སྟོན་པ། 12 - Tibetan Old Testament 2011

¹ དེར་བརྟེན་ཁྱོད་ན་གཞོན་ཡིན་པའི་དུས་སུ་དཀའ་ངལ་གྱི་ཉི་མ་དང་ལོ་རྒས་པའི་སྐབས་སུ་ཁྱོད་ཀྱིས་ངའི་མི་ཚེ་ལ་ལོངས་སྤྱོད་མེད་བརྗོད་རྒྱུའི་སྔོན་དུ་ཁྱོད་ཀྱི་བཀོད་པ་པོ་ལ་དྲན་པར་བྱོས་ཤིག

² དེ་ནི་ཉི་ཟླ་དང་སྐར་མའི་འོད་ཁྱོད་ལ་མི་གསལ་ཞིང་ཆར་པའི་སྤྲིན་དེ་ནམ་ཡང་མི་ཡལ་བའི་སྐབས་ཡིན་ནོ།

³ དེ་ནས་ཁྱོད་སྐྱོབ་པའི་ལག་ངར་འདར་བ་དང། ད་ལྟ་ཁྱོད་ཀྱི་རྐང་པ་ཤུགས་ཆེན་པོ་ཡོ་པ་དེཉམ་རྒུད་དུ་འགྱུར་བ་དང། ཁྱོད་ཁ་ཟས་ཟ་བར་ཁྱོད་ཀྱི་སོ་ཉུང་གྲགས་པ་དང། ཁྱོད་ཀྱིས་གསལ་པོ་བལྟ་བར་མིག་ཧ་ཅང་མི་གསལ་བར་འགྱུར་རོ།

⁴ རྒྱ་ལམ་གྱི་སྒྲ་དེ་ཁྱོད་ཀྱི་རྣ་བས་མི་ཐོས་སོ། རང་འཐག་འཐག་པའི་སྒྲ་ཡང་ན་རོལ་མོ་དཀྲོལ་སྐབས་ཀྱི་སྒྲ་དེ་ཁྱོད་ཀྱིས་ཐོས་པར་དཀའ་བ་ཡིན་ནོ། འོན་ཀྱང་བྱིའུས་གཞས་ཀྱི་ཁྱོད་ཀྱི་གཉིད་དཀྲོག་པར་བྱེད་དོ།

⁵ ཁྱོད་ས་མཐོ་པོར་འགྲོ་རྒྱུར་འཇིགས་པ་དང་གོམ་པ་སྤོས་རྒྱུར་ཉེན་ཁར་འགྱུར་བ་དང། ཁྱོད་ཀྱི་སྐྲ་དཀར་པོར་འགྱུར་བ་དང། ཁྱོད་རང་ཉིད་འགྲོ་མི་ཐུབ་པ་དང་ཁྱོད་ཀྱི་འདོད་པ་རྣམས་རླགས་པར་འགྱུར་རོ། ང་ཚོའི་མཐའ་མའི་ངལ་གསོའི་གནས་སུ་འགྲོ་བ་དང་དེ་ནས་རྒྱ་ལམ་སྟེངདུ་མྱ་ངན་བྱེད་མཁན་ཡོང་བར་འགྱུར།

⁶ དངུལ་གྱི་ལྕགས་ཐག་དཀྲོལ་བ་དང་གསེར་གྱི་ཞུ་མར་འགྱེལ་ནས་ཆགས་པར་འགྱུར། ཁྲོན་པའི་ཐག་པ་ཆད་པར་འགྱུར་བ་དང། ཆུ་སྣོད་དུམ་བུར་ཆགས་པར་འགྱུར་རོ།

⁷ ང་ཚོའི་ལུས་པོ་སའི་རྡུལ་དུ་ཕྱིར་ལོག་པ་དང། དཀོན་མཆོག་གིས་ང་ཚོར་གནང་བའི་མི་ཚེའི་དབུགས་དེ་ཁོང་སར་ཕྱིར་འགྲོ་བར་འགྱུར།

⁸ སྙིང་པོ་མེད། སྙིང་པོ་མེད། སློབ་དཔོན་གྱིས་དེ་ཚོ་ཚང་མ་ལ་སྙིང་པོ་མེད་ཅེས་སྨྲས་སོ༎

མཐའ་བསྡོམས།

⁹ འོན་ཀྱང་སློབ་དཔོན་ནི་ཤེས་རབ་ཅན་ཡིན་སྟབས། ཁོང་གིས་ཇི་ལྟར་ཤེས་པར་མི་མང་ཚོར་མུ་མཐུད་སློབ་སྟོན་གྱིས་སོ། ཁོང་གིས་གཏམ་དཔེ་རྣམས་སློབ་སྦྱོངས་བྱས་ནས། དེ་ཚོའི་བདེན་པའི་སྐོར་ལ་དྲང་པོའི་ཐོག་ནས་རྟགས་དཔྱད་བྱེད་དོ།

¹⁰ སློབ་དཔོན་གྱིས་སེམས་གསོའི་ཚིག་འཚོལ་ཐབས་བྱས་ན་ཡང་དེས་བྲིས་པའི་ཚིག་རྣམས་དྲང་པོ་ཡིན་ནོ།

¹¹ སྐྱེ་བོ་ཤེས་རབ་ཅན་ཚོའི་གསུང་རྣམས་ལུག་རྫི་ཚོའི་ལུག་ལ་ལམ་སྟོན་བྱེད་པའི་བེར་ཀ་ནོ་པོ་ལྟ་བུ་ཡིན་ཞིང། མཁོ་སྒྲུབ་གྱིས་པའི་གཏམ་དེ་རྣམས་དམ་པོར་བཙུགས་པའི་ཟེེར་ལྟར་བརྟན་པོར་གནས་སོ། དེ་ཚོ་ནི་ང་ཚོ་ཚང་མའི་ལུག་རྫི་གཅིག་པོ་དཀོན་མཆོག་གིས་གནང་བ་དེ་ཡིན་ནོ།

¹² ངའི་བུ། ཟབ་ཟབ་བྱ་རྒྱུ་གནས་ཚུལ་གཞན་ཞིག་ཡོད། དེབ་རྣམས་བྲིས་རྒྱུ་ལ་མཐའ་མེད་པ་དང་སློབ་སྦྱོངས་མང་པོ་བྱས་པ་ལ་ཁྱོད་ཐང་ཆད་པར་འགྱུར།

¹³ འདི་ཚོ་ཚང་མའི་རྗེས་སུ་ཤོད་རྒྱུ་གཅིག་རང་ཡོད། དེ་ནི་དཀོན་མཆོག་ལ་འཇིགས་ཤིག་དང་ཁོང་གི་བཀའ་རྒྱ་རྣམས་ལ་ཉོན་ཞིག གང་ལགས་ཟེར་ན། མི་རྣམས་བཀོད་པའི་དོན་ནི་དེ་ཚོ་ཚང་མ་ཡིན་ནོ།

¹⁴ དཀོན་མཆོག་གིས་ང་ཚོས་གྱིས་པ་ཚང་མ་ལ་བཟང་ངན་ཅི་ཡིན་རུང་གསང་བའི་ཐོག་ཏུ་གྱིས་པ་བཅས་ལ་ཞིབ་དཔྱོད་གནང་བར་འགྱུར་རོ༎