ཨེསེ་ཐར 2 - Tibetan Old Testament 2011

ཨེསི་ཐར་བཙུན་མོར་འཁོད་པ་།

¹ རྗེས་སུ་རྒྱལ་པོའི་ཐུགས་ཁྲོ་ཞི་ནའང། བཙུན་མོ་ཝསེ་ཏིས་གང་བྱས་པའི་སྐོར་དང། དེར་རྒྱལ་པོས་བཀའ་རྒྱ་གང་གནང་བའི་སྐོར་ལ་ཐུགས་དྲན་གསོ་ཞིང་བཞུགས་སོ།

² དེར་བརྟེན་རྒྱལ་པོ་དང་ཉེ་པོ་ཡོད་པ་གྲོས་སྟོན་པ་འགའ་ཤས་ཀྱིས་རྒྱལ་པོ་ལ་། སྐུ་ཉིད་ཀྱི་དོན་དུ་ན་ཆུང་མཛེས་མ་འཚོལ་བའི་བཀའ་ཞིག་གནང་ན་ལེགས་སམ་ཞེས་གྲོས་འཆར་ཕུལ་ལོ།

³ རྒྱལ་པོས་རྒྱལ་ཁམས་སུ་ཡོད་པའི་སྡེ་ཐམས་ཅད་ལ་ལས་བྱེད་པ་བསྐོ་གཞག་གནང་སྟེ། དེ་ཚོས་ན་ཆུང་མཛེས་མ་ཇི་ཡོད་གྲོང་ཁྱེར་སུ་ས་རུ་བུད་མེད་ཀྱི་སྒེར་ཁང་དུ་བསྡུས་ནས། ཁྱེད་ཀྱི་བུད་མེད་རྣམས་ཀྱི་དོ་དམ་པ་ཉུག་རུམ་པ་ཧེ་གཡེ་ལག་ཏུ་གཏད་དེ། ན་ཆུང་མ་དེ་དག་ལ་མཁོ་བའི་མཛེས་རྒྱན་གྱི་སྨན་བཅོས་རྣམས་གནང་བར་མཛོད།

⁴ དེ་ནས་རྒྱལ་པོའི་ཐུགས་མཉེས་པའི་ན་ཆུང་མ་དེ་ནི་བཙུན་མོ་ཝསེ་ཏིའི་ཚབ་ཏུ་བཙུན་མོར་བཞེས་པར་མཛོད། ཞུས་པའི་གྲོས་འཆར་དེ་རྒྱལ་པོའི་ཐུགས་ལ་བབ་ནས་དེ་བཞིན་མཛད་དོ།

⁵ སུ་ས་རུ་ཡ་ཧུ་དཱ་པ་མིང་ལ་མོར་དོ་ཀཡེ་ཞེས་པ་ཞིག་ཡོད་པས་དེ་ནི་ཡ་ཨིར་གྱི་བུ་ཡིན་པ་དང། བྷེན་ཡ་མིན་གྱི་སྡེ་རིགས་དང། ཀིཤེ་དང། ཤིམ་ཨིའི་རིགས་བརྒྱུད་ལས་འཆད་པ་ཞིག་ཡིན་ནོ།

⁶ བྷེ་བྷི་ལོན་གྱི་རྒྱལ་པོ་ནེ་བུ་ཀད་ནེ་ཛར་གྱིས་ཡ་ཧུ་དཱའི་རྒྱལ་པོ་ཡེ་ཧོ་ཡ་ཀིན་ལ་ཡེ་རུ་ཤ་སེམ་ནས་འཛིན་བཟུང་བྱས་་ཏེ་འཁྲིད་སྐབས་མོར་དོ་ཀཡེ་ཀྱང་བཙན་བྱོལ་པ་དང་མཉམ་དུ་ཡོད་དོ།

⁷ ཁོའི་ཨ་ཁུའི་བུ་མོ་ཨེསི་ཐར་རམ་ཡ་ཧུ་ད་པའི་མིང་ལ་ཧ་ད་སཱ་ཞེས་པ་གཞོན་ནུ་མ་བྱད་གཟུགས་ཤིན་ཏུ་ལེགས་པ་ཞིག་ཡོད་པ་ཡིན་ཏེ། མོའི་ཕ་མ་གཉིས་ཀ་གྲོངས་པའི་རྗེས་སུ་མོར་དོ་ཀཡེས་མོ་ལ་རང་གི་བུ་མོའི་ཚབ་ཏུ་བདག་ཉར་བྱས་སོ།

⁸ རྒྱལ་པོའི་བཀའ་རྒྱ་དེ་ཐོས་ནས་ན་ཆུང་མ་མང་པོ་སུ་ས་རུ་བསྡུས་ཡོད་པ་དང། ཨེསི་ཐར་ཡང་དེ་ཚོའི་ཁོངས་སུ་ཡོད་པས། མོའང་ཕོ་བྲང་ནང་བུད་མེད་ཚོའི་སྒེར་ཁང་དུ་ཧེ་གཡེ་ལག་ཏུ་རྩིས་སྤྲོད་བྱས་ཡོད་དོ།

⁹ ཧེ་གཡེ་ཨེསི་ཐར་ལ་དགའ་བས་ཁོང་གིས་མོ་ལ་ཐུགས་རྗེ་གནང་ཞིང། དེ་མ་ཉིད་དུ་མོ་ལ་མཁོ་བའི་མཛེས་རྒྱན་གྱི་ཡོ་བྱད་དང། བྱུགས་པ་དང། དེ་བཞིན་དམིགས་བསལ་གྱི་ཁ་ཟས་སོགས་གོ་སྒྲིགས་གནང་ཞིང། ཕོ་བྲང་ནང་བུད་མེད་ཚོའི་སྒེར་ཁང་ཡག་ཤོས་དེར་བཞག་སྟེ། ཕོ་བྲང་ནས་འདེམས་བསྐོས་བྱས་པའི་ཞལ་ཏ་མ་བདུན་མོའི་ཞབས་ཕྱིར་བསྐོ་གཞག་བྱས་སོ།

¹⁰ མོར་དོ་ཀཡེ་གྲོས་སྟོན་པ་བཞིན་ཨེསི་ཐར་གྱིས་རང་ཉིད་ཡ་ཧུ་ད་པ་ཞིག་ཡིན་པ་དེ་སུ་ལའང་མ་བཤད་པར་གསང་བར་བཞག་གོ

¹¹ མོར་དོ་ཀཡེས་ཉིན་ལྟར་རེ་བཞིན་ཨེསི་ཐར་ཇི་འདྲ་ཡོད་མེད་སྐོར་དང། མོ་ལ་གནས་ཚུལ་གང་བྱུང་མིན་སྐོར་ཤེས་རྟོགས་བྱེད་ཕྱིར་བུད་མེད་ཚོའི་སྒེར་ཁང་གི་ཚོམས་ཀྱི་མདུན་དུ་ཡར་འགྲུལ་མར་འགྲུལ་བྱེད་ཀྱི་ཡོད་དོ།

¹² བུ་མོ་ན་ཆུང་རྣམས་ལ་མཛེས་ཆ་སྟོན་པའི་ལས་དེ་ལོ་གཅིག་བར་དུ་འགོར་ཞིང། དེའང་ཟླ་བ་དྲུག་རིང་གུ་གུལ་གྱི་སྣུམ་དང། ་དེ་འཕྲོས་ཟླ་བ་དྲུག་རིང་དུ་ཐང་མར་གྱི་སྣུམ་གྱི་བྱུགས་པ་བྱས་པ་དང། དེ་རྗེས་བུ་མོ་རྣམས་རེས་མོས་བཞིན་དུ་རྒྱལ་པོ་ཨ་ཧ་སུ་རསེ་ཀྱི་དྲུང་དུ་འཁྲིད་ཀྱི་ཡོད་དོ།

¹³ བུ་མོ་དེ་བུད་མེད་ཚོའི་སྒེར་ཁང་ནས་རྒྱལ་པོའི་ཕོ་བྲང་དུ་བཅར་སྐབས་རང་གི་འདོད་མོས་བཞིན་དུ་གྱོན་གོས་དང་རྒྱན་ཆ་སོགས་གྱོན་ནས་འགྲོ་ཆོག་གི་ཡོད་པ་དང།

¹⁴ ཡང་བུ་མོ་དེ་རྣམས་དགོང་མོ་ཕོ་བྲང་དུ་བཅར་ནས། སང་ཞོགས་བུད་མེད་ཚོའི་སྒེར་ཁང་གཞན་ཞིག་ཏུ་བསྐྱེལ་ནས། རྒྱལ་པོའི་ཟུར་གྲོགས་མ་རྣམས་ལ་ལྟ་རྟོགས་བྱེད་མཁན་ཉུག་རུམ་པ་མིང་ལ་ཤསི་གྷཛི་ཞེས་པ་དེའི་ལག་ཏུ་རྩིས་སྤྲོད་བྱེད་པ་དང། རྒྱལ་པོ་ཐུགས་མཉེས་ཏེ་བུ་མོའི་མིང་བཇོད་ཅིང་ཡང་སྐྱར་མ་བོས་བར་དུ་མོ་རྒྱལ་པོའི་དྲུང་དུ་བཅར་མི་ཆོག་པ་ཡིན་ནོ།

¹⁵ དེ་རྗེས་ཨེསི་ཐར་རྒྱལ་པོའི་དྲུང་དུ་བཅར་བའི་རེ་མོས་ལ་བབ་བོ། ཨེསི་ཐར་ནི་མོར་དོ་ཀཡེ་ཀྱི་ཨ་ཁུ་ཨ་བྷི་ཧེལ་གྱི་བུ་མོ་ཡིན་པ་དང། མོར་དོ་ཀཡེས་མོ་ལ་རང་གི་བུ་མོའི་ཚབ་ཏུ་བདག་ཉར་བྱས་ཡོད་པ་ཡིན་ཏེ། སུས་ཀྱང་མོ་ལ་མཐོང་བ་ཙམ་གྱི་དགའ་སྣང་ཆེན་པོས་བསྔགས་བརྗོད་བྱེད་ཀྱི་ཡོད་དོ། ད་མོ་རྒྱལ་པོའི་དྲུང་དུ་བཅར་བའི་རེ་མོས་ལ་བབ་པས། བུད་མེད་ཚོའི་སྒེར་ཁང་གི་དོ་དམ་པ་ཧེ་གཨེས་གང་ལབ་པའི་གྱོན་གོས་དང་མཛེས་རྒྱན་སོགས་མ་གཏོགས་གང་ཡང་མ་གྱོན་ནོ།

¹⁶ དེར་བརྟེན་རྒྱལ་པོ་ཨ་ཧ་སུ་རསེ་ཀྱི་རྒྱལ་སྲིད་སྐྱོང་ལོ་བདུན་པའི་ཏེ་བེཐི་ཟེར་བའི་ཟླ་བ་བཅུ་པར་ཨེསི་ཐར་རྒྱལ་པོ་ཨ་ཧ་སུ་རསེ་ཀྱི་དྲུང་དུ་ཕོ་བྲང་ནང་འཁྲིད་ཡོད་དོ།

¹⁷ དེ་ནས་རྒྱལ་པོས་བུད་མེད་ཚང་མའི་ནང་ནས་ཨེསེ་ཐར་ལ་ཐུགས་གཅེས་པར་མཛད་ཅིང། ཁོང་གིས་ན་ཆུང་མ་ཚང་མའི་ནང་ནས་མོ་ལ་ཐུགས་རྗེ་དང་བརྩེ་བ་མཛད་ཅིང་། བཙུན་མོའི་ཅོད་པན་དེ་མོའི་དབུ་ལ་སྒྲོན་ནས། ཝསེ་ཏིའི་ཚབ་ཏུ་མོ་བཙུན་མོར་བཞེས་སོ།

¹⁸ དེ་རྗེས་རྒྱལ་པོས་བཙུན་མོ་ཨེསི་ཐར་ལ་ཆེས་བསྟོད་ཞུ་ཕྱིར་མགྲོན་སྟོན་རྒྱས་པོ་ཞིག་བཤམས་ཏེ། དེར་གཞུང་ཞབས་ཁག་དང་ལས་བྱེད་པ་ཐམས་ཅད་སྐུ་མགྲོན་དུ་བོས་ཤིང། རྒྱལ་ཁམས་ཡོངས་སུ་གུང་སངས་ཀྱི་གསལ་བསྒྲགས་བྱས་ཏེ་རྒྱལ་པོར་འོས་པའི་གནང་སྦྱིན་སོགས་གནང་ངོ༎

མོར་དོ་ཀཡེས་རྒྱལ་པོའི་སྐུ་ཚེར་སྐྱབ་བ།

¹⁹ སྐབས་དེར་མོར་དོ་ཀཡེས་ནི་གཞུང་ཞབས་སུ་འཁོད་ཡོད་པ་དང།

²⁰ བཙུན་མོ་ཨེསི་ཐར་གྱིས་རང་ཉིད་ཡ་ཧུ་ད་པ་ཞིག་ཡིན་པའི་སྐོར་སུ་ལའང་བཤད་མེད་པ་དེ་ནི། མོར་དོ་ཀཡེས་ཨེསི་ཐར་ལ་དེའི་སྐོར་སུ་ལའང་མ་བཤད་ཅིག་ཅེས་སྨྲས་པ་ལྟར་། མོས་དེ་བཞིན་རྩིས་སྲུང་ཞུས་པ་ཡིན་ནོ། ཡང་ཨེསི་ཐར་ནི་ཆུང་དུས་སུ་མོར་དོ་ཀཡེས་འཚོ་སྐྱོང་བྱེད་སྐབས་ནས་བཟུང་ཁོས་གང་སྨྲས་པ་ཚང་མར་ཉན་གི་ཡོད་པ་ཡིན་ནོ།

²¹ མོར་དོ་ཀཡེ་རྒྱལ་པོའི་ཕོ་བྲང་དུ་གཞུང་ཞབས་ཀྱི་འགོ་འཛིན་བྱེད་སྐབས་རྒྱལ་པོའི་གཟིམས་ཆུང་གི་སྒོ་སྲུང་པ་མིང་ལ་བྷིག་ཐན་ན་དང་ཏེ་རེཤི་ཞེས་པའི་ཉུག་རུམ་པ་གཉིས་ཀྱིས་རྒྱལ་པོ་ཨ་ཧ་སུ་རསེ་ལ་རྒོལ་སེམས་ཞུས་ཏེ་ཁོང་ལ་བཀྲོང་ཐབས་བྱས་སོ།

²² མོར་དོ་ཀཡེས་བྱུས་ངན་དེའི་སྐོར་ཧ་གོ་ནས་བཙུན་མོ་ཨེསི་ཐར་ལ་བཤད་པ་དང། བཙུན་མོས་དེའི་སྐོར་རྒྱལ་པོ་ལ་ཞུས་པས།

²³ དེ་ནས་རྒྱལ་པོས་བྱ་བ་དེར་ཞིབ་དཔྱོད་ལེགས་པར་གནང་ནས་གནས་ཚུལ་དེ་ནི་བདེན་པ་ཡིན་པར་མཁྱེན་ནས་མི་དེ་གཉིས་ལ་ཤིང་གི་ཁར་འཕྱར་ནས་ཉེས་པ་སྲོག་ཐོག་ཏུ་བཏང་ངོ་། ལོ་རྒྱུས་དེ་ནི་ཡུལ་གྱི་གཞུང་དེབ་ནང་དུ་བཀོད་དགོས་ཅེས་རྒྱལ་པོས་བཀའ་བསྒོས་གནང་ངོ་༎