དྷ་ནི་ཨེལ 12 - Tibetan Old Testament 2011

མཐའ་མའི་དུས།

¹ ཕོ་ཉ་ཀ་ཤི་ཀའི་ན་བཟའ་བཞེས་པ་ཞིག་གིས་གསུངས་གསལ། སྐབས་དེར་ཁྱོད་ཚོའི་མི་འབངས་ལ་སྲུང་སྐྱོབ་བྱེད་མཁན་ཕོ་ཉ་རླབས་ཆེན་མི་ཀ་ཨེལ་ཞེས་པ་དེ་ཕེབས་རྒྱུ་ཡིན་པ་དང་། དེ་ནས་ཐོག་མར་མི་རིགས་རྣམས་ཆགས་པ་ནས་བཟུང་ད་བར་བྱུང་མ་མྱོང་བའི་སྡུག་བསྔལ་གྱི་ལོ་དུས་ངན་ཤོས་དེ་ཡོང་རྒྱུ་ཡིན་པ་དང་། དུས་སྐབས་དེ་ཤར་དུས་དཀོན་མཆོག་གི་དེབ་ཐོའི་ནང་དུ་མིང་འཁོད་པའི་ཁྱེད་ཀྱི་རྒྱལ་ཁམས་ཀྱི་མི་ཚང་མ་ཐར་བར་འགྱུར།

² དེ་སྔ་འཆི་ཟིན་པའི་མི་མང་པོ་ཞིག་སླར་གསོན་པོར་ལངས་ཤིང་། འགའ་ཤས་ལ་མཐའ་མེད་པའི་ཚེ་ཐོབ་པ་དང་འགའ་ཤས་མཐའ་མེད་པའི་དམའ་འབེབས་མྱོང་བར་འགྱུར།

³ འགོ་ཁྲིད་བློ་གྲོས་ཅན་རྣམས་ནམ་མཁའི་འོད་སྣང་བཞིན་དུ་འཕྲོ་རྒྱུ་དང་། མི་མང་པོར་ལས་བཟང་བྱེད་དགོས་པའི་འབོད་བསྐུལ་སློབ་སྟོན་བྱེད་མཁན་རྣམས་ནི་སྐར་མའི་ཚོགས་ལྟར་རྒྱུན་དུ་འོད་སྣང་འཕྲོ་བར་འགྱུར།

⁴ ཁོང་གིས་ང་ལ་བརྗོད་གསལ། ཀྱེ་དྷ་ནི་ཨེལ། སྲིད་པའི་མཐའ་བར་དུ་དེབ་དེ་ཁ་རྒྱབ་ནས་དེ་ལ་དམ་ཕྲུག་རྒྱོབ་ཅིག དུས་ཡུན་དེའི་རིང་ལ་གནས་སྟངས་གང་བྱུང་སྐོར་མི་མང་པོས་ཤེས་ཐབས་བྱེད་ཀྱང་ཐབས་ཤེས་དེ་ནི་དོན་མེད་ཆུད་ཟོས་སུ་འགྲོ་བར་འགྱུར།

⁵ དེ་ནས་ངས་མི་གཉིས་གཙང་པོའི་འགྲམ་རེ་ལ་ལངས་ནས་ཡོད་པ་མཐོང་བྱུང་།

⁶ དེ་གཉིས་ཀྱི་ནང་ནས་གཅིག་གིས་གཙང་པོའི་ཐོད་ཙམ་ལ་ལངས་ནས་བསྡད་ཡོད་པའི་ཕོ་ཉ་དེ་ལ། གནས་ཚུལ་ངོ་མཚར་ཆེན་པོ་འདི་དག་ག་དུས་བར་དུ་གནས་སམ་ཞེས་བཀའ་འདྲི་ཞུས་པ་དང་།

⁷ ཕོ་ཉས་ཕྱག་གཉིས་ནམ་མཁའི་ཕྱོགས་སུ་བཏེགས་ནས་མཐའ་མེད་པའི་བར་དུ་བཞུགས་པའི་དཀོན་མཆོག་གི་མཚན་བརྗོད་དེ་ཞལ་བཞེས་གནང་ཞིང་གསུངས་པ། དེ་ནི་ལོ་གསུམ་དང་ཕྱེད་ཀ་འགོར་རྒྱུ་ཡིན་ཏེ། དཀོན་མཆོག་གི་འབངས་ཀྱི་ཐོག་ཏུ་བྱུང་བའི་མནར་གཅོད་དྲག་པོ་དེ་དག་རྫོགས་མཚམས་སུ་གནས་ཚུལ་དེ་དག་འགྲུབ་པར་འགྱུར་ཞེས་གསུངས་པ་ངས་ཐོས་བྱུང།

⁸ ཁོང་གིས་གང་གསུངས་པ་དེ་ངས་ཐོས་ཀྱང་དེའི་གོ་དོན་རྟོགས་མ་ཐུབ་པས། ངས་ཁོང་ལ། ཀྱེ་ཇོ་བོ། དེ་ཚོའི་མཐའ་མ་དེ་ཇི་ལྟར་འབྱུང་རྒྱུ་ཡིན་ནམ་ཞེས་ཞུས་པ་དང་།

⁹ དེའི་ལན་དུ་ཁོང་གིས། ཀྱེ་དྷ་ནི་ཨེལ། ད་ཁྱོད་རང་ཕར་སོང་ཞིག། གང་ལ་ཟེར་ན། མཐའ་མའི་དུས་དེ་མ་སླེབ་བར་དུ་གནས་ཚུལ་དེ་གསང་བར་སྦས་ནས་བཞག་དགོས།

¹⁰ མི་མང་པོ་ཞིག་དག་འབྱངས་བྱེད་དེ་གཙང་བར་འགྱུར་རྒྱུ་དང་། མི་ངན་པས་གང་ཡང་མ་ཤེས་པར་མུ་མཐུད་ཀྱིས་ངན་ལས་བྱེད་རྒྱུ་ཡིན་མོད། འོན་ཀྱང་ཤེས་རབས་ཅན་དེ་ཚོ་གཅིག་པུས་གནས་ཚུལ་དེ་ཤེས་པར་འགྱུར།

¹¹ ཉིན་རེའི་དམར་མཆོད་རྣམས་མཚམས་འཇོགས་བྱེད་པའམ། འཇིག་པར་བྱེད་པ་ཤིན་ཏུ་འཇིགས་སུ་རུང་བའི་ཉིན་ཞག་འགོ་ཚུགས་པ་ནས་བཟུང་ཉིན་ཞག་ ༡,༢༩༠ རྫོགས་པར་འགྱུར།

¹² ཉིན་ཞག་ ༡,༣༣༥ མ་རྫོགས་བར་དུ་རང་གི་དད་པ་མ་ཉམས་པར་སྒུག་སྡོད་བྱེད་པ་རྣམས་ནི་བདེའོ།

¹³ དེ་བས་ན་དྷ་ནི་ཨེལ་ཁྱོད་རང་མཐའ་མའི་བར་དུ་བརྟན་པོར་གནས་པར་བྱོས་ཤིག དེ་རྗེས་ཁྱོད་རང་འཆི་བར་འགྱུར་མོད། འོན་ཀྱང་མཐའ་མའི་དུས་སུ་རང་གི་བྱ་དགའ་ལེན་ཕྱིར་གསོན་པོར་ལང་བར་འགྱུར་རོ༎