བཀའ་ལུང་། 5 - Tibetan Old Testament 2011

བཀའ་འཁྲིམས་བཅུ།

¹ ཨིསི་རཱཨེལ་མི་མང་ཚང་མ་བཀོང་སྟེ་མོ་ཤེས་སྨྲས་པ། ཀྱེ་ཨིསི་རཱཨེལ་པ་རྣམས། ངས་དེ་རིང་ཁྱོད་ཚོར་སྤྲད་བཞིན་པས་བཀའ་ཁྲིམས་ཚང་མ་ཉོན་ཞིག དེ་དག་བསླབ་ནས་ངེས་པར་རྩིས་སྲུང་བྱོས་ཤིག

² རི་བོ་སི་ནཨི་ཁར་གཙོ་བོ་དཀོན་མཆོག་ང་ཚོའི་དཀོན་མཆོག་གིས་དམ་བཅའ་ཞིག་གནང་ཡོད་ཅིང་།

³ དམ་བཅའ་དེ་ནི་ང་ཚོའི་ཕ་མེས་མཉམ་དུ་གཅིག་པུར་མ་ཡིན་པར། དེང་དུས་གསོན་པོར་གནས་བཞིན་པའི་ང་ཚོའི་མི་རབས་ཡོངས་མཉམ་དུ་ཡང་གནང་བ་ཡིན་ནོ།

⁴ རི་བོའི་སྒང་དུ་གཙོ་བོ་དཀོན་མཆོག་གིས་ཁྱོད་ཚོའི་མདུན་དུ་མེའི་དཀྱིལ་ནས་གསུང་གླེང་མཛད་སྐབས།

⁵ ཁོང་གིས་གང་གསུངས་པའི་བཀའ་རྣམས་ཁྱོད་ཚོར་ཤོད་ཕྱིར་ང་ནི་གཙོ་བོ་དཀོན་མཆོག་དང་ཁྱོད་ཚོའི་བར་ལ་ལངས་ནས་བསྡད་པ་ཡིན། གང་ལགས་ཟེར་ན། ཁྱོད་ཚོས་མེ་མཐོང་ནས་འཇིགས་ཏེ་རི་བོར་འཛེགས་མ་ནུས་པ་ཡིན་ནོ། གཙོ་བོ་དཀོན་མཆོག་གིས་གསུངས་པ།

⁶ ཁྱོད་ཚོ་ཨི་ཇིབ་ཀྱི་བྲན་འཁོལ་ནས་ཕྱིར་བཏོན་བྱེད་མཁན་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་དེ་ང་ཡིན་ནོ།

⁷ ང་མ་གཏོགས་པར་ལྷ་རྟེན་གཞན་སུ་ལའང་བསྟེན་མི་རུང་།

⁸ ཁྱོད་ཚོས་རང་གི་ཕྱིར་དུ་གནམ་དང་ས་གཞིའམ། ས་གཞིའི་འོག་གི་ཆུའི་ནང་ཡོད་པའི་དངོས་པོ་གང་ཞིག་གི་གཟུགས་བརྙན་མ་བཟོ་ཞིག

⁹ སྐུ་འདྲའམ་གཟུགས་བརྙན་སོགས་ལ་ཕྱག་འཚལ་བ་དང་བསྙེན་བཀུར་མ་བྱེད་ཅིག གང་ལགས་ཟེར་ན། ང་ཁྱོད་ཚོའི་དཀོནམཆོག་གཙོ་བོ་དཀོན་མཆོག་གཅིག་རང་ཡིན་པས་ང་ལ་ཁ་གཏད་བྱེད་མཁན་རྣམས་ལ་ངས་བཟོད་བསྲན་མི་བྱེད་ཅིང་། ང་ལ་སྡང་བ་བྱེད་མཁན་རྣམས་ལ་ངས་དེ་ཚོའི་མི་རབས་གསུམ་པ་དང་བཞི་པའི་བར་དུ་ཉེས་ཆད་གཏོང་རྒྱུ་ཡིན་ནོ།

¹⁰ འོན་ཀྱང་ང་ལ་བརྩེ་བ་བྱེད་མཁན་དང་ངའི་བཀའ་སྲུང་མཁན་རྣམས་ལ་ངས་དེ་ཚོའི་མི་རབས་སྟོང་ཕྲག་མང་པོའི་བར་དུ་བྱམས་སྐྱོང་བྱེད་རྒྱུ་ཡིན་ནོ།

¹¹ ངའི་མིང་དེ་དམིགས་ཡུལ་ངན་པ་ཞིག་སྒྲུབ་པའི་ཕྱིར་དུ་མ་ལེན་ཅིག གང་ལགས་ཟེར་ན། ང་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་གི་མིང་དེ་དོན་མེད་དུ་ལེན་མཁན་ཚོར་ངས་ཉེས་ཆད་གཏོང་རྒྱུ་ཡིན་ནོ།

¹² གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ངས་ཇི་ལྟར་བཀའ་བསྒོས་བྱས་པ་བཞིན་ངལ་གསོ་བའི་ཞག་དེ་བསྲུང་དགོས་པ་དང་དེ་ལ་དམ་པར་བརྩིས་དགོས་སོ།

¹³ ཉིན་ཞག་དྲུག་བར་དུ་ལས་ཀ་བྱེད་ཆོག་པའི་གནང་བ་ཡོད།

¹⁴ འོན་ཀྱང་ཉིན་ཞག་བདུན་པ་དེ་ནི་ངའི་ཆེད་དུ་ཟུར་དུ་དབྱེ་བའི་ངལ་གསོའི་ཉིན་མོ་ཡིན་པས། དེ་ཉིན་ཁྱོད་རང་དང་ཁྱོད་ཀྱི་བུ་ཕྲུག་དང་གཡོག་པོ་དང་། སེམས་ཅན་སོགས་དང་། དེ་བཞིན་ཁྱོད་ཚོའི་ཡུལ་དུ་གནས་པའི་ཕྱི་རྒྱལ་མི་རིགས་ཚོས་ཀྱང་ལས་ཀ་བྱེད་མི་ཆོག ཁྱོད་ཚོའི་བྲན་གཡོག་ཚོས་ཀྱང་ཁྱོད་ཚོ་ལྟར་དེ་ཉིན་ངལ་གསོ་བྱེད་དགོས་སོ།

¹⁵ སྔར་ཁྱོད་ཚོ་ཨི་ཇིབ་དུ་བྲན་གཡོག་གི་གནས་སྟངས་སུ་གནས་པ་དང་། དེ་རྗེས་ང་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་རང་གི་མཐུ་སྟོབས་ཀྱི་སྒོ་ནས་ཁྱོད་ཚོར་རྐྱབས་གྲོགས་ཇི་ལྟར་བྱས་པ་དེ་ལ་དྲན་གསོ་བྱོས་ཤིག དེ་བས་ན་ཁྱོད་ཚོས་ངལ་གསོ་བའི་ཞག་དམ་པ་དེ་སྲུང་དགོས་ཅེས་ངས་བཀའ་བསྒོས་བྱས་པ་ཡིན་ནོ།

¹⁶ ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ངས་ཁྱོད་ཚོར་སྟེར་རྒྱུ་ཡིན་པའི་ཡུལ་གྱི་ནང་དུ་ཁྱོད་ཚོར་བདེ་སྐྱིད་ཡོང་བ་དང་། དེར་ཁྱོད་ཚོ་ཚེ་རིང་པོ་གནས་ཐུབ་ཕྱིར་རང་གི་ཕ་མ་གཉིས་ལ་གུས་ཞབས་བྱོས་ཤིག

¹⁷ སྲོག་གཅོད་མ་བྱེད།

¹⁸ ལོག་གཡེམ་མ་བྱེད།

¹⁹ རྐུན་མ་མ་རྐུ།

²⁰ ནག་ཉེས་མེད་པར་སུ་ལའང་སྐྱོན་བརྗོད་མ་བྱེད་ཅིག

²¹ ཁྱོད་ཀྱིས་མི་གཞན་གྱི་ཆུང་མར་འདོད་པ་མ་བྱེད་ཅིག དེའི་ཁང་པ་དང་ས་ཞིང་སོགས་དང་། དེའི་བྲན་གཡོག་དང་། དེའི་ཕྱུགས་ཟོག་དང་། དེའི་བོང་བུ་རྣམས། གཞན་ཡང་དེའི་རྒྱུ་དངོས་གང་རུང་ལ་འདོད་རྔམས་མ་བྱེད་ཅིག

²² རི་ཁར་འཛོམས་པའི་སྐབས་སུ་གཙོ་བོ་དཀོན་མཆོག་གིས་ཁྱོད་ཚོ་ཚང་མར་གནང་བའི་བཀའ་ཁྲིམས་ནི་འདི་དག་ཡིན་ཅིང་། ཁོང་གིས་མེ་དང་སྤྲིན་མཐུག་པོའི་དཀྱིལ་ནས་གསུང་སྐད་ཆེན་པོས་ཁྱོད་ཚོར་གསུང་གླེང་གནང་སྟེ། བཀའ་རྒྱ་འདི་དག་གནང་བ་མ་གཏོགས་དེ་མིན་བཀའ་རྒྱ་གཞན་ཞིག་གནང་བ་མ་ཡིན་ནོ། དེ་རྗེས་ཁོང་གིས་བཀའ་རྒྱ་དེ་དག་རྡོ་ལེབ་གཉིས་ཀྱི་ཐོག་ཏུ་བྲིས་གནང་མཛད་དེ་ང་ལ་གནང་ངོ་༎

མི་མང་རྣམས་ལ་འཇིག་སྣང་སྐྱེས་པ།

²³ རི་བོ་ཡོངས་སུ་མེ་འབར་བའི་ཚེ་མུན་པའི་དཀྱིལ་ནས་ཁྱོད་ཚོས་ཁོང་གི་གསུང་ཐོས་ཏེ། ཁྱོད་ཚོའི་འགོ་དཔོན་དང་སྡེ་རིགས་ཀྱི་རྒན་པོ་རྣམས་ངའི་རྩར་འོང་སྟེ་སྨྲས་པ།

²⁴ ང་ཚོས་མེའི་དཀྱིལ་ནས་གཙོ་བོ་དཀོན་མཆོག་ང་ཚོའི་དཀོན་མཆོག་གི་གསུང་ཐོས་པ་དེའི་སྒོ་ནས། ཉིད་ཀྱི་མངའ་ཐང་དང་གཟི་བརྗིད་དེ་ང་ཚོར་མངོན་པར་མཛད་དོ། དཀོན་མཆོག་མི་དང་མཉམ་དུ་གསུང་གླེན་གནང་སྐབས་སུའང་མི་གསོན་པོར་གནས་པ་ང་ཚོས་དེ་རིང་མཐོང་བྱུང་།

²⁵ ད་ཡང་སྐྱར་ང་ཚོ་འཆི་བའི་འཇིགས་པ་དེ་ནང་ཅིའི་ཕྱིར་མྱང་དགོས་སམ། འཇིགས་སུ་རུང་བའི་མེ་དེས་ང་ཚོ་ལ་མེད་པར་བཟོ་ཉེན་ཡོད། ང་ཚོའི་དཀོན་མཆོག་གཙོ་བོ་དཀོན་མཆོག་གིས་གསུང་གླེང་གནང་བ་དེ་ཡང་སྐྱར་ང་ཚོས་ཐོས་ན། ང་ཚོ་ཤི་ངེས་ཅན་ཡིན་ནོ།

²⁶ མེའི་དཀྱིས་ནས་གསོན་པོའི་དཀོན་མཆོག་གི་གསུང་དེ་ཐོས་པའི་རྗེས་སུ་མི་སུ་ཞིག་ད་བར་གསོན་པོར་གནས་ཐུབ་ཡོད་དམ།

²⁷ ཀྱེ་མོ་ཤེ་ཁྱེད་རང་ཡང་སྐྱར་ཕེབས་ནས་ང་ཚོའི་དཀོན་མཆོག་གཙོ་བོ་དཀོན་མཆོག་གིས་གང་གསུངས་པ་དེ་གསན་ཏེ། སླར་ཕྱིར་ལོག་ཕེབས་ཏེ་ཁོང་གིས་གང་གསུང་པ་ཐམས་ཅད་ང་ཚོར་གསུངས་ཤིག་དང་། ང་ཚོས་དེ་དག་ཉན་ཏེ་རྩིས་བསྲུང་ཞུ་གི་ཡིན་ནོ།

²⁸ གནས་ཚུལ་འདི་དག་གསན་ཏེ་གཙོ་བོ་དཀོན་མཆོག་གིས་ང་ལ་གསུངས་པ། མི་འདི་ཚོས་གང་སྨྲས་པ་རྣམས་ངས་ཐོས་བྱུང་བས། དེ་དག་འོས་ཤིང་འཚམ་པ་སྨྲས་ཡོད།

²⁹ དེ་ཚོས་རྒྱུན་དུ་དེ་བཞིན་འཚོར་སྣང་སྐྱེས་སྟེ། ང་ལ་རྩིས་གུས་བྱས་ཤིང་ངའི་བཀའ་རྒྱ་ཚང་མ་བསྲུང་པ་ཡིན་ན་ཅི་མ་རུང་། དེ་ལྟར་བྱས་པ་ཡིན་ན་དེ་ཚོ་དང་དེ་ཚོའི་མི་རྒྱུད་རྣམས་ལ་རྟག་ཏུ་བདེ་སྐྱིད་ཡོང་ངེས་སོ།

³⁰ ད་ཁྱོད་སོང་ནས་དེ་ཚོར་སོ་སོའི་གུར་གྱི་ནང་དུ་ལོག་དགོས་ཅེས་སྨྲོས་ཤིག

³¹ འོན་ཀྱང་མོ་ཤེ་ཁྱོད་ནི་ང་དང་མཉམ་དུ་འདིར་སྡོད་ཅིག ངས་ཁྱོད་ལ་ངའི་བཀའ་ཁྲིམས་ཚང་མ་བཤད་རྒྱུ་ཡིན། ངས་སྤྲོད་རྒྱུ་ཡིན་པའི་ཡུལ་དེར་མི་མང་ཚོས་ངའི་བཀའ་ཁྲིམས་ཚང་མ་སྲུང་ཕྱིར་དེ་དག་ལ་སློབ་སྟོན་བྱོས་ཤིག

³² ཀྱེ་ཨིསི་རཱཨེལ་གྱི་མི་མང་རྣམས། ཁྱོད་ཚོའི་དཀོན་མཆོག་གཙོ་བོ་དཀོན་མཆོག་གིས་ཁྱོད་ཚོར་གནང་བའི་བཀའ་རྒྱ་རྣམས་སྲུང་རྒྱུའི་བློ་ཐག་ཆོད་ཅིག ཁོང་གི་བཀའ་ཁྲིམས་གཅིག་ལའང་མ་རྩིས་པར་མ་བྱེད་ཅིག

³³ དེ་ཚོ་ཚང་མ་སྲུང་པ་ཡིན་ན། ཁྱོད་ཚོའི་ལས་དོན་ཚང་མ་འགྲུབ་ཅིང་། ཁྱོད་ཚོས་བདག་ཏུ་འཛིན་རྒྱུ་ཡིན་པའི་ཡུལ་དེར་ཁྱོད་ཚོ་མུ་མཐུད་ཀྱིས་གནས་སྡོད་བྱེད་པར་འགྱུར་རོ༎