ཨི་ཛི་ཀི་ཨེལ 48 - Tibetan Old Testament 2011

སྡེ་རིགས་ཚོའི་དབར་ས་ཆའི་ཆ་བགོས་བྱེད་པ།

^1-7 བྱང་ཕྱོགས་ཀྱི་ས་མཚམས་ནི་ཤར་ཕྱོགས་མེ་ཌི་ཊ་རེ་ནི་ཡན་རྒྱ་མཚོ་ནས་ཧེད་ལོན་གྱི་གྲོང་ཁྱེར་ནས་ཧ་མདའི་ལ་དང་ཨེ་ནོན་གྱི་གྲོང་ཁྱེར་དང་དྷ་མསེ་ཀསེ་དང་ཧ་མདའི་རྒྱལ་ཁབ་ཀྱི་ས་མཚམས་དབར་ཁྱབ་ཡོད་པ་དང་། སྡེ་རིགས་རེ་རེར་ས་ཆའི་ཆ་ཤས་ཤར་ཕྱོགས་ཀྱི་ས་མཚམས་དང་ནུབ་ཕྱོགས་ནས་མེ་ཌི་ཊ་རེ་ནི་ཡན་རྒྱ་མཚོའི་བར་ཁྱབ་པ་གཤམ་གསལ་གོ་རིམ་ལྟར་བྱང་ནས་ལྷོ་བར་ཐོབ་དགོས་སོ། དཱན ཨ་ཤེར ནཕ་ཏ་ལི མ་ནསེ་སཱེ ཨེཕ་ར་ཡིམ རུ་བྷེན ཡ་ཧུ་དཱ་བཅས་སོ༎

ས་ཆའི་དབུས་ཀྱི་དམིགས་བསལ་གྱི་ཆ་ཤས།

⁸ ས་ཆའི་ཆ་ཤས་རྗེས་མ་དེ་དམིགས་བསལ་གྱི་བེད་སྤྱོད་དུ་ཟུར་འཇོག་བྱེད་དགོས་པ་དང་། དེའི་ཞེང་དུ་བྱང་ནས་ལྷོ་བར་ཀི་ལོ་མི་ཀྲར་བཅུ་གཉིས་དང་ཕྱེད་ཀ་དང་རིང་ཐུང་ཡང་ཤར་ནས་ནུབ་བར་སྡེ་རིགས་ཚོར་སྤྲད་ཡོད་པའི་ཆ་ཤས་དེ་འདྲ་མཚུངས་ཡོད་པ་ལ་མཆོད་ཁང་ཡང་ཆ་ཤས་དེའི་ནང་ཡོད་པར་འགྱུར་རོ།

⁹ ཆ་ཤས་འདིའི་དབུས་སུ་དམིགས་བསལ་གྱི་ས་ཁུལ་རིང་ཐུང་ཀི་ལོ་མི་ཀྲར་བཅུ་གཉིས་དང་ཕྱེད་ཀ་དང་ཞེང་དུ་ཀི་ལོ་མི་ཀྲར་བཅུ་ཡོད་པ་འདི་བཞིན་གཙོ་བོ་དཀོན་མཆོག་ལ་བསྔོའོ།

¹⁰ ས་ཁུལ་དམ་པ་འདིའི་ཆ་ཤས་ཤིག་བླ་མ་ཚོར་ཐོབ་པར་འགྱུར། དེ་ཚོའི་ཆ་ཤས་དེའི་ཐིག་ཚད་ཤར་ནས་ནུབ་བར་ཀི་ལོ་མི་ཀྲར་བཅུ་གཉིས་དང་ཕྱེད་ཀ་དང་། བྱང་ནས་ལྷོ་བར་ཀི་ལོ་མི་ཀྲར་ལྔ་ཡོད་དགོས་སོ། ས་ཁུལ་དེའི་དབུས་སུ་གཙོ་བོ་དཀོན་མཆོག་གི་མཆོད་ཁང་ཡོད་དགོས་སོ།

¹¹ ས་ཁུལ་དམ་པ་འདི་ཛ་དཱོག་གི་བརྒྱུད་པའི་བླ་མ་ཚོའི་ཆེད་དུ་ཡིན་པ་དང་། གཞན་ལེ་ཝིའི་སྡེ་རིགས་ཀྱི་འཐུས་མི་ཚོས་གྱིས་པ་ལྟར་དེ་ཚོས་ཨིསི་རཱཨེལ་པ་གཞན་ཚོ་དང་མཉམ་དུ་ནོར་འཁྲུལ་བྱ་རྒྱུར་མཉམ་བཞུགས་མ་བྱས་པ་དང་། ང་ལ་དམ་ཚིག་གཙང་མའི་ངང་ཞབས་ཕྱི་ཞུ་ཡོད་དོ།

¹² དེར་བརྟེན་དེ་ཚོ་ལ་དམིགས་བསལ་གྱི་ས་ཁུལ་ལེ་ཝི་པ་ཚོར་བདག་པའི་ས་ཁུལ་གྱི་ཉེ་འགྲམ་དུ་ཐོབ་དགོས་པ་དང་། དེ་ནི་ཚང་མའི་ནང་ནས་ཤིན་ཏུ་དམ་པ་དེ་ཡིན་པར་འགྱུར་རོ།

¹³ བླ་མ་ཚོའི་ལྷོ་ཕྱོགས་སུ་ལེ་ཝི་པ་ཚོ་ལ་ཡང་དམིགས་བསལ་གྱི་ས་ཁུལ་ཞིག་ཐོབ་དགོས་པ་དང། དེ་ཡང་ཤར་ནས་ནུབ་ཏུ་ཀྱི་ལོ་མི་ཀྲར་བཅུ་གཉིས་དང་ཕྱེད་ཀ་དང་། བྱང་ནས་ལྷོ་བར་ཀི་ལོ་མི་ཀྲར་ལྔ་དགོས་སོ།

¹⁴ གཙོ་བོ་དཀོན་མཆོག་ལ་བསྔོ་བའི་ས་ཁུལ་དེ་ནི་ས་ཆ་དེ་ཚོའི་ནང་ནས་ལེགས་ཤོས་ཡིན་པ་དང་། དེ་གཞན་ལ་ཚོང་བ་དང་བརྗེ་བ་དང་སྤྲོད་པ་སོགས་གང་ཡང་བྱེད་མི་རུང་། དེ་ནི་དམ་པ་ཡིན་པ་དང་གཙོ་བོ་དཀོན་མཆོག་ལ་བདག་པ་ཡིན་ནོ།

¹⁵ དམིགས་བསལ་གྱི་ས་ཁུལ་གྱི་ཆ་ཤས་ལྷག་འཕྲོས་དེ་རིང་ཐུང་ཀི་ལོ་མི་ཀྲར་བཅུ་གཉིས་དང་ཕྱེད་ཀ་དང་ཞེང་དུ་ཀི་ལོ་མི་ཀྲར་གཉིས་དང་ཕྱེད་ཀ་དེ་ནི་དམ་པ་མ་ཡིན་པ་དང་། དེ་མི་མང་སྤྱིར་སྟངས་ཀྱི་བེད་སྤྱོད་བྱེད་པའི་ཆེད་དུ་ཡིན། དེ་ཚོ་དེར་གནས་སྡོད་བྱས་ནས་ས་ཆ་དེ་བེད་སྤྱོད་བྱེད་ཆོག་གོ དེའི་དབུས་སུ་གྲོང་ཁྱེར་དགོས་པ་དང་།

¹⁶ དེ་ནི་གྲུ་བཞི་ཡིན་པ་ལ་ཕྱོགས་རེ་རེར་ཐིག་ཚད་མི་ཀྲར་ ༢༢༥༠ ཡོད་དགོས་སོ།

¹⁷ གྲོང་ཁྱེར་གྱི་མཐའ་འཁོར་ཡོངས་སུ་ཕྱོགས་རེར་ས་སྟོང་དགོས་པ་དང་ཐད་ཀར་མི་ཀྲར་ ༡༢༥ ཡོད་པར་འགྱུར།

¹⁸ དམ་པའི་ས་ཁུལ་གྱི་ལྷོ་ཕྱོགས་སུ་གྲོང་ཁྱེར་བཟོས་པའི་རྗེས་སུ་ལྷག་པའི་ས་ཆ་ནི་ཤར་དུ་རིང་ཐུང་ཀི་ལོ་མི་ཀྲར་ལྔ་དང་ཞེང་དུ་ཀི་ལོ་མི་ཀྲར་གཉིས་དང་ཕྱེད་ཀ་དང་། ནུབ་ཏུ་རིང་ཐུང་ཀི་ལོ་མི་ཀྲར་ལྔ་དང་ཞེང་དུ་ཀི་ལོ་མི་ཀྲར་གཉིས་དང་ཕྱེད་ཀ་ཡོད་པ་དེ་གྲོང་ཁྱེར་ནང་གནས་སྡོད་བྱ་མཁན་མི་ཚོས་ས་ཞིང་འདེབས་ཀྱི་ཕྱིར་བེད་སྤྱོད་བྱེད་དགོས་སོ།

¹⁹ གྲོང་ཁྱེར་དེའི་ནང་སྡོད་མཁན་སྡེ་རིགས་ཇི་འདྲ་ཞིག་ནས་ཡོང་བ་ཡིན་ན་ཡང་ས་ཆ་དེར་ས་ཞིང་འདེབས་ཆོག་གོ

²⁰ དེར་བརྟེན་ཟུར་འཇོག་བྱས་པའི་ས་ཆ་གྲུ་བཞི་དབུས་ཀྱི་ས་ཁུལ་གྱི་རྒྱ་ཁྱོན་དེ་བཞིན་ཕྱོགས་རེར་ཀི་ལོ་མི་ཀྲར་བཅུ་གཉིས་དང་ཕྱེད་ཀ་ཡོད་པ་དང་། ཁྱོན་དེའི་ནང་གྲོང་ཁྱེར་ཆགས་པའི་ས་ཁུལ་ཡང་ཚུད་ཡོད་དོ།

^21-22 མཆོད་ཁང་དང་བླ་མ་ཚོའི་ས་ཆ་དང་ལེ་ཝི་པའི་ས་ཆ་དང་གྲོང་ཁྱེར་བཅས་ཡོད་པའི་ཤར་དང་ནུབ་ཀྱི་ས་ཁུལ་ནས་དེ་ཁྲོད་རྒྱལ་སྲིད་སྐྱོངས་མཁན་རྒྱལ་སྲས་ལ་བདག་པ་ཡིན་ནོ། དེ་ཤར་ཕྱོགས་སུ་ཤར་གྱི་ས་མཚམས་དང་། ནུབ་ཏུ་མེ་ཌི་ཊ་རེ་ནི་ཡན་རྒྱ་མཚོའི་བར་ཁྱབ་ཡོད་པ་དང་། བྱང་དུ་ཡ་ཧུ་དཱ་ལ་བདག་པའི་ཆ་ཤས་དང་ལྷོར་བྷེན་ཡ་མིན་ལ་བདག་པའི་ཆ་ཤས་ཀྱི་བསྐོར་ནས་ཡོད་དོ༎

སྡེ་རིགས་གཞན་ཚོའི་ཆེད་དུ་ས་ཆ།

^23-27 དམིགས་བསལ་གྱི་ཆ་ཤས་འདི་ལྷོ་རུ་སྡེ་རིགས་ལྷག་འཕྲོས་ཚོར་ས་ཆའི་ཆ་ཤས་ཤིག་ཤར་ཕྱོགས་ཀྱི་ས་མཚམས་ནས། ནུབ་ཏུ་མེ་ཌི་ཊ་རེ་ནི་ཡན་རྒྱ་མཚོའི་བར་དང་བྱང་ནས་ལྷོ་བར་གཤམ་གསལ་གོ་རིམ་ལྟར་ཐོབ་དགོས་པ་དང་། བྷེན་ཡ་མིན སིམ་ཨོན ཨི་ས་ཀར ཛེ་བུ་ལུན གྷཌ་བཅས་སོ།

²⁸ ལྷོ་ཕྱོགས་སུ་གྷཌ་ཀྱི་སྡེ་རིགས་ལ་སྤྲད་པའི་ཆ་ཤས་ཀྱི་ས་མཚམས་ནི། ལྷོ་ནུབ་ཏུ་ཏ་མཱར་ནས་ཀ་དྷེཤི་ཀྱི་བྱེ་ཐང་ཤིང་ཚལ་དང་། དེ་ནས་བྱང་ནུབ་ཏུ་ཨི་ཇིབ་པའི་ས་མཚམས་ནས་མེ་ཌི་ཊ་རེ་ནི་ཡན་གྱི་རྒྱ་མཚོའི་བར་ཁྱབ་ཡོད་པ་དང་།

²⁹ བླ་ན་མེད་པའི་གཙོ་བོ་དཀོན་མཆོག་གིས། དེ་ལྟར་ཨིསི་རཱཨེལ་གྱི་སྡེ་རིགས་ཚོར་བདག་པར་ས་ཆ་དེ་ཆ་ཤས་ཁག་ཏུ་བགོས་དགོས་སོ་ཅེས་བཀའ་གནང་ངོ་༎

ཡེ་རུ་ཤ་ལེམ་གྱི་རྒྱལ་སྒོ་ཁག།

^30-34 ཡེ་རུ་ཤ་ལེམ་གྱི་གྲོང་ཁྱེར་ནང་དུ་འཛུལ་སྒོ་བཅུ་གཉིས་ཡོད་པ་དང་། རྩིག་པ་བཞི་ཡོད་པ་རེ་རེར་ཐིག་ཚད་མི་ཀྲར་ ༢,༢༥༠ ཡོད་པ་དང་། དེར་སྒོ་གསུམ་རེ་ཡོད་པ་དང་། རེ་རེ་བཞིན་སྡེ་རིགས་ཚོའི་མིང་གི་བཏགས་ཡོད་པ་དང་། བྱང་གི་རྩིག་པའི་རྒྱལ་སྒོ་ཁག་ནི་རུ་བྷེན་དང་ཡ་ཧུ་དཱ་དང་ལེ་ཝི་མིང་གི་བཏགས་ཡོད་པ་དང་། ཤར་གྱི་རྩིག་པ་ཡོད་པ་ནི་ཡོ་སེབ་དང་བྷེན་ཡ་མིན་དང་དཱན་གྱི་མིང་གི་བཏགས་ཡོད་པ་དང་། ལྷོའི་རྩིག་པར་ཡོད་པ་ཚོ་ནི་སིམ་ཨོན་དང་ཨི་ས་ཀར་དང་ཛེ་བུ་ལུན་གྱི་མིང་གི་བཏགས་ཡོད་པ་དང་། ནུབ་ཀྱི་རྩིག་པར་ཡོད་པ་ཚོ་ནི་གྷཌ་དང་ཨ་ཤེར་དང་ནཕ་ཏ་ལིའི་མིང་གི་བཏགས་ཡོད་དོ།

³⁵ གྲོང་ཁྱེར་གྱི་ཕྱོགས་བཞིའི་རྩིག་པ་ཚང་མའི་རིང་ཐུང་བསྡོམས་མི་ཀྲར་ ༩,༠༠༠ ཡོད་པ་དང་། ད་ནས་བཟུང་གྲོང་ཁྱེར་དེའི་མིང་ལ་གཙོ་བོ་དཀོན་མཆོག་འདིར་བཞུགས་ཡོད་ཅེས་གྲགས་པར་འགྱུར་རོ༎