བཀའ་ལུང་། 26 - Tibetan Old Testament 2011

ལོ་ཐོག་གི་འབུལ་བ།

¹ གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཆོར་གནང་རྒྱུ་ཡིན་པའི་ཡུལ་དེ་ཁྱོད་ཚོས་བདག་འཛིན་བྱས་ཏེ་དེར་གཞིས་ཆགས་པའི་རྗེས་སུ།

² ཁྱོད་ཚོ་ཚང་མས་སྟོན་ཐོག་གི་ཕུད་དེ་ཙེལ་པོའི་ནང་དུ་བླུགས་ནས་མཆོད་འབུལ་བྱེད་སའི་ས་གནས་གཅིག་པོ་དེར་འཁྱེར་དགོས།

³ སྐབས་དེའི་བླ་མའི་རྩར་ཕྱིན་ནས་འདི་ལྟར་སྨྲས་དགོས། སྔར་གཙོ་བོ་དཀོན་མཆོག་ངའི་དཀོན་མཆོག་གིས་ང་ཚོའི་ཕ་མེས་རྣམས་ལ་ཞལ་བཞེས་གནང་བའི་ཡུལ་དེར་ང་བསླེབས་ཡོད་ཅེས་ངས་ངོས་ལེན་ཞུ་གི་ཡོད།

⁴ བླ་མས་ཁྱོད་ཀྱི་ལག་ནས་ཙེལ་པོ་དེ་བླངས་ནས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་མཆོད་ཁྲིའི་ཁར་བཞག་དགོས།

⁵ དེ་རྗེས་གཙོ་བོ་དཀོན་མཆོག་གི་སྤྱན་སྔར་ཁྱོད་ཚོས། ངའི་ཕ་མེས་ནི་གནས་ངེས་མེད་ཁག་ཏུ་འཁྱམ་འཁན་ཨ་རམ་པ་ཞིག་ཡིན་ནོ། རང་གི་ནང་མི་འཁྲིད་དེ་ཨི་ཇིབ་དུ་གཞིས་ཆགས་པར་ཕྱིན་ནོ། ཁོ་ཚོ་དེར་བསླེབས་དུས་མི་འབོར་གྲངས་ཉུང་ཞིག་ལས་མེད་རུང་། རྗེས་སུ་དེ་ཚོ་མི་རིགས་ཆེན་པོ་དང་སྟོབས་ཆེན་ཞིག་ཏུ་འགྱུར་བ་དང་།

⁶ ཨི་ཇིབ་པ་ཚོས་ང་ཚོ་ལ་གདུག་རྩུབ་དྲག་པོས་བྲན་འཁོལ་བཞིན་ལས་བསྐུལ་སྐབས།

⁷ རང་གི་མེས་པོའི་གཙོ་བོ་དཀོན་མཆོག་ལ་ང་ཚོས་སྐྱབས་གྲོགས་མཛད་རོགས་གནང་ཞེས་སྨྲེ་ངག་འདོན་པས། ཁོང་གིས་ང་ཚོའི་ཞུ་བར་གསན་ཏེ། ང་ཚོའི་སྡུག་བསྔལ་དང་དཀའ་འཚེ་དང་མྱ་ངན་རྣམས་གཟིགས་ནས།

⁸ ཁོང་གི་མཐུ་སྟོབས་ཆེན་པོས་ང་ཚོ་ཨི་ཇིབ་ནས་སྐྱབས་པ་གནང་ངོ་། ཁོང་གི་ལྟས་དང་མཛད་འཕྲིན་ངོ་མཚར་ཆེན་པོ་རྣམས་བསྟན་པ་གནང་སྟེ། འཇིགས་རུང་ཆེ་བའི་གནས་ཚུལ་སོགས་འབྱུང་དུ་བཅུག་པ་ཡིན་ནོ།

⁹ ཁོང་གིས་ང་ཚོ་འདིར་འཁྲིད་ཕེབས་ཏེ་ཕྱུག་པོ་དང་ས་ལུད་འཛོམས་པའི་ཡུལ་དེ་ནི་ང་ཚོ་ལ་གནང་བྱུང་བས།

¹⁰ ད་ངས་ཁོང་གི་གནང་བའི་ལོ་ཐོག་གི་ཕུད་དེ་གཙོ་བོ་དཀོན་མཆོག་གི་དྲུང་དུ་འབུལ་བར་བཅར་ཡོད་ཅེས་བརྗོད་དགོས་སོ། དེ་རྗེས་གཙོ་བོ་དཀོན་མཆོག་གི་སྤྱན་སྔར་ཙེལ་པོ་དེ་མར་བཞག་ནས་ཁོང་ལ་མཆོད་འབུལ་བྱེད་དགོས།

¹¹ གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོ་ནང་མི་དང་བཅས་པར་གནང་བའི་དངོས་པོ་བཟང་པོ་རྣམས་ཀྱི་ཕྱིར་དུ་ཁོང་ལ་བཀའ་དྲིན་རྗེས་དྲན་ཞུ་དགོས་པ་དང་། ཁྱོད་ཚོའི་ཁྲོད་དུ་སྡོད་པའི་ལེ་ཝི་པ་དང་ཕྱི་རྒྱལ་པ་ཚོས་ཀྱང་དགའ་སྟོན་དེ་ལ་སྐལ་བ་ལེན་དགོས་སོ།

¹² ལོ་གསུམ་རེར་སྟོན་ཐོག་གི་བཅུ་ཁག་དེ་ལེ་ཝི་པ་དང་ཕྱི་རྒྱལ་བ་དང་། ད་ཕྲུག་དང་ཡུགས་ས་མ་རྣམས་ལ་སྤྲོད་དགོས་སོ། གང་ལགས་ཟེར་ན། མི་མང་གི་སྡེ་ཚོགས་ཇི་འདྲ་ཞིག་ལའང་བཟའ་བཅའི་རིགས་ལྡང་ངེས་བཞིན་ཡོང་བས་ཕྱིར་རོ། དེ་ལྟར་བྱས་ཟིན་པའི་རྗེས་སུ།

¹³ ཁྱོད་ཚོས་གཙོ་བོ་དཀོན་མཆོག་གི་མདུན་དུ་འདི་ལྟར་བརྫོད་དགོས། དམ་པའི་བཅུ་ཁག་གི་ཟུར་ཆ་ཅིག་ཀྱང་ངའི་ནང་དུ་ལུས་མེད་ཅིང་། ཁྱེད་ཀྱིས་ང་ལ་བཀའ་བསྒོས་གནང་བ་བཞིན་ངས་ལེ་ཝི་པ་དང་། ཕྱི་རྒྱལ་བ་དང་། ད་ཕྲུག་རྣམས་དང་། ཡུགས་ས་མ་རྣམས་ལ་སྤྲད་དོ། བཅུ་ཁག་གི་འབུལ་བའི་སྐོར་གྱི་བཀའ་རྣམས་ངས་གཅིག་ཀྱང་འགལ་བའམ་བརྗེད་པ་སོགས་བྱས་མེད།

¹⁴ མྱ་ངན་གྱི་སྐབས་སུ་བཅུ་ཁག་གི་འབུལ་བའི་ཁོངས་ནས་ངས་གང་ཡང་ཟས་མེད་པ་མ་ཟད། ཆོ་ག་ལྟར་ང་མི་གཙང་བའི་གནས་སྟངས་སུ་ཡོད་སྐབས་དེ་ལས་གང་ཡང་ངའི་ནང་ནས་བཏོན་རྒྱུ་མ་བྱུང་། དེའི་ཁོངས་ནས་གཤིན་པོའི་འབུལ་བའི་ཕྱིར་དུ་གང་ཡང་བེད་སྤྱོད་བྱས་མེད། ཀྱེ་གཙོ་བོ་དཀོན་མཆོག་ཁྱེད་ཀྱི་བཅུ་ཁག་གི་འབུལ་བའི་སྐོར་ལ་བཀའ་གང་གནང་བ་ཚང་མ་ངས་སྲུང་ཡོད་པས།

¹⁵ མཐོ་རིས་ཀྱི་ཁྱེད་ཀྱི་ཞུགས་གནས་དམ་པ་ནས་མར་གཟིགས་ཏེ་རང་གི་མི་འབངས་ཨིསི་རཱཨེལ་པ་ལ་བྱིན་རླབས་གནང་བར་མཛོད། སྔར་ང་ཚོའི་མེས་པོ་རྣམས་ལ་ཞལ་བཞེས་གནང་བའི་ཡུལ་ཕྱུག་པོ་དང་ས་ལུད་འཛོམས་པོ་དེ་ལའང་བྱིན་རླབས་གནང་བར་མཛོད༎

གཙོ་བོ་དཀོན་མཆོག་གི་ཉིད་ཀྱི་མི་འབངས།

¹⁶ དེ་རིང་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོར་ཉིད་ཀྱིས་བཀའ་ཁྲིམས་ཚང་མ་སྲུང་དགོས་ཅེས་བཀའ་གནང་ཡོད་པས། ཁྱོད་ཚོས་ཁོང་དང་དམ་ཚིག་མ་འགལ་བར་སེམས་རྩེ་གཅིག་གི་སྒོ་ནས་བཀའ་དེ་དག་སྲུང་དགོས།

¹⁷ དེ་རིང་ཁྱོད་ཚོས་གཙོ་བོ་དཀོན་མཆོག་ལ་རང་གི་དཀོན་མཆོག་ཡིན་པར་ངོས་ལེན་ཞུས་ཤིང་། ཁོང་གི་བཀའ་དང་བཀའ་ཁྲིམས་ཡོངས་རྫོགས་སྲུང་ཞིང་། ཁོང་གི་བཀའ་དགོངས་བཞིན་དུ་འགྲུལ་རྒྱུའི་དམ་བཅའ་ཕུལ་ཡོད་དོ།

¹⁸ སྔར་གཅོ་བོ་དཀོན་མཆོག་གིས་ཞལ་བཞེས་གནང་བ་བཞིན། དེ་རིང་ཁོང་གིས་ཁྱོད་ཚོར་ཉིད་ཀྱི་མི་འབངས་སུ་ངོས་ལེན་གནང་ཡོད་པ་ཡིན་པས། ཁོང་གིས་ཁྱོད་ཚོར་ཉིད་ཀྱི་བཀའ་ཁྲིམས་ཚང་མ་སྲུང་དགོས་པའི་བཀའ་གནང་ཡོད།

¹⁹ ཁོང་གིས་བཀོད་གནང་མཛད་པའི་མི་རིགས་ཀུན་གྱི་ནང་ནས་ཁྱོད་ཚོ་ནི་མངའ་ཐང་ཆེ་བའི་མི་རིགས་ཤིག་ཏུ་བཀོད་པ་གནང་རྒྱུ་ཡིན་པས། ཁྱོད་ཚོས་ཁོང་གི་མཚན་ལ་བསྟོད་བསྔགས་དངགུས་བཀུར་ཞུས་དགོས། ཁོང་གིས་ཞལ་བཞེས་གནང་བ་ལྟར་ཁྱོད་ཚོ་ཁོང་རང་ཉིད་ཀྱི་མི་འབངས་སུ་བྱུང་བར་འགྱུར་རོ༎