བཀའ་ལུང་། 27 - Tibetan Old Testament 2011

རྡོ་ལེབ་ཁར་བྲིས་པའི་དཀོན་མཆོག་གི་ཁྲིམས་རྣམས།

¹ དེ་ནས་མོ་ཤེས་ཨིསི་རཱཨེལ་གྱི་འགོ་བྱེད་རྣམས་དང་བཅས་མི་མང་ལ་སྨྲས་པ། དེ་རིང་ངས་ཁྱོད་ཚོར་སློབ་སྟོན་བྱེད་པའི་བཀའ་རྣམས་སྲུངས་ཤིག

² ཁྱོད་ཚོས་གཙང་པོ་ཡོར་དན་རྒལ་ནས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོར་གནང་རྒྱུ་ཡིན་པའི་ཡུལ་དེར་འཛུལ་བའི་ཉིན་མོར་ཁྱོད་ཚོས་རྡོ་རིང་ཆེན་པོ་རྣམས་ཡར་སྒྲེང་སྟེ། དེར་རྩི་བྱུགས་ཏེ།

³ དེའི་ཁར་ཁྲིམས་དང་བཀའ་སློབ་རྣམས་བྲིས་དགོས། ཁྱོད་ཚོའི་མེས་པོའི་གཙོ་བོ་དཀོན་མཆོག་གིས་ཁྱོད་ཚོར་ཞལ་བཞེས་གནང་བའི་ཕྱུག་པོ་དང་ས་ལུད་འཛོམས་པའི་ཡུལ་དེར་ཁྱོད་ཚོ་འཛུལ་བའི་རྗེས་སུ།

⁴ ཡོར་དན་ཕར་ཕྱོགས་སུ་འབྱོར་སྐབས། ངས་དེ་རིང་ཁྱོད་ཚོར་སྨྲས་པ་བཞིན། རྡོ་རིང་འདི་དག་རི་བོ་ཨེ་བལ་གྱི་སྟེང་དུ་སླངས་ཤིང་དེར་རྩི་བྱུགས་དགོས།

⁵ ལྕགས་ཀྱི་ལག་ཆ་བེད་སྤྱོད་མ་བཏང་བའི་རྡོ་ལས་མཆོད་ཁྲི་ཞིག་བཞེངས་དགོས།

⁶ གང་ལགས་ཟེར་ན། ཁྱོད་ཚོས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་ཕྱིར་དུ་མཆོད་ཁྲི་བཞེངས་སྐབས་ལག་ཆས་མ་གཤག་པའི་རྡོ་ལས་བཞེངས་ཏེ། དེར་སྲེག་དགོས་པའི་དམར་མཆོད་རྣམས་འབུལ་དགོས།

⁷ མཐུན་འབྲེལ་གྱི་འབུལ་བ་སོགས་ཕུལ་ནས་རང་གིས་ཟ་དགོས་པ་དང་། གཙོ་བོ་དཀོན་མཆོག་གི་སྤྱན་སྔར་བཀའ་དྲིན་ཞུ་དགོས།

⁸ རྩི་བྱུགས་པའི་རྡོ་རིང་དེ་ཚོའི་ཁར་གཙོ་བོ་དཀོན་མཆོག་གི་ཁྲིམས་ཀྱི་ཚིག་འབྲུ་རེ་རེ་བཞིན་གསལ་པོར་བྲིས་དགོས་སོ།

⁹ དེ་ནས་མོ་ཤེས་ལེ་ཝིའི་བླ་མ་རྣམས་དང་མཉམ་དུ་ཨིསི་རཱཨེལ་གྱི་མི་དམངས་རྣམས་ལ་སྨྲས་པ། ཀྱེ་ཨིསི་རཱཨེལ་མི་མང་རྣམས། ངའི་ཕྱོགས་སུ་ཚུར་ཉོན་དང་། དེ་རིང་ཁྱོད་ཚོ་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་འབངས་སུ་འགྱུར་ཡོད་དོ།

¹⁰ ཁྱོད་ཚོས་ཁོང་གི་བཀའ་ལ་ཉན་ཏེ་ངས་དེ་རིང་ཁྱོད་ཚོར་སློབ་སྟོན་བྱས་པའི་ཁོང་གི་ཁྲིམས་ཚང་མ་སྲུང་དགོས་སོ༎

བཀའ་རྒྱ་མ་སྲུང་མཁན་རྣམས་ལ་དམོད་པ་རྣམས།

¹¹ དེ་རྗེས་མོ་ཤེས་ཨིསི་རཱཨེལ་མི་རྣམས་ལ་སྨྲས་པ།

¹² ཁྱོད་ཚོ་ཡོར་དན་རྒལ་བའི་རྗེས་སུ་མི་རྣམས་ལ་བྱིན་རླབས་ཀྱི་སྨོན་ཚིག་འབོད་སྒྲོག་བྱེད་སྐབས། སིམ་ཨོན་དང་། ལེ་ཝི། ཡ་ཧུ་དཱ། ཨི་ས་ཀར། ཡོ་སེབ་དང་། བྷེན་ཡ་མིན་གྱི་སྡེ་རིགས་རྣམས་རི་བོ་གྷེ་རི་ཛིམ་དུ་ལངས་ནས་སྡོད་དགོས་ཏེ།

¹³ དེ་བཞིན་དམོད་པའི་ཚིག་ངན་འབོད་སྒྲོག་བྱེད་སྐབས། རུ་བྷེན་དང་། གྷཌ། ཨ་ཤེར། ཛེ་བུ་ལུན། དཱན་དང་ནཕ་ཏ་ལིའི་སྡེ་རིགས་རྣམས་རི་བོ་ཨེ་བྷལ་གྱི་སྟེང་དུ་སྡོད་དགོས།

¹⁴ དེ་རྗེས་ལེ་ཝི་པ་ཚོས་གཤམ་གསལ་ཚིག་རྣམས་སྐད་ཤུགས་ཆེན་པོས་འབོད་དགོས་སོ།

¹⁵ སུ་ཞིག་གིས་རྡོའམ། ཤིང་དང་ལྕགས་རིགས་སོགས་ལས་སྐུ་འདྲ་བཟོས་ཏེ། དེ་ལ་གསང་བའི་ཐོག་ཏུ་མཆོད་པ་ཡིན་ན། དེ་ལ་དཀོན་མཆོག་གི་དམོད་པ་ཕོག་ངེས་ཤིང་། གཙོ་བོ་དཀོན་མཆོག་གིས་སྐུ་འདྲའི་མཆོད་པར་སྡང་བ་གནང་ངོ་། དེར་མི་མང་ཚང་མས་ཨ་མེན་ཞེས་བརྗོད་དགོས།

¹⁶ རང་གི་ཕ་མ་གཉིས་ལ་གུས་ཞབས་མ་བྱེད་མཁན་གྱི་ཐོག་དཀོན་མཆོག་གིས་དམོད་པ་ཕོག་པར་ཤོག། ཡང་དེར་མི་ཚང་མས་ཨ་མེན་ཞེས་བརྗོད་དགོས།

¹⁷ ཁྱིམ་མཚེས་ཀྱི་ས་མཚམས་སྤོ་ཤུགས་བྱེད་མཁན་ལ་དཀོན་མཆོག་གི་དམོད་པ་ཕོག་པར་ཤོག། ཡང་དེར་མི་ཚང་མས་ཨ་མེན་ཞེས་བརྗོད་དགོས།

¹⁸ མི་ལོང་བ་ཞིག་ལམ་ནོར་དུ་འཁྲིད་མཁན་དེ་ལ་དཀོན་མཆོག་གི་དམོད་པ་ཕོག་པར་ཤོག། ཡང་དེར་མི་ཚང་མས་ཨ་མེན་ཞེས་བརྗོད་དགོས།

¹⁹ ཕྱི་རྒྱལ་བ་དང་། དྭ་ཕྲུག་དང་། ཡུག་མོའི་ཐོབ་ཐང་འཕྲོག་མཁན་ཚོ་ལ་དཀོན་མཆོག་གི་དམོད་པ་ཕོག་པར་ཤོག། ཡང་དེར་མི་ཚང་མས་ཨ་མེན་ཞེས་བརྗོད་དགོས།

²⁰ རང་གི་ཕའི་ཆུང་མ་སུ་ཞིག་དང་ཆགས་པ་བྱས་ཏེ། རང་གི་ཕ་ལ་དམའ་འབེབས་བྱེད་མཁན་ལ་དཀོན་མཆོག་གི་དམོད་པ་ཕོག་པར་ཤོག། ཡང་དེར་མི་ཚང་མས་ཨ་མེན་ཞེས་བརྗོད་དགོས།

²¹ དེ་བཞིན་དུད་འགྲོ་དང་ཆགས་པ་བྱེད་མཁན་ཞིག་ལ་དཀོན་མཆོག་གི་དམོད་པ་ཕོག་པར་ཤོག། ཡང་དེར་མི་ཚང་མས་ཨ་མེན་ཞེས་བརྗོད་དགོས།

²² རང་གི་སྲིང་མོ་དང་ཕ་ཡའམ་མ་ཡའི་བུ་མོ་ཞིག་དང་ཆགས་པ་བྱེད་མཁན། དེའི་ཁར་དཀོན་མཆོག་གི་དམོད་པ་ཕོག་པར་ཤོག། ཡང་དེར་མི་ཚང་མས་ཨ་མེན་ཞེས་བརྗོད་དགོས།

²³ རང་གི་གྱོ་མོ་དང་ཆགས་པ་བྱེད་མཁན་དེ་ལ་དཀོན་མཆོག་གི་དམོད་པ་ཕོག་པར་ཤོག། ཡང་དེར་མི་ཚང་མས་ཨ་མེན་ཞེས་བརྗོད་དགོས།

²⁴ གསང་བའི་སྒོ་ནས་སྲོག་གཅོད་བྱེད་མཁན་ལ་དཀོན་མཆོག་གི་དམོད་པ་ཕོག་པར་ཤོག། ཡང་དེར་མི་ཚང་མས་ཨ་མེན་ཞེས་བརྗོད་དགོས།

²⁵ མི་ཉེས་མེད་ཅིག་བསད་པའི་ཕྱིར་ལྐོག་རྔན་ལེན་མཁན་དེ་ལ་དཀོན་མཆོག་གི་དམོད་པ་ཕོག་པར་ཤོག། ཡང་དེར་མི་ཚང་མས་ཨ་མེན་བརྗོད་དགོས།

²⁶ དཀོན་མཆོག་གི་ཁྲིམས་དང་སློབ་སྟོན་རྣམས་མ་སྲུང་མཁན་ཐོག་ཏུ་དཀོན་མཆོག་གི་དམོད་པ་ཕོག་པར་ཤོག། ཡང་དེར་མི་ཚང་མས་ཨ་མེན་ཞེས་བརྗོད་དགོས་སོ༎