བཀའ་ལུང་། 10 - Tibetan Old Testament 2011

མོ་ཤེས་ལ་བཀའ་ཁྲིམས་བཅུ་སྐྱར་དུ་ཐོབ་པ།

¹ དེ་ནས་གཙོ་བོ་དཀོན་མཆོག་གིས་ང་ལ། སྔོན་གྱི་རྡོ་ལེབ་དང་འདྲ་བ་རྡོ་ལེབ་གཉིས་བཅད་དེ། དེ་བཞག་པའི་ཕྱིར་ཤིང་སྒྲོམ་ཞིག་བཟོས་ཏེ། རི་རྩེར་ངའི་རྩར་ཤོག་ཅིག།

² སྔར་ཁྱོད་ཀྱི་བཅག་པའི་རྡོ་ལེབ་དེར་སྔར་གང་བྲིས་ཡོད་པ་བཞིན། ངས་རྡོ་ལེབ་དེ་གཉིས་ཀྱི་ཁར་སྐྱར་དུ་བྲིས་རྒྱུ་ཡིན། དེ་རྗེས་ཁྱོད་ཀྱིས་རྡོ་ལེབ་དེ་གཉིས་སྒྲོམ་དེའི་ནང་དུ་བཞག་དགོས་ཅེས་གསུངས་སོ།

³ དེ་རྗེས་ངས་ཤིང་ཏིམ་ཤིང་ལས་སྒྲོམ་ཞིག་བཟོས་ནས་སྔར་བཞིན་རྡོ་ལེབ་གཉིས་གཤག་སྟེ་རི་རྩེར་འཁྱེར་ནས་ཕྱིན་པ་ཡིན།

⁴ དེ་ནས་གཙོ་བོ་དཀོན་མཆོག་གིས་སྔར་གང་བྲིས་གནང་བའི་བཀའ་དེ་རང་ཁོང་གིས་རྡོ་ལེབ་དེ་གཉིས་ཁར་བྲིས་པ་གནང་ཞིང་། ཡང་ཁོང་གིས་གནང་བའི་བཀའ་ཁྲིམས་བཅུ་ནི་སྔར་ཁྱོད་ཚོ་རི་བོའི་འགྲམ་དུ་འཛོམ་སྐབས། ཁོང་གིས་མེའི་དཀྱིལ་ནས་གསུངས་གླེང་གནང་དུས་སྩལ་བའི་བཀའ་རྒྱ་དེ་དག་ཡིན་ནོ། དེ་རྗེས་གཙོ་བོ་དཀོན་མཆོག་གིས་རྡོ་ལེབ་དེ་གཉིས་ང་ལ་གནང་བ་དང་།

⁵ ང་རི་རྩེ་ནས་མར་བབས་ཏེ། གཙོ་བོ་དཀོན་མཆོག་གིས་གསུངས་པ་བཞིན་རྡོ་ལེབ་དེ་གཉིས་ངས་བཟོས་པའི་སྒྲོམ་དེའི་ནང་བཞག་པ་ཡིན་པས། དུས་དེ་ནས་བཟུང་རྒྱུན་དུ་དེར་ཡོད་པ་ཡིན་ནོ།

⁶ (ཡཱ་ཀན་རིགས་བརྒྱུད་ཀྱི་ཁྲོན་པ་ཡོད་སའི་ས་གནས་ནས་ཨིསི་རཱཨེལ་པ་ཚོ་ཐོན་སྟེ་མོ་སེ་རཱ་བྱ་བའི་གནས་སུ་སླེབས་ཤིང་། དེར་ཨ་རོན་གྲོངས་ནས་སྦས་པ་དང་། ཁོང་གི་བུ་ཨེ་ལི་ཛར་ཁོང་གི་ཚབ་ཏུ་བླ་མའི་ལས་མཚན་དུ་བསྐོས་སོ།

⁷ དེ་ནས་ཁོ་ཚོ་གྷུད་གོ་དཱ་རུ་ཕྱིན་ནས། ཆུ་མང་པོ་ཡོད་པའི་ས་གནས་ཡོད་བྷ་ཐཱ་རུ་བསླེབས་སོ།

⁸ རི་བོའི་ཁར་གཙོ་བོ་དཀོན་མཆོག་གིས་ལེ་ཝི་སྡེ་རིགས་ཀྱི་སྐྱེས་པ་རྣམས་ལ་སྒྲོམ་དེ་རྩིས་སྤྲོད་གནང་ཞིང་། ཁོ་ཚོས་བླ་མ་བྱས་ནས་ཁོང་གིས་ཞབས་ཕྱི་ཞུ་དགོས་པ་དང་། ཁོང་གི་མཚན་བརྗོད་དེ་གཞན་ལ་བྱིན་རླབས་སྤྲོད་དགོས་པའི་ལས་འགན་དེ་གནང་བ་ཡིན་ནོ། དེང་དུས་ཀྱང་གོང་གསལ་ལས་འགན་རྣམས་ཁོ་ཚོས་བྱེད་བཞིན་པ་ཡིན་ནོ།

⁹ དེར་བརྟེན་པས་ལེ་ཝིའི་སྡེ་རིགས་ཚོར་སྡེ་རིགས་གཞན་དང་འདྲ་བའི་ས་སྐལ་མ་ཐོབ་མོད། འོན་ཀྱང་ཁོ་ཚོར་གང་ཐོབ་པ་དེ་ནི་སྔར་ཁྱོད་ཚོའི་གཙོ་བོ་དཀོན་མཆོག་གིས་དམ་བཅའ་གནང་བ་ལྟར་དེ་ཚོ་བླ་མའི་གོ་གནས་སུ་འཁོད་པའི་དམིགས་བསལ་གྱི་ཐོབ་ཐང་ཐོབ་པ་ཡིན་ནོ།)

¹⁰ དེ་རྗེས་སྔར་བཞིན་ང་རི་རྩེར་ཉིན་མཚན་བཞི་བཅུ་བར་དུ་བསྡད་པས། གཙོ་བོ་དཀོན་མཆོག་གིས་སླར་ཡང་ངའི་ཞུ་བར་ལན་གཅིག་གསན་ཏེ་ཁྱོད་ཚོར་ཚར་གཅོད་མི་གནང་བའི་མོས་མཐུན་གནང་ངོ་།

¹¹ དེ་ནས་ཁོང་གིས་ཁྱོད་ཚོའི་མེས་པོ་རྣམས་ལ་གནང་གི་ཡིན་ཞེས་དམ་བཅའ་གནང་བའི་ཡུལ་དེ་ཁྱོད་ཚོས་དབང་འཛིན་བྱེད་ཕྱིར་ངས་ཁྱོད་ཚོར་འགོ་འཁྲིད་བྱེད་དགོས་པའི་བཀའ་གནང་བྱུང་༎

གཙོ་བོ་དཀོན་མཆོག་གི་དགོས་འདོད་དེ་ག་རེ་ཡིན་པ།

¹² ཀྱེ་ཨིསི་རཱཨེལ་གྱི་མི་མང་རྣམས། ཁྱོད་ཚོའི་གཙོ་བོ་དཀོན་མཆོག་གིས་ཁྱོད་ཚོ་ནས་དགོས་འདོད་གང་གནང་གི་ཡོད་པ་དེར་ཉོན་ཅིག གཙོ་བོ་དཀོན་མཆོག་ལ་བསྙེན་བཀུར་ཞུས་ཤིང་། ཁོང་གི་བཀའ་ཚང་མར་རྩིས་སྲུང་ཞུ་དགོས་པ་དང་། ཁོང་ལ་བྱམས་བརྩེ་དང་སེམས་ཀྱི་གཏིང་ནས་སྲི་ཞུ་ཞུ་དགོས།

¹³ ཁྱོད་ཚོར་ཕན་ཐོག་ཡོང་ཕྱིར་དེ་རིང་ངས་སློབ་སྟོན་བྱེད་བཞིན་པའི་ཁོང་གི་བཀའ་ཁྲིམས་ཡོངས་རྫོགས་སྲུང་ཞིག

¹⁴ ནམ་མཁའི་གནས་ཚད་མཐོ་ཤོས་དེ་ནི་གཙོ་བོ་དཀོན་མཆོག་གི་ཡིན་པ་དང་། དེ་བཞིན་ས་གཞི་དང་དེའི་ནང་དུ་ཡོད་པའི་དངོས་པོ་ཚང་མ་ཁོང་གི་ཡིན་ནོ།

¹⁵ འོན་ཀྱང་ཁྱོད་ཚོའི་མེས་པོ་རྣམས་ལ་གཙོ་བོ་དཀོན་མཆོག་གིས་ཧ་ཅང་ཐུགས་བརྩེ་ཆེན་པོ་གནང་བའི་རྐྱེན་གྱིས་མི་རིགས་གཞན་གྱི་ཚབ་ཏུ་ཁྱོད་ཚོར་འདམས་པ་གནང་ཞིང་། དེ་རིང་གི་བར་དུའང་ཁྱོད་ཚོ་ཁོང་གི་མི་འབངས་སུ་འཁོད་ཡོད་པ་ཡིན་ནོ།

¹⁶ དེ་བས་ན་ད་ནས་བཟུང་ཁྱོད་ཚོ་གཙོ་བོ་དཀོན་མཆོག་གིས་བཀའ་ལ་ཉན་ཏེ་སེམས་གཤིས་གྱོང་པོ་མ་བྱས་ཤིག

¹⁷ ཁྱོད་ཚོའི་གཙོ་བོ་དཀོན་མཆོག་ནི་ལྷ་རྟེན་ཀུན་དང་མཐུ་སྟོབས་ཀུན་ལས་མཆོག་ཡིན་པ་དང་། ཁོང་ནི་མངའ་ཐང་ཆེ་ཞིང་མཐུ་དང་ལྡན་པས། ཁོང་ལ་འཛིགས་དགོས་སོ། ཁོང་ནི་ཉེ་རིང་ཀུན་དང་བྲལ་ཞིང་། ལྐོག་རྔན་ནོར་སོགས་མི་བཞེས་སོ།

¹⁸ ད་ཕྲུག་དང་ཡུག་མོ་རྣམས་ལ་ཁོང་གིས་དྲང་བདེན་གྱི་ཁྲིམས་སྤྱོད་གནང་བཅུག་གོ ང་ཚོའི་མི་མང་གི་ཁྲོད་དུ་ཡོད་པའི་ཕྱི་རྒྱལ་མི་རིགས་རྣམས་ལ་ཁོང་གིས་བྱམས་སྐྱོང་གནང་སྟེ། དེ་དག་ལ་ཟས་གོས་སོགས་སྦྱོར་བར་མཛད་པར་འགྱུར།

¹⁹ དེ་བས་ན་ཁྱོད་ཚོས་ཕྱི་རྒྱལ་བ་དེ་ཚོ་ལ་བྱམས་སེམས་བྱོས་ཤིག གང་ལགས་ཟེར་ན། སྔར་ཁྱོད་ཚོའང་ཨི་ཇིབ་དུ་ཕྱི་རྒྱལ་བའི་ཚུལ་དུ་གནས་པ་ཡིན་ནོ།

²⁰ གཙོ་བོ་དཀོན་མཆོག་ཁྱོད་ཚོའི་དཀོན་མཆོག་འབའ་ཞིག་གི་བཀའ་སྲུང་བ་དང་བསྙེན་བཀུར་ཞུས་ཞིག དམ་ཚིག་གཙང་མ་ཞུས་ཤིང་། ཁྱོད་ཚོའི་དམ་བཅའ་རྣམས་ཁོང་གཅིག་པོའི་མཚན་ལ་ཞུས་ཤིག

²¹ ཁོང་ལ་བསྟོད་སྔགས་འབུལ་ཞིག། ཁོང་ནི་ཁྱོད་ཚོའི་དཀོན་མཆོག་ཡིན་པ་དང་། ཁོང་གིས་ཁྱོད་ཚོའི་ཕྱིར་གནང་བའི་མངའ་ཐང་ཆེ་ཞིང་ངོ་མཚར་ལྡན་པའི་ལྟས་རྣམས་ཁྱོད་ཚོའི་རང་གི་མིག་ངོར་མཐོང་བ་ཡིན་ནོ།

²² ཁྱོད་ཚོའི་ཕ་མེས་རྣམས་ཨི་ཇིབ་དུ་སླེབས་སྐབས་མི་གྲངས་བདུན་ཅུ་ལས་མེད་མོད། འོན་ཀྱང་ད་ལྟ་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོ་ནམ་མཁའི་སྐར་ཚོགས་བཞིན་དུ་གྲངས་ལས་འདས་པར་འཕེལ་རྒྱས་གནང་ཡོད་པ་ཡིན་ནོ༎