སྟོན་པ། 6 - Tibetan Old Testament 2011

¹ འཛམ་གླིང་འདིའི་ནང་ཁྲིམས་མི་དྲང་བའི་ལས་ཚབ་ཆེ་ཞིག་བྱེད་པར་ང་ལ་དོ་སྣང་བྱུང།

² དཀོན་མཆོག་གིས་སུ་ཞིག་ལ་རྒྱུ་དངོས་དང་གུས་བཀུར་དང་ཅི་འདོད་པ་ཚང་མ་གནང་ཡོད་ཀྱང། དེ་ལ་བེད་སྤྱོད་བྱེད་དུ་འཇུག་མི་གནང་ཞིང། དེའི་ཚབ་ལ་མི་ངོ་མ་ཤེས་མཁན་ཞིག་གིས་དེ་ལ་སྤྱོད་པར་བྱེད་དོ། དེ་ལ་སྙིང་པོ་མེད་ཅིང་དེ་ཚོ་ཚང་མ་ནོར་འཁྲུལ་ཡིན་ནོ།

³ མི་ཞིག་བུ་ཕྲུག་བརྒྱ་ཡོད་པ་དང་མི་ཚེ་རིང་པོ་བསྡད་སྲིད་ན་ཡང། ཁོ་ལ་བདེ་སྐྱིད་ཀྱི་གོ་སྐབས་མ་ཐོབ་པ་དང་དགོས་ངེས་ཀྱི་རང་གི་ཕུང་པོ་དེ་ས་ལ་མ་སྦེད་པ་ཡིནན། ངས་བྱིས་པ་ཤི་རོ་སྐྱེས་པ་དེ་ལེགས་པ་ཡིན་ཞེས་བརྗོད་རྒྱུ་ཡིན་ནོ།

⁴ བྱིས་པ་དེ་སྐྱེས་པ་ལེགས་པ་གང་ཡང་མ་བྱུང་ངོ། དེ་མུན་པའི་ནང་རླགས་པར་འགྱུར་བ་དང་དེར་དེ་ལ་བརྗེད་པར་འགྱུར།

⁵ དེས་ཉིན་མོའི་འོད་མི་མཐོང་བ་དང། ཡང་ན་མི་ཚེ་ཇི་འདྲ་ཡོད་མེད་མི་ཤེས་སོ། འོན་ཀྱང་ཉུང་མཐར་དེ་ལ་ངལ་གསོ་ཐོབ་ཡོད།

⁶ སྐྱེ་བོ་དེ་ལོ་ཉིས་སྟོང་གསོན་པོར་བསྡད་ན་ཡང། ཁོས་བདེ་སྐྱིད་ལ་ལོངས་སྤྱོད་མི་ཐུབ། མཐའ་མར་དེ་ཚོ་གཉིས་ཀ་གནས་གཅིག་ཏུ་འགྲོ་བར་བྱེད་དོ།

⁷ སྐྱེ་བོ་ཞིག་གིས་ཟ་རྒྱུ་ཕྲན་བུ་ཐོབ་པའི་ཆེད་དུ་རང་གི་ལས་ཚང་མ་བྱེད་ཀྱི་ཡོད་དོ། འོན་ཀྱང་ཁོ་ལ་ལྡང་ངེས་རྩ་བ་ནས་ཐོབ་མི་ཐུབ།

⁸ སྐྱེ་བོ་ཤེས་རབ་ཅན་ཞིག་གླེན་པ་ཞིག་ལས་ཇི་ལྟར་ལེགས་པ་ཡོད་དམ། སྐྱེ་བོ་དབུལ་པོ་ཞིག་གིས་མི་ཚེའི་གདོང་ལེན་ཇི་ལྟར་བྱ་རྒྱུ་ཤེས་པ་དེས་ཕན་ཐོག་ཅི་བྱེད་དམ།

⁹ དེ་ལ་སྙིང་པོ་གང་ཡང་མེད། དེ་ནི་རླུང་ལ་རྗེས་དེད་བྱས་པ་ལྟར་ཡིན། རྟག་ཏུ་གང་ཞིག་འདོད་པར་བྱེད་པ་ལས། ཁྱོད་ལ་ཇི་ཡོད་པར་ཚིམ་པ་དེ་ལེགས་སོ།

¹⁰ ཇི་ལྟར་བྱུང་བ་རྣམས་ཡུན་རིང་སྔོན་ནས་ཐག་ཆོད་ཟིན་ཡོད་པ་དང། སྐྱེ་བོ་ཞིག་གིས་ཁོ་ལས་སྟོབས་ཤུགས་ཆེ་བ་དེ་ལ་རྩོད་མི་ཐུབ་པ་ང་ཚོས་ཤེས་སོ།

¹¹ ཁྱོད་ཀྱིས་ཇི་ལྟར་རིང་པོ་རྩོད་པས་དེ་ལ་དེ་ཙམ་གྱིས་སྙིང་པོ་མེད་པ་དང་ཁྱོད་ལ་ཕན་ཐོག་གང་ཡང་མེད་དོ།

¹² གྲིབ་ནག་ལྟར་ཡོལ་བའི་མི་ཚེ་ཐུང་ཐུང་དང་སྙིང་པོ་མེད་པ་དེའི་ནང་ལེགས་ཤོས་ཇི་ཡིན་པ་སུས་ཤེས་ཀྱི་རེད་དམ། ཤི་བའི་རྗེས་ལ་འཛམ་གླིང་ནང་གང་ཡོང་གི་ཡོད་པ་དེ་སུས་ཤེས་སམ༎