བཀའ་ལུང་། 33 - Tibetan Old Testament 2011

ཨིསི་རཱཨེལ་གྱི་སྡེ་རིགས་རྣམས་ལ་མོ་ཤེས་བྱིན་རླབས།

¹ དཀོན་མཆོག་གི་སྐྱེ་བོ་མོ་ཤེ་མ་གྲོངས་པའི་སྔོན་དུ་ཨིསི་རཱཨེལ་པ་རྣམས་ལ་བྱིན་རླབས་ཀྱི་སྨོན་ཚིག་གཤམ་གསལ་ལྟར་ཁྱབ་སྒྲགས་བྱས་པ་ནི།

² རི་བོ་སི་ནཨེ་རྩེ་ནས་གཙོ་བོ་དཀོན་མཆོག་ཕེབས། ཨེ་དྷོམ་ཁ་རུ་ཉི་མ་བཞིན་དུ་ཤར། པ་རན་རི་ནས་ཉིད་ཀྱི་འབངས་ཁར་འོད་ཟེར་འཕྲོས། ཕོ་ཉ་སྟོང་ཕྲག་བཅུ་རྣམས་ཁོང་མཉམ་ཡོད། ཁོང་གི་ཕྱག་གཡས་འབར་བའི་མེ་ལྕེ་ཡོད།

³ གཙོ་བོ་དཀོན་མཆོག་རང་གི་འབངས་ལ་བྱམས། ཉིད་ཀྱི་ཁོངས་སུ་གཏོགས་པར་སྲུང་སྐྱབས་མཛད། དེས་ན་ང་ཚོས་ཁོང་གི་ཞབས་ལ་ཕྱག་འཚལ་ལོ། ཁོང་གི་བཀའ་ལ་བརྩི་སྲུང་ཞུ་བར་བྱ།

⁴ ང་ཚོའི་མི་རིགས་ཡོངས་ཀྱི་ཚང་མ་ལས། ཤིན་ཏུ་རིན་ཐང་ཆེ་བའི་རྒྱུ་དངོས་བཞིན། མོ་ཤེས་གནང་བའི་ཁྲིམས་ནི་ང་ཚོས་སྲུང།

⁵ ཨིསི་རཱཨེལ་པ་ཡི་སྡེ་རིགས་ཐམས་ཅད་དང་། འགོ་བྱེད་དང་བཅས་པ་གནས་གཅིག་ཏུ་འཛོམས་པའི་སྐབས། གཙོ་བོ་དཀོན་མཆོག་ཉིད་ཀྱི་མི་འབངས་ཨིསི་རཱཨེལ་གྱི་རྒྱལ་པོ་འགྱུར།

⁶ རུ་བྷེན་སྡེ་རིགས་སྐོར་ལ་མོ་ཤེས་གསུངས། དེ་ཚོའི་མི་རིགས་གྲངས་ཉུང་ཡིན་ནའང་། རུ་བྷེན་ནམ་ཡང་ཤི་བར་མ་འགྱུར་ཤོག།

⁷ ཡ་ཧུ་དཱའི་སྡེ་རིགས་སྐོར་ལ་ཁོང་གིས་གསུངས། ཀྱེ་གཙོ་བོ་དཀོན་མཆོག་ཁྱེད་ཀྱི་ནི། དེ་ཚོས་མགོན་སྐྱབས་ཞུ་བར་གསན་པར་མཛོད། དེ་ཚོ་སྡེ་རིགས་གཞན་དང་གཅིག་འགྱུར་མཛོད། ཀྱེ་གཙོ་བོ་དཀོན་མཆོག་ཁྱེད་ཀྱིས་དེ་ཚོའི་ཆེད་དུ་འཐབ་པར་མཛོད། དགྲ་བོར་རྒོལ་ཕྱིར་དེ་ཚོར་སྐྱབས་གྲོགས་མཛོད།

⁸ ལེ་ཝིའི་སྡེ་རིགས་སྐོར་ལ་ཁོང་གིས་གསུངས། ཀྱེ་གཙོ་བོ་དཀོན་མཆོག་ཁྱེད་ཀྱིས་རང་ཉིད་ནས། ཨུ་རིམ་དང་ནི་ཐུམ་མིམ་བརྒྱུད་ནས། ཁྱེད་ཀྱི་ཐུགས་དགོངས་གསལ་པོར་མངོན་པར་མཛོད། དམ་ཚིག་ལྡན་པའི་ལེ་ཝིའི་པས་སྒོ་ནས། ཞབས་ཏོག་པ་རྣམས་བརྒྱུད་དེ་དེ་ལྟར་མཛོད། ཁྱེད་ཀྱིས་དེ་ཚོ་མ་སཱ་བྱ་བ་རུ། ཚོད་བལྟ་མཛད་དེ་མེ་རི་བཱ་བྱ་བའི། ཆུ་ཡི་འགྲམ་དུ་དེ་ཚོར་དྲང་བདེན་དང་། ཚུལ་མཐུན་ཡིན་པའི་དཔང་པོ་མཛད་པར་གནང་།

⁹ དེ་ཚོས་ཕ་མ་སྤུན་དང་བུ་ཕྲུག་ལས། ལྷག་པར་ཁྱེད་ལ་མོས་ཤིང་ཤ་ཞེན་ཞུས། དེ་ཚོས་ཁྱེད་ཀྱི་བཀའ་རྣམས་སྲུང་བ་དང་། ཁྱེད་ཀྱི་དམ་བཅར་དམ་ཚིག་བརྟེན་པོར་གནས།

¹⁰ དེ་ཚོས་ཁྱེད་ཀྱི་མི་འབངས་རྣམས་ལ་ནི། ཁྱེད་ཀྱི་བཀའ་ཁྲིམས་སྲུང་བར་སློབ་སྟོན་དང་། ཁྱེད་ཀྱི་མཆོད་ཁྲིའི་སྟེང་དུ་དེ་ཚོས་དམར་མཆོད་འབུལ།

¹¹ ཀྱེ་གཙོ་བོ་དཀོན་མཆོག་ཁྱེད་ཀྱིས་ནི། དེ་ཚོའི་སྡེ་རིགས་སྟོབས་ཆེན་བཟོས་བར་གྲོགས་གནང་བར་མཛོད། དེ་ཚོས་ཅི་བྱས་ལས་ལ་མཉེས་པར་མཛོད། དེ་ཚོའི་དགྲ་བོར་ཚར་གཅོད་གནང་བར་མཛོད། དེ་དག་སླར་ཡང་ལངས་རྒྱུ་མེད་པར་མཛད།

¹² བྷེན་ཡ་མིན་གྱི་སྡེ་རིགས་སྐོར་ཁོང་གིས་གསུངས། སྡེ་རིགས་འདི་ལ་གཙོ་བོ་དཀོན་མཆོག་གིས། བྱམས་སྐྱོང་དང་ནི་སྲུང་སྐྱོབ་གནང་བར་མཛོད། ཁོང་གིས་དེ་ཚོར་ཉིན་གང་སྲུང་སྐྱོབ་གནང་། དེ་ཚོའི་ཁྲོད་དུ་ཁོང་ནི་བཞུགས་པར་མཛད།

¹³ ཡོ་སེབ་སྡེ་རིགས་སྐོར་ལ་ཁོང་གིས་གསུངས། གཙོ་བོ་དཀོན་མཆོག་ཁོང་གི་མནམ་གི་ཆར་ཆུ་དང་། ས་གཞིའི་འོག་གི་ཆུ་རྣམས་གནང་བས་རྐྱེན། དེ་ཚོའི་ཡུལ་ལ་བྱིན་གྱིས་བརླབས་པར་ཤོག།

¹⁴ ཉི་མས་ཡོངས་སུ་སྨིན་པའི་ཤིང་ཐོག་དང་། ནམ་དུས་སོ་སོའི་ཤིང་འབྲས་བཟང་ཤོས་ཀྱིས། དེ་ཚོའི་ཡུལ་དེ་བྱིན་གྱིས་བརླབས་པར་ཤོག།

¹⁵ དེ་ཚོའི་གནའ་བོའི་རི་བརྒྱུད་ས་ཁུལ་དུ། ཤིང་འབྲས་བཟང་ཤོས་དག་གིས་གང་བར་ཤོག།

¹⁶ མེ་ལྕེ་འབར་བཞིན་ཡོད་པའི་ཚེར་ཤིང་ནས། གསུང་གླེང་མཛད་མཁན་གཙོ་བོ་དཀོན་མཆོག་གི། ཐུགས་རྗེ་དང་ནི་བྱིན་རླབས་བཟང་པོ་ཡིས། དངོས་པོ་བཟང་པོས་ཡུལ་དེ་གང་བར་ཤོག། བྱིན་རླབས་འདི་རྣམས་ཡོ་སེབ་ལ་ཐོབ་ཤོག། གང་ལ་ཟེར་ན་རང་གི་སྤུན་དཀྱིལ་ནས། ཁོང་ནི་འགོ་དཔོན་ཡིན་པའི་རྐྱེན་གྱིས་སོ།

¹⁷ ཡོ་སེབ་རྒྱུད་ལ་ཡོད་པའི་ནུས་ཤུགས་དེ། བོ་གླང་ཞིག་གི་སྟོབས་དང་འདྲ། ནགས་ཀྱི་གླང་གི་ར་ཅོའི་ཤུགས་དང་མཚུངས། ཁོ་ཡི་ནུས་ཤུགས་ལྡན་པའི་ར་ཅོ་ནི། མ་ནསེ་སཱེ་ཡི་སྐྱེས་པ་སྟོང་མང་པོ་དང་། ཨེཕ་ར་ཡིམ་གྱི་སྐྱེས་པ་ཁྲི་ཕྲག་ཡིན། ཁོ་ཡིས་དེ་ཚོའི་ནུས་ཤུགས་ལ་བརྟེན་ནས། མི་རིགས་གཞན་རྣམས་བརྡུངས་ནས་ས་མཐར་སྐྱེལ།

¹⁸ ཛེ་བུ་ལུན་དང་ཨི་ས་ཀར་གྱི་ནི། སྡེ་རིགས་རྣམས་ཀྱི་སྐོར་ལ་ཁོང་གིས་གསུངས། ཛེ་བུ་ལུན་གྱི་རྒྱ་མཚོའི་ཚོང་དོན་རྣམས། འཕེལ་ཞིང་རྒྱས་པའི་བྱིན་རླབས་ལྡན་པར་ཤོག། ཨི་ས་ཀར་གྱི་ནང་གི་རྒྱུ་དངོས་རྣམས། ཁོང་གི་ཁྱིམ་གོང་དུ་འཕེལ་བར་ཤོག།

¹⁹ དེ་ཚོས་ཕྱི་རྒྱལ་བ་རྣམས་མགྲོན་འབོད་ཀྱིས། རང་གི་རི་བོར་མཆོད་འབུལ་བྱེད་པར་བྱ། དེ་ཚོས་མཚོ་དང་མཚོ་འགྲམ་བྱེ་མ་ལས། རྒྱུ་ནོར་ལོངས་སྤྱོད་མང་པོ་ཐོབ་པར་བྱ།

²⁰ གྷཌ་ཀྱི་སྡེ་རིགས་སྐོར་ལ་ཁོང་གིས་གསུངས། དེ་ཚོའི་ས་མཚམས་རྒྱ་ཆེར་གཏོང་གནང་བའི། གཙོ་བོ་དཀོན་མཆོག་དེ་ལ་བསྟོད་བསྔགས་འབུལ། སེང་གེས་ལག་དང་མགོ་པགས་ཧྲལ་བ་བཞིན། དེ་བཞིན་གྷད་ཀྱང་སྒུག་ནས་བསྡད།

²¹ དེ་ཚོས་ས་ཞིང་བཟང་ཤོས་བདག་ཉར་བྱས། དེ་ཚོར་སྡེ་དཔོན་ཞིག་གི་ཐོབ་སྐལ་སྤྲད། ཨིསི་རཱཨེལ་པ་ཡི་སྡེ་དཔོན་རྣམས་ཀྱི་ཚོགས། ས་གནས་གཅིག་ཏུ་འདུ་འཛོམས་བྱས་པའི་སྐབས། དེ་ཚོས་གཙོ་བོ་དཀོན་མཆོག་གི་བཀའ་ཁྲིམས་སྲུང་།

²² དཱན་གྱི་སྡེ་རིགས་སྐོར་ལ་ཁོང་གིས་གསུངས། དཱན་ནི་སེང་གེ་ན་གཞོན་ཞིག་ཡིན། ཁོ་ནི་བྷ་ཤཱན་ཡུལ་ནས་འཚོངས་ཤིང་འོངས།

²³ ནབ་ཏ་ལི་ཡི་སྡེ་རིགས་སྐོར་ལ་ཁོང་གིས་གསུངས། གཙོ་བོ་དཀོན་མཆོག་གི་ནི་ཐུགས་རྗེ་གྱིས། ནཕ་ཏ་ལི་ལ་བྱིན་རླབས་མང་པོ་ཐོབ། དེ་ཚོའི་ཡུལ་ནི་རྒྱ་མཚོ་གྷ་ལིལ་གྱི། ལྷོ་ཕྱོགས་བར་དུ་ཁྱབ་ནས་ཡོད་པ་ཡིན།

²⁴ ཨ་ཤེར་སྡེ་རིགས་སྐོར་ལ་ཁོང་གིས་གསུངས། སྡེ་རིགས་གཞན་ལས་ལྷག་པར་ཨ་ཤེར་ལ་ནི་བྱིན་རླབས་ཐོབ། བུ་སྤུན་རྣམས་ཀྱི་སྤྱན་གསལ་དུ་འགྱུར་ཞིང་། དེ་ཡི་ཡུལ་དུ་ཁ་སྐྱུར་པོའི་ཤིང་སྡོང་རྣམས། ཤིན་ཏུ་འཕེལ་རྒྱས་ཡོང་བར་ཤོག།

²⁵ ཁོ་ཡི་གྲོང་རྣམས་ལྕགས་ཀྱི་རྒྱལ་སྒོ་ཡིས། རྒྱུན་དུ་སྲུང་སྐྱོབས་བརྟན་པོར་བྱས་པས་རྐྱེན། དེ་ནི་རྒྱུན་དུ་བཙན་སར་གནས་པར་ཤོག།

²⁶ ཀྱེ་ཨིསི་རཱཨེལ་པ་ཡིས་མི་མང་རྣམས། ལྷ་རྟེན་སུ་ཞིག་ཁྱོད་ཀྱི་དཀོན་མཆོག་འདྲ་མཚུངས་མེད། ཁོང་ནི་གཟི་བརྗིད་མངའ་ཐང་ཆེན་པོའི་ངང་། མཁའ་དབྱིངས་བརྒྱུད་དེ་སྤྲིན་ལ་ཆིབས་མཛད་ནས། ཁྱོད་ལ་སྐྱབས་པའི་ཕྱིར་དུ་ཕེབས་པར་འགྱུར།

²⁷ དཀོན་མཆོག་ཁོང་གི་རྒྱུན་དུ་ཁྱོད་ལ་སྲུང་སྐྱོབ་མཛད། ཁོང་གི་མཐའ་མའི་ཕྱག་དེ་ཁྱོད་ཀྱི་མཛའ་གྲོགས་ཡིན། ཁྱོད་ཚོ་མདུན་དུ་བསྐྱོད་སྐབས་ཁོང་ཉིད་ཀྱིས། ཁྱོད་ཚོའི་དགྲ་རྣམས་མཐར་སྐྲོད་གནང་བར་མཛད། དེ་དག་ཡོངས་སུ་ཚར་གཅོད་བྱེད་དགོས་ཁྱོད་ལ་གསུངས།

²⁸ དེར་བརྟེན་ཡ་ཀོབ་རིགས་བརྒྱུད་རྣམས་ནི། འབྲུ་དང་རྒུན་ཆང་མང་བའི་སྲུང་ཅ་བཙེན་པོའི་ཡུལ། གནམ་གྱི་ཟིལ་པས་སྦང་བའི་ས་གནས་དེར། ཞི་བདེའི་ངང་དུ་འཚོ་ཞིང་གནས་པར་འགྱུར།

²⁹ ཀྱེ་ཨིསི་རཱཨེལ་ཁྱོད་ནི་བདེ་ཞིང་སྐྱིད། ཁྱོད་དང་འདྲ་བའི་གཞན་ཞིག་མེད། ཁྱོད་ནི་གཙོ་བོ་དཀོན་མཆོག་གིས་སྐྱབས་པའི་མི་རིགས་ཡིན ཁྱོད་ལ་སྐྱབས་དང་རྒྱལ་ཁ་གནང་བའི་ཕྱིར། གཙོ་བོ་དཀོན་མཆོག་ཁྱོད་ཀྱི་ཕུབ་དང་རལ་གྲི་བཞིན་དུ་འགྱུར། ཁྱོད་ཀྱི་དགྲ་རྣམས་མགོ་བོ་སྒུར་ཞིང་ཡོང་བའི་སྐབས། ཁྱོད་ཀྱིས་དེ་ཚོར་རྡོག་བརྫིས་གཏོང་བར་བྱ༎