སྟོན་པ། 10 - Tibetan Old Testament 2011

¹ སྦྲང་མ་ཤི་རོ་ཚོས་དྲི་བཟང་གི་བུམ་པ་ཡོངས་རྫོགས་ལ་དྲི་ངན་བྲོ་རུ་འཇུག་པ་དང། གླེན་པའི་སྤྱོད་ལམ་ཕྲན་བུས་ཤེས་རབ་ཆེ་ཤོས་མེད་པར་བཟོས་པའོ།

² ཤེས་རབ་ཅན་ཞིག་གི་བྱ་བ་བཟང་པོ་བྱ་རྒྱུ་དང་གླེན་པ་ཞིག་གིས་ནོར་འཁྲུལ་བྱ་རྒྱུ་དེ་རང་བཞིན་གྱི་གཤིས་ཀ་ཡིན་ནོ།

³ ཁོའི་གླེན་པའི་རྟགས་དེ་ཁོ་ལ་ལམ་དུ་འཕྲད་མཁན་རྒྱུས་མེད་སྐྱེ་བོ་ཚོས་ཀྱང་ཤེས་པར་འགྱུར། ཁོས་ཚང་མར་ཁོ་རང་གླེན་པ་ཡིན་པ་དེ་ཤེས་སུ་འཇུག་གོ

⁴ སྲིད་སྐྱོངས་པས་ཁྱོད་ལ་ཁྲོ་ཡོད་ན་ཁྱོད་ཀྱིས་དགོངས་པའི་ཞུ་ཡིག་ཁོང་ལ་མ་ཕུལ་ཞིག ཁྱོད་ལྷིང་འཇགས་ངང་གནས་པ་ཡིན་ན་ཉེས་པ་ཚབ་ཆེ་ལ་ཡང་བཟོད་གསོལ་གནང་སྲིད་དོ།

⁵ འཛམ་གླིང་འདིའི་ནང་ངས་མཐོང་བའི་སྲིད་སྐྱོངས་མཁན་ཚོས་བཟོས་པའི་དྲང་མིན་ཞིག་འདིར་ཡོད།

⁶ སྐྱེ་བོ་གླེན་པ་ཚོར་དབང་ཆའི་གོ་གནས་སྤྲད་པ་དང། སྐྱེ་བོ་ཕྱུག་པོ་ཚོ་ལ་སྤྲད་མེད་དོ།

⁷ ངས་ཚེ་གཡོག་ཚོ་རྟའི་སྟེང་དང་སྐུ་དྲག་ཚོ་ཚེ་གཡོག་ལྟར་རྐང་པའི་གོམ་བགྲོད་ཀྱི་འགྲོ་བཞིན་པ་མཐོང་བྱུང་།

⁸ ཁྱོད་ཀྱིས་དོང་ཞིག་འབྲུ་བ་ཡིན་ན་ཁྱོད་ནི་དེའི་ནང་ལྷུང་བར་འགྱུར། ཁྱོད་ཀྱིས་རྩིག་པ་བཤིགས་པ་ཡིན་ན་སྦྲུལ་གྱིས་སོ་རྒྱབ་པར་འགྱུར།

⁹ ཁྱོད་རྡོ་གཤགས་སའི་ནང་ལས་ཀ་བྱེད་ཀྱི་ཡོད་ན་ཁྱོད་ལ་རྡོས་རྨས་པར་འགྱུར། ཁྱོད་ཀྱིས་ཤིང་བཤགས་པ་ཡིན་ན་དེ་སྐབས་ཁྱོད་རྨས་པར་འགྱུར།

¹⁰ ཁྱོད་ཀྱི་རྟ་རེ་ལ་རྣོ་མེད་པ་དང་ཁྱོད་ཀྱི་དེ་ལ་རྣོ་མ་འདོན་པ་ཡིན་ན་ཁྱོད་ཀྱིས་དེ་བེད་སྤྱོད་བྱ་སྐབས་ཤུགས་མང་པོ་རྒྱབ་དགོས་སོ། འཆར་གཞི་སྔོན་ལ་གཏིང་ན་དེ་ནི་ཤེས་རབ་ཅན་ཡིན་ནོ།

¹¹ སྦྲུལ་འདུལ་རྒྱུ་ཤེས་ན་ཡང་དེ་སྔོན་དུ་སྦྲུལ་ལ་སོ་རྒྱབ་ཏུ་འཇུག་ན་ཕན་ཐོག་མེད་དོ།

¹² སྐྱེ་བོ་ཤེས་རབ་ཅན་ཞིག་གིས་ཇི་ལྟར་སྨྲས་པ་ལ་ཆེ་མཐོང་ཡོང་བ་དང། གླེན་པ་ཞིག་གིས་གཏམ་གྱིས་རང་ཉིད་མེད་པར་བཟོ་བ་དང།

¹³ ཁོས་གླེན་གཏམ་གྱིས་འགོ་འཛུགས་པ་དང་སྨྱོ་སྤྱོད་ཀྱིས་མཐའ་རྫོགས་པར་འགྱུར།

¹⁴ གླེན་པ་ཞིག་གིས་མུ་མཐུད་གཏམ་གླེན་བྱེད་དོ། རྗེས་སུ་ཇི་ལྟར་ཡོང་བ་སུས་ཀྱང་མི་ཤེས་ཤིང་ང་ཚོ་འཆི་བའི་རྗེས་ལ་ཇི་འདྲ་ཡོང་བ་སུས་ཀྱང་བརྗོད་མི་ཐུབ་བོ།

¹⁵ རང་གི་ཁྱིམ་དུ་འགྲོ་བའི་ལམ་ཡང་ངོ་མ་ཤེས་མཁན་ཧ་ཅང་གླེན་པ་ཞིག་གི་གཅིག་པོ་ཐང་མ་ཆེད་བར་དུ་ལས་ཀ་བྱེད་དོ།

¹⁶ ཡུལ་ཞིག་ལ་ཉམས་མྱོང་མེད་པ་རྒྱལ་པོ་ན་གཞོན་ཞིག་ཡོད་པ་དང་། དེའི་དཔོན་རིགས་རྣམས་མཚན་གང་ཐུགས་སྤྲོ་གཏོང་མཁན་བྱུང་བ་ཡིན་ན་དེ་དཀའ་ངལ་ངང་ལྷུང་ངོ།

¹⁷ རྒྱལ་པོ་རང་གི་ཡུལ་ལུང་ཐག་ཆོད་གནང་མཁན་དང། དེའི་དཔོན་རིགས་དུས་ཚོད་རན་པོར་ཁ་ཟས་ཟ་བ་དང། རང་ཉིད་ཚོད་ཟིན་ནས་ར་མ་བཟི་མཁན་ཡུལ་དེ་བསོད་བདེ་ཅན་ཡིན་ནོ།

¹⁸ སྐྱེ་བོ་ཞིག་རང་གི་ཁང་པའི་ཐོག་བཟོ་བཅོས་བྱ་རྒྱུར་ཧ་ཅང་ལེ་ལོ་ཅན་ཡིན་ན། དེ་ནས་ཐིགས་པ་རྒྱབ་ཅིང་ཁང་པ་གཞིགས་པར་འགྱུར་རོ།

¹⁹ ཐུགས་སྤྲོས་ཁྱོད་དགའ་བར་བྱེད་པ་དང་རྒུན་ཆང་གྱི་སྤྲོ་བར་བྱེད་ན་ཡང་དངུལ་མེད་ན་དེ་ཆོ་གཉིས་ཀ་མི་ཡོང་ངོ།

²⁰ ཁུ་སིམ་པོའི་ངང་ནས་རྒྱལ་པོར་སྐྱོན་བརྗོད་དང་ངོ་རྒོལ་མ་བྱེད་ཅིག ཁྱོད་རང་ཉིད་ཀྱི་ཉལ་ཁང་དུ་གསང་བའི་ཐོག་ནས་ཕྱུག་པོར་ཡང་སྐྱོན་བརྗོད་མ་བྱེད་ཅིག དེ་མིན་བྱིའུ་ཞིག་གིས་འཕྲིིན་དེ་འཁྱེར་ནས་དེ་ཚོ་ལ་ཁྱོད་ཀྱི་སྨྲས་པ་དེ་ལབ་སྲིད་དོ༎