ཨེསེ་ཐར 8 - Tibetan Old Testament 2011

ཡ་ཧུ་ད་པ་ཚོས་གཞན་ལ་འཐབ་རྒོལ་བྱེད་ཆོག་པའི་དབང་ཆ་ཐོབ་པ།

¹ ཉིན་མོ་དེ་རང་ལ་རྒྱལ་པོ་ཨ་ཧ་སུ་རསེ་ཀྱིས་ཡ་ཧ་ད་པ་རྣམས་ཀྱི་དགྲ་བོ་ཧ་མན་གྱི་རྒྱུ་དངོས་ཚང་མ་བཙུན་མོ་ཨེསི་ཐར་ལ་གནང་ངོ། དེ་རྗེས་ཨེསི་ཐར་གྱིས་མོར་དོ་ཀཡེ་ནི་མོའི་གཉེན་མཚན་ཡིན་པའི་སྐོར་རྒྱལ་པོ་ལ་ཞུས་པས། ཉིན་དེ་ནས་བཟུང་མོར་དོ་ཀཡེ་རྒྱལ་པོའི་དྲུང་དུ་བཅར་ཆོག་པ་ཡིན་ནོ།

² དེ་ནས་རྒྱལ་པོས་ཧ་མན་ནས་ཕྱིར་སློག་བླངས་པའི་ཉིད་ཀྱི་ཐམ་ག་བརྒྱབ་པའི་སོར་གདུབ་དེ་ཕྱག་ནས་ཕུད་དེ། མོར་དོ་ཀཡེ་ལ་གནང་ངོ་། ཨེསི་ཐར་གྱིས་མོར་དོ་ཀཡེ་ལ་ཧ་མན་གྱི་རྒྱུ་དངོས་ཚང་མའི་དོ་དམ་པར་བསྐོས་སོ།

³ དེ་རྗེས་ཨེསི་ཐར་གྱིས་སླར་ཡང་རྒྱལ་པོའི་ཞབས་ལ་དབུ་བཏུད་དེ། སྤྱན་ཆབ་བསིལ་བཞིན་དུ། ཨ་གག་རིགས་བརྒྱུད་ལས་ཡིན་པ་ཧ་མན་གྱིས་ཡ་ཧུ་ད་པ་རྣམས་ལ་གནོད་འཚེ་བྱེད་ཕྱིར་བཤམས་པའི་བྱུས་ངན་དེ་འགོག་ཐབས་ཡོན་བ་ཞིག་མཛད་དུ་གསོལ་ཞེས་ཞུ་འབུལ་བྱས་པ་དང།

⁴ རྒྱལ་པོས་ཨེསི་ཐར་གྱི་ཕྱོགས་གསེར་གྱི་ཕྱག་བེར་དེ་བཏེགས་པས། ཁོང་རྒྱལ་པོའི་དྲུང་དུ་ཡར་བཞེངས་ནས།

⁵ གལ་ཏེ་རྒྱལ་པོས་ཁོ་མོར་ཐུགས་དགྱེས་ཤིང་རྒྱལ་པོའི་གཟིགས་པ་རྙེད་དེ། ཁོ་མོའི་ཞུ་འབོད་དེ་རྒྱལ་པོའི་གཟིགས་ངོར་འོས་པ་ཞིག་དགོངས་ན་། ཨ་གག་རིགས་བརྒྱུད་པ་ཧ་མེ་དྷ་ཐའི་བུ་ཧ་མན་གྱིས་རྒྱལ་ཁམས་ཀུན་ཏུ་ཡོད་པའི་ཡ་ཧུ་ད་པ་ཚང་མ་མེད་པར་བཟོ་ཕྱིར་ཁྱབ་བསྒྲགས་བྱས་པའི་བཀའ་དེ་བརྩི་མེད་བཟོས་ཕྱིར། སྐུ་ཉིད་ནས་བཀའ་ཤོག་གཅིག་འབྲི་བར་མཛོད།

⁶ ཁོ་མོའི་མི་བརྒྱུད་ལ་གནོད་སྐྱོན་འདི་ལྟབུ་ཞིག་བྱུང་སྟེ། ཁོ་མོའི་གཉེན་མཚན་རྣམས་ཤི་དགོས་པ་བྱུང་ན། ངས་དེ་ལ་ཇི་ལྟར་བལྟ་ཞིང་བཟོད་པར་ནུས་ཞེས་ཞུས་པ་དང།

⁷ རྒྱལ་པོ་ཨ་ཧ་སུ་རསེ་ཀྱིས་བཙུན་མོ་ཨེསི་ཐར་དང་ཡ་ཧུ་ད་པ་མོར་དོ་ཀཡེ་གཉིས་ལ་བཀའ་བསྒོ་བ། ལྟོས་ཤིག། ཧ་མན་གྱིས་ཡ་ཧུ་ད་པ་རྣམས་ལ་བྱུས་ངན་བཤམས་པའི་ཉེས་ལན་དུ། ངས་ཁོ་ལ་འཕྱར་ཤིང་ལ་བརྐྱངས་པ་ཡིན། དེ་ཙམ་མ་ཟད་ཁོའི་རྒྱུ་དངོས་ཚང་མ་ངས་ཨེསི་ཐར་ལ་སྟེར་བ་ཡིན།

⁸ འོན་ཀྱང་རྒྱལ་པོའི་མིང་ཐོག་ཏུ་བྲིས་པའི་བཀའ་ཤོག་དེའི་ཁར། རྒྱལ་པོའི་སོར་གདུབ་ཀྱི་ཐམ་ག་བརྒྱབ་ཟིན་པ་དེ་ནི། མི་སུས་ཀྱང་བསྒྱུར་ཟློག་བྱེད་མི་ཐུབ། དེ་བས་ཡ་ཧུ་ད་པ་རྣམས་ལ་ཁྱོད་ཚོའི་འདོད་མོས་ལྟར་གྱི་དོན་གནད་གཞན་ཞིག་ངའི་མིང་ཐོག་ཏུ་བྲིས་ཏེ། དེར་ངའི་སོར་གདུབ་ཀྱི་ཐམ་ག་བརྒྱབ་ནས་གཏོང་ཞིག

⁹ ཡང་གནས་ཚུལ་དེ་ནི་སི་ཝན་ཞེས་པའི་ཟླ་བ་གསུམ་པའི་ཚེས་ཉེར་གསུམ་གྱི་ཉིན་བྱུང་ཞིང། མོར་དོ་ཀཡེས་རྒྱལ་པོའི་དྲུང་ཡིག་རྣམས་བོས་ཏེ། རྒྱ་གར་ནས་ཨི་ཐི་ཨོ་པི་ཡ་བར་མངའ་སྡེ་ ༡༢༧ ཁག་ཏུ་ཡོད་པའི་ཡ་ཧུ་དཱ་པ་རྣམས་དང། སྲིད་ཚབ་རྣམས་དང། དེ་བཞིན་གཞུང་ཞབས་དང་ལས་བྱེད་པ་ཁག་ལ། མངའ་སྡེ་སོ་སོའི་སྐད་ཡིག་དང་འབྲི་སྲོལ་བཞིན་དུ་ཡི་གེ་འབྲི་རུ་བཅུག་ཅིང།

¹⁰ ཡང་ཡི་གེ་དེ་དག་ནི་རྒྱལ་པོའི་མཚན་ཐོག་ཏུ་བྲིས་ཏེ། རྒྱལ་པོའི་སོར་གདུབ་ཀྱི་ཐམ་ག་བརྒྱབ་ནས། རྒྱལ་པོའི་ཆིབས་ར་ནས་བང་ཆེ་བའི་རྟ་པ་རྣམས་བརྒྱུད་དེ་ཡུལ་སོ་སོར་བཏང་ངོ།

¹¹ བཀའ་ཤོག་དེ་དག་གི་ནང་དུ། རྒྱལ་པོའི་གྲོང་ཁྱེར་ཀུན་ཏུ་གནས་པའི་ཡ་ཧུ་ད་པ་རྣམས་ལ། རང་རང་སོ་སོའི་སྲུང་སྐྱོབ་ཀྱི་ལས་འགུལ་བྱེད་ཆོག་པའི་བཀའ་བྲིས་ཡོད་པ་དང། དེ་ཙམ་མ་ཟད་མངའ་སྡེ་གང་རུང་དུ་ཁོ་ཚོར་མི་རིགས་སུ་འདྲ་ཞིག་གིས་ཀྱང་དམག་འཐབ་པ་ཡིན་ན། དེར་ཁོ་ཚོས་ཕར་རྒོལ་བྱེད་དེ། དགྲ་བོའི་སྐྱེ་དམན་བུ་ཕྲུག་དང་བཅས་པ་ཚར་གཅོད་བྱདེ་ཅིང། དེ་ཚོའི་མི་མཐའ་མར་མ་ཐུག་བར་དུ་སྡེབ་གསོད་བཏང་སྟེ། དེ་ཚོའི་རྒྱུ་དངོས་ཚང་མ་འཕྲོག་བཅོམ་བྱེད་ཆོག་ཅེས་གསལ་ཡོད་པ་ཡིན་ནོ།

¹² ཡང་བཀའ་རྒྱ་དེ་ནི། སྔར་ཡ་ཧུ་ད་པ་རྣམས་ལ་སྡེབ་གསོད་གཏོང་རྒྱུའི་གཏན་འབེབས་བྱས་པའི་ཉིན་ཞག་གམ། ཨ་དྷར་ཞེས་པའི་ཟླ་བ་བཅུ་གཉིས་པའི་ཆེས་བཅུ་གསུམ་གྱི་ཉིན་མོ་ནས་བཟུང་སྟེ། པར་ཤི་ཡའི་རྒྱལ་ཁམས་ཀུན་ཏུ་ལག་ལེན་བསྟར་རྒྱུར་ངེས་པ་ཡིན་ནོ།

¹³ ཡ་ཧུ་ད་པ་རྣམས་ཀྱིས་རང་གི་དགྲ་ཤ་ལེན་ཕྱིར་གྲ་སྒྲིགས་བྱས་ནས་བསྡད་པའི་ཆེད་དུ། མངའ་སྡེ་རེ་རེའི་ནང་བཀའ་རྒྱ་དེབཞིན་ཡུལ་ཁྲིམས་ཀྱི་ཚུལ་དུ་མི་རེ་རེར་ཁྱབ་བསྒྲགས་བྱེད་རྒྱུར་ཐག་གཅོད་བྱས་ཏེ།

¹⁴ རྒྱལ་པོའི་བཀའ་བསྒོས་བཞིན་བང་མགྱོགས་ཆེ་བའི་རྟ་པ་རྣམས་ཕྱིན་ཏེ། བཀའ་རྒྱ་དེ་བཞིན་རྒྱལ་ས་སུ་ས་རུའང་ཁྱབ་བསྒྲགས་བྱས་སོ།

¹⁵ དེར་མོར་དོ་ཀཡེས་ལུས་ལ་རས་ཀ་ཤི་ཀ་ལས་བཟོས་པའི་རྒྱལ་པོའི་ན་བཟའ་ཚོས་གཞི་སྔོན་པོ་དང་དཀར་པོ་དང་དེའི་ཁར་སྟོད་གོས་མུ་མན་བྱས་པ་ཞིག་གྱོན་ཏེ། དེ་བཞིན་མགོ་ལ་གསེར་གྱི་ཅོད་པན་རྒྱས་སྤྲོས་ལྡན་པ་ཞིག་གྱོན་ནས་ཕོ་བྲང་ནས་ཕྱིར་ཐོན་པ་དང། རྒྱ་ས་སུ་སའི་གཞུང་ལམ་ཁུལ་དུ་དགའ་མགུའི་སྐད་དབྱངས་ཆེན་པོས་གང་ངོ།

¹⁶ གང་ལ་ཟེར་ན་། ཡ་ཧུ་དཱ་པའི་མི་བརྒྱུད་རྣམས་ཀྱི་དཀྱིལ་དུ་བདེ་སྐྱིད་དང་དགའ་ཚོར་ཆེན་པོ་བྱུང་བ་དང་། རྒྱལ་ཁ་ཐོབ་པ་ལྟ་བུའི་དགའ་སྣང་ཆེན་པོ་ཞིག་བྱུང་ངོ།

¹⁷ རྒྱལ་པོའི་བཀའ་ཤོག་སྒྲོག་སྦྱང་བྱས་པའི་གྲོང་ཁྱེར་དང་མངའ་སྡེ་རེ་རེར་ཡ་ཧུ་དཱ་པ་ཚོས་དགའ་སྟོན་ཆེན་པོའི་མགྲོན་ཞིག་བཤམས་ཏེ། ཉིན་དེ་ལ་ཚང་མས་གུང་སངས་བཏང་བ་དང་། མི་མང་པོ་ཡ་ཧུ་དཱ་པ་རྣམས་ལ་ཞེད་ནས་ཁོ་ཚོའང་ཡ་ཧུ་ད་པའི་ལུགས་སུ་བཞུགས་སོ༎