བཀའ་ལུང་། 25 - Tibetan Old Testament 2011

¹ གལ་ཏེ་ཨིསི་རཱཨེལ་པ་གཉིས་འཐབ་རྩོད་བྱུང་སྟེ་ཁྲིམས་ཁང་དུ་ཁྲིད་ནས་གཅིག་དེ་ནོངས་མེད་དང་གཞན་དེ་ཉེས་ཅན་དུ་རྩིས་པ་དང་།

² ཉེས་ཅན་དེ་ལ་རྡུང་དགོས་པའི་ཁྲིམས་ཕོག་པ་ཡིན་ན། ཁྲིམས་དཔོན་གྱིས་ཁོ་ལ་མར་ཁ་འབུབ་ཏུ་སྙལ་ནས་རྟ་ལྕག་གཏོང་དགོས། རྟ་ལྕག་མང་ཉུང་ཇི་ཙམ་གཏོང་དགོས་པ་དེ་ཁོའི་ནག་ཉེས་ཆེ་ཆུང་ལ་ལྟས་ནས་ཐག་གཅོད་བྱེད་དགོས།

³ དེ་ལ་རྟ་ལྕག་བཞི་བཅུ་ལས་གཏོང་མི་ཆོག དེ་ལས་མང་བ་རྟ་ལྕག་བཏང་བ་ཡིན་ན། ཀུན་གྱིས་མཐོང་སར་ཁོ་ལ་མིང་རྗེས་ངན་པ་ཞིག་ཡོང་ཉེན་ཡོད།

⁴ ཕྱུགས་ཆགས་བསྐོར་སྐབས་གླང་གི་ཁ་མ་སྡམ་ཞིག།

འདས་གྲོངས་ཟིན་པའི་སྤུན་གྱི་ཆེད་དུ་བྱེད་དགོས་པའི་ལས་འགན།

⁵ ཁྱིམ་ཚང་གཅིག་གི་ནང་དུ་སྤུན་གཉིས་ཡོད་པ་ལས་གཅིག་ལ་བུ་མེད་པར་ཤི་བ་ཡིན་ན། ཁོའི་སྐྱེ་དམན་དེས་ཕྱི་མིའི་ཁྱིམ་ཚང་གཞན་གྱི་སྐྱེས་པ་དང་ཆང་ས་བརྒྱབ་མི་ཆོག འོན་ཀྱང་འདས་གྲོངས་ཟིན་པའི་མི་དེའི་སྤུན་གྱིས་མོ་ལ་ཆང་ས་བརྒྱབ་དགོས། དེ་ནི་ཁོའི་ལས་འགན་ཞིག་ཡིན་ནོ།

⁶ དེ་གཉིས་ལས་སྐྱེས་པའི་བུ་སྔོན་སྐྱེས་དེ་ནི་སྤུན་འདས་གྲོངས་ཕྱིན་པ་དེའི་བུའི་ཚུལ་དུ་ངོས་འཛིན་བྱས་ཏེ། སྤུན་འདས་པའི་རིགས་རྒྱུད་དེ་ཡིན་ཟེར་ཨིསི་རཱཨེལ་ནང་དུ་གནས་པར་བྱེད་རྒྱུ་ཡིན།

⁷ འདས་པའི་མིའི་སྤུན་དེས་མོ་ལ་ཆང་ས་བརྒྱབ་འདོད་མ་བྱས་ན། བུད་མེད་དེས་གྲོང་ཁྱེར་གྱི་འགོ་བྱེད་ཚོའི་མདུན་དུ་ཕྱིན་ནས། ངའི་ཁྱོ་གའི་སྤུན་དེས་རང་གི་ལས་འགན་མ་སྒྲུབ་པར། ཨིསི་རཱཨེལ་པ་རྣམས་ཀྱི་དཀྱིལ་དུ་རང་གི་སྤུན་གྱི་རིགས་རྒྱུད་སྤེལ་འདོད་བྱེད་ཀྱི་མི་འདུག་ཅེས་བརྗོད་དགོས།

⁸ དེ་ནས་གྲོང་ཁྱེར་གྱི་འགོ་བྱེད་ཚོས་མི་དེ་ལ་བོས་ཏེ་བསླབ་བྱ་བྱེད་དགོས། དེ་ལྟར་བྱས་ཏེ་མ་ཉན་པ་ཡིན་ན།

⁹ ཡུག་མོ་དེས་གྲོང་ཁྱེར་གྱི་འགོ་བྱེད་ཚོས་མཐོང་སར་སྐྱེས་པ་དེའི་ལྷམ་ཡ་གཅིག་ཕུད་དེ་མི་དེའི་གདོང་ལ་མཐུ་ལུད་བརྒྱབ་ཅིང་འདི་ལྟར་སྨྲས་དགོས། རང་གི་སྤུན་གྱི་རིགས་རྒྱུད་སྤེལ་འདོད་མི་བྱེད་མཁན་དེ་ལ་གནས་ཚུལ་ཐབས་སྡུག་འདི་འདྲ་ཡོང་ངེས་སོ།

¹⁰ ཁྱིམ་ཚང་དེའི་མིང་ལ་ལྷམ་ཕུད་པའི་མིའི་ཁྱིམ་ཚང་ཞེས་ཨིསི་རཱཨེལ་ཡོངས་སུ་གྲགས་པར་འགྱུར༎

ཁྲིམས་གཞན་རྣམས།

¹¹ མི་གཉིས་འཐབ་འཛིང་བྱེད་སྐབས་མི་གཅིག་གི་ཆུང་མས་རང་གི་ཁྱོ་གའི་ཕྱོགས་བྱས་ཏེ། སྐྱེས་པ་གཞན་དེའི་ཕོ་མཚན་བཙིར་ཐབས་བྱས་པ་ཡིན་ན།

¹² བུད་མེད་དེ་ལ་སྙིང་རྗེ་མ་བྱེད་པར་དེའི་ལག་པ་གཅོད་དགོས་སོ།

^13-14 ཐིག་ཚད་དང་ལྗིད་ཚད་བེད་སྤྱོད་བྱེད་སྐབས་གཞན་ལ་མགོ་སྐོར་མ་གཏོང་ཞིག

¹⁵ ཁྱོད་ཚོས་ཁྲིམས་དང་མཐུན་པའི་ལྡན་པའི་ལྗིད་ཆད་དང་ཚད་སོགས་བེད་སྤྱོད་བྱས་པ་ཡིན་ན། གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོ་ལ་གནང་རྒྱུ་ཡིན་པའི་ཡུལ་དེར་ཁྱོད་ཚོ་ཚེ་རིང་པོར་གནས་པར་འགྱུར།

¹⁶ མགོ་སྐོར་གཏོང་མཁན་རྣམས་ལ་གཙོ་བོ་དཀོན་མཆོག་སྡང་བ་གནང་ངོ་༎

ཨ་མ་ལེག་པ་རྣམས་གསོད་དགོས་པའི་བཀའ།

¹⁷ ཁྱོད་ཚོ་ཨི་ཇིབ་ནས་ཐོན་ཡོང་སྐབས། ཨ་མ་ལེག་པ་ཚོས་ཁྱོད་ཚོར་གང་བྱས་པ་དེ་དྲན་གསོ་བྱོས་ཤིག

¹⁸ དེ་ཚོས་དཀོན་མཆོག་ལ་མ་འཇིགས་པར། ཁྱོད་ཚོ་ངལ་ཞིང་ཐང་ཆད་པའི་སྐབས་སུ། དེ་ཆོས་ཁྱོད་ཚོའི་རྒྱབ་ནས་འཐབ་འཛིང་བྱས་ཏེ། མི་ཚོགས་ཀྱི་མཇུག་ཏུ་ལུས་པ་ཚང་མ་བསད་པ་ཡིན་པས།

¹⁹ དེར་བརྟེན་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཡུལ་དེ་ཁྱོད་ཚོར་གནང་དུས། ཁྱོད་ཚོའི་མཐའ་འཁོར་ལ་ཡོད་པའི་དགྲ་བོའི་ལས་བརྟན་པོ་མཛོག་སྐབས། ཁྱོད་ཚོས་ཨ་མ་ལེག་པ་ཚང་མ་ངེས་པར་གསོད་དགོས། དེ་ཚོའི་མིང་ཤུལ་ཙམ་ཡང་སུ་ཞིག་གི་ནམ་ཡང་མི་དྲན་པར་བྱེད་དགོས་པ་དང། དེ་མ་བརྗེད་ཅིག།