བཀའ་ལུང་། 31 - Tibetan Old Testament 2011

ཡོ་ཤུ་ཨས་མོ་ཤེའི་ཤུལ་འཛིན་བྱེད་པ།

¹ མོ་ཤེས་ཨིསི་རཱཨེལ་མི་མང་རྣམས་ལ་མུ་འཐུད་ནས་སྨྲས་པ།

² ང་ནི་ལོ་ ༡༢༠ ལོན་པས། ད་ངས་ཁྱོད་ཚོའི་འགོ་འཁྲིད་བྱེད་ཐུབ་པ་མི་འདུག གཙོ་བོ་དཀོན་མཆོག་གིས་ང་ལ་ཁྱོད་ཡོར་དན་རྒལ་ནས་ཕར་འགྲོ་མི་ཆོག་ཅེས་གསུངས་ཡོད།

³ དེ་བས་ན་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་རང་ཉིད་ཁྱོད་ཚོའི་སྔོན་དུ་ཕེབས་ནས་དེར་གནས་པའི་མི་རིགས་རྣམས་ཚར་གཅོད་གནང་སྟེ། ཁྱོད་ཚོས་དེ་དག་གི་ཡུལ་དེ་བདག་འཛིན་བྱེད་པར་འགྱུར། གཙོ་བོ་དཀོན་མཆོག་གིས་གསུངས་པ་བཞིན་ཡོ་ཤུ་ཨས་ཁྱོད་ཚོའི་འགོ་འཁྲིད་བྱེད་རྒྱུ་ཡིན་ནོ།

⁴ ཨ་མོར་པའི་རྒྱལ་པོ་སི་ཧོན་དང་ཨོག་གཉིས་ཕམ་པར་མཛད་ནས་དེ་དག་གི་ཡུལ་དེ་འཇིག་པར་མཛད་པ་བཞིན། གཙོ་བོ་དཀོན་མཆོག་གིས་མི་རིགས་དེ་ཚོ་ལའང་དེ་བཞིན་འཇིགས་པར་མཛད་ངེས་ཤིང་།

⁵ གཙོ་བོ་དཀོན་མཆོག་གིས་ཁྱོད་ཚོ་ལ་དེ་དག་གི་ཁར་རྒྱལ་ཁ་གནང་རྒྱུ་ཡིན་པ་དང་། ཁྱོད་ཚོས་དེ་ཚོ་དང་འབྲེལ་བ་བྱེད་སྟངས་ནི་སྔར་ངས་གང་སྨྲས་པ་བཞིན་དུ་བྱེད་དགོས།

⁶ ཁྱོད་ཚོས་སེམས་ཤུགས་སྐྱེད་ཅིང་ཡིད་བརྟན་ཆེན་པོ་བྱས་ཏེ་དེ་དག་ལ་མ་འཇིག་པར་བྱོས་ཤིག་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་རང་ཉིད་ཁྱོད་ཚོ་དང་མཉམ་དུ་གནས་པར་མཛད་ཅིང་། ཁོང་གིས་ཁྱོད་ཚོར་སླུ་བ་དང་སྤོང་བ་སོགས་གནང་མི་ཡོང་ཞེས་སྨྲས་སོ།

⁷ དེ་ནས་མོ་ཤེས་ཨིསི་རཱཨེལ་མི་དམངས་ཀྱི་མདུན་དུ་ཡོ་ཤུ་ཨ་ལ་བོས་ནས་སྨྲས་པ། སེམས་ཤུགས་སྐྱེད་ཅིང་ཡིད་བརྟན་ཆེན་པོ་བྱོས་ཤིག སྔར་གཙོ་བོ་དཀོན་མཆོག་གིས་མི་མང་འདི་ཚོའི་མེས་པོ་རྣམས་ལ་ཞལ་བཞེས་གནང་བའི་ཡུལ་དེ་བདག་འཛིན་བྱེད་པའི་ཕྱིར་ཁྱོད་ཀྱིས་དེ་ཚོར་འགོ་འཁྲིད་བྱེད་དགོས།

⁸ གཙོ་བོ་དཀོན་མཆོག་རང་ཉིད་ཁྱོད་དང་མཉམ་དུ་འགྲོགས་ཤིང་ཁྱོད་ལ་དབུ་འཁྲིད་མཛད་རྒྱུ་ཡིན་པས། ཁོང་གིས་ཁྱོད་ལ་སླུ་བ་དང་སྤོང་བ་སོགས་གནང་མི་ཡོང་ངོ་། དེར་བརྟེན་སེམས་ཤུགས་མ་ཆགས་པ་དང་འཇིག་མི་དགོས༎

ལོ་འཁོར་བདུན་རེར་ཁྲིམས་དེ་ཀློག་དགོས་པ།

⁹ དེ་རྗེས་མོ་ཤེས་དཀོན་མཆོག་གི་ཁྲིམས་དེ་བྲིས་ནས། གཙོ་བོ་དཀོན་མཆོག་གི་དམ་བཅའི་སྒྲོམ་གྱི་དོ་དམ་པ་ལེ་ཝིའི་བླ་མ་རྣམས་དང་ཨིསི་རཱཨེལ་གྱི་འགོ་བྱེད་རྣམས་ལ་སྤྲད་དེ།

¹⁰ ཁོས་དེ་དག་ལ་བཀའ་བསྒོས་བྱས་ཏེ་སྨྲས་པ། ལོ་བདུན་རེའི་ལོ་མཇུག་ཏུ་བུ་ལོན་འཇལ་མི་དགོས་པར་བུན་ཐོ་སུབ་པའི་དུས་རན་སྐབས། རྩ་གཡབ་གི་དུས་ཆེན་ཐོག་ཏུ་བཀའ་ཁྲིམས་འདི་དག་སྐད་ཤུགས་ཆེན་པོས་ཀློག་དགོས།

¹¹ མཆོད་འབུལ་བྱེད་སའི་ས་གནས་གཅིག་པོ་དེར་ཨིསི་རཱཨེལ་པ་རྣམས་ཁྱོད་ཀྱི་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ལ་མཆོད་འབུལ་བྱེད་ཕྱིར་ཡོང་སྐབས་དེ་ཚོའི་མདུན་དུ་བཀའ་ཁྲིམས་འདི་སྒྲོག་སྦྱང་བྱེད་དགོས།

¹² སྐྱེས་པ་དང་བུད་མེད་དང་། བུ་ཕྲུག་དང་། དེ་བཞིན་ཁྱོད་ཚོའི་གྲོང་ཁྱེར་ནང་གནས་པའི་ཕྱི་རྒྱལ་བ་རྣམས་དང་བཅས་པ་ཚང་མ་ཕྱོགས་གཅིག་ཏུ་བོས་ནས། ཀུན་གྱིས་བཀའ་ཁྲིམས་དེ་ཐོས་ཏེ་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ལ་དད་གུས་ཞུས་ཤིང་། ཁོང་གི་བཀའ་སློབ་རྣམས་རྩིས་སྲུང་ཞུ་བར་སློབ་སྟོན་བྱེད་དགོས།

¹³ དེ་ལྟར་བྱས་པས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་ཁྲིམས་ནམ་ཡང་ཐོས་མ་མྱོང་བའི་ཁྱོད་ཚོའི་རིགས་བརྒྱུད་ཚོས་ཀྱང་དེའི་སྐོར་ལ་གོ་ཐོས་བྱས་ཏེ། ཁྱོད་ཚོས་བདག་འཛིན་བྱེད་གྲབ་ཡོད་པའི་ཡོར་དན་ཕ་རོལ་གྱི་ཡུལ་དུ་གནས་སྡོད་བྱེད་སྐབས་དེ་ཚོས་བཀའ་ལ་སྲུང་ཞུ་བའི་བསླབ་བྱ་ཐོབ་པར་འགྱུར་རོ༎

གཙོ་བོ་དཀོན་མཆོག་གིས་མོ་ཤེ་ལ་མཐའ་མའི་བཀའ་སློབ་གནང་བ།

¹⁴ དེ་ནས་གཙོ་བོ་དཀོན་མཆོག་གིས་མོ་ཤེ་ལ་གསུངས་པ། ད་ཁྱོད་ཡུན་རིང་པོར་གསོན་མི་ཡོང་། དེ་བས་ན་ཡོ་ཤུ་ཨ་ལ་བོས་ཏེ་དབུ་གུར་དམ་པའི་ནང་དུ་འཁྲིད་ཤོག། ངས་ཁོ་ལ་བསླབ་བྱ་བྱེད་རྒྱུ་ཡིན། དེ་ནས་མོ་ཤེ་དང་ཡོ་ཤུ་ཨ་གཉིས་དབུ་གུར་དམ་པའི་ནང་དུ་བཅར་བ་དང་།

¹⁵ དབུ་གུར་དམ་པའི་གཟིམས་སྒོའི་འགྲམ་དུ་གཙོ་བོ་དཀོན་མཆོག་གིས་དེ་དག་ལ་སྤྲིན་གྱི་ཀ་བའི་ཚུལ་དུ་ཉིད་ཀྱི་ཞལ་གཟིགས་ཤིག་གནང་བ་དང་།

¹⁶ གཙོ་བོ་དཀོན་མཆོག་གིས་མོ་ཤེ་ལ་གསུངས་པ། ད་ཁྱོད་རིང་མིན་འཆི་བར་ངེས་ཤིང་། ཁྱོད་འཆི་བའི་རྗེས་སུ་མི་རྣམས་ང་དང་དམ་ཚིག་འགལ་ཏེ། ངས་དེ་ཚོ་དང་མཉམ་དུ་བཞག་པའི་དམ་བཅའ་དེའང་དེ་ཚོས་འགལ་ལོ། ང་ལ་སྤངས་རྒྱུ་ཡིན་པ་དང་། དེ་ཚོ་སླེབས་རན་པའི་ཡུལ་གྱི་ལྷ་རྟེན་གཞན་ལ་མཆོད་པར་འགྱུར།

¹⁷ ཡང་དེ་དུས་ང་དེ་ཚོ་དང་ཁྲོ་ཞིང་། ངས་དེ་ཚོ་ལ་སྤངས་ནས་དེ་ཚོ་འཇིག་རྒྱུ་ཡིན་པ་དང་། དེ་ཚོའི་ཐོག་ཏུ་རྐྱེན་ངན་དྲག་པོ་མང་པོ་བྱུང་བ་དང་། ང་དེ་ཚོའི་དཀོན་མཆོག་ཁོ་ཚོ་དང་མཉམ་དུ་འགྲོགས་མེད་པར་བརྟེན་པས་རྐྱེན་ངན་འདི་ཚོ་ཚང་མ་བྱུང་བ་ཡིན་པར་དེ་ཚོས་ཤེས་རྟོགས་བྱེད་རྒྱུ་ཡིན།

¹⁸ དེ་ཚོས་ལས་ངན་ཁོ་ན་བྱས་ཏེ་ལྷ་རྟེན་གཞན་ལ་མཆོད་པའི་རྐྱེན་གྱིས་ངས་དེ་ཚོར་སྐྱབས་གྲོགས་བྱེད་པར་མི་འགྱུར་རོ།

¹⁹ ད་མགུར་མ་འདི་བྲིས་ནས་ཨིསི་རཱཨེལ་པ་རྣམས་ལ་སློབས་ཤིག་དང། དེ་ནི་དེ་ཚོའི་རྒྱབ་རྒལ་དུ་དཔང་པོའི་ཚུལ་བཞིན་གནས་པར་འགྱུར།

²⁰ ངས་དེ་ཚོའི་ཕ་མེས་རྣམས་ལ་དམ་བཅའ་བྱས་པ་བཞིན། དེ་ཚོ་ཕྱུག་པོ་དང་ས་ལུད་འཛོམས་པོའི་ཡུལ་དེར་འཁྲིད་འགྲོ་རྒྱུ་ཡིན་པ་དང་། དེར་ཁོ་ཚོར་རང་འདོད་བཞིན་དུ་ཁ་ཟས་འབྱོར་ཏེ། བདེ་སྐྱིད་ཕུན་སུམ་ཚོགས་པའི་ངང་དུ་སྡོད་རྒྱུ་བྱུང་ནའང་། དེ་ཚོའི་བློ་ཁ་བསྒྱུར་ཏེ་ལྷ་རྟེན་གཞན་ལ་མཆོད་ཅིང་། ང་ལ་ཁས་ལེན་མ་བྱས་པ་དང་ངའི་དམ་བཅའ་དང་འགལ་རྒྱུ་ཡིན་པས།

²¹ འཇིགས་རུང་ཆེ་བའི་རྐྱེན་ངན་མང་པོ་ཞིག་དེ་ཚོའི་ཐོག་ཏུ་ཡོང་ངེས་སོ། འོན་ཀྱང་མགུར་དབྱངས་འདི་ནི་ད་དུང་ལེན་དགོས་སོ། ཡང་དེ་ནི་དེ་ཚོའི་རྒྱབ་རྒལ་དུ་དཔང་པོའི་ཚུལ་དུ་གནས་པར་འགྱུར། ངས་ཁྱོད་ཚོར་དམ་བཅའ་བྱས་པའི་ཡུལ་དུ་ཁོ་ཚོ་མ་འཁྲིད་གོང་དུ་ཁོ་ཚོས་སེམས་ནང་ག་རེ་དྲན་གྱི་ཡོད་པ་དེ་ངས་ད་ལྟ་ནས་ཤེས་ཀྱི་ཡོད།

²² ཉིན་མོ་དེ་རང་ལ་མོ་ཤེས་མགུར་མ་དེ་བྲིས་ཏེ་ཨིསི་རཱཨེལ་མི་མང་རྣམས་ལ་བསླབས་སོ།

²³ དེ་རྗེས་གཙོ་བོ་དཀོན་མཆོག་གིས་ནུན་གྱི་བུ་ཡོ་ཤུ་ཨ་ལ་གསུང་གླེང་མཛད་ཅིང་བཀའ་གནང་གསལ། སེམས་ཤུགས་སྐྱེད་ཅིང་ཡིད་བརྟན་ཆེན་པོ་བྱོས་ཤིག ཁྱོད་ཀྱིས་ཨིསི་རཱཨེལ་པ་རྣམས་ལ་འགོ་འཁྲིད་བྱས་ཏེ། ངས་དམ་བཅའ་བྱས་པའི་ཡུལ་དུ་འཁྲིད་རྒྱུ་ཡིན་པས། ང་ཁྱོད་དང་མཉམ་དུ་གནས་པར་ངེས་ལགས་སོ།

²⁴ མོ་ཤེས་ཟབ་ཟབ་བྱས་ཏེ་གཙོ་བོ་དཀོན་མཆོག་གི་བཀའ་ཁྲིམས་དེ་ཆད་ལྷག་མེད་པར་དེབ་ཞིག་གི་ནང་དུ་བྲིས་སོ།

²⁵ དེ་བྲིས་ཟིན་པའི་རྗེས་སུ་ཁོས་གཙོ་བོ་དཀོན་མཆོག་གི་དམ་བཅའི་སྒྲོམ་གྱི་དོ་དམ་པ་ལེ་ཝིའི་བླ་མ་རྣམས་ལ་སྨྲས་པ།

²⁶ དཀོན་མཆོག་གི་ཁྲིམས་ཀྱི་དེབ་འདི་འཁྱེར་ནས། གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་དམ་བཅའི་སྒྲོམ་གྱི་ཉེ་འགྲམ་དུ་ཞོག་ཅིག གླེགས་བམ་དེ་ནི་དེ་ཚོའི་རྒྱབ་རྒལ་དུ་དཔང་པོའི་ཚུལ་བཞིན་གནས་རྒྱུ་ཡིན་ནོ།

²⁷ དེ་ཚོ་ནི་སེམས་གཤིས་གྱོང་ཞིང་ངོ་ལོག་བྱེད་མཁན་ཡིན་པ་དེ་ངས་ཤེས་ཀྱི་ཡོད། ང་གསོན་རིང་དུ་དེ་ཚོས་གཙོ་བོ་དཀོན་མཆོག་ལ་ངོ་ལོག་ཞུས་པ་ཡིན་ན། ད་ང་ཤི་བའི་རྗེས་སུ་དེ་ཚོས་སྔར་ལས་མང་བ་ངོ་ལོག་བྱེད་ཉེན་ཡོད།

²⁸ ཁྱོད་ཚོའི་སྡེ་རིགས་སོ་སོའི་འགོ་བྱེད་དང་ལས་བྱེད་པ་ཚང་མ་ངའི་མདུན་དུ་བཀོང་ཞིག་དང་། ངས་དེ་ཚོ་ལ་གཏམ་གླེང་འདི་ཚོ་བྱེད་རྒྱུ་ཡིན། དེ་ཚོའི་རྒྱབ་རྒལ་འདིའི་ཆད་དུ་ངས་མཐོ་རིས་དང་ས་གཞི་ནི་ངའི་བར་དཔང་དུ་འཛུག་རྒྱུ་ཡིན།

²⁹ ང་ཤི་བའི་རྗེས་སུ་མི་རྣམས་ངན་པར་བསྒྱུར་རྒྱུ་ཡིན་པ་དེ་ངས་ཤེས་ཀྱི་ཡོད་པས། ངས་སློབ་སྟོན་གང་བྱས་པ་རྣམས་སྤངས་ཤིང་། ཕྱིས་སུ་དེ་ཚོའི་ཁར་རྐྱེན་ངན་རྣམས་འོངས་བར་འགྱུར། གང་ལགས་ཟེར་ན། དེ་ཚོས་གཙོ་བོ་དཀོན་མཆོག་གིས་བཀག་བྱ་གནང་བའི་ལས་རྣམས་བྱས་ཏེ། ཁོང་གི་ཐུགས་དགོངས་དཀྲུགས་པར་འགྱུར་རོ༎

མོ་ཤེའི་མགུར་མ།

³⁰ དེ་ནས་མོ་ཤེས་མགུར་མ་འདི་ཆ་ཚང་སྒྲོགས་པ་དང་། ཨིསི་རཱཨེལ་པ་ཚང་མས་ཐོས་སོ༎