དྷ་ནི་ཨེལ 5 - Tibetan Old Testament 2011

བྷེལ་ཤ་ཛར་གྱིས་མགྲོན་ཆེན་བཤམས་པ།

¹ མཚན་གཅིག་རྒྱལ་པོ་བྷེལ་ཤ་ཛར་གྱིས་རང་གི་གཞུང་ཞབས་གཙོ་དྲག་སྟོང་ཕྲག་གཅིག་ལ་གསོལ་སྟོན་ཆེན་པོ་ཞིག་ཏུ་བོས་ནས། དེ་ཚོ་མཉམ་ཚོགས་ཀྱིས་རྒུན་ཆང་འཐུང་ནས་བསྡད་ཡོད་པ་དང་།

² སྐབས་དེར་བྷེལ་ཤ་ཛར་གྱིས་རང་གི་མེས་པོ་ནེ་བུ་ཀད་ནེ་ཛར་གྱིས་ཡེ་རུ་ཤ་ལེམ་གྱི་མཆོད་ཁང་ནས་འཁྱེར་ཡོང་བའི་གསེར་དང་དངུལ་གྱི་ཕོར་པ་དང་གཞོང་པ་རྣམས་དེར་འཁྱེར་ཡོང་དགོས་པའི་བཀའ་གནང་ངོ། རྒྱལ་པོས་དེ་ལྟར་བཀའ་གནང་དགོས་དོན་ནི། རྒྱལ་པོ་རང་ཉིད་དང་། ཁོང་གི་མི་སྣ་གཙོ་དྲག་དང། རང་གི་ཆུང་མ་རྣམས་དང་། རང་གི་ཟུར་གྲོགས་མ་རྣམས་ཀྱིས་དེ་དག་ལས་འཐུང་བའི་ཕྱིར་ཡིན་ནོ།

³ དེ་མ་ཉིད་དུ་གསེར་གྱི་ཕོར་པ་དང་གཞོང་པ་རྣམས་འཁྱེར་ཡོང་ནས་དེ་ཚོ་ཚང་མས་སྣོད་དེ་དག་ནང་འཐུང་བ་དང་།

⁴ གསེར་དང་། དངུལ་དང་། ལི་དང་ལྕགས་དང་། ཤིང་དང་རྡོ་ལས་བཟོས་པའི་ལྟ་རྟེན་སོགས་ལ་བསྟོད་བསྔགས་བྱས་སོ།

⁵ དེ་ནས་བློ་བུར་དུ་མིའི་ལག་པ་ཞིག་བྱུང་ནས། དེས་རྩིག་པའི་ལྡེབས་ལོགས་ལ་ཡི་གེ་བྲིས་སོ། རྩིག་པའི་ལྡེབས་ལེགས་དེར་ཞུན་མར་འབར་བའི་འོད་སྣང་གསལ་པོར་འཕོག་བཞིན་ཡོད་པས། ཡི་གེ་འབྲི་བཞིན་པའི་ལག་པ་དེ་རྒྱལ་པོས་གཟིགས་པ་དང་།

⁶ ཁོང་གི་ཞལ་མདངས་སེར་པོར་འགྱུར་ཞིང་། ཧ་ཅང་འཇིགས་ནས་པུས་མོ་འདར་བ་དང་།

⁷ རྒྱལ་པོས་གསུང་སྐད་ཆེན་པོས། སྒྱུ་མ་མཁན་དང་་སྔགས་པ་དང་སྐར་རྩིས་པ་རྣམས་བོས་ཤིག་ཅེས་བཀའ་གནང་བ་བཞིན། དེ་ཚོ་ཕོ་བྲང་ནང་དུ་བསླེབས་པ་དང་། རྒྱལ་པོས་དེ་ཚོ་ལ། སུས་ཀྱང་ཡི་གེ་དེ་ཀློག་ནས་དེའི་དོན་བཤད་ཐུབ་པ་ཡིན་ན། དེ་ལ་རྒྱལ་གོས་མུ་མན་དེ་བསྐོན་རྒྱུ་མ་ཟད། གཟེངས་བསྟོད་མཚོན་ཕྱིར་སྐེ་ལ་གསེར་གྱི་སྐེ་རྒྱན་བསྐོན་རྒྱུ་དང་། ཡང་ཡུལ་གྱི་ནང་དུ་དེ་ལ་བཀའ་བློན་རིམ་པ་གསུམ་པའི་གོ་གནས་སུ་རྩིས་པར་འགྱུར་ཞེས་གསུངས་སོ།

⁸ དེ་ནས་རྒྱལ་པོའི་གྲོས་དཔོན་རྣམས་ཀྱི་མདུན་དུ་ཡོང་མོད། འོན་ཀྱང་སུ་ཞིག་གིས་ཀྱང་གང་བྲིས་པ་དེ་ཀློག་མ་ཐུབ་ཅིང་། རྒྱལ་པོ་ལ་དེའི་འགྲེལ་པའང་ཞུ་མ་ཐུབ་པས།

⁹ རྒྱལ་པོའི་ཞལ་མདངས་ནི་དངངས་སྐྲག་གིས་ད་དུང་སེར་པོར་བསྒྱུར་ཞིང་། བློན་པོ་རྣམས་ཀྱང་ཅི་བྱ་གཏོལ་མེད་དུ་གནས་སོ།

¹⁰ རྒྱལ་པོ་དང་ཁོང་གི་བཀའ་བློན་རྣམས་ཀྱིས་གྲོས་གཏམ་གང་བྱས་པ་དེ་རྒྱལ་ཡུམ་གྱིས་ཐོས་ཏེ། གསོལ་སྟོན་ཁང་དུ་ཕེབས་ནས། ཀྱེ་རྒྱལ་པོ་ཆེན་པོ་སྐུ་ཚེ་བརྟན་པར་ཤོག། སྐུ་ཉིད་ཐུགས་འཁྲལ་གནང་མི་དགོས། སྐུ་ཉིད་ཀྱི་ཞལ་མདངས་ནི་དངངས་སྐྲག་མི་དགོས།

¹¹ སྐུ་ཉིད་ཀྱི་རྒྱལ་ཁབ་ནང་དུ་མི་ཞིག་ཡོད་པས། དེ་དང་མཉམ་དུ་དཀོན་མཆོག་གི་དམ་པའི་ཐུགས་ཉིད་དེ་གནས་ཡོད་པ་ཡིན། མེས་རྒྱལ་ནེ་བུ་ཀད་ནེ་ཛར་གྱིས་རྒྱལ་སྲིད་སྐྱོང་དུས། མི་དེས་དཀོན་མཆོག་དང་འདྲ་བའི་བསམ་ཤེས་བཟང་པོ་དང་། བློ་དང་ཤེས་རབ་ལྡན་པའི་རིག་རྩལ་དག་བསྟན་པ་ཡིན་པས། མེས་རྒྱལ་ཆེན་པོས། ཁོ་ལ་མོ་པ་དང་སྒྱུ་འཕྲུལ་ཅན་དང་སྔགས་པ་རྣམས་ཀྱི་གཙོ་བོར་བསྐོས་གནང་མཛད་པས།

¹² མི་དེའི་མིང་ལ་དྷ་ནི་ཨེལ་ཟེར་བ་དང་། རྒྱལ་པོས་གནང་བའི་མིང་གསར་པ་ནི་བྷེལ་ཏེ་ཤ་ཛར་ཞེས་ཟེར་བ་ཡིན་ཏེ། སྐྱེ་བོ་དེ་ལ་གཞན་དང་མཚུངས་མེད་པའི་མཐུ་དང་ཤེས་རབ་ཡོད་པས། ཁོས་དཀའ་རྙོག་སེལ་ཐུབ་པ་དང་། རྨི་ལམ་གྱི་དོན་རྣམས་བཤད་ཐུབ་པ་མ་ཟད། གསང་དོན་ཚང་མ་བཤད་པར་མཁས་པ་ཡིན་ནོ། དེ་བས་ན་མི་དེ་འབོད་པར་གཏོང་བ་གནང་ན། ཁོས་གནས་ཚུལ་འདི་དག་གི་གསང་དོན་ཚང་མ་གསལ་པོར་བཤད་པར་འགྱུར་ཞེས་ཞུས་སོ༎

དྷ་ནི་ཨེལ་གྱིས་རྩིག་པའི་ཡི་གེར་དོན་འགྲེལ་བཤད་པ།

¹³ དེ་མ་ཐག་ཏུ་དྷ་ནི་ཨེལ་རྒྱལ་པོའི་དྲུང་དུ་འཁྲིད་ཡོང་བ་དང་། རྒྱལ་པོས། ངའི་མེས་པོས་ཡ་ཧུ་དཱ་ནས་འཁྲིད་ཡོང་བའི་ཡ་ཧུ་དཱ་པ་བཅན་བྱོལ་བ་དྷ་ནི་ཨེལ་ཟེར་བ་དེ་ཁྱོད་རང་ཡིན་ནམ།

¹⁴ དམ་པའི་དཀོན་མཆོག་གི་ཐུགས་ཉིད་དེ་ཁྱོད་ཀྱི་ནང་དུ་ཡོད་པ་དང་། ཁྱོད་ནི་བློ་གྲོས་དང་ཤེས་རབ་ལྡན་པའི་མི་མཁས་པ་ཞིག་ཡིན་པའི་སྐོར་ངས་ཐོས་བྱུང་བས།

¹⁵ རྩིག་པར་བྲིས་ཡོད་པའི་ཡི་གེ་དེ་ཀློག་ནས་དེ་ལ་དོན་འགྲེལ་བཤད་ཕྱིར་མི་མཁས་པ་དང་སྒྱུ་མ་མཁན་དང་སྔགས་པ་རྣམས་ངའི་རྩར་འཁྲིད་ཡོང་མོད། འོན་ཀྱང་དེ་ཚོས་དོན་འགྲེལ་གང་ཡང་བཤད་མ་ཐུབ་ཅིང་།

¹⁶ ཁྱོད་ཀྱིས་གསང་དོན་ཚང་མ་བཤད་ཐུབ་ཀྱི་ཡོད་པའི་སྐོར་ངས་གོ་ཐོས་བྱུང་བས། ད་ཁྱོད་ཀྱིས་ཡི་གེ་དེ་ཀློག་ནས་དེའི་དོན་དེ་ང་ལ་བཤད་ཐུབ་པ་ཡིན་ན། ཁྱོད་ལ་རྒྱལ་གོས་མུ་མན་དེ་བསྐྱོན་རྒྱུ་མ་ཟད། གཟེངས་བསྟོད་མཚོན་ཕྱིར་སྐེ་ལ་གསེར་གྱི་སྐེ་རྒྱན་བསྐོན་ཏེ། ཁྱོད་ནི་ཡུལ་ནང་བཀའ་བློན་གྱི་གོ་གནས་གསུམ་པར་བསྐོ་གཞག་བྱེད་རྒྱུ་ཡིན་ཞེས་གསུངས་སོ།

¹⁷ དེའི་ལན་དུ་དྷ་ནི་ཨེལ་གྱིས། ཁྱེད་ཀྱི་བྱ་དགའ་རྣམས་ནི་ཁྱེད་རང་མཉམ་དུ་བཞག་རོགས་གནང་། ཡང་ན་མི་གཞན་ལ་གནང་ནའང་ཆོག། འོན་ཀྱང་རྩིག་པར་གང་བྲིས་ཡོད་པ་དེ་ངས་ཁྱེད་ཀྱི་དོན་དུ་ཀློག་ནས་དེའི་དོན་གང་ཡིན་པ་དེ་ངས་ཁྱེད་ལ་ཞུ་གི་ཡིན།

¹⁸ བླ་ན་མེད་པའི་དཀོན་མཆོག་གིས་ཁྱེད་ཀྱི་མེས་པོ་ནེ་བུ་ཀད་ནེ་ཛར་ལ་རྒྱལ་པོ་མངའ་ཐང་ཆེན་པོ་ཞིག་ཏུ་བསྐོས་པ་གནང་སྟེ། ཁོང་ལ་དབུ་འཕང་དང་དཔལ་གནང་བ་དང་།

¹⁹ ཁོང་ནི་ཤིན་ཏུ་མངའ་ཐང་ཆེ་བས། མི་རིགས་འདྲ་མིན་དང་། མི་སྡེ་སྣ་ཚོགས་དང་། སྐད་རིགས་མི་གཅིག་པའི་མི་རྣམས་ཁོང་ལ་འཇིགས་ཤིང་འདར་བ་དང་། ཁོང་གིས་བསད་འདོད་གནང་བའི་མི་དེ་བསད་པ་དང་། དེ་བཞིན་གསོན་པོར་བཞག་འདོད་གནང་བའི་མི་དེ་གསོན་པོར་བཞག་པ་མ་ཟད། ཁོང་གི་ཐུགས་འདོད་བཞིན་དུ་མི་རྣམས་ལ་ཆེས་བསྟོད་དང་དམའ་འབེབས་གནང་གི་ཡོད་དོ།

²⁰ འོན་ཀྱང་ཁོང་ནི་ང་རྒྱལ་དང་རང་འདོད་ཆེ་ཞིང་སེམས་གཤིས་ངན་པའི་རྐྱེན་གྱིས། རང་གི་རྒྱལ་ཁྲི་དང་གཟེངས་བསྟོད་ཀྱི་གནས་བཅས་པ་ཤོར་དགོས་བྱུང་ཞིང་།

²¹ ཁོང་མི་སྡེའི་ཁྲོད་ནས་ཕྱིར་སྐྲོད་བྱུང་དགོས་པ་མ་ཟད། དུད་འགྲོའི་སེམས་གཤིས་བཞིན་དུ་འགྱུར་ཏེ། ནགས་ཀྱི་བོང་བུ་རྣམས་དང་མཉམ་དུ་གནས་སྡོད་བྱས་པ་དང་། བ་གླང་བཞིན་དུ་རྩ་ཟ་དགོས་པ་བྱུང་ཞིང་། ཐང་སྟོང་ཁུལ་དུ་ཉལ་ཏེ། ནམ་མཁའི་ཟིལ་པས་གཟུགས་པོ་འབང་དགོས་པ་བྱུང་ངོ། མཐར་དཀོན་མཆོག་གིས་མིའི་རྒྱལ་ཁབ་ཀུན་གྱི་ཐོག་ཏུ་དབང་སྒྱུར་མཛད་ཐུབ་པ་མ་ཟད། ཁོང་གིས་ཐུགས་འདོད་གནང་བའི་སྐྱེ་བོ་སུ་འདྲ་ཞིག་ལའང་རྒྱལ་ཁབ་དེ་ཚོ་གནང་སྲིད་པར་ངོས་ལེན་ཞུ་དགོས་བྱུང་བ་ཡིན་ནོ།

²² འོན་ཀྱང་ཁྱེད་ཁོང་གི་བུ་བརྒྱུད་ཡིན་བཞིན་དུ། གནས་ཚུལ་དེ་དག་མཁྱེན་ནས་ཀྱང་། ཁྱེད་ཀྱི་ཐུགས་སེམས་མ་དུལ་བར།

²³ མཐོ་རིས་ཀྱི་གཙོ་བོའི་ཐུགས་དགོངས་དང་འགལ་བའི་ལས་ཤིག་གནང་ཡོད་པ་དང་། ཁོང་གི་མཆོད་ཁང་ནས་འཁྱེར་ཡོང་བའི་ཕོར་པ་དང་གཞོང་པ་སོགས་ཁྱེད་ཀྱི་མདུན་དུ་འཁྱེར་ཡོང་ཞིང་། ཁྱེད་དང་ཁྱེད་ཀྱི་མི་སྣ་གཙོ་དྲག་ཁག་དང་། ཁྱེད་ཀྱི་ཆུང་མ་རྣམས་དང་། ཟུར་གྲོགས་མ་རྣམས་ཀྱིས་དེ་དག་ནང་རྒུན་ཆང་འཐུང་ཞིང། གསེར་དངུལ་ལི་ལྕགས། ཤིང་དང་རྡོ་ལས་བཟོས་པའི་ལྷ་རྣམས་ལ་བསྟོད་བསྔགས་བྱས་མོད། འོན་ཀྱང་ལྷ་དེ་ཚོས་ནི་མཐོང་ཐོས་ཤེས་རྟོགས་སོགས་གང་ཡང་བྱེད་མི་ཐུབ་བོ། འོན་ཀྱང་ཁྱེད་ཀྱི་སྲོག་དང་འཆི་བ་ཐག་གཅོད་མཁན་དང་། ཁྱེད་ཀྱི་མཛད་སྤྱོད་ཚང་མར་དབང་སྒྱུར་མཛད་མཁན་དཀོན་མཆོག་དེ་ལ་ཁྱེད་ཀྱིས་གུས་ཞབས་མ་ཞུས་པ་ཡིན་པས།

²⁴ ཚིག་འཕྲིན་འདི་དག་བྲིས་པའི་ཕྱིར་དཀོན་མཆོག་གིས་ལག་པ་དེ་གཏོང་གནང་མཛད་པ་ཡིན་ནོ།

²⁵ དེར་བྲིས་ཡོད་པའི་ཡི་གེའི་བརྗོད་ཚིག་ནི། གྲངས་ཀ། གྲངས་ཀ། ལྗིད་ཚད། ཆ་བགོས། བཅས་ཡིན་ནོ།

²⁶ དེའི་དོན་ནི་འདི་ལྟར་ཡིན། གྲངས་ཀ། དཀོན་མཆོག་གིས་ཁྱེད་ཀྱི་རྒྱལ་སྲིད་སྐྱོང་བའི་ཞག་དུས་མང་ཉུང་གི་ཁ་གྲངས་རྩིས་ཟིན་པ་དང། དེའི་མཐའ་མར་བསླེབས་ཡོད་པ་ཡིན་ནོ།

²⁷ ཡང་ལྗིད། ཁྱེད་རང་སྲང་ལ་ཡང་ལྗིད་བཀྱགས་ཟིན་ཏེ། ཡང་ཞིང་ལྗིད་ཚད་མ་ལོན་པ་ཡིན་ནོ།

²⁸ ཆ་བགོས་ཀྱི་དོན་ནི། ཁྱེད་ཀྱི་རྒྱལ་ཁབ་ནི་ཆ་བགོས་བརྒྱབ་སྟེ། མ་དཱ་པ་དང་པར་ཤི་ཡའི་ཡུལ་མི་རྣམས་ལ་བགོས་ཟིན་པ་ཡིན་ནོ།

²⁹ དེ་ནས་བློ་བུར་དུ་རྒྱལ་པོ་བྷེལ་ཤ་ཛར་གྱིས་རང་གི་འཁོར་གཡོག་རྣམས་ལ། དྷ་ནི་ཨེལ་ལ་ཆེས་བསྟོད་ཞུ་ཕྱིར་རྒྱལ་གོས་མུ་མན་དེ་དང་སྐེ་ལ་གཟེངས་བསྟོད་ཀྱི་གསེར་གྱི་སྐེ་རྒྱན་བསྐོན་ཞིག་ཅེས་བཀའ་གནང་ནས། ཁོང་གིས་དྷ་ནི་ཨེལ་ལ་ཡུལ་གྱི་བཀའ་བློན་གོ་རིམ་གསུམ་པར་བསྐོ་གཞག་གནང་ངོ།

³⁰ དེ་རྗེས་མཚན་མོ་དེ་རང་ལ་བྷེ་བྷི་ལོ་ནི་ཡའི་རྒྱལ་པོ་བྷེལ་ཤ་ཛར་བསད་དེ།

³¹ མ་དཱའི་ཡུལ་གྱི་རྒྱལ་པོ་དྷ་རི་ཡསེ་ཀྱིས་རྒྱལ་སྲིད་དེ་དབང་བསྒྱུར་བྱས་པ་དང་། སྐབས་དེར་རྒྱལ་པོ་དེ་ནི་རང་ལོ་དྲུག་ཅུ་རེ་གཉིས་ལོན་ཡོད་པ་ཡིན་ནོ༎