དྷ་ནི་ཨེལ 9 - Tibetan Old Testament 2011

དྷ་ནི་ཨེལ་གྱིས་མི་མང་གི་དོན་དུ་སྨོན་ལམ་འདེབས་པ།

¹ མ་དཱ་པའི་རིགས་བརྒྱུད་ལས་ཡིན་པ་ཨ་ཧ་སུ་རསེ་ཀྱི་བུ་དྷ་རི་ཡསེ་བྷེ་བྷི་ལོ་ནི་ཡ་དུ་སྲིད་སྐྱོང་བྱེད་བཞིན་ཡོད་པ་དང་།

² ཁོང་གིས་རྒྱལ་སྲིད་སྐྱོང་ལོ་དང་པོར། གཙོ་བོ་དཀོན་མཆོག་གིས་སྔར་ལུང་སྟོན་པ་ཡེར་མི་ཡཱ་ལ་ཡེ་རུ་ཤ་ལེམ་ནི་ལོ་ངོ་བདུན་བཅུའི་རིང་ལ་འཇིགས་རྒྱུ་ཡིན་པའི་སྐོར་གྱི་ལུང་བསྟན་གནང་བའི་དམ་པའི་མདོ་རྣམས་ངས་ཀློག་སྟེ། དེའི་སྐོར་བསམ་བློ་གཏོང་ཞིང་བསྡད་ཡོད་པ་དང་།

³ ངས་སྨྱུང་གནས་སྲུང་ཞིང་ལུས་ལ་རྩ་རས་གྱོན་ཏེ། གོ་ཐལ་ནང་བསྡད་ནས་གཙོ་བོ་དཀོན་མཆོག་ལ་གདུང་ཤུགས་དྲག་པོས་སྨོན་ལམ་འདེབས་པ་ཡིན།

⁴ ངས་རང་གི་དཀོན་མཆོག་གཙོ་བོ་དཀོན་མཆོག་ལ་ཞུ་བ་འབུལ་ཞིང་རང་གི་མི་འབངས་ཀྱི་ཉེས་སྡིག་རྣམས་ངོས་ལེན་ཞུས་ཏེ་མཐོལ་བཤགས་འབུལ་བ་ཡིན། ངས་གཙོ་བོ་དཀོན་མཆོག་ལ། ཀྱེ་གཙོ་བོ་དཀོན་མཆོག། ཁྱེད་ནི་མངའ་ཐང་ཆེ་ཞིང་། ང་ཚོས་ཁྱེད་ལ་གུས་བཀུར་ཞུས་ཏེ། ཁྱེད་ཀྱི་བཀའ་ལ་བརྩི་སྲུང་ཞུས་ཤིང་། ཁྱེད་ལ་བརྩེ་གུས་ཞུས་མཁན་རྣམས་ལ་ཁྱེད་ཀྱིས་རྒྱུན་ལྡན་ཐུགས་བརྩེ་གནང་བ་དང། ཁྱེད་ནི་ཉིད་ཀྱི་དམ་བཅའ་སྲུང་བར་ཐུགས་དྲང་པོ་ཡིན་ནོ།

⁵ ང་ཚོས་ཉེས་སྡིག་བསག་སྟེ། ལས་ངན་བྱས་ཤིང་ནོར་འཁྲུལ་ཁོ་ན་བྱས་པ་དང་། ཁྱེད་ཀྱི་བཀའ་ལ་བརྩི་མེད་ཞུས་ཤིང་། ཁྱེད་ཀྱི་བཀའ་དགོངས་བཞིན་གྱི་ལས་བཟང་པོ་རྣམས་སྤངས་པ་མ་ཟད།

⁶ ང་ཚོའི་རྒྱལ་པོ་རྣམས་དང་། སྲིད་སྐྱོང་པ་དང་། ང་ཚོའི་མེས་པོ་རྣམས་དང་། དེ་བཞིན་ང་ཚོའི་མི་རིགས་ཡོངས་ལ་ཁྱེད་ཀྱི་མཚན་བརྗོད་ཅིང་གསུང་གླེང་མཛད་མཁན་ཁྱེད་ཀྱི་ཞབས་ཏོག་པ་ལུང་སྟོན་པ་རྣམས་ལ་ང་ཚོས་བརྩི་མེད་ཞུས་པ་ཡིན།

⁷ གཙོ་བོ་ཁྱེད་ཀྱིས་དུས་རྒྱུན་དུ་དྲང་པོ་ཤ་ལྟག་མཛད་པ་དང་། འོན་ཀྱང་ང་ཚོས་ནི་དུས་རྒྱུན་དུ་རང་ཉིད་ཐོག་ཏུ་དམའ་འབེབས་འཁྱེར་ཡོང་ཡོད་པ་ཡིན་ནོ། ང་ཚོ་ཡ་ཧུ་དཱ་དང་། ཡེ་རུ་ཤ་ལེམ་དང་། ཨིསི་རཱཨེལ་ཡོངས་སུ་གནས་སྡོད་བྱེད་མཁན་ཚོས་ཁྱེད་ལ་དད་ལོག་ཞུས་པའི་རྐྱེན་གྱིས། ཁྱེད་ཀྱིས་ང་ཚོར་ཡུལ་གྲུ་ཉེ་འགྱང་ཀུན་ཏུ་ཁ་འཐོར་ནས་འགྲོ་དགོས་པར་མཛད།

⁸ ཀྱེ་གཙོ་བོ། ང་ཚོའི་རྒྱལ་པོ་དང་། སྲིད་སྐྱོང་པ་དང་། དེ་བཞིན་ང་ཚོའི་མེས་པོ་རྣམས་ཀྱིས་ངོ་ཚ་དང་བྲལ་བའི་ལས་ངན་བྱས་ཏེ། ཁྱེད་ཀྱི་ཐུགས་དགོངས་དང་འགལ་བའི་ཉེས་སྡིག་བྱས་ཡོད།

⁹ ང་ཚོས་ཁྱེད་ལ་རྒོལ་སེམས་ཇི་ལྟར་ཞུས་ཀྱང་། ཁྱེད་ནི་སྙིང་རྗེ་ཆེ་ལ་ཐུགས་བཟོད་དང་ལྡན་པ་ཡིན་ཏེ།

¹⁰ ཀྱེ་གཙོ་བོ་དཀོན་མཆོག་ང་ཚོའི་དཀོན་མཆོག། ཁྱེད་ཀྱི་ཞབས་ཏོག་པ་ལུང་སྟོན་པ་ཚོའི་བརྒྱུད་ནས་ང་ཚོར་ཚུལ་བཞིན་མི་ཚེ་སྐྱེལ་དགོས་པའི་བཀའ་ཁྲིམས་གནང་བ་དེ་ལ་ང་ཚོས་བརྩི་མེད་ཞུས་ཤིང་།

¹¹ ཨིསི་རཱཨེལ་པ་ཡོངས་ནས་ཁྱེད་ཀྱི་བཀའ་ཁྲིམས་དང་འགལ་ཞིང་ཁྱེད་ཀྱིས་བཀའ་གནང་བར་ཉན་སེམས་མ་བྱས་པས། ང་ཚོས་མི་དགེ་བ་གྱིས་པ་དང་ཁྱེད་ཀྱི་ཞབས་ཏོག་པ་མོ་ཤེའི་བཀའ་ཁྲིམས་ནང་བྲིས་ཡོད་པའི་དམོད་པ་དེ་དག་ང་ཚོའི་ཐོག་ཏུ་གཏོང་བ་གནང་ཞིང་།

¹² ཁྱེད་ཀྱི་ང་ཚོ་དང་ང་ཚོའི་རྒྱལ་པོ་ཚོར་ཇི་ལྟར་མཛད་རྒྱུའི་བཀའ་ཕེབས་པ་ལྟར། ཡེ་རུ་ཤ་ལེམ་ལ་འཛམ་གླིང་ཡུལ་གྲུ་གཞན་གྱི་གྲོང་ཁྱེར་ལས་ཚབ་ཆེ་བའི་ཉེས་ཆད་གནང་ཞིང་།

¹³ མོ་ཤེའི་བཀའ་ཁྲིམས་ནང་གསལ་བའི་ཆད་པ་རྣམས་ང་ཚོའི་ཐོག་ཏུ་གཏོང་བ་གནང་མོད། འོན་ཀྱང་ཀྱེ་གཙོ་བོ་དཀོན་མཆོག། ང་ཚོས་ད་དུང་རང་གི་ཉེས་སྡིག་སྤངས་ནས་ཁྱེད་ཀྱི་བདེན་པའི་རྗེས་སུ་འབྲངས་ཤིང་། ཁྱེད་ཐུགས་མཉེས་པའི་ཐབས་ལམ་སོགས་གང་ཡང་བྱས་མེད་པ་དང་།

¹⁴ ཀྱེ་གཙོ་བོ་དཀོན་མཆོག་ཁྱེད་ཀྱིས་ང་ཚོར་ཉེས་ཆད་གཏོང་བ་གནང་རྒྱུའི་ཐུགས་ཐག་བཅད་པ་ལྟར་ཉེས་ཆད་བཏང་བ་གནང་བྱུང་། གང་ལ་ཟེར་ན། ཁྱེད་ཀྱིས་རྒྱུན་དུ་བདེན་པ་ཇི་ཡིན་པ་དེ་རང་གནང་གི་ཡོད་པ་དང་། ང་ཚོས་ནི་ཁྱེད་ཀྱི་བཀའ་ལ་རྩིས་སྲུང་མ་ཞུས་པ་ཡིན་ནོ།

¹⁵ ཀྱེ་གཙོ་བོ་དཀོན་མཆོག་ང་ཚོའི་དཀོན་མཆོག། ཁྱེད་ཀྱིས་རང་གི་མི་འབངས་ལ་ཨི་ཇིབ་ནས་གཏོན་གནང་མཛད་པའི་སྒོ་ནས་ཁྱེད་ཀྱི་མཐུ་སྟོབས་དེ་མངོན་པར་མཛད་པ་དང་། ཁྱེད་ཀྱི་མཐུ་སྟོབས་དེ་ལ་ད་བར་ཚང་མས་དྲན་གསོ་བྱེད་བཞིན་ཡོད། ང་ཚོས་ནི་སྡིག་པ་དང་ནོར་འཁྲུལ་ཤ་སྟག་བྱས་པ་ཡིན་ནོ།

¹⁶ འདས་པའི་དུས་སུ་ཁྱེད་ཀྱིས་ང་ཚོར་སྲུང་སྐྱོབ་གནང་བ་ཡིན་པས། ད་ཁྱེད་ཀྱིས་ཡེ་རུ་ཤ་ལེམ་ལ་ཐུགས་ཁྲོ་མ་གནང་བར་མཛོད། དེ་ནི་ཁྱེད་ཀྱི་གྲོང་ཁྱེར་དང་རི་བོ་དམ་པ་དེ་ཡིན་ནོ། ང་ཚོའི་ཉེས་སྡིག་དང་ང་ཚོའི་ཕ་མེས་ཀྱི་ལས་ངན་དག་ལ་བརྟེན་ནས་ཁྱིམ་མཚེས་ཡུལ་གྲུ་ཁག་གི་མི་མང་ནས་ཡེ་རུ་ཤ་ལེམ་དང་ཁྱེད་ཀྱི་མི་འབངས་རྣམས་ལ་འཕྱ་སྨད་གཏོང་བ་ཡིན་པས།

¹⁷ ཀྱེ་དཀོན་མཆོག་ངའི་སྨོན་ལམ་དང་ཞུ་བར་གསན་དུ་གསོལ། ཁྱེད་ནི་དཀོན་མཆོག་ཡིན་པ་ཀུན་གྱིས་ཤེས་ཕྱིར། ཉིད་ཀྱི་མཆོད་ཁང་འཇིག་སྐྱོན་བྱུང་བ་དེ་ལ་སྐྱར་གསོ་གནང་བར་མཛོད།

¹⁸ ཀྱེ་དཀོན་མཆོག་ང་ཚོའི་ཞུ་བར་གསན་ཏེ་ང་ཚོར་གཟིགས་རོགས་གནང་། ང་ཚོའི་དཀའ་ངལ་དང་དེ་བཞིན་ཁྱེད་ཀྱི་མཚན་བཟང་འཁོད་པའི་གྲོང་ཁྱེར་དེས་མྱོང་བཞིན་པའི་སྡུག་བསྔལ་ལ་གཟིགས་པར་མཛོད། ང་ཚོ་དྲང་པོ་ཡིན་པའི་རྐྱེན་གྱིས་མ་ཡིན་པར། ཁྱེད་ནི་སྙིང་རྗེ་དང་ལྡན་པ་ཡིན་པས། ང་ཚོས་ཁྱེད་ལ་གསོལ་བ་འདེབས་ཀྱི་ཡོད།

¹⁹ ཀྱེ་གཙོ་བོ་ང་ཚོར་གསན་རོགས་གནང། ཀྱེ་གཙོ་བོ་ང་ཚོར་བཟོད་གསོལ་གནང་རོགས་གནང་། ང་ཚོའི་ཞུ་བར་གསན་ཏེ་དེ་བཞིན་ཕྱག་བཞེས་གནང་བར་མཛོད། ཁྱེད་ནི་དཀོན་མཆོག་ཡིན་པ་དེ་ཚང་མས་ཤེས་ཕྱིར་དུས་འགྱངས་མེད་པར་མཛད་འཕྲིན་བསྟན་དུ་གསོལ། གྲོང་ཁྱེར་འདི་དང་མི་མང་འདི་རྣམས་ནི་སྐུ་ཉིད་རང་གི་ཡིན་ནོ༎

གྷབ་རི་ཨེལ་ནས་ལུང་བསྟན་གྱི་འགྲེལ་བཤད་གནང་བ།

²⁰ ངས་མུ་མཐུད་དེ་ཐུགས་སྨོན་ཞུས་ཤིང་། སོ་སོ་རང་གི་ཉེས་སྡིག་དང་། ཨིསི་རཱཨེལ་པ་རྣམས་ཀྱི་སྡིག་པར་མཐོལ་བཤགས་འབུལ་ཏེ། ངས་གཙོ་བོ་དཀོན་མཆོག་ངའི་དཀོན་མཆོག་ལ་ཉིད་ཀྱི་མཆོད་ཁང་དམ་པ་དེ་སྐྱར་གསོ་གནང་བར་མཛོད་ཅེས་ཞུ་འབུལ་བྱས་པ་ཡིན།

²¹ ངས་སྨོན་ལམ་འདེབས་བཞིན་པའི་སྐབས་སུ། ངས་ཞལ་གཟིགས་སྔོན་མར་མཐོང་བའི་གྷབ་རི་ཨེལ་དེ་ངའི་རྩར་འཕུར་ནས་བསླེབས་པ་དང་། དེ་ནི་ཕྱི་དྲོའི་དམར་མཆོད་འབུལ་བའི་དུས་སྐབས་རན་པ་ཡིན་པ་དང་།

²² ཁོང་གིས་འགྲེལ་བརྗོད་གནང་གསལ། ཀྱེ་དྷ་ནི་ཨེལ། ཁྱོད་ཀྱིས་ལུང་བསྟན་དེའི་གོ་དོན་རྟོགས་པར་རོགས་བྱེད་པའི་ཕྱིར་ང་འདིར་ཡོང་བ་ཡིན།

²³ ཁྱོད་ཀྱིས་དཀོན་མཆོག་ལ་ཞུ་འབོད་གང་བྱས་པར་ཁོང་གིས་བཀའ་ལན་གནང་ཡོད། ཁོང་གིས་ཁྱོད་ལ་ཐུགས་བརྩེ་གནང་གི་ཡོད་པ་ཡིན་པས། ངས་ཁྱོད་ལ་ལན་འདི་སྐྱེལ་བར་ཡོང་བ་ཡིན། ད་ངས་ཞལ་གཟིགས་ཀྱི་འགྲེལ་བཤད་བརྒྱབ་རྒྱུ་ཡིན་པས། དེར་དོ་སྣང་བྱེད་ནས་ཉོན་ཞིག།

²⁴ དཀོན་མཆོག་གིས་ཁྱོད་ཀྱི་མི་མང་དང་། གྲོང་ཁྱེར་དམ་པ་དེ་བཞིན་སྡིག་པ་དང་ངན་ལས་ཀུན་ལས་འགྲོལ་བ་གནང་རྒྱུའི་དུས་ཡུན་གཏན་འབེབས་གནང་བ་དེ་ནི་ལོ་ངོ་བདུན་ལྡབ་བདུན་ཅུ་ཡིན་པ་དང་། ཞལ་གཟིགས་དེའི་ལུང་བསྟན་དངོས་སུ་འགྲུབ་ནས། མཆོད་ཁང་དམ་པ་དེ་སྐྱར་དུ་བསྔོ་འབུལ་བྱེད་ཕྱིར་སྡིག་སེལ་གནང་རྒྱུ་ཡིན་པ་མ་ཟད། མཐའ་མེད་པའི་བདེན་པའི་ཁྲིམས་གཅོད་དྲང་པོ་དེ་གཏན་འབེབས་གནང་རྒྱུ་ཡིན་ནོ།

²⁵ ད་ངས་གང་བཤད་རྒྱུ་ཡིན་པ་དེ་ལ་དོ་སྣང་ཆེན་པོས་གོ་དོན་རྟོགས་ཐབས་བྱོས་ཤིག ཡེ་རུ་ཤ་ལེམ་སྐྱར་བཞེངས་བྱེད་དགོས་པའི་བཀའ་གནང་བ་ནས་བཟུང་དཀོན་མཆོག་གིས་འདེམས་བསྐོས་གནང་བའི་དབུ་འཁྲིད་དེ་མ་ཕེབས་བར་དུ་ལོ་ངོ་བདུན་ལྡབ་བདུན་འགོར་རྒྱུ་ཡིན་པ་དང་། ཡེ་རུ་ཤ་ལེམ་དང་དེའི་སྲང་ལམ་དང་དེའི་སྲུང་སྐྱོབ་ཀྱི་ལྕགས་རི་བཅས་པ་སྐྱར་བཞེངས་བྱེ་རྒྱུ་ཡིན་པ་དང་། དེ་ནི་ལོ་ངོ་བདུན་ལྡབ་དྲུག་ཅུ་རེ་གཉིས་བར་དུ་གནས་སྟངས་དེ་རང་ལ་གནས་རྒྱུ་ཡིན་ནོ། འོན་ཀྱང་དུས་ཡུན་དེ་ནི་དཀའ་ངལ་གྱི་དུས་ཤིག་ཏུ་འགྱུར་རྒྱུ་ཡིན་པས།

²⁶ དུས་སྐབས་དེའི་མཐའ་མར་དཀོན་མཆོག་གིས་འདེམས་བསྐོས་མཛད་པའི་དབུ་འཁྲིད་དེ་ནི་ཁྲིམས་འགལ་ཚུལ་མིན་གྱི་སྒོ་ནས་བཀྲོང་རྒྱུ་ཡིན་པ་དང། རྒྱལ་པོ་སྟོབས་ཆེན་ཞིག་གི་དམག་མིས་བཙན་འཛུལ་བྱས་ཏེ། གྲོང་ཁྱེར་དང་མཆོད་ཁང་བཅས་པར་སྟོར་བཤིགས་བྱེད་པར་འགྱུར། དཀོན་མཆོག་གིས་གྲ་སྒྲིག་མཛད་པའི་དམག་གི་འཇིག་སྐྱོན་དང་ལྡན་པའི་དུས་ཀྱི་མཐའ་མ་དེ་ནི་ཆུ་རུད་ཡོང་བ་བཞིན་བློ་བུར་དུ་ཡོང་བར་འགྱུར།

²⁷ རྒྱལ་པོ་དེས་མི་མང་པོ་དང་མཉམ་དུ་ལོ་བདུན་གྱི་རིང་ལ་མཐུན་ལམ་ཡག་པོ་བྱེད་རྒྱུ་ཡིན་མོད། དུས་ཡུན་ཕྱེད་ཀ་རྫོགས་མཚམས་སུ། དེས་དམར་མཆོད་དང་མཆོད་འབུལ་རྣམས་མཚམས་འཇོག་བྱེད་རྒྱུ་ཡིན་པ་དང་། མཆོད་ཁང་གི་གནས་མཐོ་ཤོས་དེར་འཇིག་པར་བྱེད་པ་ཤིན་ཏུ་འཇིགས་སུ་རུང་བ་དེ་བཞག་པར་འགྱུར་རོ། དེ་བཞག་མཁན་དེའི་ཐོག་ཏུ་དཀོན་མཆོག་གིས་གྲ་སྒྲིག་མཛད་པའི་མཐའ་མའི་འཇིག་པ་མ་འཕོག་བར་དུ་དེ་གནས་དེ་རང་དུ་བཞག་པར་འགྱུར་རོ༎