དྷ་ནི་ཨེལ 3 - Tibetan Old Testament 2011

ནེ་བུ་ཀད་ནེ་ཛར་གྱིས་ཚང་མར་གསེར་གྱི་འདྲ་སྐུར་མཆོད་དགོས་པའི་བཀའ་གནང་བ།

¹ རྒྱལ་པོ་ནེ་བུ་ཀད་ནེ་ཛར་གྱིས་གསེར་གྱི་འདྲ་སྐུ་མཐོ་ཚད་མི་ཊར་ཉི་ཤུ་ཙ་བདུན་དང་། ཞེང་ཚད་མི་ཊར་གསུམ་ཙམ་བྱས་པ་ཞིག་བཟོ་རུ་བཅུག་ནས། མངའ་སྡེ་བྷེ་བྷི་ལོན་གྱི་ཌུ་ར་ཞེས་པའི་ཐང་དུ་སྐུ་འདྲ་དེ་ཡར་བསྒྲེངས་ནས་བཞག་གོ

² དེ་ནས་རྒྱལ་པོས་རང་གི་ལས་བྱེད་པ་ཚང་མ་དེར་འཛོམས་དགོས་པའི་བཀའ་གནང་བ་བཞིན། རྒྱལ་སྲས་རྣམས་དང་། སྲིད་ཚབ་རྣམས་དང་། སྲིད་ཚབ་ལས་རོགས་རྣམས་དང་། རྫོང་དཔོན་རྣམས་དང་། དངུལ་གཉེར་བློན་ཆེན་རྣམས་དང་། ཁྲིམས་དཔོན་ཁག་དང་། དེ་བཞིན་མངའ་སྡེའི་ལས་བྱེད་པ་གཞན་རྣམས་ཀྱང་སྐུ་འདྲའི་རབ་གནས་ཀྱི་མཛད་སྒོར་འཇོམས་སོ།

³ དེ་ནས་ལས་བྱེད་པ་ཚང་མ་འདྲ་སྐུའི་མདུན་དུ་རབ་གནས་ཀྱི་མཛད་སྒོའི་ཆེད་དུ་ལངས་པའི་སྐབས།

⁴ བཀའ་རྒྱ་སྒྲོག་བྱང་བྱེད་མི་ཞིག་གིས་སྐད་ཤུགས་ཆེན་པོས་སྨྲས་པ། ཀྱེ་མི་རིགས་འདྲ་མིན་དང་། མི་སྡེ་སོ་སོ་དང་། དེ་བཞིན་སྐད་རིགས་མི་འདྲ་བའི་མི་རྣམས།

⁵ ཁྱོད་ཚོས་དུང་འབུད་པའི་སྐད་དང་། རྒྱ་གླིང་དང་། པི་ཝང་དང། གླིང་བུ་དང། སྒྲ་སྙན་སྣ་ཚོགས་ཀྱི་སྒྲ་སོགས་ཐོས་ཡོང་། རོལ་གཞེས་འགོ་བཙུགས་མ་ཐག་ཏུ་རྒྱལ་པོས་བཞེངས་པའི་གསེར་གྱི་འདྲ་སྐུ་དེ་ལ་ཕྱག་དང་མཆོད་འབུལ་བྱེད་དགོས་སོ།

⁶ ཕྱག་དང་མཆོད་འབུལ་མི་བྱེད་མཁན་རྣམས་ནི་དེ་མ་ཉིད་དུ་འབར་བཞིན་པའི་མེ་དོང་ནང་དུ་དབྱུགས་པར་འགྱུར།

⁷ དེར་བརྟེན་རོལ་བྱའི་སྒྲ་ཐོས་མ་ཐག་ཏུ་མི་རིགས་འདྲ་མིན་དང་། སྐད་རིགས་མི་འདྲ་བའི་མི་སྡེ་སོ་སོས་ལུས་ས་ལ་བརྡབས་ནས་རྒྱལ་པོས་བཞེངས་པའི་འདྲ་སྐུ་དེ་ལ་ཕྱག་དང་མཆོད་པ་བྱས་སོ༎

དྷ་ནི་ཨེལ་གྱི་གྲོགས་པོ་གསུམ་ལ་རྒྱལ་པོའི་བཀའ་བཅག་པའི་སྐྱོན་འཛུག་བྱེད་པ།

⁸ སྐབས་དེར་བྷེ་བྷི་ལོན་པ་འགའ་ཤས་ཀྱིས་ཡ་ཧུ་དཱ་པ་རྣམས་ལ་མངོན་གསུམ་དུ་སྐྱོན་བརྗོད་བྱེད་པའི་གོ་སྐབས་རྙེད་ནས།

⁹ དེ་ཚོས་རྒྱལ་པོ་ནེ་བུ་ཀད་ནེ་ཛར་ལ། རྒྱལ་པོ་ཆེན་པོ་སྐུ་ཚེ་བརྟན་པར་ཤོག།

¹⁰ རོལ་བྱའི་སྒྲ་ཐོས་མ་ཐག་ཏུ་ཚང་མས་འདྲ་སྐུའི་མདུན་དུ་ཕྱག་བཙལ་ནས་མཆོད་འབུལ་བྱེད་དགོས་པ་མ་ཟད།

¹¹ མི་སུས་ཀྱང་འདྲ་སྐུའི་མདུན་དུ་ཕྱག་དང་མཆོད་འབུལ་མ་བྱེད་པ་ཡིན་ན། དེ་ནི་འབར་བཞིན་པའི་མེ་དོང་ནང་དུ་དབྱུགས་པར་འགྱུར་ཞེས་རྒྱལ་པོ་ཁྱེད་ཀྱིས་བཀའ་གནང་ཡོད་ཀྱང་།

¹² ཁྱེད་ཀྱིས་མངའ་དེ་བྷེ་བྷི་ལོན་གྱི་དཔོན་པོར་བསྐོ་གཞག་མཛད་པའི། ཤད་རག། མེ་ཤཱག། ཨ་བྷེད་ནེ་གྷོ་ཞེས་པའི་ཡ་ཧུ་དཱ་པ་འགའ་ཤས་ཀྱིས་སྐུ་ཉིད་ཀྱི་བཀའ་ལ་མ་བརྩིས་པར། ཁྱེད་ཀྱི་དཀོན་མཆོག་དང་། ཁྱེད་ཀྱིས་བཞེངས་པའི་འདྲ་སྐུར་ཕྱག་དང་མཆོད་མི་བྱེད་དོ་ཞེས་ཞུས་སོ།

¹³ དེར་རྒྱལ་པོ་ཤིན་ཏུ་ཐུགས་ཁྲོས་ཏེ། ཤད་རག། མེ་ཤཱག། ཨ་བྷེད་ནེ་གོ་གསུམ་ལ་རང་གི་མདུན་དུ་འཁྲིད་ཡོང་དགོས་ཅེས་བཀའ་གནང་ཞིང་།

¹⁴ རྒྱལ་པོས་དེ་དག་ལ། ཀྱེ། ཤད་རག། མེ་ཤཱག། དང་ཨ་བྷེད་ནེ་གྷོ་ཁྱོད་ཚོ་གསུམ་གྱིས་ངའི་དཀོན་མཆོག་དང་། ངས་བཞེངས་པའི་འདྲ་སྐུར་ཕྱག་དང་མཆོད་པ་བྱེད་ཀྱི་མེད་པ་དེ་བདེན་པ་ཡིན་ནམ།

¹⁵ ད་ཁྱོད་ཚོས། དུང་དང་། རྒྱ་གླིང་། པི་ཝང་། སྒྲ་སྙན་སོགས་པའི་རོལ་བྱ་སྣ་ཚོགས་ཀྱི་སྒྲ་ཐོས་མ་ཐག་ཏུ་འདྲ་སྐུ་དེ་ལ་ཕྱག་དང་མཆོད་འབུལ་བྱོས་ཤིག དེ་མིན་ཁྱོད་ཚོ་འབར་བཞིན་པའི་མེ་དོང་ནང་དུ་ལམ་སང་དབྱུགས་རྒྱུ་ཡིན་པ་དེ་ངེས་པ་ཡིན་པས། ཁྱོད་ཚོར་སྐྱོབ་ཐུབ་པའི་དཀོན་མཆོག་གཞན་ཞིག་ཡོད་ཅེས་བསམ་གྱི་འདུག་གམ་ཞེས་གསུངས་པ་དང་།

¹⁶ དེའི་ལན་དུ་ཤད་རག། མེ་ཤཱག། ཨ་བྷེད་ནེ་གྷོ་གསུམ་གྱིས། ཀྱེ་རྒྱལ་པོ་ཆེན་པོ། ང་ཚོས་རང་གི་སྲུང་སྐྱོབ་ཀྱི་ཆེད་དུ་ཞུ་རྒྱུ་གང་ཡང་མེད།

¹⁷ ང་ཚོ་ལ་འབར་བཞིན་པའི་མེའི་དོང་ནང་དབྱུགས་ན་ང་ཚོས་མཆོད་པའི་དཀོན་མཆོག་དེས་ང་ཚོར་སྐྱོབ་ཐུབ་པ་དང་རྒྱལ་པོ་ཁྱེད་ཀྱི་ཕྱག་ནས་ཐར་བར་གནང་ཡོང།

¹⁸ གལ་ཏེ་ཁོང་ཀྱིས་ང་ཚོར་སྐྱོབ་པ་མ་གནང་ནའང་། ཁྱེད་ཀྱི་ལྷ་དང་། ཁྱེད་ཀྱིས་བཞེངས་པའི་གསེར་གྱི་འདྲ་སྐུའི་མདུན་དུ་ང་ཚོས་ཕྱག་དང་མཆོད་འབུལ་མི་བྱེད་པ་དེ་ནི་ཁྱེད་ཀྱིས་མཁྱེན་པར་མཛོད་ཅེས་ཞུས་སོ༎

དྷ་ནི་ཨེལ་གྱི་གྲོགས་པོ་གསུམ་ལ་སྲོག་ཐོག་གི་ཉེས་ཆད་བྱུང་བ།

¹⁹ དེ་ནས་ནེ་བུ་ཀད་ནེ་ཛར་གྱིས། ཤད་རག། མེ་ཤཱག། ཨ་བྷེད་ནེ་གྷོ་གསུམ་ལ་ཤིན་ཏུ་ཁྲོས་ཏེ། ཞལ་རས་དམར་པོར་བསྒྱུར་ཞིང་། རང་གི་འཁོར་གཡོག་རྣམས་ལ། མེ་དོང་དེ་སྔར་ལས་ལྷག་པའི་བདུན་ལྡབ་ཀྱིས་ཆེ་རུ་གཏོང་དགོས་པའི་བཀའ་གནང་བ་མ་ཟད།

²⁰ རང་གི་དམག་མིའི་ཁོངས་ནས་མི་སྟོབས་ཤུགས་ཆེ་ཤོས་དག་ལ་ཁོ་ཚོ་གསུམ་ཀ་བརྡམས་ནས་མེ་དོང་ནང་དུ་དབྱུགས་དགོས་པའི་བཀའ་གནང་བ་བཞིན།

²¹ དེ་དག་གིས་ཁོ་ཚོ་གསུམ་ལ་སྟོད་ཐུང་དང་། གོས་ཐུང་དང་། ཞ་མོ་སོགས་གྱོན་པ་དང་ཆབས་ཅིག་བརྡམས་ནས་མེ་དོང་ནང་དུ་དབྱུགས་སོ།

²² རྒྱལ་པོས་མེ་དེ་ཧ་ཅང་ཆེན་པོ་བཟོས་དགོས་པའི་བཀའ་བཙན་པོ་གནང་བའི་རྐྱེན་གྱིས་ཁོ་ཚོ་གསུམ་པོ་མེ་དོང་ནང་དུ་དབྱུགས་མཁན་མི་དེ་ཚོའང་མེས་ཚིག་ནས་ཤི་བ་དང་།

²³ ཤད་རག། མེ་ཤཱག། ཨ་བྷེད་ནེ་གྷོ་གསུམ་ནི་ཐག་པས་བརྡམས་བཞིན་པའི་གནས་སྟངས་དེ་རང་ལ་མེ་དོང་ནང་དུ་ལྷུང་ངོ་།

²⁴ དེ་ནས་རྒྱལ་པོ་ནེ་བུ་ཀད་ནེ་ཛར་བློ་བུར་དུ་ཡར་བཞེངས་ནས། ཡ་མཚན་ཆེན་པོས་རང་གི་ལས་བྱེད་པ་རྣམས་ལ། ང་ཚོས་མི་གསུམ་བརྡམས་ནས་མེ་དོང་ནང་དུ་དབྱུགས་པ་མ་ཡིན་ནམ་ཞེས་བཀའ་འདྲི་གནང་བ་དང་། དེ་ཚོས་ལེན་དུ། ཀྱེ་རྒྱལ་པོ་ཆེན་པོ་ལགས། དེ་ག་རང་ཡིན་ཞེས་ཞུས་པ་དང་།

²⁵ རྒྱལ་པོས། དེ་འདྲ་ཡིན་ན། ངས་མེའི་ནང་དུ་མི་བཞི་ཕར་ཚུར་འགྲུལ་བཞིན་པ་མཐོང་བ་དེ་གང་ཡིན་ནམ། དེ་ཚོ་དེ་ཚོར་རྨས་སྐྱོན་སོགས་གང་ཡང་བྱུང་མི་འདུག དེ་ཙམ་མ་ཟད་མི་བཞི་པ་དེ་ནི་དཀོན་མཆོག་གི་ཕོ་ཉ་ཞིག་དང་འདྲ་བ་མཐོང་གི་འདུག་ཅེས་གསུངས་སོ༎

མི་གསུམ་པོ་དེ་ཚོ་ཐར་ནས་གོ་གནས་ཕར་བ།

²⁶ དེ་ནས་རྒྱལ་པོ་འབར་བཞིན་ཡོད་པའི་མེ་དོང་ཆེན་པོའི་སྒོའི་འགྲམ་དུ་ཕེབས་ནས་གསུང་སྐད་ཆེན་པོས། ཀྱེ་ཤད་རག། མེ་ཤཱག། ཨ་བྷེད་ནེ་གྷོ། བླ་ན་མེད་པའི་དཀོན་མོཆག་གི་ཞབས་ཏོག་པ་ཁྱོད་ཚོ་ཕྱི་རུ་ཐོན་ཤོག་ཅེས་གསུངས་པ་དང་། དེ་ཚོ་ལམ་སང་ཕྱི་རུ་ཐོན་ནོ།

²⁷ དེ་ནས་རྒྱལ་སྲས་ཚང་མ་དང་། སྲིད་ཚབ་རྣམས་དང་། སྲིད་ཚབ་ལས་རོགས་རྣམས་དང་། དེ་བཞིན་རྒྱལ་པོའི་ལས་བྱེད་པ་གཞན་རྣམས་དེ་ཚོ་གསུམ་ལ་ལྟས་མོ་བལྟ་ཕྱིར་ཡོང་བ་དང་། དེ་ཚོར་མེས་འཚིག་སྐྱོན་སོགས་གང་ཡང་བྱུང་མེད་པ་དང་། མགོའི་སྐྲ་ཡང་འཚིག་མེད་པ་དང་། དེ་ཚོའི་གྱོན་གོས་དང་ལུས་ལ་མེའི་དྲི་མ་ཙམ་ཡང་འགོས་མེད་པ་ཡིན་ནོ།

²⁸ རྒྱལ་པོས། ཤད་རག། མེ་ཤཱག། ཨ་བྷེད་ནེ་གྷོའི་དཀོན་མཆོག་ལ་བསྟོད་བསྔགས་པར་ཤོག ཁོང་ལ་བློ་གདེང་ཞུས་པའི་ཞབས་ཏོག་པ་གསུམ་ལ་སྲུང་སྐྱོབ་གནང་ཕྱིར་ཁོང་གིས་ཉིད་ཀྱི་ཕོ་ཉ་གཏོང་གནང་མཛད་པ་ཡིན། དེ་ཚོས་ངའི་བཀའ་ལའང་མ་བརྩིས་པར་རང་སྲོག་ཉེན་ཁའི་ནང་དུ་བཅུག་སྟེ། ལྷ་རྟེན་གཞན་ལ་ཕྱག་དང་མཆོད་འབུལ་མ་བྱས་པར། སོ་སོའི་དཀོན་མཆོག་འབའ་ཞིག་ལ་བསྙེན་བཀུར་ཞུས་པ་རེད།

²⁹ ད་ངས་བཀའ་སྤྲད་རྒྱུ་དེ་ནི་ད་ནས་བཟུང་མི་རིགས་སུ་འདྲ་ཞིག་གམ། མི་སྡེ་གང་ཡིན་དང་། སྐད་རིགས་མི་གཅིག་པ་སུ་འདྲ་ཞིག་གིས་ཀྱང་། ཤད་རག། མེ་ཤཱག། ཨ་བྷེད་ནེ་གྷོ་གསུམ་གྱི་དཀོན་མཆོག་ལ་འཕྱ་ཞིང་སྨད་པ་ཡིན་ན། ཁོའི་ཡན་ལག་དུམ་བུར་བཏུབ་རྒྱུ་ཡིན་པ་མ་ཟད། ཁོའི་ཁང་ཁྱིམ་ཕུང་པོར་རྒྱུར་བར་བྱའོ། དེ་ལྟ་བུའི་སྐྱབས་གྲོགས་མཛད་ཐུབ་པའི་དཀོན་མཆོག་ནི་གཞན་ཞིག་མེད་པ་ཡིན་ནོ་ཞེས་གསུངས་སོ།

³⁰ དེ་ནས་རྒྱལ་པོས། ཤད་རག། མེ་ཤཱག། ཨ་བྷེད་ནེ་གོ་གསུམ་ལ་མངའ་སྡེ་བྷེ་བྷི་ལོན་གྱི་དཔོན་པོའི་གོ་གནས་མཐོ་སར་བསྐོ་གཞག་མཛད་དོ༎