བཀའ་ལུང་། 6 - Tibetan Old Testament 2011

བཀའ་ཁྲིམས་རླབས་ཆེན།

¹ ཁྱོད་ཚོར་སློབ་སྟོན་བྱེད་ཕྱིར་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ང་ལ་བཀའ་གནང་བའི་ཁྲིམས་ཚང་མ་ནི་འདི་ཡིན་ནོ། ཁྱོད་ཚོས་དབང་འཛིན་བྱེད་ཕྱིར་འཛུལ་གྲབ་ཡོད་པའི་ཡུལ་དེའི་ནང་དུ་དེ་དག་རྩིས་སྲུང་བྱོས་ཤིག

² ཁྱོད་ཚོ་སྲོག་གནས་ཡུན་རིང་ལ་ཁྱོད་ཚོ་དང་ཁྱོད་ཚོའི་བུ་བརྒྱུད་ཚོས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ལ་གུས་བཀུར་ཞུ་དགོས་པ་དང་། ངས་ཁྱོད་ཚོར་སྤྲད་པའི་ཁོང་གི་ཁྲིམས་ཡོངས་རྫོགས་སྲུང་དགོས། དེ་ལྟར་བྱས་པ་ཡིན་ན་ཁྱོད་ཚོ་ཡུལ་དེར་ལོ་མང་རིང་དུ་འཚོ་བར་འགྱུར།

³ ཀྱེ་ཨིསི་རཱཨེལ་པ་རྣམས། དེ་དག་ལ་ཉན་ནས་རྩིས་སྲུང་བྱོས་ཤིག་དང་། ཁྱོད་ཚོའི་ལས་དོན་ཚང་མ་འགྲུབ་ཅིང་། ཁྱོད་ཚོ་མི་རིགས་སྟོབས་ཆེན་ཞིག་ཏུ་འགྱུར་རྒྱུ་དང་། སྔར་གཙོ་བོ་དཀོན་མཆོག་ང་ཚོའི་མེས་པོ་རྣམས་ཀྱི་ཀོན་མཆོག་གིས་དབུ་མནའ་ཞེས་གནང་བ་ལྟར། ཕྱུག་པོ་དང་ས་ལུད་འཛོམས་པོའི་ཡུལ་དེར་ཁྱོད་ཚོ་གནས་སྡོད་བྱེད་པར་འགྱུར།

⁴ ཀྱེ་ཨིསི་རཱཨེལ་པ་རྣམས། གཙོ་བོ་དཀོན་མཆོག་གཅིག་པོ་ང་ཚོའི་དཀོན་མཆོག་ཡིན་པ་དེ་དྲན་གསོ་བྱོས་ཤིག

⁵ ཁྱོད་ཀྱིས་རང་གི་གཙོ་བོ་དཀོན་མཆོག་ལ་སེམས་ཉིད་ཡོངས་དང་ཁྱོད་ཀྱི་སྲོག་ཆང་མ་དང་། ཁྱོད་ཀྱི་ནུས་པ་ཇི་ཡོད་ཀྱི་སྒོ་ནས་བརྩེ་བ་ཞུ་དགོས།

⁶ ངས་དེ་རིང་ཁྱོད་ཚོར་བཤད་པའི་བཀའ་རྒྱ་འདི་དག་ནམ་ཡང་མ་བརྗེད་པར།

⁷ དེའི་སྐོར་རང་གི་བུ་ཕྲུག་རྣམས་ལ་སློབ་སྟོན་བྱོས་ཤིག ཡང་ཁྱོད་ཚོ་ནང་དུ་གནས་སྐབས་དང་དེ་བཞིན་ཕྱི་རུ་འགྲོ་སྐབས་དང་། ངལ་གསོ་བརྒྱབ་སྐབས་ལས་ཀ་བྱེད་སྐབས་སོགས་དུས་ཚོས་གང་རུང་ལ་དེའི་སྐོར་ཡང་ཡང་གཏམ་གླེང་བྱོས་ཤིག

⁸ དྲན་རྟེན་གྱི་ཚུལ་དུ་དེ་དག་རང་གི་དཔུང་པར་འསྡམས་ཤིང་། ཐོད་པའི་སྒང་དུ་སྒྲོགས་དགོས་པ་དང་།

⁹ དེ་དག་རང་གི་ཁྱིམ་གྱི་སྒོའི་དང་རེ་བཞི་དང་རྒྱལ་སྒོའི་ཁར་བྲིས་དགོས་སོ༎

བཀའ་རྒྱ་བརྩི་སྲུང་མི་བྱེད་མཁན་རྣམས་ལ་ཟོན་རྡ།

¹⁰ ཁྱོད་ཚོའི་མེས་པོ་ཨབ་ར་ཧམ་དང་ཨི་སཱག་དང་ཡ་ཀོབ་ལ་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་དམ་བཅའ་གནང་བ་ལྟར་ཁོང་གིས་ཁྱོད་ཚོ་རང་གིས་མ་བཟོས་པའི་གྲོང་ཁྱེར་རྒྱ་ཆེ་ཞིང་ཕུན་སུམ་ཚོགས་པ་དང་ལྡན་པའི་ཡུལ་ཞིག་གནང་རྒྱུ་ཡིན་པ་དང་།

¹¹ ཁང་ཁྱིམ་རྣམས་ནོར་རྫས་བཟང་པོས་གང་ཞིང་། ཁྱོད་ཚོས་བྲུ་མ་དགོས་པའི་ཁྲོན་པ་ཁག་དང་། དེ་བཞིན་འདེབས་ལས་བྱེད་མ་དགོས་པའི་རྒུན་ཚལ་དང་ཁ་སྐྱུར་འབྲས་བུའི་ལྡུམ་ར་སོགས་སྐྱེས་པར་འགྱུར། གཙོ་བོ་དཀོན་མཆོག་གིས་ཁྱོད་ཚོ་ཡུལ་དེར་འཁྲིད་ཕེབས་དུས་ཁྱོད་ཚོར་ཁ་ཟས་འདོད་པ་གང་ཡོད་འབྱོར་ངེས་སོ།

¹² འོན་ཀྱང་ཁྱོད་ཚོ་ཨི་ཇིབ་དུ་བྲན་གཡོག་གི་གནས་སྟངས་ནས་འདྲེན་པ་གནང་མཁན་གཙོ་བོ་དཀོན་མཆོག་ལ་ནམ་ཡང་མ་བརྗེད་པར་བྱོས་ཤིག

¹³ གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ལ་གུས་བཀུར་བྱོས་ཤིག་དང། ཁོང་གཅིག་པོར་བསྙེན་བཀུར་ཞུས་ཞིག ཁོང་གི་མཚན་གཅིག་པོར་དམ་བཅའ་འབུལ་ཞིག

¹⁴ ཁྱོད་ཚོའི་མཐའ་འཁོར་གྱི་མི་རིགས་ཚོས་ལྷ་རྟེན་གཞན་སོགས་ལ་བསྙེན་བཀུར་མ་བྱེད་ཅིག

¹⁵ གལ་ཏེ་ཁྱོད་ཚོས་ལྷ་རྟེན་གཞན་ལ་མཆོད་པ་ཡིན་ན། གཙོ་བོ་དཀོན་མཆོག་གི་ཐུགས་ཁྲོ་དྲག་པོ་དེ་ཁྱོད་ཚོའི་ཐོག་ཏུ་མེ་བཞིན་བབ་སྟེ། དེས་ཁྱོད་ཚོ་ཡོངས་སུ་འཇིག་པར་འགྱུར། གང་ལགས་ཟེར་ན། ཁྱོད་ཚོ་དང་མཉམ་དུ་བཞུགས་ཡོད་པའི་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁོང་ལ་ཁ་གཏད་ཞུ་མཁན་རྣམས་ལ་ཐུགས་བཟོད་གནང་བར་མི་འགྱུར་རོ།

¹⁶ ཁྱོད་ཚོས་མ་སཱ་བྱ་བའི་གནས་སུ་གང་བྱས་པ་བཞིན་གཙོ་བོ་དཀོནམཆོག་ཁྱོད་ཚོའི་དཀོན་མཆོག་ལ་ཚོད་ལྟ་མ་ཞུས་ཤིག

¹⁷ ཁོང་གིས་གནང་བའི་ཁྲིམས་ཚང་མ་སྲུང་བར་བློ་ཐག་ཆོད་ཅིག

¹⁸ གཙོ་བོ་དཀོན་མཆོག་གི་གཟིགས་སྣང་དུ་གང་བཟང་ཞིང་རིགས་པ་དེ་བྱོས་ཤིག་དང་། ཁྱོད་ཚོའི་ལས་དོན་ཚང་མ་འགྲུབ་པར་འགྱུར། གཙོ་བོ་དཀོན་མཆོག་གིས་སྔར་ཁྱོད་ཚོའི་མེས་པོ་རྣམས་ལ་དབུ་མནའ་བཞེས་གནང་བའི་ཡུལ་ས་ལུས་འཛོམས་པོ་དེ་ཁྱོད་ཚོས་བདག་འཛིན་བྱེད་ངེས་སོ།

¹⁹ ཁོང་གིས་ཇི་ལྟར་དབུ་མནའ་བཞེས་གནང་བ་བཞིན་ཁྱོད་ཚོས་རང་གི་དགྲ་བོ་རྣམས་ཕྱིར་སྐྲོད་བྱེད་པར་འགྱུར།

²⁰ མ་འོངས་པ་ན་ཁྱོད་ཚོའི་བུ་ཕྲུག་ཚོས་ཁྱོད་ཚོ་ལ། གཙོ་བོ་དཀོན་མཆོག་ང་ཚོའི་དཀོན་མཆོག་གིས་ཁྲིམས་འདི་དག་སྲུང་དགོས་ཅེས་ང་ཚོར་བཀའ་གནང་བ་དེ་གང་ཡིན་ནམ། ཞེས་འདྲི་རྩད་བྱེད་སྐབས།

²¹ ཁྱོད་ཚོས། དེ་ཚོ་ལ་ལན་དུ་དེ་ལྟར་སྨྲ་དགོས། སྔར་ང་ཚོ་ཨི་ཇིབ་ཀྱི་རྒྱལ་པོའི་བྲན་གཡོག་ཏུ་གནས་སྐབས། གཙོ་བོ་དཀོན་མཆོག་གིས་ཉིད་ཀྱི་མཐུ་སྟོབས་ཆེན་པོས་ང་ཚོར་སྐྱབས་གནང་ངོ་།

²² ཁོང་གིས་མཛད་པའི་ངོ་མཚར་ཆེ་བའི་ལྟས་རྣམས་དང་། ཨི་ཇིབ་པ་རྣམས་དང་དེ་ཚོའི་རྒྱལ་པོ་དང་། ཁོང་གི་ལས་བྱེད་པ་ཁག་གི་ཐོག་ཏུ་གནང་བའི་འཇིགས་སུ་རུང་བའི་མཛད་འཕྲིན་རྣམས་ང་ཚོའི་མིག་ངོར་མཐོང་ངོ་།

²³ སྔར་ཁོང་གིས་ང་ཚོའི་མེས་པོ་རྣམས་ལ་ཇི་ལྟར་དབུ་མནའ་བཞེས་གནང་བ་བཞིན། ཡུལ་འདི་ང་ཚོར་གནང་བའི་དོན་དུ་ཁོང་གིས་ང་ཚོ་ཨི་ཇིབ་ནས་ཕྱིར་བཏོན་གནང་ནས་འཁྲིད་ཕེབས་པ་ཡིན་ནོ།

²⁴ དེ་རྗེས་གཙོ་བོ་དཀོན་མཆོག་ང་ཚོའི་དཀོན་མཆོག་གིས་ང་ཚོ་ལ་ཁྲིམས་འདི་དག་ཚང་མ་སྲུང་སྟེ། ཁོང་ལ་གུས་ཞབས་ཞུ་དགོས་པའི་བཀའ་གནང་ཡོད། གལ་ཏེ་དེ་བཞིན་བྱས་པ་ཡིན་ན་ཁོང་གིས་ང་ཚོར་རྒྱུན་དུ་སྲུང་སྐྱོབ་གནང་ཞིང་། ང་ཚོའི་མི་རིགས་ལ་ཕུན་སུམ་ཚོགས་པ་འཛོག་གནང་བར་གྱུར།

²⁵ གལ་སྲིད་ང་ཚོའི་དམ་ཚིག་ལྡན་པའི་སྒོ་ནས་ཁོང་གིས་བཀའ་རྒྱ་ཚང་མ་གནང་བ་དེ་སྲུང་བ་ཡིན་ན། ཁོང་ཐུགས་མཉེས་པར་འགྱུར་རོ༎