ཨེསེ་ཐར 3 - Tibetan Old Testament 2011

ཧ་མན་གྱིས་ཡ་ཧུ་ད་པ་རྣམས་རྩ་མེད་བཟོ་རྒྱུ་བྱུས་ངན་བརྩམས་པ་།

¹ ནམ་ཞིག་རྗེས་སུ་རྒྱལ་པོ་ཨ་ཧ་སུ་རསེ་ཀྱིས་ཧ་མན་ཞེས་པའི་མི་ཞིག་ལ་གོ་གནས་སྤར་ནས་སྲིད་བློན་གྱི་གོ་སར་བཀོད་ཅིང། ཧ་མན་ནི་ཨ་གྷག་གི་རིགས་བརྒྱུད་ལས་ཡིན་པ་ཧམ་མེ་དྷ་ཐའི་བུ་ཡིན་ནོ།

² སྐབས་དེར་རྒྱལ་པོས་རང་གི་ལས་བྱེད་པ་ཚང་མར། ཧ་མན་ལ་མགོ་བོ་བཏུད་དེ་ཕྱག་འཚལ་ཞིང་གུས་བཏུད་ཞུ་དགོས་ཅེས་བཀའ་གནང་བ་བཞིན། མོར་དོ་ཀཡེ་མ་གཏོགས་གཞན་ཚང་མས་རྒྱལ་པོའི་བཀའ་དེར་རྩིས་སྲུང་ཞུས་སོ།

³ རྒྱལ་པོའི་ལས་བྱེད་པ་གཞན་ཚོས་ཁོ་ལ། ཁྱོད་རྒྱལ་པོའི་བཀའ་ལ་རྩི་སྲུང་མ་ཞུས་པ་དེ་གང་ཡིན་ནམ་ཞེས་བརྗོད་དེ།

⁴ ཉིན་ལྟར་རེ་བཞིན་ཁོ་ལ་ནན་བསྐུལ་བྱས་རུང། ཁོས་དེ་ཚོར་མ་ཉན་ནོ། ཁོས། ང་ནི་ཡ་ཧུ་ད་པ་ཞིག་ཡིན་པས། ཧ་མན་ལ་ཕྱག་འཚལ་བར་མི་རུང་ངོ་ཞེས་སྨྲས་པ་དང། ཁོ་ཚོས་དེའི་སྐོར་ཧ་མན་ལ་བཤད་དེ། ཁོས་མོར་དོ་ཀཡེའི་སྤྱོད་ཚུལ་དེ་འདྲར་བཟོད་སྲན་བྱེད་ཐུབ་མིན་རྟོགས་ཞིབ་བྱས་སོ།

⁵ ཧ་མན་ལ་མོར་དོ་ཀཡེས་ཕྱག་འཚལ་ཏེ་གུས་བཏུད་ཞུ་གི་མེད་པའི་སྐོར་ལ་ཐོས་ནས་ཁོ་ཧ་ཅང་ཁྲོས་སོ།

⁶ མོར་དོ་ཀཡེ་ཡ་ཧུ་ད་པ་ཞིག་ཡིན་པའི་སྐོར་ཐོས་ནས། མོར་དོ་ཀཡེ་ལ་ཉེས་ཆད་བཏང་བ་ལས་ལྷག་པ་ཞིག་བྱེད་དགོས་འདུག་ཅེས་ཐག་གཅོད་བྱས་ཏེ། པར་སི་ཡའི་རྒྱལ་ཁམས་ཀུན་ཏུ་གནས་པའི་ཡ་ཧུ་ད་པ་ཐམས་ཅད་གསོད་རྒྱུའི་འཆར་གཞི་ངན་པ་ཞིག་བརྩམས་སོ།

⁷ རྒྱལ་པོ་ཨ་ཧ་སུ་རསེ་ཀྱི་རྒྱལ་སྲིད་སྐྱོང་ལོ་བཅུ་གཉིས་པའི་ནི་སན་ཞེས་པའི་ཟླ་བ་དང་པོར་རང་གི་བརྩམས་པའི་ཐབས་བྱུས་དེ་བཞིན་ཟླ་དུས་ཚེ་གྲངས་གང་གི་ཐོག་ཏུ་ལག་ལེན་བསྟར་ན་རིགས་སམ་ཞེས་བརྟག་དཔྱད་བྱེད་དགོས་ཤེས་ཧ་མན་གྱིས་པུ་རིམ་ཞེས་པའི་རྒྱན་འཕེན་པའི་བཀའ་བསྒོས་བྱས་པས། ཨ་དྷར་ཞེས་པའི་ཟླ་བ་བཅུ་གཉིས་པའི་ཚེས་བཅུ་གསུམ་གྱི་ཉིན་མོ་དེར་འཁེལ་ལོ།

⁸ དེར་བརྟེན་ཧ་མན་གྱིས་རྒྱལ་པོ་ལ། ཁྱེད་ཀྱི་རྒྱལ་ཁམས་ཀྱི་མངའ་སྡེ་ཚང་མའི་ནང་དུ་མི་བརྒྱུད་གཅིག་ཁ་འཐོར་ནས་གནས་སྡོད་བྱེད་བཞིན་འདུག་པས། དེ་ཚོས་མི་གཞན་དང་མི་འདྲ་བའི་ཁྲིམས་སྲོལ་རྩིས་ཀྱི་ཡོད་པ་དང་། དེ་ཚོས་རྒྱལ་ཁམས་ཀྱི་ཡུལ་ཁྲིམས་ལའང་རྩིས་སྲུང་མི་བྱས་པས། དེ་ཚོ་ལ་ཐུགས་བཟོད་གནང་རྒྱུ་དེ་ནི་ཁྱེད་ལ་ཕན་ཐོག་མི་ཡོང་།

⁹ གལ་ཏེ་རྒྱལ་པོ་ཐུགས་དགྱེས་ན་དེ་དག་ལ་ཉེས་པ་སྲོག་ཐོག་ཏུ་གཏོང་དགོས་ཅེས་པའི་བཀའ་ཤོག་ཅིག་གནང་བར་མཛོད། དེ་ལྟ་བུའི་བཀའ་བསྒོས་ཤིག་གནང་བ་ཡིན་ན་། གཞུང་དོན་ལ་ཕན་ཕྱིར་ངས་རྒྱལ་པོའི་བང་མཛོད་དུ་དངུལ་ཀི་ལོ་གྷ་རམ ༣༤༠,༠༠༠ འབུལ་རྒྱུའི་ཁས་ལེན་ཞུ་རྒྱུ་ཡིན་ཞུས་སོ།

¹⁰ དེར་རྒྱལ་པོས་བཀའ་ཤོག་ལ་དམ་ཕྲུག་གནང་ཕྱིར་རང་གི་ཕྱག་གི་སོར་གདུབ་དེ་ཕུད་ནས། ཡ་ཧུ་ད་པའི་དགྲ་བོ་ཨ་གག་གི་རིགས་བརྒྱུད་ལས་ཡིན་པ་ཧམ་མེ་དྷ་ཐའི་བུ་ཧ་མན་ལ་གནང་ངོ།

¹¹ རྒྱལ་པོས་ཁོ་ལ་མི་རིགས་དེ་ཚོའི་རྒྱུ་དངུལ་དང་མི་བཅས་པ་ཚང་མ་ཁྱོད་ལ་དག་པ་ཡིན་པས། ཁྱོད་ཀྱིས་དེ་ཚོར་གང་དགའ་བར་གྱིས་ཤིག་ཅེས་བཀའ་གནང་ངོ།

¹² དེ་ནས་ཟླ་བ་དང་པོའི་ཚེས་བཅུ་གསུམ་པར། ཧ་མན་གྱིས་རྒྱལ་པོའི་དྲུང་ཡིག་རྣམས་བཀོང་ནས་བཀའ་ཤོག་གཅིག་འབྲི་བཅུག་པ་དང་། རྒྱལ་ཁམས་ཀྱི་སྐད་ཡིག་ཚང་མའི་ཐོག་ཏུ་བསྒྱུར་ནས། སྲིད་ཀྱོང་པ་ཀུན་དང་། སྤྱིད་ཁྱབ་དང། ལས་བྱེད་པ་བཅས་ལ་གཏོང་དགོས་པའི་བཀའ་བསྒོས་བྱས་སོ། བཀའ་ཤོག་དེ་ནི་རྒྱལ་པོ་ཨ་ཧ་སུ་རསེ་ཀྱི་མཚན་ཐོག་ཏུ་བྲིས་ཏེ། དེར་རྒྱལ་པོས་སོར་གདུབ་ཀྱི་ཐེ་རྩེ་རྒྱབ་ཡོད་དོ།

¹³ ཨ་དྷར་ཟླ་བའི་ཚེས་བཅུ་གསུམ་པར། ཡ་ཧུ་ད་པ་ཕོ་མོ་རྒན་གཞོན་བྱིས་པ་དང་བཅས་པ་ཉི་མ་གཅིག་རང་ལ་བསད་དེ། བྱམས་དང་སྙིང་རྗེ་མེད་པར་དེ་དག་ཚར་གཅོད་བཏང་ཞིང་དེ་ཚོའི་རྒྱུ་དངོས་ཚང་མ་འཕྲོག་བཅོམ་བྱེད་དགོས་ཅེས་པའི་བཀའ་རྒྱ་དེ་བང་ཆེན་ཚོས་རྒྱལ་ཁམས་ཀྱི་མངའ་སྡེ་ཡོངས་སུ་བསྐྱེལ་ལོ།

¹⁴ བཀའ་རྒྱའི་འདྲ་ཤུས་རེ་མངའ་སྡེ་རེ་རེའི་ནང་ཡོངས་སུ་གསལ་བསྒྲགས་བྱས་ཤིང། དེ་ལྟར་བྱེད་དགོས་དོན་ནི་ཉིན་ཞག་དེའི་དོན་དུ་ཚང་མས་གྲ་སྒྲིགས་བྱས་ནས་སྡོད་ཐུབ་པའི་ཕྱིར་ཡིན་ནོ།

¹⁵ རྒྱལ་པོས་ཇི་ལྟར་བཀའ་བསྒོས་གནང་བ་བཞིན། བཀའ་ཤོག་དེ་རྒྱལ་ས་སུ་ས་རུ་ཁྱབ་བསྒྲགས་བྱས་ཏེ། བང་ཆེན་ཚོས་གནས་ཚུལ་དེ་མངའ་སྡེ་སོ་སོར་བསྐྱལ་སོ། རྒྱལ་ས་སུ་ས་རུ་དངས་ཚབ་ཆེ་བའི་ཛ་དྲག་གི་གནས་སྟངས་དེ་ལྟ་བུ་ཆགས་སྐབས་སུའང་རྒྱལ་པོ་དང་ཧ་མན་གཉིས་ཆང་རག་འཐུང་སྟེ་དགའ་སྤྲོའི་ངང་དུ་རོལ་ཞིང་གནས་སོ༎