སྟོན་པ། 4 - Tibetan Old Testament 2011

¹ དེ་ནས་ངས་འཛམ་གླིང་འདིའི་ནང་ལ་ཁྲིམས་དྲང་མིན་པ་བྱུང་བཞིན་པ་རྣམས་ལ་མཐོང་བ་དང། མནར་གཅོད་མྱོང་མཁན་ཚོ་ངུ་བཞིན་ཡོད་པ་དང་དེ་ཚོ་ལ་སུས་ཀྱང་རོགས་མི་བྱེད་དོ། གང་ལགས་ཟེར་ན། མནར་གཅོད་གཏོང་མཁན་ཚོའི་ཕྱོགས་སུ་དབང་ཤུགས་ཡོད། དེ་ཚོ་ལ་སུས་ཀྱང་རོགས་མི་བྱེད་དོ།

² འཚི་ནས་འགྲོ་ཟིན་པ་ཚོར་ངས་ཡིད་སྨོན་བྱེད། ད་ལྟ་གསོན་པོར་གནས་ཡོད་པ་ཚོ་ལས་དེ་ཚོ་ལེགས་པ་ཡོན།

³ དེ་ཚོ་གཉིས་ལས་ཀྱང་ནམ་ཡང་མ་སྐྱེས་པ་འཛམ་གླིང་འདིའི་ནང་ལ་དྲང་བདེན་མིན་པ་མི་མཐོང་མཁན་ཚོ་བདེའོ།

⁴ མི་ཚོས་ཅིའི་ཕྱིར་ལམ་འགྲོ་ཡོང་བའི་ཆེད་ཧ་ཅང་དཀའ་ལས་རྒྱབ་ཀྱི་ཡོད་པ་ངས་ཤེས་བྱུང། དེ་ཚོས་རང་གི་ཁྱིམ་མཚེས་ཚོར་ཁྲག་དོག་བྱེད་ཀྱི་ཡོད་པའི་རྐྱེན་གྱི་ཡིན་ནོ། འོན་ཀྱང་དེ་ལ་ཕན་ཐོག་མེད་པ་དང། དེ་ནི་རླུང་ལ་དེད་པ་ལྟ་བུ་ཡིན་ནོ།

⁵ དེ་ཚོས་སུ་ཞིག་རང་གི་ལག་པ་བསྡམས་ནས་རང་ཉིད་ལྟོགས་ཤི་རྒྱབ་འཇུག་མཁན་དེ་གླེན་པ་རེད་ཟེར་རོ།

⁶ ཕལ་ཆེར་དེ་ཡིན་སྲིད་ན་ཡང་སྦ་ར་གང་ཡོད་ནས་སེམས་ལ་ཞི་བདེ་ཡོད་པ་དེ་ནི་རྟག་ཏུ་ལག་པ་གཉིས་བྲེལ་ཟིང་བྱེད་ནས་རླུང་ལ་འཛིན་ཐབས་བྱེད་པ་དེ་ལས་ལེགས་སོ།

⁷ མི་ཚེའི་ནང་ཕན་ཐོག་མེད་པའི་བྱ་བ་གཞན་ཞིག་ང་ལ་དོ་སྣང་བྱུང་ངོ།

⁸ འདིར་མི་གཅིག་རང་སྡོད་མཁན་ཞིག་ཡོད་པ་དང། ཁོ་ལ་བུ་དང་སྤུན་མེད་དོ། འོན་ཀྱང་ཁོ་རྟག་ཏུ་ལས་ཀ་བྱེད་བཞིན་ཡོད་པ་དང་ཁོ་ལ་ཡོད་པའི་རྒྱུ་ནོར་དེས་ཁོའི་འདོད་པ་ཁེངས་ཀྱི་མེད་དོ། ཁོས་སུའི་ཆེད་དུ་དཀའ་ལས་དེ་ལྟར་རྒྱབ་ཀྱི་ཡོད་པ་དང་རང་ཉིད་ལ་བདེ་བ་གང་ཡང་སྤྲོད་ཀྱི་མེད་པ་རེད་དམ། དེ་ལ་ཡང་སྙིང་པོ་གང་ཡང་མེད་པ་དང་དེ་དཀའ་སྡུག་ངང་ལ་འཚོ་རྒྱུ་ཡིན་ནོ།

⁹ གཉིས་ནི་གཅིག་ལས་བཟང་ངོ། གང་ལགས་ཟེར་ན། དེ་གཉིས་ཀྱི་ལས་ཧ་ཅང་སྒྲུབ་འབྲས་ཆེ་བ་བྱེད་ཐུབ།

¹⁰ གཉིས་ནས་གཅིག་འགྱེལ་བ་ཡིན་ན་གཞན་དེས་ཁོ་ལ་ཡར་སློང་རྒྱུར་རོགས་བྱེད་ཐུབ་བོ། འོན་ཀྱང་སུ་ཞིག་གཅིག་པོ་ཡིན་པ་དེ་འགྱེལ་བར་འགྱུར་བ་དེ་ནི་ཧ་ཅང་ཐབས་ཞན་པོ་ཡིན། གང་ལགས་ཟེར་ན། ཁོ་ལ་རོགས་བྱེད་མི་སུ་ཡང་མེད་དོ།

¹¹ གྲང་བའི་སྐབས་སུ་མི་གཉིས་མཉམ་དུ་ཉལ་བ་ཡིན་ན་དྲོ་པོར་གནས་ཐུབ་ཡོང། འོན་ཀྱང་ཁོ་རང་ཉིད་གཅིག་པོས་དྲོ་པོ་ཇི་ལྟར་བཟོ་ཐུབ་བམ།

¹² མི་གཅིག་ལ་འཕམ་ཐུབ་པ་དང་གཉིས་ཀྱིས་ཕར་ལ་བདོང་ལན་བྱེད་ཐུབ་པར་འགྱུར། སྐུད་པ་གསུམ་གྱི་བཟོས་པའི་ཐག་པ་དེ་ཆད་རྒྱུ་ཁག་པོ་ཡོད་དོ།

^13-14 སྐྱེ་བོ་ཞིག་དབུལ་པོ་ནས་རང་གི་ཡུལ་གྱི་རྒྱལ་པོར་འགྱུར་སྲིད་པའམ། བཙོན་ནས་ཞུགས་ཁྲིར་གནས་སྲིད་དོ། འོན་ཀྱང་ཁོ་ལོ་རྒས་པའི་སྐབས་སུ་བསླབ་བྱ་མ་ལེན་པར་གླེན་པ་ལྟར་བྱེད་པ་ཡིན་ན། མི་ན་གཞོན་ཞིག་དབུལ་ཞིང་ཤེས་རབ་དང་ལྡན་པ་ཡིན་ན་ཁོ་ལེགས་པ་ཡིན་ནོ།

¹⁵ ངས་འཛམ་གླིང་འདིའི་ནང་སྡོད་པའི་མི་ཚང་མའི་སྐོར་བསམ་བློ་བཏང་ནས། དེ་ཚོའི་ཁྲོད་དུ་སྐྱེ་བོ་ན་གཞོན་ཞིག་གི་རྒྱལ་ཚབ་བཟུང་མཁན་ཞིག་ཡོད་པ་ཤེས་བྱུང།

¹⁶ རྒྱལ་པོ་ཞིག་གིས་དབང་བསྒྱུར་བྱས་པའི་འོག་ཏུ་མི་མང་གི་གྲངས་འབོར་གྱི་ཚད་མེད་ན་ཡང། ཁོང་གྲོང་ཟིན་སྐབས་ཁོང་གིས་ཇི་ལྟར་གནང་བ་ལ་སུས་ཀྱང་བཀའ་དྲིན་བསམ་ཤེས་མི་བྱེད་དོ། དེ་ལ་སྙིང་པོ་མེད་ཅིང་དེ་ནི་རླུང་གིས་རྗེས་སུ་དེད་པ་ལྟ་བུ་ཡིན་ནོ༎