བཀའ་ལུང་། 30 - Tibetan Old Testament 2011

བྱིན་རླབས་དང་སྐྱར་གསོའི་ཆེད་དུ་ཁྲིམས་རྣམས།

¹ ངས་ད་ལྟ་ཁྱོད་ཚོར་བྱིན་རླབས་དང་དམོད་པ་གཉིས་ལས་གཅིག་འདམས་པའི་གོ་སྐབས་སྤྲད་ཡོད། གནས་ཚུལ་དེ་ཚོ་ཚང་མ་ཁྱོད་ཚོའི་ཐོག་ཏུ་བྱུང་ཚར་བའི་རྗེས་སུ། ཁྱོད་ཀྱི་གཙོ་བོ་དཀོན་མཆོག་གིས་ཁྱོད་ཚོ་ཁ་སྟོར་བ་གནང་སྟེ། མི་རིགས་གཞན་དང་མཉམ་དུ་གནས་སྐབས། ངས་ཁྱོད་ཚོ་ལ་འདམས་ཀ་བྱེད་པའི་གོ་སྐབས་སྤྲད་པ་དེ་ཁྱོད་ཚོས་དྲན་ཡོང་།

² གལ་ཏེ་ཁྱོད་དང་ཁྱོད་ཚོའི་རིགས་རྒྱུད་ཚོ་གཙོ་བོ་དཀོན་མཆོག་གི་ཕྱོགས་སུ་བློ་ཁ་བསྒྱུར་ཏེ་ཁོང་གི་བཀའ་རྒྱ་རྣམས་བློ་སེམས་རྩེ་གཅིག་གི་སྒོ་ནས་སྲུང་པ་ཡིན་ན།

³ གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོའི་ཐོག་ཏུ་སྙིང་རྗེ་གནང་ཞིང་། ཁྱོད་ཚོ་ཁ་འཐོར་ནས་གནས་ཡོད་པའི་ཡུལ་ཁག་སོ་སོ་ནས་བཏོན་པ་གནང་ཞིང་། ཕྱིར་ལོག་འཁྲིད་ཕེབས་རྒྱུ་ཡིན་པ་དང་། སླར་ཡང་ཁྱོད་ཚོར་ཕུན་སུམ་ཚོགས་པབཟོས་གནང་ངོ་།

⁴ ཁྱོད་ཚོ་འཛམ་གླིང་གྱི་མཐའ་མཚམས་ཀུན་ཏུ་ཁ་འཐོར་ཡོད་པ་ཡིན་ནའང་། གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོར་སླར་ཡང་ཕྱོགས་གཅིག་ཏུ་བསྡུས་ཏེ་ཕྱིར་ལོག་འཁྲིད་ཕེབས་ཡོང་།

⁵ སྔར་ཁྱོད་ཚོའི་མེས་པོ་རྣམས་གནས་སྡོད་བྱས་པའི་ཡུལ་དེ་ཁྱོད་ཚོས་སླར་ཡང་བདག་འཛིན་བྱེད་རྒྱུ་དང་། ཁོང་གིས་ཁྱོད་ཚོ་ལ་ཁྱོད་ཚོའི་ཕ་མེས་རྣམས་ལས་གྲངས་འབོར་ཆེ་བ་དང་། ཕུན་སུམ་ཚོགས་པ་བཟོས་གནང་ངོ་།

⁶ གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོ་དང་ཁྱོད་ཚོའི་རིགས་རྒྱུད་རྣམས་ལ་བཀའ་རྒྱ་སྲུང་བའི་སེམས་གནང་བ་དང་། ཁྱོད་ཚོས་ཁོང་ལ་བློ་སེམས་རྩེ་གཅིག་གིས་བརྩེ་བ་ཞུས་ཤིག་དང་། ཡུལ་དེར་ཁྱོད་ཚོ་རྒྱུན་དུ་གནས་པར་འགྱུར།

⁷ ཁོང་གིས་དམོད་པ་དེ་ཚོ་ཚང་མ་ཁྱོད་ཚོར་སྡང་ཞིང་མནར་གཅོད་བྱེད་མཁན་དགྲ་བོའི་སྟེང་དུ་འབེབས་པར་འགྱུར།

⁸ ཁྱོད་ཚོས་སླར་ཡང་ཁོང་གི་བཀའ་ལ་ཉན་པ་དང་དེ་རིང་ངས་ཁྱོད་ཚོར་སྤྲད་པའི་ཁོང་གི་བཀའ་རྒྱ་ཚང་མ་རྩིས་སྲུང་བྱས་པར་འགྱུར།

⁹ དེ་རྗེས་ཁྱོད་ཚོས་བྱས་པའི་ལས་དོན་ཚང་མར་གཙོ་བོ་དཀོན་མཆོག་གིས་བྱིན་རླབས་གནང་བས། ཁྱོད་ཚོའི་བུ་ཕྲུག་དང་ཟོག་སེམས་ཅན་དང་བཅས་པ་འཕེལ་རྒྱས་བྱུང་ཞིང་། ཁྱོད་ཚོའི་ས་ཞིང་གི་ཐོན་སྐྱེད་ཀྱང་གོང་དུ་འཕེལ་བར་འགྱུར། གཙོ་བོ་དཀོན་མཆོག་གིས་ཁྱོད་ཚོའི་མེས་པོ་རྣམས་ལ་ཡར་རྒྱས་གོང་དུ་འཕེལ་བའི་བྱིན་རླབས་གནང་དུས་ཇི་ལྟར་ཐུགས་དགྱེས་སྣང་བྱུང་བ་བཞིན། དེ་ལྟར་ཁྱོད་ཚོ་ལའང་བྱིན་རླབས་གནང་དུས་ཁོང་ཧ་ཅང་ཐུགས་མཉེས་པར་འགྱུར་མོད།

¹⁰ འོན་ཀྱང་ཁྱོད་ཚོས་ཁོང་གི་བཀའ་ལ་ཉན་དགོས་པ་དང་། དེབ་འདིིའི་ནང་བྲིས་ཡོད་པའི་ཁོང་གི་བསླབ་བྱ་དང་བཀའ་རྒྱ་ཡོངས་རྫོགས་སྲུང་ཞིང་། བློ་སེམས་རྩེ་གཅིག་གི་སྒོ་ནས་ཁོང་གི་ཕྱོགས་སུ་བློ་ཁ་བསྒྱུར་དགོས།

¹¹ དེ་རིང་ངས་སྤྲད་པའི་བཀའ་དེ་དག་ཧ་ཅང་དཀའ་ཞིང་། སྒྲུབ་མ་ཐུབ་པ་ཞིག་མེད་དོ།

¹² དེ་ནི་གནམ་ལ་བཞག་མེད་ཅིང་། ང་ཚོས་བཀའ་དེ་ཐོས་ཏེ་དེ་ལ་རྩིས་སྲུང་ཞུ་བའི་ཕྱིར་སུས་ཡར་ཕྱིན་སྟེ། ང་ཚོའི་དོན་དུ་བཀའ་དེ་མར་འབེབས་ཡོང་ངམ་ཞེས་ཁྱོད་ཚོས་འདྲི་བ་བྱེད་མི་དགོས།

¹³ ཡང་དེ་ནི་རྒྱ་མཚོའི་ཕ་རོལ་དུའང་མེད་དེ། ང་ཚོས་བཀའ་དེ་ཐོས་ཏེ་དེ་ལ་རྩིས་སྲུང་ཞུ་བའི་ཕྱིར་སུས་རྒྱ་མཚོའི་ཕ་རོལ་དུ་ཕྱིན་ཏེ། ང་ཚོའི་དོན་དུ་བཀའ་དེ་འཁྱེར་འོང་ངམ་ཞེས་ཁྱོད་ཚོས་འདྲི་བ་བྱེད་མི་དགོས་སོ།

¹⁴ དེ་ནི་ཁྱོད་ཚོ་དང་མཉམ་དུ་ཡོད་ཅིང་། ཁྱོད་ཚོས་དེ་ཤེས་པ་དང་། ཁྱོད་ཚོས་ཁས་ཀྱང་ཤོད་ཐུབ་བོ། དེ་བས་ན་ད་དེ་ལ་སྲུང་རྩིས་ཞུས་ཞིག

¹⁵ དེ་རིང་ངས་ཁྱོད་ཚོར་བཟང་པོ་དང་ངན་པའམ། དེ་བཞིན་གསོན་པོ་དང་འཆི་བ་གཉིས་ལས་གཅིག་འདམས་ཀ་བྱེད་པའི་གོ་སྐབས་ཤིག་སྤྲད་ཀྱི་ཡོད།

¹⁶ དེ་རིང་ངས་ཁྱོད་ཚོར་སྤྲད་པའི་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་བཀའ་རྒྱ་རྣམས་ཁྱོད་ཚོས་སྲུང་ཞིང་། ཁོང་ལ་བརྩེ་བ་དང་རྩིས་སྲུང་ཞུས་ཏེ། ཁོང་གི་ཁྲིམས་ཚང་མ་སྲུང་བ་ཡིན་ན་ཁྱོད་ཚོ་ཕུན་སུམ་ཚོགས་ཞིང་། གྲངས་འབོར་ཆེ་བའི་མི་རིགས་ཞིག་ཏུ་འགྱུར་རོ། ཁྱོད་ཚོས་བདག་འཛིན་བྱེད་གྲབ་ཡོད་པའི་ཡུལ་དེར་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོ་ལ་བྱིན་རླབས་གནང་བར་འགྱུར།

¹⁷ འོན་ཀྱང་ཁྱོད་ཚོས་དེ་མ་ཉན་པར། ཁོང་ལ་ལོག་ལྟ་ཞུས་ཏེ། ལྷ་རྟེན་གཞན་ལ་མཆོད་པ་ཡིན་ན།

¹⁸ ཁྱོད་ཚོ་འཇིག་པར་ངེས་སོ་ཞེས་ངས་ད་ལྟ་ནས་ཁྱོད་ཚོ་ལ་ཟོན་བསྐུལ་བྱེད་ཀྱི་ཡོད། ཁྱོད་ཚོས་བདག་འཛིན་བྱེད་གྲབ་ཡོད་པའི་ཡོར་དན་ཕ་རོལ་གྱི་ཡུལ་དུ་ཁྱོད་ཚོ་ཚེ་རིང་པོར་གནས་པར་མི་འགྱུར་རོ།

¹⁹ ངས་དེ་རིང་ཁྱོད་ཚོ་ལ་གསོན་པ་ཉིད་དང་འཆི་བའམ། དེ་བཞིན་དཀོན་མཆོག་གི་བྱིན་རླབས་དང་དམོད་པ་གཉིས་ལས་གཅིག་འདམས་པའི་གོ་སྐབས་སྤྲོད་བཞིན་ཡོད་པས། ད་ངས་མཐོ་རིས་དང་ས་གཞི་འབོད་དེ་ཁྱོད་ཚོས་འདམས་ཀ་ཇི་བྱེད་ལ་དཔང་པོར་འཛུག་རྒྱུ་ཡིན། དེ་བས་ན་གསོན་པ་ཉིད་དེ་འདམས་ཤིག

²⁰ གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ལ་བརྩེ་བ་ཞུ་ཞིང་ཁོང་གི་བཀའ་ལ་ཉན་ཏེ། ཁོང་དང་དམ་ཚིག་ཅན་དུ་འགྱུར་བ་ཡིན་ན་ཁོང་གིས་ཁྱོད་ཚོའི་ཕ་མེས་ཨབ་ར་ཧམ་དང་ཨི་སཱག་དང་ཡ་ཀོབ་ལ་ཞལ་བཞེས་གནང་བའི་ཡུལ་དེར་ཁྱོད་ཚོ་དང་ཁྱོད་ཚོའི་རིགས་རྒྱུད་ལོ་མང་རིང་དུ་གནས་པར་འགྱུར་རོ༎