སྟོན་པ། 5 - Tibetan Old Testament 2011

བྲེལ་ཟིང་ངང་མནའ་སྐལ་མི་རུང།

¹ མཆོད་ཁང་ལ་འགྲོ་རྒྱུའི་སྐོར་ཟབ་ཟབ་བྱོས་ཤིག། སྐྱེ་བོ་གླེན་པ་ཚོས་དམར་མཆོད་འབུལ་བ་ལས་སློབ་སྦྱོངས་བྱེད་པར་འགྲོ་བ་ལེགས་སོ། གང་ལགས་ཟེར་ན་དེ་ཚོས་བདེན་རྫུན་ཇི་ཡིན་མི་ཤེས་སོ།

² ཁྱོད་ཀྱིས་སྨྲ་བའི་སྔོན་དུ་བསམ་བློ་ཐོང་ཞིག་དང། དཀོན་མཆོག་གི་མདུན་དུ་བྲེལ་ཟིང་ངང་ནས་མནའ་གང་ཡང་མ་སྐལ་ཞིག ཁོང་ནི་མཐོ་རིས་སུ་ཡོད་པ་དང་ཁྱོད་ནི་ས་གཞིའི་སྟེང་དུ་ཡོད་པའི་སྟབས་ཀྱི་ཁྱོད་ཀྱི་བཤད་དགོས་པ་ལས་ལྷག་པ་མ་ཤོད་ཅིག

³ ཁྱོད་ཀྱིས་སེམས་ཁྲལ་ཇི་ཙམ་མང་བ་བྱས་ན་ཡང་དེ་ཙམ་གྱིས་ཁྱོད་ལ་རྨི་ལམ་ངན་པ་གཏོང་སྲིད་པ་དང། ཁྱོད་ཀྱིས་ཇི་ཙམ་མང་བ་བཤད་པས་དེ་ཙམ་གྱིས་ཁྱོད་ཀྱིས་གླེན་གཏམ་མང་བ་བཤད་སྲིད་དོ།

⁴ དེར་བརྟེན་ཁྱོད་ཀྱིས་དཀོན་མཆོག་ལ་མནའ་སྐྱལ་བ་དེ་ཁྱོད་ཀྱི་དེ་གང་མགྱོགས་སྒྲུབ་པར་བྱོས་ཤིག ཁོང་ལ་གླེན་པ་ཞིག་གི་ཕན་ཐོག་མེད་དོ། ཁྱོད་ཀྱིས་ཇི་ལྟར་མནའ་སྐྱལ་བ་དེ་སྒྲུབ་པར་བྱོས་ཤིག

⁵ ཁས་ལེན་ཞུས་ནས་སྒྲུབ་མ་ཐུབ་པ་ལས། ཁས་ལེན་ཙ་བ་ནས་མ་ཞུས་པ་དེ་ལེགས་སོ།

⁶ ཁྱོད་རང་ཉིད་ཀྱི་གཏམ་གྱི་སྡིག་པའི་ནང་ཚུད་དུ་མ་བཅུག་ཅིག ངས་དེ་ལྟར་ཞུ་རྒྱུ་མ་བྱུང་ཞེས་དཀོན་མཆོག་གི་བླ་མའི་མདུན་དུ་དེ་ལྟར་སྨྲ་མ་དགོས་པར་གྱིས་ཤིག ཁྱོད་ཐོག་དཀོན་མཆོག་ཅི་ལ་ཁྲོ་འཇུག་གམ། ཁྱོད་ཀྱིས་ཇི་ལྟར་འབད་སྒྲུབ་གྱིས་པ་དེ་ཅིའི་ཕྱིར་ཁོང་ལ་མེད་པར་བཟོ་རུ་འཇུག་གམ།

⁷ ཁྱོད་ཀྱིས་རྨི་ལམ་མང་པོ་བཏང་བ་དང་ཕན་མེད་ཀྱི་ལས་ཀ་མང་པོ་བྱས་པ་དང། ཡང་ན་ཁྱོད་ཀྱིས་གཏམ་མང་པོ་བཤད་ན་ཡང་ཕན་ཐོག་མེད། ཁྱོད་རང་ངེས་པར་དུ་དཀོན་མཆོག་ལ་བགས་སེམས་ཞུས་དགོས་སོ༎

མི་ཚེ་ལ་ཕན་ཐོག་མེད།

⁸ ཁྱོད་ཀྱིས་དབུལ་པོར་གཞུང་གི་མནར་གཅོད་གཏོང་བ་དང་དེ་ཚོར་ཁྲིམས་དྲང་དང་ཐོབ་ཐང་མ་སྤྲད་པ་མཐོང་སྐབས། དེ་ལ་ཁྱོད་ཧ་ལས་མི་དགོས་སོ། ལས་བྱེད་པ་ཚང་མ་ལ་དེ་ཚོའི་གོང་མས་སྲུང་སྐྱོབ་བྱེད་པ་དང། དེ་ཚོ་གཉིས་ལ་དེ་ཡི་གོང་མས་སྲུང་སྐྱོབ་བྱེད་དོ།

⁹ རྒྱལ་པོ་ཞིག་ཡིན་ཀྱང་སྟོན་ཐོག་ལ་བློས་འགེལ་བྱེད་དགོས་སོ།

¹⁰ ཁྱོད་དངུལ་ལ་དགའ་ན་ནམ་ཡང་འདོད་པ་མ་ཁེངས་སོ། ཁྱོད་ཕྱུག་པོར་འགྱུར་འདོད་ན་ཁྱོད་ཀྱིས་འདོད་པ་རྣམས་ཁྱོད་ལ་མི་ཐོབ་བོ། དེ་ནི་ཕན་ཐོག་མེད་དོ།

¹¹ ཁྱོད་རང་ཇི་ཙམ་ཕྱུག་པོར་འགྱུར་བས་དེ་ཙམ་གྱི་མང་བ་ཁྱོད་ཀྱིས་གསོས་དགོས། ཁྱོད་ལ་མཁེ་བཟང་ཐོབ་རྒྱུ་དེ་ནི་ཁྱོད་ཕྱུག་པོ་ཡིན་པའི་ཤེས་བྱ་གཅིག་པོ་དེ་ཡིན་ནོ།

¹² ལས་མི་ཚོ་ལ་ཟ་རྒྱུ་སྡང་ན་ཡང་མི་སྡང་ན་ཡང། ཁོ་ལ་མཚན་མོ་གཉིད་སྐྱིད་པོ་ཁུག་པར་བྱེད་དོ། མི་ཕྱུག་པོ་ཞིག་ལ་རྒྱུ་དངོས་མང་པོ་ཡོད་པའི་རྐྱེན་གྱིས་སེམས་འཁྲལ་བྱེད་བཞིན་གཉིད་མ་ཁུག་པར་སྡོད་ཀྱི་ཡོད་དོ།

¹³ ངས་ཛམ་གླིང་འདིའི་ནང་ལ་འཇིགས་སྣང་ཆེན་པོ་ཞིག་མཐོང་གིས་འདུག མི་ཚོས་རང་ལ་དངུལ་དགོས་མཁའི་སྐབས་སུ་ཕན་ཐོག་པའི་ཆེད་དུ་གསོགས་པར་བྱེད་དོ།

¹⁴ འོན་ཀྱང་དེ་ཚོ་ཚང་མ་ཚོང་འབྲེལ་ཐབས་སྡུག་ཞིག་ནང་རླག་པར་བྱེད་པ་དང། རང་གི་བུ་ཕྲུག་ཚོར་ལྷག་མ་གང་ཡང་འཇོག་རྒྱུ་མེད་པར་རྫོགས་པར་བྱེད་དོ།

¹⁵ ང་ཚོ་འཛམ་གླིང་འདིའི་ནང་ཇི་ལྟར་ཡོང་བ་ལྟར་གང་ཡང་མེད་པར་འགྲོ་དགོས་སོ། ང་ཚོས་དཀའ་ངལ་ཇི་ཙམ་རྒྱབ་ན་ཡང་རང་དང་མཉམ་དུ་གང་ཡང་འཁྱེར་མི་ཐུབ་བོ།

¹⁶ དེ་བདེན་པ་མ་ཡིན། ང་ཚོ་ཡོང་བ་ལྟར་འགྲོ་དགོས་སོ། ང་ཚོས་དཀའ་ལས་རྒྱབ་པ་དང་རླུང་ལ་འཇུས་ཐབས་བྱས་ན་ཡང་ང་ཚོ་ལ་སྒྲུབ་འབྲས་ཇི་ཐོབ་བམ།

¹⁷ ང་ཚོའི་མི་ཚེ་ནི་མུན་པའི་ནང་དང་སྡུག་བསྔལ་དང་སེམས་ཁྲལ་དང་ཁོང་ཁྲོ་དང་ན་ཚའི་ངང་ལ་སྐྱེལ་དགོས་སོ།

¹⁸ ངས་ཤེས་པ་རྣམས་ནི། དཀོན་མཆོག་གིས་མི་ཞིག་ལ་མི་ཚེ་ཐུང་ཐུང་ཞིག་གནང་བ་དེ་ལ་དཀའ་ལས་རྒྱབ་པ་རྣམས་ཟ་འཐུང་བྱ་བ་དང་ལོངས་སུ་སྤྱོད་རྒྱུ་དེ་ལེགས་ཤོས་ཡིན་ནོ། དེ་ནི་མིའི་སྐྱལ་བ་ཡིན་ནོ།

¹⁹ གལ་སྲིད་དཀོན་མཆོག་གིས་མི་ཞིག་ལ་རྒྱུ་ནོར་ལོངས་སྤྱོད་སོགས་གནང་ཡོད་ན། ཁོ་ངལ་རྩོལ་བྱེད་པ་དེ་ཚོར་བཀའ་དྲིན་བསམ་ནས་ལོངས་སུ་སྤྱོད་དུ་འཇུག་དགོས་སོ། དེ་ནི་དཀོན་མཆོག་གི་གསོལ་རས་ཡིན་ནོ།

²⁰ དཀོན་མཆོག་གིས་ཁོ་ལ་དགའ་སྐྱིད་བྱེད་དུ་འཇུག་ཡོད་སྟབས་ཁོའི་མི་ཚེ་ཐུང་ཐུང་ཡིན་པར་དེ་ལ་སེམས་ཁྲལ་བྱེད་མི་དགོས་སོ༎