སྟོན་པ། 9 - Tibetan Old Testament 2011

¹ དེ་ཚོའི་སྐོར་ལ་ངས་ཡུན་རིང་པོར་བསམ་བློ་ནན་ཏན་བཏང་བ་དང། དཀོན་མཆོག་གིས་སྐྱེ་བོ་ཤེས་རབ་ཅན་ཚོ་དང་དྲང་ལྡན་ཚོའི་སྤྱོད་ཚུལ་རྣམས་དབང་བསྒྱུར་གནང་བ་དང། དེ་ཚོའི་བྱམས་པ་དང་འཁོན་འཛིན་ཡང་དབང་བསྒྱུར་གནང་བ་མཐོང་བྱུང། སུ་ཞིག་གིས་ཁོ་པའི་མདུན་དུ་ཇི་འདྲ་ཡོད་པ་མི་ཤེས་པ་དང།

² དེ་ལ་ཁྱད་པར་གང་ཡང་མེད། སྐྱེ་བོ་དྲང་ལྡན་དང་། སྤྱོད་ངན་དང་། སྐྱེ་བོ་བཟང་པོ་དང་། ངན་པ་དང་། སྐྱེ་བོ་ཆོས་པ་དང་ཆོས་པ་མ་ཡིན་པ་དང་། དམར་མཆོད་འབུལ་མཁན་དང་མི་འབུལ་མཁན་ཚོའི་སྐྱལ་བ་འདྲ་མཚུངས་ཡིན། སྐྱེ་བོ་བཟང་པོ་ཞིག་ནི་སྡིག་ཅན་ཞིག་ལས་ལེགས་པ་མེད། སྐྱེ་བོ་མནའ་སྐྱེལ་མཁན་དེ་མནའ་མི་སྐྱེལ་མཁན་ཞིག་ལས་ལེགས་པ་མ་ཡིན་ནོ།

³ ཚང་མར་སྐྱལ་བ་འདྲ་མཚུངས་ཡོད་པ་དང་དེ་ནི་འཛམ་གླིང་འདིའི་ནང་འབྱུང་བཞིན་པའི་བྱ་བ་གཞན་ལྟར་ནོར་འཁྲུལ་ཡིན། མི་རྣམས་ནམ་འཚོའི་རིང་སེམས་ནང་སྨྱོ་འཁྲུལ་དང་ངན་པས་ཁེངས་པ་དང་གློ་བུར་དུ་དེ་ཚོ་འཆིའོ།

⁴ འོན་ཀྱང་སུ་ཞིག་གསོན་པའི་འཛམ་གླིང་ནང་གནས་མཁན་ཞིག་ལ་རེ་བ་ཕྲན་བུ་ཡོད་ཅིང། ཁྱི་གསོན་པོ་ཞིག་ནི་འཚི་བའི་སེང་གེ་ཞིག་ལས་ལེགས་སོ།

⁵ གསོན་པོས་རང་ཉིད་འཆི་རྒྱུ་ཡིན་པ་ཤེས་ཤིང། འདས་པ་ཚོས་གང་ཡང་མི་ཤེས་སོ། དེ་ཚོར་བྱ་དགའ་མེད་ཅིང་ཆ་ཚང་བརྗེད་ཡོད།

⁶ དེ་ཚོའི་བྱམས་པ་དང་འཁོན་སེམས་དང་འདོད་ཆགས་དང་བཅས་ཚང་མ་དེ་ཚོ་དང་མཉམ་དུ་འཆི་ཡོད། སླར་དེ་ཚོ་འཛམ་གླིང་འདིའི་ནང་ཇི་འདྲ་འབྱུང་རྒྱུར་སྐྱེ་བ་མི་ལེན་ནོ།

⁷ སྔོན་དུ་སོང་ལ་རང་གི་ཁ་ཟས་ཟས་ནས་དགའ་བདེར་སྤྱོད་ཅིག རང་གི་རྒུན་ཆང་འཐུང་ལ་བློ་བདེར་སྡོད་ཅིག དཀོན་མཆོག་གིས་དེ་ལ་མོས་མཐུན་གནང་ཡོད།

⁸ རྟག་ཏུ་སྐྱིད་པོ་དང་བློ་བདེ་པོ་མཐོང་དུ་བཅུག་ཅིག

⁹ འཛམ་གླིང་འདིའི་ནང་དཀོན་མཆོག་གི་ཁྱོད་ལ་ཕན་མེད་ཀྱི་མི་ཚེ་གནང་བ་དེ་ལ་འཚོ་བའི་རིང་ཁྱོད་ཀྱིས་དགའ་བའི་བུ་མེད་མཉམ་དུ་མི་ཚེ་སྤྱོད་ཅིག དེའི་ཉིན་ཞག་ཕན་མེད་ཚང་མ་ལ་ལོངས་སྤྱོད་ཅིག གང་ལགས་ཟེར་ན། ཁྱོད་ཀྱི་དཀའ་སྡུག་ཚང་མ་ལ་ཐོབ་རྒྱུ་དེ་རང་ཡིན་ནོ།

¹⁰ ཁྱོད་ཀྱི་གང་བྱེད་པར་འབད་བརྩོན་བྱོས་ཤིག། གང་ལགས་ཟེར་ན། འཆི་བའི་ཡུལ་དུ་བྱ་བ་དང་བསམ་བློ་དང་ཡོན་ཏན་དང་ཤེས་རབ་བཅས་པ་གང་ཡངམེད་པ་དང་དེ་ནི་ཁྱོད་འགྲོ་བཞིན་པའི་ཡུལ་དེ་ཡིན་ནོ།

¹¹ ང་ཡིས་གནས་ཚུལ་གཞན་ཞིག་ཤེས་བྱུང་། དེ་ནི་འཛམ་གླིང་འདིའི་ནང་རྒྱུག་མཁན་མགྱོགས་ཤོས་དེ་ལ་རྟག་ཏུ་རྒྱལ་ཁ་མི་ཐོབ་པ་དང། བློ་ཁོག་ཆེན་པོ་དེ་ལ་རྟག་ཏུ་དམག་ལ་རྒྱལ་ཁ་མི་ཐོབ་བོ། སྐྱེ་བོ་ཤེས་རབ་ཅན་ཚོས་རྟག་ཏུ་ཟས་གོས་བསྒྲུབ་མི་ཐུབ་པ་དང། ཤེས་རིགས་ལྡན་པའི་སྐྱེ་བོ་ཚོ་རྟག་ཏུ་ཕྱུག་པོར་མི་འགྱུར་བ་དང། འབྱོན་སྟང་ཅན་གྱི་སྐྱེ་བོ་ཚོ་རྟག་ཏུ་གོ་གནས་མཐོ་པོར་མི་སླེབས་སོ། ཚང་མར་སྟབས་ངན་འབྱུང་སྲིད།

¹² ཁྱོད་ཀྱི་དུས་སྐབས་ངན་པ་དེ་ནམ་ཡོང་རྩ་བ་ནས་ཁྱོད་ཀྱིས་མི་ཤེས་ཤིང། གློ་བུར་དུ་བྱ་རྙིའི་ནང་བཟུང་བ་ལྟར་ཉ་དྲ་བའི་ནང་བཟུང་བ་ལྟར་ང་ཚོར་དེ་འདྲ་ཡོང་རྒྱུའི་བསམ་བློ་མེད་སྐབས་དུས་སྐབས་ངན་པ་ཞིག་གི་རྙི་ནང་ང་ཚོ་འཚུད་དོ༎

ཤེས་རབ་ཅན་དང་གླེན་པའི་བསམ་ཚུལ།

¹³ དེ་ནས་ངས་གནས་ཚུལ་གཞན་ཞིག་མཐོང་བྱུང། དེ་ནི་འཛམ་གླིང་འདིའི་ནང་ཤེས་རབ་ལ་ཇི་ལྟར་རྩི་བའི་དཔེ་བཟང་པོ་ཞིག་ཡིན།

¹⁴ མི་ཉུང་ཉུང་བསྡད་པའི་གྲོང་ཁྱེར་ཆུང་ཆུང་ཞིག་ཡོད་པ་དང། རྒྱལ་པོ་སྟོབས་ཤུགས་ཆེན་པོ་ཞིག་གིས་དམག་དྲང་པ་དང། ཁོང་གིས་གྲོང་ཁྱེར་དེ་མཐའ་བསྐོར་ནས་རྩིག་པ་སྟོར་ཞིང་ནང་དུ་བཞུག་རྒྱུའི་གྲ་སྒིགས་བྱས་སོ།

¹⁵ དེར་སྐྱེ་བོ་དབུལ་པོ་ཞིག་ཡང་ཡོད་ཅིང། ཁོ་ཧ་ཅང་སྤྱང་པོ་ཡོད་སྟབས་ཁོས་གྲོང་ཁྱེར་དེ་སྐྱོབ་ཐུབ་ཀྱི་ཡོད་ཅིང། འོན་ཀྱང་སུས་ཀྱང་ཁོའི་སྐོར་ལ་བསམ་བློ་བཏང་མེད་དོ།

¹⁶ ངས་རྟག་ཏུ་ཤེས་རབ་ནི་སྟོབས་ཤུགས་ལས་ལྷག་པ་ཡོད་སྨྲས་ཡོད། འོན་ཀྱང་སུས་ཀྱང་སྐྱེ་བོ་དབུལ་པོ་ཡང་ཤེས་རབ་ཅན་བྱུང་སྲིད་པའི་སྐོར་ལ་བསམ་བློ་བཏང་མེད་པ་དང། ཁོས་གང་སྨྲས་པར་དོ་སྣང་མ་བྱས་སོ།

¹⁷ བླུན་པོ་ཚོའི་ཁྲོད་དུ་སྐད་ཤུགས་ཆེན་པོས་གཏམ་ཤོད་མཁན་སྲིད་སྐྱོངས་པའི་གཏམ་ཉན་རྒྱུ་ལས། བཞི་དེའི་ཐོག་ནས་གཏམ་ཤོད་མཁན་ཤེས་རབ་ལྡན་པའི་མིས་གཏམ་ཉོན་རྒྱུ་ལེགས་པ་ཡིན།

¹⁸ མཚོན་ཆ་ལས་ཤེས་རབ་ནི་ཕན་པ་ཆེ་ཐོག་ཡོད་ཅིང། སྡིག་ཅན་གཅིག་གིས་ལས་བཟང་པོ་ཧ་ཅང་མང་པོ་སྟོངས་སུ་འཇུག་གོ།