ཨེསེ་ཐར 4 - Tibetan Old Testament 2011

མོར་དོ་ཀཡེས་ཨེསི་ཐར་ལ་སྐྱབས་གྲོགས་ཞུས་པ་།

¹ མོར་དོ་ཀཡེས་གནས་ཚུལ་དེ་ཐམས་ཅད་ཤེས་ནས་མྱ་ངན་དྲག་པོས་རང་གི་གྱོན་གོས་ཧྲལ་ཏེ། རྩ་རས་ཀྱི་གོས་གྱོན་ཞིང། མགོ་ལ་གོག་ཐལ་བྱུགས་ནས་གྲོང་ཁྱེར་གྱི་གཞུང་ལམ་བརྒྱུད་དེ། སྐད་ཤུགས་ཆེན་པོས་སྨྲེ་ངག་འདོན་ནོ།

² ཕོ་བྲང་གི་གཞུང་སྒོ་བར་དུ་སླེབས་དུས། ཁོང་ནང་དུ་མ་འཛུལ་ལོ། གང་ལ་ཟེར་ན། རྩ་རས་ཀྱི་གོས་གྱོན་པ་སུའང་ཕོ་བྲང་གི་ནང་དུ་འཛུལ་མི་ཆོག་པ་ཡིན་ནོ།

³ རྒྱལ་པོའི་བཀའ་རྒྱ་བསླེབས་པའི་མངའ་སྡེ་ཁག་ཏུ། ཡ་ཧུ་ད་པ་རྣམས་ཀྱི་ཁྲོད་དུ་ངུ་འབོད་དང་སྨྲེ་ངག་ཤུགས་ཆེ་འདོན་པ་དང། སྨྱུང་གནས་སྲུངཞིང། དེ་ཚོ་མང་ཆེ་བས་ལུས་ལ་རྩ་་རས་གྱོན་ཏེ། གོག་ཐལ་ནང་དུ་ཉལ་ནས་བསྡད་དོ།

⁴ དེ་ནས་ཨེསི་ཐར་གྱི་ཞལ་ཏ་མ་རྣམས་དང་ཉུག་རུམ་པ་ཚོས་ཁོང་ལ་མོར་དོ་ཀཡེས་གང་བྱེད་བཞིན་པའི་སྐོར་ལ་ཞུས་པས། དེར་བཙུན་མོ་ཤིན་ཏུ་ཐུགས་འཁྲུགས་ཤིང། མོར་དོ་ཀཡེ་ལ་རྩ་རས་ཀྱི་གོས་ཕུད་དེ་གྱོན་པའི་ཕྱིར་གྱོན་གོས་གཞན་ཞིག་བཏང་རུང། འོན་ཀྱང་ཁོས་གྱོན་གོས་དེ་མ་བླལས་སོ།

⁵ དེ་ནས་བཙུན་མོའི་ཞབས་ཕྱི་ཞུ་ཕྱིར་ཕོ་བྲང་ནས་ཆེད་བསྐོས་བྱས་པའི་ཉུག་རུམ་པ་ཚོའི་ནང་ནས་ཧ་ཐག་ཟེར་བས་དེ་ལ་བཙུན་མོས་འབོས་ནས། གནས་ཚུལ་གང་བྱུང་མིན་དང་ག་རེའི་དོན་དུ་དེ་ལྟར་བྱུང་བའི་སྐོར་མོར་དོ་ཀཡེ་ལ་འདྲི་རྩད་བྱེད་དགོས་ཅེས་བཀའ་བསྒོས་གནང་ངོ་།

⁶ ཧ་ཐག་ཕོ་བྲང་གི་གཞུང་སྒོའི་མདུན་དུ་ཡོད་པའི་ཁྱམས་རའི་ནང་མོར་དོ་ཀཡེའི་རྩར་ཕྱིན་ནོ།

⁷ མོར་དོ་ཀཡེས་ཧ་ཐག་ལ་རང་ཉིད་ཐོག་ཏུ་གནས་ཚུལ་གང་བྱུང་བའི་སྐོར་དང། གལ་ཏེ་ཡ་ཧུ་ད་པ་རྣམས་རྩ་མེད་དུ་བཏང་བ་ཡིན་ན་། ཧ་མན་གྱིས་རྒྱལ་པོའི་བང་མཛོད་ནང་དངུལ་འབོར་ག་ཚོད་འབུལ་རྒྱུའི་ཁས་ལེན་བྱས་པའི་སྐོར་ལ་ཆ་ཚང་བཤད་དོ།

⁸ ཡང་ཁོས་ཧ་ཐག་ལ་སུ་ས་རུ་ཁྱབ་བསྒྲགས་བྱས་པའི་བཀའ་རྒྱའི་ངོ་ཤུས་ཤིག་ཀྱང་སྤྲད་པ་དང། ཡང་བཀའ་རྒྱ་དེའི་ནང་ཡ་ཧུ་ད་པ་རྣམས་རྩ་མེད་གཏོང་དགོས་ཅེས་གསལ་ཡོད་པ་དང། མོར་དོ་ཀཡེས་ཁོ་ལ་བརྗོད་པ་། བཀའ་རྒྱ་དེ་འཁྱེར་ནས་ཨེསི་ཐར་ལ་འབུལ་ནས། བཙུན་མོ་ལ་གནས་སྟངས་དེངི་སྐོར་ཞིབ་པར་གསལ་བཤད་ཞུས་ཤིག བཙུན་མོས་རྒྱལ་པོའི་དྲུང་དུ་བཅར་ནས་སོ་སོའི་མི་རིགས་རྣམས་ལ་སྲུང་སྐྱབས་བྱེད་ཕྱིར་ནན་ཏན་ཆེན་པོས་ཞུ་འབུལ་གནང་དགོས་ཅེས་ཁྱོད་ཀྱིས་ཞུ་དགོས།

⁹ དེ་ནས་ཧ་ཐག་གིས་དེ་བཞིན་བྱས་པས།

¹⁰ ཡང་ཨེསི་ཐར་གྱིས་ཁོ་ལ་མོར་དོ་ཀཡེ་རྩར་ལོན་ཞིག་བསྐྱེལ་བར་བཏང་བ་ནི་འདི་ལྟ་སྟེ།

¹¹ ཕོ་མོ་སུ་འདྲ་ཞིག་ཡིན་རུང་རྒྱལ་པོའི་བཀའ་མེད་པར་ཚོམས་སྐོར་ནང་མར་ཕྱིན་ནས་རྒྱལ་པོ་བཇལ་བ་ཡིན་ན། དེ་ནི་ངེས་པར་ཤི་དགོས་པ་ཡིན་ནོ། དེ་ནི་ཁྲིམས་ཡིན་ནོ། མཐོ་བ་རྒྱལ་པོའི་གྲོས་དཔོན་ནས་བཟུང་དམའ་བ་མངའ་སྡེ་ཁག་གི་ཡུལ་མི་ཕལ་པ་ཚང་མས་ཤེས་གསལ་ཡིན་པ་དང། ཁྲིམས་དེ་ལས་ཐར་བར་ཐབ་ལམ་གཅིག་རང་ཡོད། གལ་ཏེ་རྒྱལ་པོས་གསེར་གྱི་ཕྱག་བེར་དེ་མི་དེ་ཕྱོགས་སུ་འདེགས་པ་ཡིན་ན་མི་དེ་གསོན་པོར་གནས་ཐུབ་པར་འགྱུར། འོན་ཀྱང་རྒྱལ་པོས་ང་ལ་རྒྱལ་པོའི་དྲུང་དུ་མ་བོས་པར་ཉིན་ཞག་སུམ་ཅུ་སོང་ངོ་།

¹² མོར་དོ་ཀཡེས་ཨེསི་ཐར་གྱིས་བཏང་བའི་ལོན་དེ་འབྱོར་བ་དང།

¹³ ཁོས། ཁྱེད་རང་རྒྱལ་པོའི་ཕོ་བྲང་དུ་ཡོད་པའི་རྐྱེན་གྱིས། ཡ་ཧུ་ད་པ་གཞན་ལས་ཉེན་ཁ་ཆུང་བ་ཡོད་ཅེས་མ་སེམས་ཤིག

¹⁴ དུས་ཚོད་འདིའ་ལྟ་བུ་ཞིག་ལ་ཁྱེད་རང་ཁ་རོགས་བསྡད་པ་ཡིན་ན། ཡ་ཧུ་ད་པ་རྣམས་ལ་མཐོ་རིས་ནས་སྐྱབས་གྲོགས་མཛད་ཅིང་དེ་དག་ཐར་བར་འགྱུར་སྲིད། འོན་ཀྱང་ཁྱོདཤི་ངེས་ཤིང་ཁྱོད་ཀྱི་ཕ་བརྒྱུད་ཀྱང་སྟོངས་བར་འགྱུར། གཅིག་བྱས་ན་དུས་ཚོད་འདི་ལྟ་བུའི་ཕྱིར་ཁྱེད་རང་བཙུན་མོའི་གོ་གནས་སུ་འཁོད་པ་ཡིན་པར་སུས་ཤེས་སའམ་ཞེས་ཟོན་བརྡ་བསྐུལ་བའི་ལོན་ཞིག་བཏང་ངོ།

¹⁵ དེའི་ལན་དུ་ཨེསི་ཐར་གྱིས་མོར་དོ་ཀཡེ་ལ།

¹⁶ ད་ཁྱོད་ཕྱིན་ནས་སུ་ས་རུ་ཡོད་པའི་ཡ་ཧུ་ད་པ་ཚང་མ་ཕྱོགས་གཅིག་ཏུ་བཀོང་ནས་དེ་དག་ལ། སྨྱུང་གནས་སྲུང་སྟེ་ངའི་དོན་དུ་སྨོན་ལམ་འདེབས་དགོས་པ་དང། ཉིན་མཚན་གསུམ་གྱི་རིང་ལ་བཟའ་བཏུང་སོགས་གང་ཡང་མ་བྱས་པར་སྨྱུང་གནས་སྲུང་དགོས་ཅེས་སྨྲོས་ཤིག ཡང་ང་དང་ངའི་ཞལ་ཏ་མ་ཚོས་ཀྱང་དེ་བཞིན་བྱེད་རྒྱུ་ཡིན། དེ་རྗེས་ཡུལ་ཁྲིམས་དང་འགལ་རུང། ང་རྒྱལ་པོའི་དྲུང་དུ་ངེས་པར་བཅར་གྱི་ཡིན། དེ་ལྟར་བྱས་པའི་རྐྱེན་གྱིས་ང་ཤི་དགོས་བྱུང་ནའང་ང་ལ་འགྱོད་པ་གང་ཡང་མེད་ཅེས་སྨྲས་སོ།

¹⁷ དེ་ནས་མོར་དོ་ཀཡེ་ཕྱིན་ནས་ཨེསི་ཐར་གྱིས་སྨྲས་པ་བཞིན་ཐམས་ཅད་བསྒྲུབས་སོ༎