བཀའ་ལུང་། 12 - Tibetan Old Testament 2011

མཆོད་འབུལ་གྱི་ས་གནས་གཅིག་རང་།

¹ ཁྱོད་ཚོའི་མེས་པོའི་དཀོན་མཆོག་གཙོ་བོ་དཀོན་མཆོག་གིས་ཁྱོད་ཚོ་ལ་གནང་རྒྱུ་ཡིན་པའི་ཡུལ་དེར་གནས་ཡུན་རིང་ལ། ཁྱོད་ཚོས་རྩིས་སྲུང་ཞུ་དགོས་པའི་ཁྲིམས་འདི་དག་ལ་ཉོན་ཅིག

² ཁྱོད་ཚོས་བདག་འཛིན་བྱེད་རྒྱུ་ཡིན་པའི་ཡུལ་དེར་རི་མཐོ་པོ་རྣམས་དང་། རི་བརྒྱུད་ཁག་དང་། ཤིང་སྡོང་ལྗང་ཁུའི་འོག་ཏུ་ཡོད་པའི་དེ་ཚོའི་ལྷ་རྟེན་རྣམས་ལ་མཆོད་ཕྱིར་གཞན་གྱིས་བཟོས་པའི་ས་གནས་དེ་ཚོ་ཚང་མ་ཁྱོད་ཚོས་སྟོར་ཤིག་གཏོང་དགོས་པ་དང་།

³ དེ་ཚོའི་མཆོད་ཁྲི་རྣམས་སྟོར་ཤིག་བཏང་ནས་དབྱུགས་དགོས། རྡོའི་ཀ་བ་རྩ་ཆེན་རྣམས་དུམ་བུར་བཅག་སྟེ་སྟོར་དགོས། ལྷ་མོ་ཨ་ཤེ་རཱའི་འདྲ་སྐུ་རྣམས་མེར་སྲེག་གཏོང་དགོས། འདྲ་སྐུ་གཞན་རྣམས་ཀྱང་བཏུབ་ནས་དབྱུགས་དགོས། གང་ལགས་ཟེར་ན། ཕྱིས་སུ་ས་ཁུལ་དེ་ཚོར་སླར་ཡང་ལྷ་རྟེན་དེ་དག་ལ་མཆོད་འབུལ་བྱེད་མི་ཐུབ་པའི་ཕྱིར་རོ།

⁴ མི་རིགས་འདི་ཚོས་རང་གི་ལྷ་རྟེན་དག་ལ་མཆོད་པ་བཞིན་ཁྱོད་ཚོས་རང་གི་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ལ་དེ་བཞིན་མ་མཆོད་ཅིག

⁵ ཁྱོད་ཚོའི་སྡེ་རིགས་ཚང་མའི་ས་ཁོངས་ནས་གཙོ་བོ་དཀོན་མཆོག་གིས་ས་གནས་གཅིག་རང་འདམས་པ་གནང་ཞིང་། དེར་མི་རྣམས་ཁོང་གི་སྤྱན་སྔར་བཅར་ཏེ། ཁོང་ལ་བསྙེན་བཀུར་ཞུ་བར་འགྱུར།

⁶ དེར་ཁྱོད་ཚོས་རང་གི་དམར་མཆོད་ཀྱི་སྦྱིན་སྲེག་དང་དམར་མཆོད་གཞན་རྣམས་དང་། ཁྱོད་ཚོའི་འབུལ་བའི་བཅུ་ཁག་དང་འབུལ་བ་སོགས་དང་། གཙོ་བོ་དཀོན་མཆོག་ལ་དམ་བཅའ་ཞུས་པའི་འབུལ་བ་རྣམས་དང་། དང་བླངས་ཀྱི་འབུལ་བ་རྣམས་དང་། རང་གི་སྒོ་ཕྱུགས་ཀྱི་སྔོན་སྐྱེས་ཀྱི་འབུལ་བ་སོགས་འབུལ་ཞིང་།

⁷ དེར་ཁྱོད་ཚོ་ལ་བྱིན་རླབས་གནང་མཁན་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་སྤྱན་སྔར་ཁྱོད་ཚོ་དང་ཁྱོད་ཚོ་རང་གི་ནང་མི་དང་བཅས་པས་རང་གིས་འབད་བརྩོན་བྱས་པའི་འགྲུབ་འབྲས་བཟང་པོ་བཟའ་ཞིང་ལོངས་སུ་སྤྱོད་པར་འགྱུར།

⁸ དུས་དེ་རན་སྐབས། ཁྱོད་ཚོས་ད་བར་བྱེད་སྟངས་གང་བྱས་པ་བཞིན་ད་ཕྱིན་ཆད་མ་བྱེད་ཅིག ད་བར་ཁྱོད་ཚོས་རང་གི་འདོད་མོས་བཞིན་དུ་མཆོད་འབུལ་བྱས་ཡོད་པ་ཡིན་ནོ།

⁹ གང་ལགས་ཟེར་ན། ཁྱོད་ཚོ་ཞི་བདེའི་ངང་དུ་གནས་ཐུབ་པའི་ཕྱིར་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་གནང་རྒྱུ་ཡིན་པའི་ཡུལ་དེར་འཛུལ་མེད་པ་ཡིན་ནོ།

¹⁰ ཁྱོད་ཚོས་གཙང་པོ་ཡོར་དན་རྒལ་བའི་རྗེས་སུ་གཙོ་བོ་དཀོན་མཆོག་གིས་ཡུལ་དེ་ཁྱོད་ཚོའི་བདག་དབང་དུ་གནང་ཞིང་དེར་ཁྱོད་ཚོ་གནས་སྡོད་བྱ་རྒྱུ་དང་། དེར་གཙོ་བོ་དཀོན་མཆོག་གིས་ཁྱོད་ཚོར་དགྲ་བོའི་འཇིགས་པ་ཀུན་ལས་སྐྱབས་པ་གནང་ཞིང་། ཁྱོད་ཚོ་ཞི་བདེའི་ངང་དུ་གནས་པར་འགྱུར།

¹¹ གཙོ་བོ་དཀོན་མཆོག་གིས་ཁོང་ལ་བསྙེན་བཀུར་ཞུ་བའི་ས་གནས་གཞན་དང་མི་འདྲ་བ་ཞིག་ཁོང་གིས་འདམས་གནང་ཞིང་། ངས་སྨྲས་པ་བཞིན་ཁྱོད་ཚོས་དེར་རང་གི་དམར་མཆོད་ཀྱི་སྦྱིན་སྲེག་དང་དམར་མཆོད་གཞན་རྣམས་དང་། ཁྱོད་ཚོའི་འབུལ་བའི་བཅུ་ཁག་དང་འབུལ་བ་སོགས་དང་། ཁྱོད་ཚོས་གཙོ་བོ་དཀོན་མཆོག་ལ་དམ་བཅའ་ཞུས་པའི་དམིགས་བསལ་གྱི་འབུལ་བ་རྣམས་འཁྱེར་ཡོང་དགོས།

¹² ཁྱོད་ཚོ་གཙོ་བོ་དཀོན་མཆོག་གི་སྤྱན་སྔར་རང་གི་བུ་ཕྲུག་དང་། འཁོར་གཡོག་དང་། དེ་བཞིན་ཁྱོད་ཚོའི་གྲོང་ཁྱེར་དུ་གནས་སྡོད་བྱེད་པའི་ལེ་ཝི་པ་དང་བཅས་པ་ཚང་མ་དགའ་མགུར་སྤྱོད་ཅིང་། ལེ་ཝི་པ་རྣམས་ལ་རང་གི་ས་སྐལ་མེད་པ་དེ་དྲན་པར་གྱིས་ཤིག

¹³ ཁྱོད་ཚོས་འདོད་མོས་བཞིན་ས་གནས་གང་རུང་དུ་རང་གི་དམར་མཆོད་མ་འབུལ་ཞིག

¹⁴ གཙོ་བོ་དཀོན་མཆོག་གིས་ཁྱོད་ཚོའི་སྡེ་རིགས་ཁོངས་ནས་འདེམས་སྒྲུག་གནང་བའི་ས་གནས་དེ་རང་གཅིག་པོར་རང་གི་འབུལ་བ་རྣམས་འབུལ་དགོས་པ་དང་། ས་གནས་དེ་རང་གཅིག་པོར་ཁྱོད་ཚོས་རང་གི་སྦྱིན་སྲེག་གི་མཆོད་འབུལ་དང་། ངས་སྨྲས་པའི་དོན་གནད་གཞན་རྣམས་བྱེད་ཆོག་པ་ཡིན་ནོ།

¹⁵ འོན་ཀྱང་ཁྱོད་ཚོ་གང་དུ་གནས་སྡོད་བྱེད་པའི་ས་གནས་དེ་རང་དུ་རང་གི་འདོད་མོས་བཞིན་སེམས་ཅན་བསད་ནས་ཟ་ཆོག་པ་དང་། གཙོ་བོ་དཀོན་མཆོག་གིས་ཁྱོད་ཚོར་གནང་བའི་སེམས་ཅན་མང་ཉུང་ཇི་ཙམ་ཡང་ཟ་ཆོག ཁྱོད་ཚོ་ཆོས་ཁྲིམས་བཞིན་དུ་གཙང་བའམ་མི་གཙང་བ་བྱུང་ཡོད་ན་ཡང་རི་དགས་ཤ་བའམ་ཤ་མོའི་ཤ་ཟ་བ་བཞིན་དེ་ཡང་ཟ་ཆོག་གོ

¹⁶ ཁྱོད་ཚོས་དེ་ཚོའི་ཁྲག་ཟ་མི་ཆོག། འོན་ཀྱང་ཆུ་གཤོ་བ་བཞིན་ཁྲག་དེའང་སའི་ཁར་གཤོས་ཤིག

¹⁷ ཁྱོད་ཚོས་རང་གི་ལོ་ཐོག་དང་རྒུན་ཆང་དང་། དེ་བཞིན་ཁ་སྐྱུར་པོའི་སྣུམ་བཅས་ཀྱི་བཅུ་ཁག་དང་། ཁྱོད་ཚོའི་ལུག་ལ་སོགས་པའི་ཟོག་སེམས་ཅན་རྣམས་ཀྱི་སྔོན་སྐྱེས་དང་། ཁྱོད་ཚོས་གཙོ་བོ་དཀོན་མཆོག་ལ་དམ་བཅའ་ཕུལ་བའི་འབུལ་བ་ཁག་དང་། དང་བླངས་ཀྱི་འབུལ་བ་ཁག་དང་དེ་བཞིན་འབུལ་བ་གཞན་རྣམས་གཙོ་བོ་དཀོན་མཆོག་ལ་ཕུལ་བའི་རྗེས་སུ། ཁྱོད་ཚོས་འབུལ་བ་དེ་རྣམས་རང་གི་སྡོད་གནས་རང་དུ་ཟ་མི་རུང་།

¹⁸ འབུལ་བ་དེ་རྣམས་ཁྱོད་ཚོ་དང་ཁྱོད་ཚོའི་བུ་ཕྲུག་རྣམས་དང་། ཁྱོད་ཚོའི་འཁོར་གཡོག་རྣམས་དང་། དེ་བཞིན་ཁྱོད་ཚོའི་གྲོང་ཁྱེར་ཁག་ཏུ་གནས་སྡོད་བྱེད་པའི་ལེ་ཝི་པ་རྣམས་དང་མཉམ་དུ་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་འདེམས་སྒྲུག་གནང་བའི་མཆོད་འབུལ་བྱེད་སའི་ས་གནས་གཅིག་པོར་ཁོང་གི་སྤྱན་སྔར་ཟ་དགོས་པ་མ་ཟད། དེར་ཁྱོད་ཚོས་གང་བྱས་པའི་ལས་དོན་ཚང་མར་དགའ་སྤྲོ་སྐྱེས་དགོས།

¹⁹ ཁྱོད་ཚོ་རང་ཡུལ་དུ་གནས་ཡུན་རིང་དུ་ལེ་ཝི་པ་རྣམས་ལ་ལྟ་སྐྱོང་བྱེད་རྒྱུའི་སེམས་འཁུར་བྱོས་ཤིག

²⁰ གཙོ་བོ་དཀོན་མཆོག་ཁྱོད་ཀྱི་དཀོན་མཆོག་གི་ཞལ་བཞེས་གནང་བ་བཞིན་ཁོང་གིས་ཁྱོད་ཚོའི་ཡུལ་གྱི་ས་མཚམས་རྒྱ་ཆེ་རུ་གཏོང་བ་གནང་སྐབས། ཁྱོད་ཚོས་རང་གི་འདོད་མོས་བཞིན་ག་དུས་ཡིན་རུང་ཤ་ཟ་ཆོག་པ་ཡིན་ནོ།

²¹ མཆོད་འབུལ་བྱེད་སའི་གནས་དེ་ས་ཐག་རིང་པོར་ཡོད་པ་ཡིན་ན། ཁྱོད་ཚོས་ག་དུས་ཡིན་རུང་རང་གི་འདོད་མོས་བཞིན་གཙོ་བོ་དཀོན་མཆོག་གིས་ཁྱོད་ཚོ་ལ་གནང་བའི་བ་ཕྱུགས་སམ་ལུག་དག་བསད་ནས་ངས་སྨྲས་པ་བཞིན་སོ་སོའི་ནང་དུ་ཤ་དེ་ཟ་ཆོག

²² ཆོས་ཁྲིམས་གཞིར་བཟུང་ཁྱོད་ཚོ་སུ་ཞིག་དག་སྦྱང་བྱུང་ཡོད་མིན་ཁྱོད་ཚོས་རི་དྭགས་ཤ་བ་ཕོ་མོའི་ཤ་ཟ་བ་བཞིན་ཤ་དེའང་དེ་བཞིན་ཟ་ཆོག་མོད།

²³ འོན་ཀྱང་ད་དུང་ཁྲག་འབྲེལ་ཡོད་པ་ཡིན་ན་ཤ་དེ་ཟ་མི་རུང་། གང་ལགས་ཟེར་ན། ཁྲག་གི་ནང་སྲོག་ཡོད་པས་ཁྱོད་ཚོས་ཤ་དང་མཉམ་དུ་སྲོག་དེ་ཟ་མི་རུང་བ་ཡིན་ནོ།

²⁴ ཁྲག་ནི་ཟས་སུ་ལོངས་མ་སྤྱད་པར། ཆུ་གཤོ་བ་བཞིན་ཁྲག་དེ་སའི་ཁར་གཤོས་ཤིག་དང་།

²⁵ ཁྱོད་ཚོས་བཀའ་ཁྲིམས་འདི་དག་བརྩིས་སྲུང་ཞུས་ན་གཙོ་བོ་དཀོན་མཆོག་ཐུགས་མཉེས་ཤིང་། ཁྱོད་ཚོ་དང་ཁྱོད་ཚོའི་རིགས་བརྒྱུད་དང་བཅས་པར་བྱ་བ་ལམ་འགྲོ་ཡོང་རྒྱུ་ཡིན་ནོ།

²⁶ ཁྱོད་ཚོས་རང་གི་འབུལ་བ་ཁག་དང་། གཙོ་བོ་དཀོན་མཆོག་ལ་དམ་བཅའ་ཕུལ་བའི་དམིགས་བསལ་གྱི་འབུལ་བའི་འབུལ་བ་རྣམས་མཆོད་འབུལ་བྱེད་སའི་ས་གནས་གཅིག་པོ་དེར་འཁྱེར་ཡོང་དགོས།

²⁷ གཙོ་བོ་དཀོན་མཆོག་གི་མཆོད་ཁྲིའི་སྟེང་དུ་ཡོངས་སུ་མེར་སྲེག་གཏོང་དགོས་པའི་དམར་མཆོད་རྣམས་གནས་དེར་འབུལ་དགོས། འབུལ་བའི་ཤ་དེ་ཟས་ནས་ཁྲག་དེ་མཆོད་ཁྲིའི་ཁར་གཏོར་དགོས་པའི་མཆོད་པ་དེའང་ས་གནས་དེ་རང་དུ་བྱོས་ཤིག་དང་།

²⁸ ངས་གང་སྨྲས་པ་ཚང་མ་ཁྱོད་ཚོས་ཚུལ་བཞིན་སྲུང་བ་ཡིན་ན། ཁྱོད་ཚོ་རང་གི་མི་བརྒྱུད་དང་བཅས་པར་ལས་དོན་གང་སྤྱིར་ལམ་འགྲོ་ཡོང་ངེས་སོ། གང་ལགས་ཟེར་ན། དེ་ལྟར་བྱས་པའི་སྒོ་ནས་ཁྱོད་ཚོས་གང་བཟང་ཞིང་རིགས་པ་ཡིན་པ་དང་། ཁྱོད་ཀྱི་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ཐུགས་མཉེས་པའི་ལས་བྱེད་དོོ༎

ལྷ་སྐུར་བརྟེན་མི་རུང་བའི་ཟོན་བསྐུལ།

²⁹ ཁྱོད་ཚོས་དབང་འཛིན་བྱས་པའི་ཡུལ་གྱི་མི་རིགས་རྣམས་ལ་གཅོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཚར་གཅོད་གནང་ཞིང་། དེར་ཁྱོད་ཚོ་གཞིས་ཆགས་རྒྱུ་ཡིན་པ་དང་།

³⁰ ཡང་གཙོ་བོ་དཀོན་མཆོག་གིས་མི་རིགས་དེ་ཚོ་ཚར་གཅོད་གནང་བའི་རྗེས་སུ། ཁྱོད་ཚོས་དེ་དག་གི་ཆོས་ལུགས་ཀྱི་རྗེས་སུ་མ་འབྲངས་ཤིག དེ་མིན་ཁྱོད་ཚོ་རྙི་ནང་ཚུད་བར་འགྱུར། དེ་ཚོས་མཆོད་ལྟངས་ཇི་ལྟར་ཡིན་ནམ་ཞེས་ཤེས་འདོད་ཙམ་ཡང་མ་བྱེད་ཅིག དེ་མིན་ཁྱོད་ཚོས་ཀྱང་དེ་བཞིན་བྱེད་ཉེན་ཡོད།

³¹ དེ་ཚོས་རང་གི་ལྷ་རྟེན་སོགས་ལ་མཆོད་འབུལ་བྱེད་སྐབས། གཙོ་བོ་དཀོན་མཆོག་གི་སྡང་བ་དང་ལས་ངན་སྐྱོག་བྲོ་པོ་དག་བྱེད་སྲོལ་ཡོད་པས། ཁྱོད་ཚོས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ལ་དེ་བཞིན་མཆོད་འབུལ་མ་བྱེད་ཅིག དེ་ཚོས་རང་གི་ཕྲུ་གུའང་མེའི་མཆོད་ཁྲིའི་ཁར་དམར་མཆོད་འབུལ་གྱི་ཡོད།

³² ངས་སློབ་སྟོན་བྱས་པའི་བཀའ་རྒྱ་ཚང་མ་སྒྲུབ་དགོས་པ་དང་། དེའི་ཁར་ཚིག་གཅིག་ཀྱང་འཕར་གནོན་བརྒྱབ་པའམ་དེ་ལས་ཚིག་གཅིག་ཀྱང་འཐེན་པ་སོགས་བྱེད་མི་རུང་ངོ་༎