ཨེསེ་ཐར 1 - Tibetan Old Testament 2011

བཙུན་མོ་ཝསེ་ཏིས་རྒྱལ་པོ་ཨ་ཧ་སུ་རསེ་ཀྱི་བཀའ་ལ་བརྩི་མེད་ཞུས་པ་།

^1-2 རྒྱལ་པོ་ཨ་ཧ་སུ་རསེ་ཀྱིས་པར་སི་ཡའི་ཡུལ་གྱི་རྒྱལ་ས་སུ་ས་རུ་རྒྱལ་ཁྲི་བཟུང་ཞིང་། རྒྱ་གར་ནས་བཟུང་སྟེ་ཨི་ཐི་ཨོ་པི་ཡ་བར་དུ་ཡུལ་སྡེ་ ༡༢༧ ལ་རང་གི་རྒྱལ་སྲིད་སྐྱོང་བཞིན་ཡོད་པ་དང།

³ རང་གི་ཆབ་སྲིད་སྐྱོང་ལོ་གསུམ་པའི་སྐབས་སུ་ལས་བྱེད་པ་ཁག་དང་གཞུང་ཞབས་པ་རྣམས་ལ་གསོལ་སཏོན་རྒྱ་ཆེན་པོ་ཞིག་བཤམས་སོ། པར་སི་ཡ་དང་མ་དཱའི་ཡུལ་གྱི་དམག་དཔོན་རྣམས་དང་ཡུལ་ལྗོངས་སོ་སོའི་སྤྱི་ཁྱབ་དང་མི་སྣ་གཙོ་དྲག་ཁག་བཅས་གསོལ་སྟོན་དེར་འཛོམས་ཡོད་ཅིང་།

⁴ ཟླ་བ་དྲུག་གི་བར་དུ་རང་གི་ཕོ་བྲང་གི་རྒྱུ་ནོར་དང་དེའི་མངའ་ཐང་དང་གཟི་བཇིད་ཕུན་སུམ་ཚོགས་པ་རྣམས་འགྲེམས་སྟོན་མཛད་དོ།

⁵ དེ་རྗེས་རྒྱལ་པོས་རྒྱལ་ས་སུ་ས་རུ་ཡོད་པའི་སྐྱེ་བོ་མཆོག་དམན་ཀུན་ལ་གསོལ་སྟོན་ཆེན་པོ་ཞིག་བཤམས་སོ། ཡང་གསོལ་སྟོན་དེ་ནི་ཕོ་བྲང་གི་ལྡུམ་རའི་ནང་དུ་བདུན་ཕྲག་གཅིག་གི་རིང་ལ་བཤམས་སོ།

⁶ ཁྱམས་ར་དེ་ནི་ཀ་ཤི་ཀའི་རས་ཀྱི་ཡོལ་བ་དཀར་པོ་དང་སྔོན་པོས་བརྒྱན་ཡོད་ཅིང་། ཀ་ཤི་ཀའི་ཐག་པ་སྤུས་ལེགས་མུ་མན་གྱི་དེ་ལ་དངུལ་གྱི་ཨ་ལོང་ནང་བརྒྱུད་དེ་རྡོ་ཀ་མ་རུ་པ་ལས་བཟོས་པའི་ཀ་བ་ཁག་ལ་བཏགས་ཡོད་དོ། རྡོ་ཀ་མ་རུ་པ་དཀར་པོ་དང་། རིན་ཐང་ཆེ་བའི་རྡོ་དམར་པོ་དང་། ཉ་ཕྱིད་བཀྲགས་མདངས་ཆེ་བ་དང། གཞན་ཡང་གཡུ་སོགས་བརྒྱན་པའི་རྡོ་གཅལ་སྟེང་དུ་གསེར་དང་དངུལ་གྱི་མལ་ཁྲི་རྣམས་བཞག་ཡོད་དོ།

⁷ མགྲོན་པོ་རྣམས་ཀྱི་བཏུང་བའི་གསེར་ཕོར་ནི་བཟོ་དབྱིབས་གཅིག་ལས་གཅིག་མི་འདྲ་བ་ཡོད་ཅིང། རྒྱལ་པོས་ཕངས་སེམས་མེད་པར་རྒུན་ཆང་མང་པོ་དྲངས་སོ།

⁸ ཡང་རྒུན་ཆང་མང་ཉུང་ཇི་ཙམ་འཏུང་དགོས་པའི་ཚད་སོགས་མེད་པ་ནི་ཕོ་བྲང་གི་གཡོག་པོ་རྣམས་ལ་མགྲོན་པོ་སོ་སོའི་འདོད་མོས་ལྟར་དྲངས་དགོས་ཤེས་བཀའ་གནང་ཡོད་པ་ཡིན་ནོ།

⁹ སྐབས་དེར་བཙུན་མོ་ཝསེ་ཏིས་ཀྱང་རྒྱལ་པོའི་ཕོ་བྲང་ནང་དུ་སྐྱེས་དམན་རྣམས་ལ་མགྲོན་སྟོན་ཞིག་བཤམས་བཞིན་ཡོད་པ་དང་།

¹⁰ མགྲོན་གྱི་ཉིན་ཞག་བདུན་པའི་ཉིན་མཆོད་ཆང་གིས་རྒྱལ་པོའི་ཐུགས་ཡོངས་སུ་བདེ་བའི་ཚེ་རང་གི་དྲུང་དུ་གནས་པའི་མེ་ཧུ་མན་དང། བཧིསེ་ཐ་དང་། ཧར་བོ་ན་དང། བྷིག་ཐ་དང་། ཨ་བག་ཐ་དང། ཛེ་ཐར་དང། ཀར་ཀསེ་བྱ་བའི་ཉུག་རུམ་བདུན་པོ་ལ་བོས་ཏེ་འདི་སྐད་དུ།

¹¹ བཙུན་མོ་ཝསེ་ཏི་ལ་ཅོད་པན་སྒྲོན་ནས་འདིར་འཁྲིད་ཤོག་། བཙུན་མོ་དེ་ནི་བཞིན་རས་མཛེས་པས། རྒྱལ་པོའི་ལས་བྱེད་པ་ཁག་དང་སྐུ་མགྲོན་ཚོར་བཙུན་མོའི་མཛེས་ཆ་མིག་སྟོན་བྱེད་པར་དགོངས་སོ།

¹² དེ་ནས་ཞབས་ཕྱི་ཚོས་རྒྱལ་པོའི་བཀའ་དེ་བཙུན་མོ་ཝསེ་ཏི་ལ་ཞུས་ཀྱང་། བཙུན་མོས་ང་མི་འགྲོ་གསུངས་པས། རྒྱལ་པོ་ཐུགས་ཁྲོ་བར་འགྱར་རོ།

¹³ རྒྱལ་པོས་རང་གི་ཕྱག་ལས་ཐམས་ཅད་ཡུལ་གྱི་བཀའ་ཁྲིམས་ཤེས་པའི་མཁས་པ་རྣམས་དང་བསྟུན་ཏེ་གནང་སྲོལ་ཡོད་པ་བཞིན་ཁོང་གིས་དེ་དག་དང་བཀའ་གྲོས་གནང་ངོ།

¹⁴ ཁོང་གིས་རྒྱུན་དུ་བཀའ་གནང་ས་རྒྱལ་ཁམས་ནང་གྲལ་འགོ་འཛིན་མཁན་པར་སི་ཡ་དང་མ་དཱའི་ས་ཁོངས་ཀྱི་ལས་བྱེད་པ་བདུན་པོ་རྣམས་ནི། ཀར་ཤེ་ན་དང། ཤེ་ཐར་དང། ཨད་མ་ཐ་དང། ཏར་ཤིཤ་དང། མེ་རེསི་དང། མར་སེ་ན་དང། མེ་མུ་ཀན་བཅས་ཡིན་ནོ།

¹⁵ ཁོང་གིས་དེ་དག་ལ་། ང་ཨ་ཧ་སུ་རསེ་རྒྱལ་པོས་བཙུན་མོ་ཝསེ་ཏིའི་མདུན་དུ་རང་གི་འཁོར་གཡོག་རྣམས་བཏང་སྟེ་བཀའ་བསྒོས་ཤིག་སྨྲས་པར་མོས་དེར་བརྩི་མེད་བྱས་པས། ཁྲིམས་སྲོལ་ལྟར་མོ་ལ་གང་བྱེད་དགོས་སམ་ཞེས་བཀའ་འདྲི་གནང་བ་དང།

¹⁶ མེ་མུ་ཀན་གྱིས་རྒྱལ་པོ་དང་ཁོང་གི་ལས་བྱེད་པ་རྣམས་ཀྱི་དྲུང་དུ་གསལ་བསྒྲགས་བྱས་གསལ། བཙུན་མོ་ཝསེ་ཏིས་རྒྱལ་པོ་ཙམ་མ་ཟད། ལས་བྱེད་པ་རྣམས་དང་གཞན་ཡང་རྒྱལ་ཁམས་ནང་དུ་ཡོད་པའི་སྐྱེས་པ་རེ་རེར་དམའ་འབེབས་བྱས་པ་ཡིན་ཅིང།

¹⁷ བཙུན་མོས་གང་གནང་བའི་སྐོར་ཐས་མ་ཐག་ཏུ་རྒྱལ་ཁམས་ནང་དུ་ཡོད་པའི་བུད་མེད་རེ་རེས་ཀྱང་རང་རང་སོ་སོའི་ཁྱོ་རྣམས་ལ་རྩི་མེད་ཀྱིས་དམའ་འབེབས་བྱེད་ངེས་སོ། དེ་ཚོས། རྒྱལ་པོ་ཨ་ཧ་སུ་རསེ་ཀྱིས་བཙུན་མོ་ཝསེ་ཏི་ལ་བཀའ་བསྒོས་ཤིག་གནང་རུང། བཙུན་མོས་དེར་རྩིས་མེད་ཞུས་སོ་ཞེས་བརྗོད་ཉེན་ཡོད།

¹⁸ དེ་ལྟ་བུའི་བཙུན་མོའི་སྤྱོད་ཚུལ་སྐོར་པར་སིི་ཡ་དང་མ་དཱའི་ནང་གི་རྒྱལ་པོའི་ལས་བྱེད་པ་ཁག་གི་ཆུང་མ་ཚོས་གོ་ཐོས་བྱུང་ཚེ། རང་རང་སོ་སོའི་ཁྱོ་རྣམས་ལ་དེ་རིང་རང་དེའི་སྐོར་ལ་གཏམ་གླེང་བྱེད་ཡོང་། ས་ཕྱོགས་ཀུན་ཏུ་ཆུང་མ་ཚོས་རང་རང་སོ་སོའི་ཁྱོ་ལ་རྩིས་གུས་མི་བྱེད་པས། ཁྱོ་རྣམས་རང་གི་ཆུང་མར་ཁྲོ་བ་བྱེད་ཉེན་ཡོད།

¹⁹ དེ་བས་ན་རྒྱལ་པོ་ཐུགས་དགྱེས་ཚེ་། པར་སི་ཡ་དང། མ་དཱའི་ཡུལ་ཁྲིམས་འགྱུར་མེད་བཞིན་དུ་རྒྱལ་པོས་བཀའ་རྒྱ་ཞིག་སྤྲིང་བར་མཛོད། དེའི་ནང་དུ་ཝསེ་ཏིས་ནི་ད་ཕྱིན་ནམ་ཡང་རྒྱལ་པོའི་དྲུང་དུ་བཅར་མི་ཆོག་ཅེས་བྲིས་དགོས། དེ་ནས་མོའི་ཚབ་ཏུ་དེ་ལས་ལྷག་པའི་བཟང་མོ་ཞིག་ལ་རྒྱལ་པོའི་བཙུན་མོའི་གོ་ས་གནང་བར་མཛོད།

²⁰ ཁྱེད་ཀྱི་བཀའ་རྒྱ་དེ་བཞིན་རྒྱལ་ཁམས་ཆེན་པོ་འདིར་ཡོངས་སུ་ཁྱབ་པར་བྱེད་སྐབས། བུད་མེད་རེ་རེས་རང་གི་ཁྱོའི་གོ་ནས་ཆེ་ཆུང་འཇིན་འདྲ་ཡིན་རུང་ཁོང་ཚོར་གུས་ཞབས་བྱེད་པར་འགྱུར།

²¹ གྲོས་འཆར་དེ་ལ་རྒྱལ་པོ་དང་ལས་བྱེད་པ་རྣམས་ཐུགས་རབ་ཏུ་དགྱེས་ནས་རྒྱལ་པོས་ཀྱང་མེ་མུ་ཀན་གྱིས་གང་སྨྲས་པ་བཞིན་མཛད་དོ།

²² དེ་རྗེས་རྒྱལ་པོས་མངའ་སྡེ་ཐམས་ཅད་ལ་བཀའ་རྒྱ་དེ་བཞིན་མི་བརྒྱུད་རེ་རེའི་སྐད་ཡིག་ཏུ་སྐྱེས་པ་ཀུན་གྱིས་རང་རང་སོ་སོའི་ཁང་ཁྱིམ་དུ་རང་གཙོ་བྱེད་དེ་ལས་དོན་གང་སྤྱིར་ཐག་གཅོད་མཐའ་མ་དེ་སྐྱེས་པས་བྱེད་དགོས་ཅེས་བྲིས་ནས་སྤེལ་བར་མཛད་དོ༎