བཀོད་པ 13 - Tibetan Old Testament 2011

ཨབ་རམ་དང་ལོད་སོ་སོར་འགྲོ་བ།

¹ དེ་ནས་ཨབ་རམ་དང་རང་གི་ཆུང་མ་དང་ཁོ་ལ་ཡོད་པའི་ནོར་ཐམས་ཅད་འཁྱེར་ནས་ལོད་དང་བཅས་པ་ཨི་ཇིབ་ནས་ཀ་ནན་གྱི་ལྷོ་ཕྱོགས་ཁུལ་དུ་སོང་ངོ་།

² ཨབ་རམ་ཧ་ཅང་ཕྱུག་པོ་ཡིན་པ་དང་། ཁོང་ལ་ར་ལུག་དང་། བ་གླང་དང་། གསེར་དངུལ་མང་པོ་ཡོད་པ་ཡིན་ནོ།

³ དེ་ནས་ཁོང་གིས་ས་ཆ་དེ་སྤངས་ཏེ་ས་གནས་སྤོས་བཞིན་ཡུལ་བྷེ་ཐེལ་ཕྱོགས་སུ་སོང་ངོ་། ཁོང་གིས་སྔོན་དུ་རང་གི་གུར་ཕུབ་ནས་བསྡད་པའི་བྷེ་ཐེལ་དང་ཨེ་ཀྱི་ཁྲོད་ཀྱི་ས་གནས་སུ་སླེབས་སོ།

⁴ སྔོན་དུ་ཁོས་མཆོད་ཁྲི་ཞིག་བཟོསཡོད་པ་དང་། དེར་གཙོ་བོ་དཀོན་མཆོག་ལ་མཆོད་པ་ཕུལ་ལོ།

⁵ ལོད་ལའང་ར་ལུག་བ་གླང་སོགས་དང་། རང་གི་ནང་མི་དང་གཡོག་པོ་བཅས་ཡོད་པ་ཡིན་ནོ།

⁶ ཁོང་གཉིས་ཀྱི་ཕྱུགས་ཟོག་གི་ཆད་དུ། རྩ་ཁ་མང་པོ་མེད་པའི་རྐྱེན་མཉམ་དུ་བསྡད་མི་སྲིད་པ་བྱུང་ངོ་། གང་ལ་ཟེར་ན། དེ་ཚོའི་ཕྱུགས་ཟོག་མང་པོ་ཡོད་པ་ཡིན་ནོ།

⁷ དེའི་རྐྱེན་གྱིས་ཨབ་རམ་དང་ལོད་ཀྱི་ཁྱུའི་རྫི་བོ་རྣམས་ཀྱི་བར་ལ་འཁྲུགས་རྩོད་བྱུང་ངོ་། དེ་སྐབས་ཀ་ནན་པ་དང་པེ་རི་ཟི་པ་རྣམས་ཡུལ་དེའི་ནང་གནས་བཞིན་ཡོད་དོ།

⁸ དེ་ནས་ཨབ་རམ་གྱིས་ལོད་ལ་སྨྲས་པ། ང་གཉིས་གཉན་མཚན་ཡིན་པས། ངེད་གཉིས་ཀྱི་མི་རྣམས་དེ་ལྟར་འཁྲུགས་རྩོད་བྱེད་མི་ཉན།

⁹ དེའི་རྐྱེན་ང་ཚོ་སོ་སོར་འགྲོ་བ་ལེགས་པས། ཁྱོད་ཀྱི་འདོད་པ་ལྟར་ས་ཆ་འདམས་ཤིག། ཁྱོད་ཕྱོགས་གཅིག་ཏུ་སོང་ཞིག ང་ཕྱོགས་གཞན་དུ་འགྲོ་རྒྱུ་ཡིན།

¹⁰ ལོད་ཀྱིས་ཕྱོགས་བཞིར་བལྟས་ཏེ་ཆུ་ཤིན་ཏུ་འབོལ་པོ་ཡོད་པའི་ཡོར་དན་ལུང་གཤོང་ནི་ཛོ་ཨར་བར་དུ་ཁྱབ་ཡོད་པ་མཐོང་ངོ་། དེར་གཙོ་བོ་དཀོན་མཆོག་གི་ལྡུམ་ར་ཨི་ཇིབ་ཡུལ་དང་འདྲ་བ་ཡོད་པ་ཡིན་ནོ། ས་གནས་དེ་ནི་གཙོ་བོ་དཀོན་མཆོག་གིས་སོ་དྷོམ་དང་གོ་མོ་ར་མེད་པར་གནང་བའི་སྔོན་གྱི་ལོ་རྒྱུས་ཡིན་ནོ།

¹¹ དེ་ལྟར་ལོད་ཀྱིས་ཡོར་དན་ལུང་གཤོང་ཆ་ཚང་འདམས་ནས་ཤར་ཕྱོགས་སུ་སོང་ངོ་། དེ་ལྟར་གཉན་མཚན་གཉིས་སོ་སོར་གྱེས་སོ།

¹² ཨབ་རམ་ཀ་ནན་ཡུལ་ནང་གནས་པ་དང་། ལོད་ནི་ལུང་གཤོང་གི་གྲོང་ཁྱེར་རྣམས་ཀྱི་ཁྲོད་དུ་སོ་དྷོམ་གྱི་ཉེ་འགྲམ་དུ་གནས་སོ།

¹³ སོ་དྷོམ་གྱི་མི་རྣམས་ངན་པ་ཡིན་པ་དང་གཙོ་བོ་དཀོན་མཆོག་གི་སྤྱན་སྔར་སྡིག་པ་ཚབ་ཆེན་བྱས་སོ༎

ཨབ་རམ་ཧེབ་རོན་དུ་འགྲོ་བ།

¹⁴ ལོད་གྱེས་པའི་རྗེས་སུ་དཀོན་མཆོག་གིས་ཨབ་རམ་ལ་གསུངས་པ། ཁྱོད་ལངས་པའི་ས་གནས་དེ་ནས་ཕྱོགས་བཞིར་ལྟོས་ཤིག

¹⁵ ཁྱོད་ཀྱི་མཐོང་བའི་ས་གཞི་ཐམས་ཅད་ངས་ཁྱོད་དང་ཁྱོད་ཀྱི་བུ་བརྒྱུད་རྣམས་ལ་དུས་གཏན་དུ་ཁྱོད་ལ་བདག་རྒྱུ་ཡིན།

¹⁶ སུ་ཞིག་གིས་ཀྱང་རྩིས་མི་ཐུབ་པའི་བུ་དང་ཚ་བོ་ཁྱོད་ལ་སྤྲོད་རྒྱུ་ཡིན། དེ་ལས་ས་གཞིའི་རྡུལ་རྩིས་བར་ལས་སླ་པོ་ཡོད་འགྲོ།

¹⁷ ད་སོང་ལ་ཡུལ་ཀུན་ཏུ་ལྟོས་ཤིག། གང་ལ་ཞེ་ན། འདི་ཚོ་ཚང་མ་ངས་ཁྱོད་ལ་སྟེར་བར་བྱའོ།

¹⁸ ཨབ་རམ་གྱིས་རང་གི་གུར་སྤོས་ནས་ཧེབ་རོན་དུ་ཡོད་པའི་མམ་རེ་བྱ་བའི་དམ་པའི་ཤིང་རྣམས་ཀྱི་འགྲམ་དུ་གནས་སོ། དེར་ཁོང་གིས་གཙོ་བོ་དཀོན་མཆོག་ལ་མཆོད་ཁྲི་ཞིག་བཟོས་སོ༎