བཀའ་ལུང་། 32 - Tibetan Old Testament 2011

¹ ཀྱེ་གནམ་དང་ས་གཞི་ང་ཡི་བཀའ་ཉོན། ང་ཡི་གཏམ་ལ་ལེགས་པར་ཉོན།

² ང་ཡི་བསླབ་བྱ་ཆར་ཐིག་བཞིན་དུ་འཛག། ས་གཞིར་ཟིལ་པ་བཞིན་དུ་ཆགས། རྩི་ཤིང་གསར་སྐྱེས་སྟེང་དུ་ངའི་བཀའ། གསར་དུ་སྐྱེས་པའི་རྩའི་སྟེང་དུ། ཡང་པོའི་ཆར་ཆུ་འབེབས་པ་ལྟར།

³ ང་ནི་གཙོ་བོ་དཀོན་མཆོག་མཚན་ལ་བསྟོད། ཁོང་གི་མི་འབངས་རྣམས་ཀྱིས་ནི། ཉིད་ཀྱི་མངའ་ཐང་ཆེན་པོའི་སྐོར། ཡོངས་སུ་ཁྱབ་སྒྲགས་བྱེད་པར་འགྱུར།

⁴ གཙོ་བོ་དཀོན་མཆོག་ཁྱོད་ཀྱི་བྲག་ལགས་ཤིང་། ཁོང་གི་སྤྱོད་ལམ་རྣམ་དག་དང་ཁྲིམས་དྲང་ལགས། ཁྱོད་ཀྱི་དཀོན་མཆོག་ཚུལ་དམ་ཚིག་ཅན་དང་མཐུན་དྲང་པོ་ལགས། ཉིད་ཀྱི་མཇད་འཕྲིན་ཀུན་ནི་དྲང་བདེན་ལགས།

⁵ འོན་ཀྱང་ཁྱོད་ཚོ་དམ་ཚིག་མི་མཐུན་ཞིང་། ཁོང་གི་འབངས་སུ་ཚུད་པར་མི་འོས་ཤིང་། ཁྱོད་ཆོ་སྡིག་ཅན་གཡོ་སྒྱུའི་མི་རིགས་ཡིན།

⁶ ཀྱེ་བློ་གྲོས་ཉམས་པའི་མི་རིགས་གླུན་པོ་ཁྱོད། ཁྱོད་ཚོས་རང་གི་གཙོ་བོ་དཀོན་མཆོག་ལ། སྤྱོད་ཚུལ་ཞུ་སྟངས་དེ་ལྟར་རང་ཡིན་ནམ། ཁོང་ནི་ཁྱོད་ཚོའི་ཡབ་དང་། བཀོད་པ་པོའང་ཡིན། ཁོང་གིས་ཁྱོད་ཚོར་མི་རིགས་གཅིག་ཏུ་བཀོད།

⁷ འདས་པའི་ལོ་མང་སྔོན་གྱི་དུས་ལ་དྲན། སྐབས་དེར་གང་བྱུང་ཁྱོད་ཚོའི་ཕ་ལ་དྲིས། གནའ་བོའི་དུས་ཀྱི་སྐོར་ལ་མི་རྒན་རྣམས་ལ་འདྲི།

⁸ བླ་ན་མེད་པའི་གཙོ་བོ་དཀོན་མཆོག་གིས། མི་རིགས་སོ་སོར་དེ་ཚོའི་ཡུལ་གནང་སྐབས། དཀོན་མཆོག་ཁོང་གི་ཕོ་ཉའི་གྲངས་བཞིན་དུ། མི་རྣམས་གང་དུ་སྡོད་དམ་ཟེར་ནས་ཁོང་གིས་དེ་ཚོར་བསྐོས།

⁹ འོན་ཀྱང་ཡ་ཀོབ་རིགས་རྒྱུད་ནི། ཉིད་ཀྱི་མི་འབངས་ཁོངས་སུ་འདམས་པར་མཛད།

¹⁰ ཁོ་ཚོ་འབྲོག་སྟོང་རྒྱུད་དེ་འགྲུལ་བའི་སྐབས། མི་མེད་རླུང་འཚུབ་ལྡན་པའི་འབྲོག་སྟོང་ནང་། ཁོང་གིས་དེ་ཚོར་སྐྱབས་དང་གསོ་སྐྱོང་མཛད། རང་ལ་སྐྱབས་བཞིན་ཁོ་ཚོར་སྐྱབས་གྲོགས་མཛད།

¹¹ བྱ་ཆེན་གླག་གིས་རང་གི་བྱ་ཕྲུག་ལ། ཤོག་པར་འཁྱེར་ཏེ་འཕུར་སྟངས་བསླབ་པ་བཞིན། གཙོ་བོ་དཀོན་མཆོག་གིས་ནི་ཨིསི་རཱཨེལ་ལ། ལྷུང་བའི་ཉེན་ལས་ཡོངས་སུ་སྐྱབས་པར་མཛད།

¹² ཕྱི་རྒྱལ་ལྷ་རྟེན་སུས་ཀྱང་རོགས་མེད་པར། དཀོན་མཆོག་གཅིག་པོས་ཉིད་འབངས་དབུ་འཁྲིད་མཛད།

¹³ ཁོང་གིས་དེ་ཚོར་རི་བརྒྱུད་ས་ཁུལ་དུ། རྒྱལ་སྲིད་སྐྱོང་བའི་དབང་ཆ་གནང་བར་མཛད། ཞིང་དུ་སྐྱེས་པའི་སྟོན་ཐོག་ཁོ་ཚོས་ཟས། བྲག་རིའི་གསེབ་ཏུ་ནགས་ཀྱི་སྦྲང་རྩི་རྙེད། རྡོ་ཧྲུག་ལྡན་པའི་ས་ཞིང་ཁུལ་དུའང་། དེ་ཚོའི་ཁ་སྐྱུར་པོའི་ཤིང་སྡོང་རྒྱས་ཤིང་འཕེལ།

¹⁴ དེ་ཚོའི་བ་དང་ར་མོའི་འོ་མ་མང་། ཕྱུགས་ཟོག་ར་ལུག་བཟང་ཤོས་ཁོ་ཚོར་ཡོད། ལེགས་ཤོས་གྲོ་དང་ཤིན་ཏུ་བཟང་བའི་རྒུན་ཆང་དེ་ཚོར་ཡོད།

¹⁵ གཙོ་བོ་དཀོན་མཆོག་ཉིད་ཀྱི་མི་འབངས་ནི། ལོངས་སྤྱོད་རྒྱས་པས་ངོ་ལོག་མཁན་དུ་འགྱུར། ལུས་སྟོབས་རྒྱས་ཤིང་ཁ་ཟས་མང་བའི་རྐྱེན། རང་གི་བཀོད་པ་དཀོན་མཆོག་ལའང་སྤངས། རང་གི་མངའ་ཐང་ཆེ་བའི་སྐྱབས་མགོན་དེའང་སྤངས།

¹⁶ དེ་ཚོས་སྐུ་འདྲར་མཆོད་པས་ཁོང་ལ་ཞེ་སྡང་བཟོས། དེ་ཚོས་ལས་ངན་གྱིས་ནི་ཁོང་ལ་ཐུགས་ཁྲོ་བཟོས།

¹⁷ མེས་པོས་དེ་སྔ་ནམ་ཡང་ངོ་མ་ཤེས་པས། ཨིསི་རཱཨེལ་པ་ཡི་རྩིས་སྲུང་མ་ཞུས་པའི། རྫུན་གྱི་ལྷ་རྟེན་རྣམས་ལ་དམར་མཆོད་འབུལ།

¹⁸ རང་གི་མངའ་ཐང་ཆེ་བའི་སྐྱབས་མགོན་དཀོན་མཆོག་ལ། རང་ལ་ཚེ་སྲོག་གནང་མཁན་ཁོང་ལ་ནི། དེ་ཚོས་བརྗེད་པར་བྱས།

¹⁹ གཙོ་བོ་དཀོན་མཆོག་གིས་ནི་གཟིགས་པ་དང་། ཐུགས་ཁྲོ་བཞེས་ཤིང་ཉིད་ཀྱི་བུ་ཕྲུག་སྤངས།

²⁰ སེམས་གཤིས་གྱོང་ཞིང་དམ་འགལ་མི་རིགས་ལ། ད་ཕྱིན་ངས་ནི་སྐྱབས་གྲོགས་མི་བྱ་བར། དེ་ཚོར་ཅི་འབྱུང་ང་ཡིས་ལྟ་བར་བྱ་ཞེས་གསུངས།

²¹ སྐུ་འདྲའི་སྒོ་ནས་དེ་ཚོས་ང་ལ་ཁྲོ་བ་བསླངས། དཀོན་མཆོག་ཟེར་བའི་ལྷ་རྣམས་དཀོན་མཆོག་མིན། དེ་ཚོའི་སྒོ་ནས་ང་ལ་ཞེ་སྡང་བསླངས། ཕན་མེད་མི་རིགས་སྒོ་ནས་དེ་ཚོར་ཁོང་ཁྲོ་བསླངས་རྒྱུ་ཡིན། བླུན་པོའི་མི་རིགས་སྒོ་ནས་དེ་ཚོར་ཞེ་སྡང་བསླངས་རྒྱུ་ཡིན།

²² ང་ཡི་ཁྲོ་བ་མེ་ལྟར་འབར་བ་དང་། ས་གཞིའི་དངོས་པོ་ཇི་ཡོད་འཚིག་པར་འགྱུར། དེ་ནི་ས་འོག་གླིང་དུ་སླེབས་པ་དང། རི་བོའི་མང་གཞི་རྣམས་ཀྱང་འཚིག་པར་འགྱུར།

²³ ང་ནི་ནམ་ཡང་དེ་ཚོ་ཡི་ཐོག་ཏུ། རྒྱུན་ཆད་མེད་པའི་རྐྱེན་ངན་འཁྱེར་ཡོང་ཤིང་། དེ་ཚོའི་ཐོག་ཏུ་ང་ཡི་མདའ་རྣམས་འཕང་རྒྱུ་ཡིན།

²⁴ དེ་ཚོ་ལྟོགས་ཤིང་ཚ་བས་ཤི་རྒྱུ་དང་། ནད་གཞི་དྲག་པོས་ཡོངས་སུ་ཤི་བར་འགྱུར། ཁོ་ཚོར་རྒོལ་ཕྱིར་ནགས་ཀྱི་གཅན་གཟན་རྣམས་ནི་གཏོང་རྒྱུ་དང་། ཁོ་ཚོར་སོ་ནི་བརྒྱབ་ཕྱིར་སྦྲུལ་རྣམས་གཏོང་བར་བྱ།

²⁵ སྲང་ལམ་ཁུལ་དུ་དམག་གི་འཆི་བ་འདྲེན། ཁང་ཁྱིམ་རེ་རེར་དངངས་སྐྲག་ཆེན་པོས་ཁྱབ། ཕོ་མོ་ན་གཞོན་རྣམས་ཀྱང་ཤི་ངེས་ཤིང་། མི་རྒན་བྱིས་པ་རྣམས་ཀྱང་མི་ཐར་རོ།

²⁶ ངས་ནི་དེ་དག་ཡོངས་སུ་ཚར་བཅད་དེ། སུས་ཀྱང་དེ་དག་དྲན་གསོ་མི་བྱེད་དོ།

²⁷ རང་གི་འབངས་ལ་འཕམ་རྒུད་བཟོ་མཁན་དེ། ང་རང་ཡིན་པས་དེ་ཚོའི་དགྲ་བོ་ལ། ང་ཚོ་རྒྱལ་བྱུང་ཟེར་བའི་ང་རྒྱལ་ཇི་ལྟར་སྤྲད་ཐུབ་ཡོང་།

²⁸ ཨིསི་རཱཨེལ་པ་ནི་མི་རིགས་རྨོངས་པ་དང་། དེ་ཚོར་བློ་དང་ཤེས་རབ་གཅིག་ཀྱང་མེད།

²⁹ དེ་ཚོར་འཕམ་རྒུད་བྱུང་བའི་རྐྱེན་དེ་ནི། གང་ཡིན་དེ་ཚོས་མི་ཤེས་སོ། དེ་ཚོས་ཐོག་ཏུ་གནས་ཚུལ་གང་བྱུང་མི་རྟོགས་སོ།

³⁰ གཅིག་གིས་སྟོང་ལ་ཅི་ལྟར་འཕམ་པར་བྱེད། གཉིས་ཀྱིས་འབུམ་གཅིག་ལ་ཅི་ལྟར་འཕམ་པར་བྱེད། གཙོ་བོ་དཀོན་མཆོག་དེ་ཚོའི་དཀོན་མཆོག་གིས། དེ་དག་ཡོངས་སུ་སྤངས་གནང་ཡོད། དེ་ཚོའི་མངའ་ཐང་ཆེ་བའི་དཀོན་མཆོག་གིས། དེ་དག་ཡོངས་སུ་སློད་པའི་རྐྱེན་གྱིས་སོ།

³¹ དེ་ཚོའི་དགྲ་བོ་རྣམས་ཀྱི་ལྷ་རྟེན་དག། དབང་དང་ནུས་པ་མེད་པར་ཁོ་ཚོས་ཤེས། ཨིསི་རཱཨེལ་པ་ཡི་དཀོན་མཆོག་ཏ་བུའི་མངའ་ཐང་མེད།

³² སོ་དྷོམ་གྷོ་མོ་རཱ་དང་དཔེ་མཚུངས་བཞིན། དེ་ཚོའི་དགྲ་རྣམས་ཚུལ་མིན་ལོག་ཏུ་སྤྱོད། དྲོ་ཁག་བཙན་དུག་ལྡན་པའི་རྒུན་འབྲུམ་སྐྱེས་པའི་ལྗོན་ཤིང་འདྲ།

³³ སྦྲུལ་གྱི་དུག་ལས་བཟོས་པའི་རྒུན་ཆང་མཚུངས།

³⁴ དེ་ཚོའི་དགྲ་བོས་ཇི་བྱས་རྣམས། གཙོ་བོ་དཀོན་མཆོག་གིས་ནི་དྲན་གསོ་གནང་། ཁོང་གིས་དེ་ཚོར་ཉེས་ཆད་གནང་བའི་ཕྱིར། གོ་སྐབས་བཟང་པོ་འཚོལ་ནས་བཞུགས་ཤིང་ཡོད།

³⁵ དཀོན་མཆོག་གིས་ནི་དགྲ་ལེན་འཇལ་གནང་སྟེ། དེ་ཚོར་ཉེས་ཆད་ངེས་པར་གནང་བར་འགྱུར། དེ་ཚོ་འགྱེལ་ཞིང་ལྷུང་བའི་དུས་སྐབས་དང་། ཡོངས་སུ་འཇིག་པའི་དུས་དེ་ཉེ་བར་རན།

³⁶ གཙོ་བོ་དཀོན་མཆོག་གིས་ནི་ཉིད་ཀྱི་མི་འབངས་ཀྱི། ནུས་སྟོབས་ཉམས་པའི་གནས་སྟངས་དེར་གཟིགས་ཏེ། དེ་ཚོར་མགོན་སྐྱབས་མཛད་པར་འགྱུར། ཐབས་ཤེས་བྲལ་བའི་ཉིད་ཀྱི་ཞབས་ཏོག་པར། ཉིད་ཀྱི་སྙིང་རྗེ་ཆེན་པོས་གཟིགས་པར་འགྱུར།

³⁷ དེ་ནས་གཙོ་བོ་དཀོན་མཆོག་ཉིད་ཀྱི་མི་འབངས་ལ། ཁྱོད་ཚོས་ད་ཕན་བློ་གདེངས་བྱས་པ་དང་། མངའ་ཐང་ཆེ་ཚུལ་ཡིན་པའི་ལྷ་རྟེན་རྣམས། གང་དུ་ཡོད་ཅེས་བཀའ་འདྲི་གནང་བར་འགྱུར།

³⁸ ཁྱོད་ཚོས་དེ་ཚོར་ཚིལ་གྱི་དམར་མཆོད་སྤྲད། འཐུང་ཕྱིར་དེ་ཚོར་རྒུན་ཆང་ཕུལ། ད་ནི་དེ་ཚོས་ཡོང་ནས་ཁྱོད་ཚོར་དགོན་སྐྱབས་བྱེད་པར་ཤོག། ཁྱོད་ཚོར་སྐྱབས་ཕྱིར་དེ་ཚོ་འགྱུགས་ནས་ཡོང་བར་ཤོག།

³⁹ ང་རང་འབའ་ཞིག་གཙོ་བོ་དཀོན་མཆོག་ཡིན། བདེན་པའི་དཀོན་མཆོག་གཞན་ནི་སུའང་མེད། ངས་ནི་བསད་དེ་སྲོག་ཀྱང་སྦྱིན་པར་ནུས། དེ་བཞིན་རྨས་ཀྱང་གསོ་ཐབས་བྱེད་པར་ནུས། ང་ཡིས་བྱས་པའི་བྱ་བར་སུས་ཀྱང་རྒོལ་མི་ཐུབ།

⁴⁰ ང་ནི་གསོན་པོའི་དཀོན་མཆོག་ཡིན་ངེས་པས། རང་གི་ལག་པ་བརྐྱངས་ཏེ་དམ་བཅའ་ངེས་པར་བྱེད།

⁴¹ འོད་མདང་འཁྱུག་པའི་རལ་གྲིའི་རྣོ་བཏོན་ཏེ། དོན་གནད་ཀུན་ལ་ཁྲིམས་གཅོད་དྲང་པོ་བྱེད། ང་ཡི་དགྲ་བོར་དགྲ་ལེན་འཇལ་རྒྱུ་དང་། ང་ལ་སྡང་མཁན་རྣམས་ལ་ཉེས་ཆད་གཏོང་རྒྱུ་ཡིན།

⁴² དེ་ཚོའི་ཁྲག་ཐིག་ང་ཡི་མདའ་ལས་འཛག། ང་ལ་རྒོལ་མཁན་ང་ཡི་རལ་གྲིས་བསད། འཐབ་རྒོལ་བྱེད་མཁན་གཅིག་ཀྱང་མི་ཐར་ཞིང་། རྨས་སྐྱོན་རྣམས་དང་བཙོན་པའང་ཤི་བར་འགྱུར།

⁴³ གཙོ་བོ་དཀོན་མཆོག་ཉིད་ཀྱི་མི་འབངས་ལ། མི་རིགས་ཁྱོད་ཚོས་བསྟོད་བསྔགས་བྱེད་དགོས་ཤིང་། དེ་ཚོ་གསོད་མཁན་རྣམས་ལ་ཁོང་གིས་ནི། ཉེས་ཆད་དྲག་པོ་གཏོང་བར་གནང་ངེས་སོ། ཉིད་ཀྱིས་དགྲ་བོར་དགྲ་ལེན་འཇལ་གནང་ཞིང་། ཉིད་ཀྱི་འབངས་ལ་སྡིག་པ་སྡིག་སེལ་གནང་བར་མཛད།

⁴⁴ ཨིསི་རཱཨེལ་པ་ཚང་མས་ཐོས་ཐུབ་པའི་ཕྱིར། མོ་ཤེ་དང་ནུན་གྱི་བུ་ཡོ་ཤུ་ཨ་གཉིས་ཀྱིས་མགུར་མ་འདི་སྒྲོག་སྦྱང་བྱས་སོ༎

མོ་ཤེའི་མཐའ་མའི་སློབ་སྟོན།

⁴⁵ མོ་ཤེས་གཙོ་བོ་དཀོན་མཆོག་གི་བཀའ་སློབ་རྣམས་མི་མང་ལ་བཤད་ཟིན་པའི་རྗེས་སུ།

⁴⁶ ཁོས། དེ་རིང་ངས་ཁྱོད་ཚོར་བཤད་པའི་བཀའ་རྒྱ་འདི་དག་ཡོངས་སུ་སྲུང་དགོས་པ་དང་། རྗེས་སུ་ཁྱོད་ཚོའི་བུ་ཕྲུག་རྣམས་ཀྱིས་ཀྱང་དཀོན་མཆོག་གི་བཀའ་རྒྱ་འདི་དག་ཚུལ་བཞིན་སྲུང་བའི་ཕྱིར། ཁྱོད་ཚོས་དེའི་སྐོར་ཡང་ནས་ཡང་དུ་དེ་དག་སློབ་སྟོན་བྱེད་དགོས་སོ།

⁴⁷ བསླབ་བྱ་འདི་དག་ནི་སྙིང་པོ་མེད་པའི་སྟོང་གཏམ་ཞིག་མ་ཡིན་གྱི། དེ་ནི་ཁྱོད་ཚོའི་སྲོག་ཡིན་ཏེ། དེར་ཉམས་ལེན་བྱས་ན། ཁྱོད་ཚོས་བདག་འཛིན་བྱེད་གྲབ་ཡོད་པའི་ཡུལ་ཡོར་དན་ཕ་རོལ་དུ་དེར་ཁྱོད་ཚོ་ཚེ་རིང་པོར་གནས་པར་འགྱུར་ཞེས་སྨྲས་སོ།

⁴⁸ ཉིན་མོ་དེ་རང་ལ་གཙོ་བོ་དཀོན་མཆོག་གིས་མོ་ཤེ་ལ།

⁴⁹ མོ་ཨབ་ཡུལ་གྱི་གྲོང་ཁྱེར་ཡེ་རི་ཀོའི་ཐང་དུ་ཡོད་པའི་ཨ་བྷ་རིམ་གྱི་རི་བརྒྱུད་ཁུལ་དུ་ཕྱིན་ནས་རི་བོ་ནེ་བོའི་རྩེ་ལ་འཛེགས་ཏེ། ངས་ཨིསི་རཱཨེལ་པ་རྣམས་ལ་སྤྲོད་རྒྱུའི་ཡུལ་ཀ་ནན་ལ་སྟོས་ཤིག

⁵⁰ ཧོར་ཞེས་པའི་རི་བོར་ཁྱོད་ཀྱི་གཅེན་པོ་ཨ་རོན་ཤི་བ་བཞིན། ཁྱོད་ཀྱང་རི་བོ་འདིར་ཤི་རྒྱུ་ཡིན།

⁵¹ གང་ལགས་ཟེར་ན། ཁྱོད་གཉིས་ཀྱིས་ཨིསི་རཱཨེལ་མི་རྣམས་ཀྱི་མཐོང་སར་ང་ལ་རྩིས་མེད་བྱས་པ་ཡིན། ཁྱོད་ཚོ་ཀ་དྷེཤི་གྲོང་ཁྱེར་གྱི་འགྲམ་དུ་ཛིན་བྱ་བའི་འབྲོག་སྟོང་ནང་མེ་རི་བཱའི་ཆུ་མིག་གི་ཉེ་འགྲམ་དུ་ཡོད་སྐབས། མི་མང་གི་མདུན་དུ་ཁྱོད་གཉིས་ཀྱིས་ང་ལ་རྩིས་མེད་བྱས་པ་ཡིན་པས།

⁵² ཁྱོད་ཀྱིས་ཡུལ་དེ་ལ་ཐག་རིང་ནས་ལྟ་ཆོག་མོད། འོན་ཀྱང་ངས་ཨིསི་རཱཨེལ་པ་རྣམས་ལ་སྤྲོད་རྒྱུའི་ཡུལ་དེར་ཁྱོད་འགྲོ་མི་ཆོག་ཞེས་གསུངས་སོ༎