ཤ་མུ་ཨེལ་གཉིས་པ། 9 - Tibetan Old Testament 2011

དཱ་བིད་དང་མེ་ཕི་བྷོ་ཤེད།

¹ ཉིན་ཞིག་དཱ་བིད་ཀྱིས། ས་ཨུལ་གི་ནང་མིའི་ཁོངས་ནས་སུ་ཞིག་ད་དུང་གནས་ཡོད་དམ། གལ་ཏེ་ཡོད་ན་ངས་ཡོ་ན་ཐན་གྱི་ངོ་སྲུང་སྟེ་བརྩེ་སེམས་བྱེད་རྒྱུ་ཡིན་ཞེས་འདྲི་རྩད་བྱས་པར།

² ས་ཨུལ་གྱི་ཁྱིམ་ཚང་དུ་མིང་ལ་ཛི་བྷ་ཟེར་བའི་གཡོག་པོ་ཞིག་ཡོད་དེ། ཁོ་ལ་དཱ་བིད་ཀྱི་དྲུང་དུ་བོས་ནས། རྒྱལ་པོས། ཁྱོད་ཀྱི་མིང་ལ་ཛི་བྷ་ཡིན་ནམ་ཞེས་དྲིས་པས། ཁོས་ལན་དུ། ལགས་ང་རང་ཡིན་ཞེས་ཞུས་སོ།

³ རྒྱལ་པོས། ངས་དཀོན་མཆོག་ལ་དམ་བཅའ་འབུལ་བཞིན། ས་ཨུལ་གྱི་ནང་མིའི་ཁོངས་ནས་མི་སུ་ཞིག་ད་དུང་གནས་ཡོད་པ་ཡིན་ན། དེ་ལ་ངས་བཀའ་དྲིན་དང་ཤ་ཞེན་བྱེད་རྒྱུ་ཡིན་ཞེས་གསུངས་སོ། ཛི་བྷས་ལན་དུ། ཡོ་ན་ཐན་གྱི་བུའི་ཁོངས་ནས་རྐང་པ་ཞ་བོ་བྱེད་པ་ཞིག་ཡོད་ཅེས་ཞུས་སོ།

⁴ རྒྱལ་པོས། ཁོ་ག་རུ་ཡོད་དམ་ཞེས་གསུངས་པ་དང་། ལན་དུ་ཛི་བྷས། ལོ་དྷི་བར་རུ་ཨམ་མི་ཨེལ་གྱི་བུ་མ་ཀིར་གྱི་ནང་དུ་ཡོད་ཅེས་ཞུས་པ་དང་།

⁵ རྒྱལ་པོ་དཱ་བིད་ཀྱིས་ཁོ་ལ་བོས་ཕྱིར་མི་མངགས་སོ།

⁶ ས་ཨུལ་གྱི་ཚ་བོ། ཡོ་ན་ཐན་གྱི་བུ་མེ་ཕི་བྷོ་ཤེད་ཏི་དཱ་བིད་ཀྱི་དྲུང་དུ་གུས་ཞབས་ཆེན་པོས་ས་ལ་ཁ་འབུབ་ནས་ཕྱག་བཙལ་བ་དང་། དཱ་བིད་ཀྱིས། མེ་ཕི་བྷོ་ཤེད་ལ་གསུངས་པ་དང་། ལགས་ང་ལ་བཀའ་གནང་དུ་གསོལ་ཞེས་ཞུས་སོ།

⁷ དེ་ནས་དཱ་བིད་ཀྱིས། མ་འཇིགས་ཤིག། ཁྱོད་ཀྱི་ཕ་ཡོ་ན་ཐན་གྱི་ངོ་ལ་བརྟེན་ནས་ངས་ཁྱོད་ལ་དྲིན་བྱེད་རྒྱུ་ཡིན། ཁྱོད་ཀྱི་པོ་པོ་ས་ཨུལ་གྱི་ས་ཞིང་ཚང་མ་ངས་ཁྱོད་ལ་ཕྱིར་ལོག་བྱ་རྒྱུ་ཡིན། ཁྱོད་ནི་གཏན་དུ་ང་དང་མཉམ་དུ་ཁ་ཟས་ཟ་བར་དགའ་བསུ་ཡོད་ཅེས་གསུངས་པ་དང་།

⁸ མེ་ཕི་བྷོ་ཤེད་ཀྱིས་སླར་ཡང་མགོ་མགུར་ནས་གུས་ཞབས་ཞུས་ཏེ་ཞུས་པ། ང་ནི་ཁྱི་རོ་ལྟ་བུའི་སྐྱེ་བོ་སྣང་ཆུང་ཞིག་ལ་ཁྱེད་ཀྱིས་ང་ལ་འདི་ལྟ་བུའི་ཐུགས་རྗེ་ཆེན་པོ་གནང་བ་དེ་གང་ཡིན་ནམ་ཞུས་སོ།

⁹ དེ་ནས་རྒྱལ་པོས་ས་ཨུལ་གྱི་གཡོག་པོ་ཛི་བྷ་ལ་བོས་ནས་གསུངས་པ། ཁྱོད་ཀྱི་སྦྱིན་བདག་གི་ཚ་བོ་མེ་ཕི་བྷོ་ཤེད་ལ་ངས་ས་ཨུལ་དང་ཁོའི་ནང་མིའི་རྒྱུ་དངོས་ཚང་མ་སྤྲོད་ཀྱི་ཡོད།

¹⁰ ཁྱོད་དང་ཁྱོད་ཀྱི་བུ་རྣམས་དང་ཁྱོད་ཀྱི་གཡོག་པོ་ཚོས་ཁྱོད་ཚོའི་སྦྱིན་བདག་ས་ཨུལ་ལ་ནང་མིའི་ཆེད་དུ་ཞིང་རྨོས་རྒྱབ་ནས་སྟོན་ཐོག་རྔ་སྒྲུག་བྱས་ཏེ་དེ་ཚོར་ཁ་ཟས་སྒྲུབ་དགོས་སོ། འོན་ཀྱང་མེ་ཕི་བྷོ་ཤེད་ཁོ་རང་ནི་རྒྱུན་དུ་ང་དང་མཉམ་དུ་ཁ་ཟས་ཟ་བར་འགྱུར། (ཛི་བྷ་ལ་བུ་སྤུན་བཅོ་ལྔ་དང་གཡོག་པོ་ཉི་ཤུ་ཐམ་པ་ཡོད་པ་ཡིན་ནོ།)

¹¹ དེ་ནས་ཛི་བྷས། རྒྱལ་པོ་ཁྱེད་ཀྱིས་བཀའ་གང་གནང་བ་ཚང་མ་ངས་སྒྲུབ་པར་བྱ་ཞེས་ཞུས་སོ། མེ་ཕི་བྷོ་ཤེད་ནི་རྒྱལ་པོའི་སྲས་དང་འདྲ་བ་དུས་རྒྱུན་དུ་རྒྱལ་པོའི་གསོལ་ལྕོག་ཁར་ཁ་ཟས་ཟ་གི་ཡོད་པ་རེད།

¹² མེ་ཕི་བྷོ་ཤེད་ལ་མི་ཀ་ཟེར་བའི་བུ་གཞོན་པ་ཞིག་ཡོད་པ་དང་། ཛི་བྷའི་ནང་མི་ཚང་མ་མེ་ཕི་བྷོ་ཤེད་ཀྱི་བྲན་གཡོག་ཏུ་འཁོདོ།

¹³ དེ་བཞིན་རྐང་པ་གཉིས་ཀ་ཞ་བོ་ཡིན་པའི་མེ་ཕི་བྷོ་ཤེད་ནི་ཡེ་རུ་ཤ་ལེམ་དུ་གནས་སྡོད་བྱས་ཏེ། རྒྱལ་པོ་དང་ལྷན་དུ་ལྕོག་རྩེ་གཅིག་གི་ཁར་ཁ་ཟས་ཟ་གི་ཡོདོ༎