སྟོན་པ། 8 - Tibetan Old Testament 2011

¹ སྐྱེ་བོ་ཤེས་རབ་ཅན་གཅིག་པུས་དངོས་པོའི་དོན་གནད་ཇི་ཡིན་ཤེས་པ་དང། ཤེས་རབ་ཀྱི་ཁོ་འཛུམ་མུལ་མུལ་བཟོ་བ་དང་དེས་སྐྱོ་བའི་གདོང་པར་སྐྱིད་ཉམས་དོད་པོ་བཟོས༎

རྒྱལ་པོའི་བཀའ་ཉན་དགོས།

² རྒྱལ་པོས་བཀའ་ཇི་ལྟར་གནང་བར་ཉོན་ཞིག། ཁྱོད་ཀྱིས་དཀོན་མཆོག་ལ་བྲེལ་འཚུབ་ཀྱི་ངང་ནས་དམ་བཅའ་ནམ་ཡང་མ་འཇོག་ཅིག

³ རྒྱལ་པོས་རང་གི་ཐུགས་འདོད་ལྟར་གནང་ཐུབ་ཅིང། ཁོང་གི་དྲུང་ནས་ཐོན་ནས་དེ་ལྟ་བུ་ཉེན་ཁ་ཅན་གྱི་ས་གནས་སུ་མ་སྡོད་ཅིག

⁴ རྒྱལ་པོས་སྐུ་དབང་ལྟར་གནང་བས་ཁོང་གིས་ཇི་གནང་བར་འགྲན་མི་ནུས།

⁵ ཁྱོད་ཀྱིས་ཁོང་གི་བཀའ་ཉན་པའི་རིང་ཁྱོད་བདེ་བར་གནས་པ་དང། སྐྱེ་བོ་ཤེས་རབ་ལྡན་པ་ཞིག་གིས་དེ་བཞིན་ཇི་ལྟར་བྱེད་པ་དང་དེ་ནམ་བྱེད་དགོས་ཤེས་སོ།

⁶ བྱ་བ་ཚང་མ་བྱེད་པའི་དུས་ཚོད་ངེས་གཏན་དང་ཐབས་ལམ་ངེས་གཏན་ཞིག་ཡོད། འོན་ཀྱང་ང་ཚོས་དེའི་སྐོར་ཧ་ཅང་ཉུང་ཉུང་ཤེས་ཀྱི་ཡོད།

⁷ ཇི་ལྟར་ཡོང་རྒྱུ་ཡིན་པ་དེ་ང་ཚོ་སུས་ཀྱང་མི་ཤེས་པ་ལྟར། ང་ཚོ་ལ་བརྫོད་མཁན་སུ་ཡང་མེད་དོ།

⁸ རང་ཉིད་འཆི་བ་ལས་ཀྱང་སུ་ཞིག་ཐར་མི་ཐུབ་ཅིང། རང་ཉིད་འཆི་རྒྱུའི་ཉིན་མོ་དེ་སུས་ཀྱང་དུས་བཤོལ་མི་ཐུབ་བོ། དམག་འཐབ་དེ་ལས་ཐར་མི་ཐུབ་ཅིང་ང་ཚོས་དེ་ལས་གཡོ་ཡང་མི་ཐུབ་པ་ཞིག་ཡོན་ནོ༎

སྤྱོད་ངན་དང་དྲང་བདེན།

⁹ འཛམ་གླིང་ནང་སྐྱེ་བོ་འགའ་ཤས་ལ་དབང་ཆ་ཡོད་ཅིང། དེ་ཚོའི་དབང་ཆའི་འོག་མི་གཞན་ཚོ་སྡུག་པོ་མྱོང་དགོས་པའི་འཛམ་གླིང་འདིའི་ནང་ཇི་ལྟར་བྱེད་པའི་སྐོར་ལ་བསམ་བློ་གཏོང་སྐབས་ངས་འདི་ཚོ་ཚང་མ་མཐོང་བྱུང།

¹⁰ ངས་སྐྱེ་བོ་སྤྱོད་ངན་ཚོ་དུར་ཁུང་ནང་གུས་ཞབས་ངང་སྦས་པ་མཐོང་བྱུང། འོན་ཀྱང་གཙོ་བོ་དཀོན་མཆོག་གི་མི་རྣམས་དམ་པའི་གྲོང་ཁྱེར་སྤངས་ནས་འགྲོ་དགོས་པ་དང། དེ་ཚོ་ལ་ཚང་མས་རྗེད་དོ། དེ་བས་ན་དེ་ཚོར་སྙིང་པོ་གང་ཡང་མེད་དོ།

¹¹ སྐྱེ་བོ་ཚོས་ཤེས་བཞིན་དུ་ཁྲིམས་འགལ་ཅི་ལ་བྱེད་བཞིན་ཡོད་དམ། གང་ལགས་ཟེར་ན། ཁྲིམས་འགལ་གྱི་ཉེས་ཆད་དགོས་ངེས་འཕྲལ་དུ་གཏོང་གི་མེད་པ་ཡིན་ནོ།

¹² སྡིག་ཅན་ཞིག་གིས་ཁྲིམས་འགལ་བརྒྱ་ཐམ་པ་གྱིས་ན་ཡང་ད་དུང་འཚོ་བཞིན་ཡོད་དོ། དེ་ཚོས་ཇི་ལྟར་བརྗོད་བཞིན་ཡོད་པ་ངས་ཤེས་ཀྱི་ཡོད། ཁྱོད་ཚོས་དཀོན་མཆོག་གི་བཀའ་ལ་ཉན་གྱི་ཡོད་ན་ཚང་མ་ལེགས་པར་འགྱུར་རོ།

¹³ འོན་ཀྱང་སྤྱོད་ངན་ཚོ་དེ་ལྟར་མིན་ནོ། དེ་ཚོའི་མི་ཚེ་གྲིབ་ནག་ལྟར་འདྲ་བས་དེ་ཚོ་གཞོན་ནུར་འཆི་བར་འགྱུར་རོ། གང་ལགས་ཟེར་ན། དེ་ཚོས་དཀོན་མཆོག་གི་བཀའ་ལ་ཉན་གྱི་མེད་དོ།

¹⁴ འོན་ཀྱང་དེ་ཚོ་ནི་སྙིང་པོ་མེད་པ་ཡིན། འཛམ་གླིང་འདི་ཇི་འདྲ་ཡོད་པར་ལྟོས་དང། སྐབས་རེ་སྐྱེ་བོ་དྲང་ལྡན་ལ་སྤྱོད་ངན་གྱི་ཉེས་ཆད་ཕོག་པ་དང། སྐྱེ་བོ་སྤྱོད་ངན་ཚོ་ལ་དྲང་ལྡན་གྱི་བྱ་དགའ་ཐོབ་པ་དང། ངས་དེ་ལ་སྙིང་པོ་མེད་ཟེར་བརྗོད་རྒྱུ་ཡིན་ནོ།

¹⁵ དེའི་རྐྱེན་གྱི་ང་ལ་ཡིད་ཆད་ངེས་གཏན་ཡོད་པས་ང་ཚོས་ལོངས་སྤྱོད་དགོས། གང་ལགས་ཟེར་ན། ང་ཚོའི་མི་ཚེའི་ནང་བདེ་སྐྱིད་ཡོང་རྒྱུ་དེ་ཟ་རྒྱུ་དང་འཐུང་རྒྱུར་དང་ཀྱི་ལོངས་སྤྱོད་རྒྱུ་དེ་རང་ཡིན། དཀོན་མཆོག་གིས་འཛམ་གླིང་འདིའི་ནང་ང་ཚོ་ལ་གནང་བའི་མི་ཚེ་རིང་ལ་ལས་ཀ་ཧུར་བརྩོནབྱེད་སྐབས་ང་ཚོས་འདི་ཙམ་བྱེད་ཐུབ་བོ།

¹⁶ ངས་རང་ཉིད་སྐྱེ་བོ་ཤེས་རབ་ཅན་ཞིག་འབྱུང་ཐབས་དང་འཛམ་གླིང་ནང་ཇི་ཡོང་ཤེས་ཐབས་བྱས་སྐབས་ཉིན་མཚན་གཉིས་ཀར་གཉིད་མ་ཁུག་པར་བསྡད་ན་ཡང།

¹⁷ དཀོན་མཆོག་གིས་ཇི་ལྟར་གནང་བཞིན་ཡོད་པ་དེ་རྩ་བ་ནས་རྟོགས་མི་ཐུབ་པ་ཤེས་བྱུང། ཁྱོད་ཀྱིས་འབད་བརྩོན་ཇི་ལྟར་བྱས་ན་ཡང་རྩ་བ་ནས་དེ་རྟོགས་མི་ཐུབ་བོ། ཤེས་རབ་ཅན་གྱི་སྐྱེེ་བོ་ཚོས་རྟོགས་ཐུབ་པར་སྨྲས་ན་ཡང་དེ་ཚོས་རྟོགས་མེད་དོ༎