ།

²⁵ དེ་ཚོ་བདུན་ནི། ལ་བན་གྱི་རང་གི་བུ་མོ་ར་ཧེལ་མཉམ་དུ་བཏང་བའི་བྲན་མོ་བྷིལ་ཧཱ་ལས་སྐྱེས་པའི་ཡ་ཀོབ་ཀྱི་རིགས་བརྒྱུད་རྣམས་ཡིན་ནོ།

²⁶ ཡ་ཀོབ་ཀྱི་བུའི་ཆུང་མ་རྣམས་མ་རྩིས་པས། ཁོང་དང་མཉམ་དུ་ཨི་ཇིབ་དུ་འགྲོ་མཁན་ཁོང་གི་རང་གི་རིགས་བརྒྱུད་རྣམས་བསྡོམས་བཅུ་དྲུག་ཡིན་ནོ།

²⁷ ཨི་ཇིབ་དུ་ཡོ་སེབ་ལ་བུ་གཉིས་བྱུང་བ་དང་། ཡ་ཀོབ་དང་མཉམ་དུ་ཡོང་མཁན་ཚང་མ་བསྡོམས་ནས་བདུན་བཅུ་ཐམ་པ་བྱུང་ངོ་༎

ཡ་ཀོབ་དང་ནང་མི་ཚང་མ་ཨི་ཇིབ་དུ་བསླེབས་པ།

²⁸ གྷོ་ཤེན་དུ་ང་ལ་འཕྲད་པར་ཤོག་ཟེར་གནས་ཚུལ་བཏང་བར་ཡ་ཀོབ་ཀྱིས་རང་གི་སྔོན་དུ་ཡ་ཧུ་དཱ་ལ་ཡོ་སེབ་ཀྱི་རྩར་བཏང་ངོ་། དེ་ཚོ་ཚང་མ་གྷོ་ཤེན་དུ་སླེབས་པའི་རྗེས་སུ།

²⁹ ཡོ་སེབ་རང་གི་ཤིང་རྟ་བཞོན་ནས་ཕ་ཡ་ཀོབ་ལ་འཕྲད་པར་གྷོ་ཤེན་དུ་སོང་ངོ་། ས་གནས་དེར་ཁོང་ལ་མཇལ་ནས་ཡོ་སེབ་ཀྱིས་ཕ་ལ་འཁྱུད་ཅིང་ཡུན་རིང་པོར་ངུས་སོ།

³⁰ ཡ་ཀོབ་ཀྱིས་ཡོ་སེབ་ལ། ད་ངས་ཁྱོད་ཀྱི་ངོ་གདོང་མཐོང་ཐུབ་པ་བྱུང་བ་དང་། ཁྱོད་གསོན་པོ་ཡིན་པ་ངས་ཤེས་བྱུང་། ད་ང་ཞི་བའི་སྒོ་ནས་ཤི་བར་གྲ་སྒྲིག་ཡོད་ཅེས་སྨྲས་སོ།

³¹ དེ་ནས་ཡོ་སེབ་ཀྱིས་རང་གི་སྤུན་རྣམས་དང་ཕ་དང་མཉམ་དུ་ཡོད་པའི་ནང་མི་རྣམས་ལ། ད་ང་སོང་ནས་ངའི་སྤུན་ཐམས་ཅད་དང་ཕ་ཡི་ནང་མི་རྣམས་ཡུལ་ཀ་ནན་ནས་ངའི་རྩར་སླེབས་ཡོད་ཅེས་རྒྱལ་པོ་ལ་སྙན་སེང་ཞུ་དགོས།

³² ཁྱོད་ཚོ་ཚང་མ་ནི་ལུག་རྫི་ཡིན་པ་དང། ལུག་ཕྱུགས་སོགས་ཁྱོད་ཚོས་འཁྲིད་འདུག་ཅེས་ངས་རྒྱལ་པོ་ལ་ཞུ་གི་ཡིན།

³³ རྒྱལ་པོས་ཁྱོད་ཚོར་འབོད་ནས་ཁྱོད་ཚོའི་ལས་འགན་གང་ཡིན་པའི་སྐོར་བཀའ་འདྲི་མཛད་ན།

³⁴ ཁྱོད་ཚོས་མི་ཚེ་གང་ལུག་རྫི་བྱས་པ་དང་། དེ་ལྟར་ཁྱོད་ཚོའི་ཕ་མེས་ཀྱང་དེ་བཞིན་བྱས་པ་ཡིན་ཞེས་ཞུས་ཤིག། དེ་ནས་རྒྱལ་པོས་ཁྱོད་ཚོ་ལ་གྷོ་ཤེན་ལྗོངས་སུ་གནས་པའི་བཀའ་གནང་བར་འགྱུར་ཞེས་སྨྲས་སོ། ཡོ་སེབ་ཀྱིས་དེ་ལྟར་ཁོང་ཚོ་ལ་ལབ་དགོས་པའི་རྒྱུ་མཚན་ནི་ཨི་ཇིབ་པ་ཚང་མས་ལུག་རྫི་པ་རྣམས་ལ་ཞེན་ལོག་བྱེད་ཀྱི་ཡོད་པ་ཡིན་ནོ༎