ཤ་མུ་ཨེལ་གཉིས་པ། 6 - Tibetan Old Testament 2011

དམ་བཅའི་སྒྲོམ་དེ་ཡེ་རུ་ཤ་ལེམ་དུ་འཁྱེར་ཡོང་བ།

¹ སླར་ཡང་ཐེངས་ཅིག་དཱ་བིད་ཀྱིས་ཨིསི་རཱཨེལ་གྱི་དམག་མི་ལེགས་ཤོས་ ༣༠,༠༠༠ ཙམ་བཀོང་སྟེ།

² ཡ་ཧུ་དཱའི་ས་གནས་བྷ་ལཱ་ནས་དཀོན་མཆོག་གི་དམ་བཅའི་སྒྲོམ་དེ་གདན་འདྲེན་ཞུ་བའི་ཕྱིར་སྣེ་འཁྲིད་བྱས་སོ། དམ་བཅའི་སྒྲོམ་དེའི་ཁར་ཀུན་དབང་ལྡན་པའི་གཙོ་བོ་དཀོན་མཆོག་གི་མཚན་བྱང་འཁོད་ཡོད་པ་དང་། ཁོང་ནི་ཀེ་རུབ་གཉིས་ཀྱི་ཐོད་དུ་བཞུགས་ཡོད་པ་ཡིན་ནོ།

³ དེ་ཚོས་རི་རྩེར་ཡོད་པའི་ཨ་བྷི་ན་དྷབ་ཀྱི་ཁང་ཁྱིམ་ནས་དམ་བཅའི་སྒྲོམ་དེ་བཏོན་ནས་ཤིང་རྟ་འཁོར་ལོ་གསར་པ་ཞིག་གི་ཁར་བཞག་གོ ཨ་བྷི་ན་དྷབ་ཀྱི་ཁང་ཁྱིམ་ནས་དམ་བཅའི་སྒྲོམ་དེ་བཏོན་ནས་ཤིང་རྟ་འཁོར་ལོ་གསར་པ་ཞིག་གི་ཁར་བཞག་གོ ཨ་བྷི་ན་དྷབ་ཀྱི་བུ་ཨུཛ་ཛཱ་དང་ཨ་ཧི་ཡོས་ཤིང་རྟ་འཁོར་ལོ་གསར་པ་ཞིག་བཏང་ངོ་།

⁴ ཨ་ཧི་ཡོ་ནི་ཤིང་རྟ་འཁོར་ལོའི་མདུན་དུ་ཕྱིན་ནོ།

⁵ དེ་བཞིན་དཱ་བིད་དང་ཨིསི་རཱཨེལ་པ་ཡོངས་ནས་གཙོ་བོ་དཀོན་མཆོག་ལ་བཀུར་སྟི་ཞུ་ཕྱིར་རང་ནུས་བཞིན་གྱིས་གར་དང་གླུ་གཞས་སོགས་བཏང་བ་དང། དེ་ཚོས་སྒྲ་སྙན་སྣ་ཚོགས་དང་རྔ་དང་བསིལ་སྙན་དང་རོལ་དབྱངས་སྣ་ཚོགས་ཤིག་བཏང་ངོ་།

⁶ དེ་ཚོ་ན་ཀོན་གྱི་ཕྱུགས་ཆག་བསྐོར་སའི་གནས་དེར་སླེབས་སྐབས། གླང་རྣམས་རྐང་པ་འཁྱོར་བ་དང་། ཨུཛ་ཛཱས་རང་གི་ལག་པ་བརྐྱངས་ནས་དམ་བཅའི་སྒྲོམ་དེ་འཆང་བ་ཡིན་པས།

⁷ བློ་བུར་དུ་གཙོ་བོ་དཀོན་མཆོག་ཨུཛ་ཛཱ་ལ་ཐུགས་ཁྲོས་ཏེ་ཁོ་བསད་པ་གནང་ངོ་། གང་ལགས་ཟེར་ན། ཁོས་དམ་བཅའི་སྒྲོམ་ལ་བརྩི་གུས་མ་ཞུས་པས་ཕྱིར་རོ། ཨུཛ་ཛཱ་ནི་དམ་བཅའི་སྒྲོམ་གྱི་ཉེ་འགྲམ་དུ་ཤི་བ་ཡིན་ནོ།

⁸ ཉིན་མོ་དེ་ནས་བཟུང་ས་གནས་དེའི་མིང་ལ་པེ་རེཛ་ཨུཛ་ཛཱ་ཞེས་ཐོག་པ་ཡིན་ནོ། གཙོ་བོ་དཀོན་མཆོག་གིས་དེ་ལྟར་ཐུགས་ཁྲོའི་ངང་དུ་ཨུཛ་ཛཱ་ལ་ཉེས་ཆད་གཏོང་གནང་མཛད་པ་ཡིན་པས། དཱ་བིད་ཧ་ཅང་ཁོང་ཁྲོ་ལངས་པ་རེད།

⁹ དེ་རྗེས་དཱ་བིད་གཙོ་བོ་དཀོན་མཆོག་ལ་འཇིགས་ཤིང་སྨྲས་པ། ད་ངས་དམ་བཅའི་སྒྲོམ་དེ་ང་དང་མཉམ་དུ་ཇི་ལྟར་འཁྱེར་ཐུབ་བམ།

¹⁰ དེར་བརྟེན་པས་ཁོས་དམ་བཅའི་སྒྲོམ་དེ་ཡེ་རུ་ཤ་ལེམ་དུ་འཁྱེར་རྒྱུ་མིན་པའི་ཐག་ཆོད་བྱས་པ་དང་། ཁོས་ལམ་གཞན་ནས་བསྐོར་ཏེ་གྷད་གྲོང་ཁྱེར་གྱི་ཡུལ་མི་ཨོ་བེད་ཨེ་དྷོམ་ཞེས་པ་དེའི་ནང་དུ་དམ་བཅའི་སྒྲོམ་དེ་བསྐྱེལ་བ་ཡིན་ནོ།

¹¹ དེར་དམ་བཅའི་སྒྲོམ་དེ་ཟླ་བ་གསུམ་བར་དུ་བཞག་པ་ཡིན་པས། གཙོ་བོ་དཀོན་མཆོག་གིས་ཨོ་བེད་ཨེ་དྷོམ་དང་ཁོའི་ནང་མི་བཅས་ལ་བྱིན་གྱིས་བརླབས་པར་མཛད་དོ།

¹² དམ་བཅའི་སྒྲོམ་དེའི་རྐྱེན་གྱིས་གཙོ་བོ་དཀོན་མཆོག་གིས་ཨོ་བེད་ཨེ་དྷོམ་གྱི་ནང་མི་དང་ཁོའི་རྒྱུ་དངོས་སོགས་ལ་བྱིན་རླབས་གནང་བའི་སྐོར་ཐོས་པས། དཱ་བིད་ཀྱིས་དམ་བཅའི་སྒྲོམ་དེ་དགའ་སྟོན་ཆེན་པོའི་ངང་ཡེ་རུ་ཤ་ལེམ་དུ་བསྐྱེལ་བའི་ཕྱིར་ཨོ་བེད་ཀྱི་ནང་ནས་འཁྱེར་ཡོང་ངོ་།

¹³ དམ་བཅའི་སྒྲོམ་འཁྱེར་མི་རྣམས་གོམ་པ་དྲུག་སྤོས་པའི་རྗེས་སུ་དཱ་བིད་ཀྱིས་དེ་ཚོར་བཀག་སྟེ། གླང་གཅིག་དང་བེའུ་རྒྱག་པ་གཅིག་གཙོ་བོ་དཀོན་མཆོག་ལ་དམར་མཆོད་ཕུལ་ལོ།

¹⁴ དཱ་བིད་ནི་རང་གི་རྐེད་པར་རས་གོས་དཀྱུས་མ་ཞིག་དཀྲི་ནས། སེམས་ཤུགས་ཆེན་པོས་གཙོ་བོ་དཀོན་མཆོག་ལ་མོས་གུས་ཞུ་ཕྱིར་བྲོ་གར་སོགས་འཁྲབ་པ་དང་།

¹⁵ དེ་བཞིན་དཱ་བིད་དང་ཨིསི་རཱཨེལ་པ་ཚང་མས་དགའ་བ་ཆེན་པོའི་སྐད་དབྱངས་དང་དམག་དུང་གི་སྒྲ་དང་བཅས་དམ་བཅའི་སྒྲོམ་དེ་ཡེ་རུ་ཤ་ལེམ་བར་དུ་འཁྱེར་ཡོང་ངོ་།

¹⁶ དམ་བཅའི་སྒྲོམ་དེ་གྲོང་ནང་འཁྱེར་ཡོང་སྐབས་ས་ཨུལ་གི་བུ་མོ་མི་ཀལ་གྱིས་སྐར་ཁུང་ནས་ཕྱི་རུ་བལྟ་བས། དཱ་བིད་ནི་གར་འཆམ་དམ་པའི་ཁོངས་སུ་འཆོངས་ཞིང་བྲོ་གར་འཁྲབ་བཞིན་པ་མཐོང་བ་དང་མོས་ཁོང་ལ་སྡང་སེམས་བྱས་སོ།

¹⁷ དཱ་བིད་ཀྱིས་གྲ་སྒྲིག་བྱས་པའི་དབུ་གུར་དམ་པའིི་ནང་དུ་སྒྲོམ་དེ་གདན་ཞུས་ཏེ། དེ་ཚོས་དེ་དེར་བཞག་གོ། དེར་ཁོང་གིས་གཙོ་བོ་དཀོན་མཆོག་ལ་དམར་མཆོད་དང་མཐུན་འབྲེལ་གྱི་མཆོད་འབུལ་བྱས་སོ།

¹⁸ དམར་མཆོད་འབུལ་ཚར་བའི་རྗེས་སུ་ཁོང་གིས་ཀུན་དབང་ལྡན་པའི་གཙོ་བོ་དཀོན་མཆོག་གི་མཚན་གྱི་ངང་དུ་མི་ཚང་མར་བྱིན་རླབས་གནང་སྟེ།

¹⁹ དེ་ཚོ་ཚང་མར་ཁ་ཟས་སོགས་བགོས་གནང་ངོ་། ཁོང་གིས་ཨིསི་རཱཨེལ་གྱི་སྐྱེ་ཕོ་མོ་ཚང་མར་བག་ལེབ་རེ་དང་མེར་སྲེག་བཏང་བའི་ཤ་དུམ་བུ་རེ་དང་། རྒུན་འབྲུམ་སོགས་སྤྲད་པའི་རྗེས་སུ་ཚང་མར་རང་རང་སོ་སོའི་ཁང་ཁྱིམ་དུ་ལོག་ཕྱིན་ནོ།

²⁰ དེའི་རྗེས་སུ་དཱ་བིད་རང་གི་ནང་མི་དང་ཐུག་འཕྲད་བྱེད་ཕྱིར་ནང་དུ་ཡོང་བ་དང་། མི་ཀལ་ཕྱིར་ཐོན་ཏེ་ཁོང་དང་མཛལ་འཕྲད་བྱེད་ཕྱིར་ཡོང་ཞིང་སྨྲས་པ། དེ་རིང་ཡིན་ན་ཨིསི་རཱཨེལ་གྱི་རྒྱལ་པོས་རང་ཉིད་ཀྱི་མཚན་སྙན་མངོན་པར་མཐོ་བའི་ཕྱག་ལས་ཤིག་གནང་བཞག། རང་གི་ལས་བྱེད་པ་ཁག་གི་བྲན་གཡོག་མ་རྣམས་ཀྱི་མདུན་དུ་གླེན་པ་བཞིན་རང་ཉིད་གོས་མེད་གཅེར་བུར་བྱས་ཏེ་བྲོ་འཁྲབ་བཞིན་འདུག་ཅེས་སྨྲས་སོ།

²¹ དཱ་བིད་ཀྱིས་ལན་དུ། ངས་ནི་གཙོ་བོ་དཀོན་མཆོག་ཐུགས་དགྱེས་པར་བྱེད་པའི་ཕྱིར་བྲོ་གར་འཁྲབ་པ་ཡིན། ཁོང་གིས་ཁྱོད་ཀྱི་ཕ་དང་ཁོའི་ནང་མི་ཚབ་ཏུ་ང་ལ་ཉིད་ཀྱི་མི་འབངས་ཨིསི་རཱཨེལ་གྱི་འགོ་འཁྲིད་དུ་འདེམས་བསྐོས་མཛད་པ་ཡིན། དེ་བས་ན་གཙོ་བོ་དཀོན་མཆོག་ཐུགས་མཉེས་པའི་ཕྱིར་ངས་མུ་མཐུད་དེ་བྲོ་གར་འཁྲབ་རྒྱུ་ཡིན་པ་མ་ཟད།

²² ང་ནི་ད་དུང་རང་ཉིད་ལ་ལྷག་པར་དམའ་འབེབས་མཐོང་ཆུང་གི་གནས་སུ་འཁོད་པར་བྱེད་ནུས་སོ། ཁྱོད་ཀྱིས་ང་ལ་སྐྱེ་བོ་སྣང་ཆུང་ཞིག་ཏུ་བརྩི་ནའང་། བུད་མེད་འདི་ཚོས་ང་ལ་གུས་ཞབས་བྱེད་པར་འགྱུར་རོ།

²³ ས་ཨུལ་གྱི་བུ་མོ་མི་ཀལ་ལ་ནམ་ཡང་ཕྲུ་གུ་མ་བྱུང་ངོ་༎