ཤ་མུ་ཨེལ་གཉིས་པ། 5 - Tibetan Old Testament 2011

དཱ་བིད་ཨིསི་རཱཨེལ་དང་ཡ་ཧུ་དཱའི་རྒྱལ་པོར་འཁོད་པ།

¹ དེ་ནས་ཨིསི་རཱཨེལ་གྱི་སྡེ་རིགས་ཡོངས་རྫོགས་ཧེབ་རོན་དུ་དཱ་བིད་ཡོད་སར་ཡོང་ནས་སྨྲས་པ། ང་ཚོ་ནི་ཁྱེད་ཀྱི་ཤ་རུས་དང་འབྲེལ་བ་ཡོད་པ་ཡིན་ནོ།

² སྔར་ས་ཨུལ་གྱིས་ང་ཚོའི་ཐོག་ཏུ་རྒྱལ་སྲིད་གནང་དུས་ཀྱང་། ཁྱེད་ཀྱིས་ཨིསི་རཱཨེལ་པ་རྣམས་དམག་སར་འགོ་འཁྲིད་གནང་ཞིང་། གཙོ་བོ་དཀོན་མཆོག་གིས་ཀྱང་ཁྱེད་ལ་རང་གི་མི་འབངས་ཀྱི་འགོ་འཁྲིད་བྱེད་ཅིང་། དེ་ཚོའི་ཐོག་ཏུ་སྲིད་སྐྱོང་བྱེད་པར་འགྱུར་ཞེས་ཞལ་བཞེས་གནང་བ་ཡིན་ནོ།

³ དེར་བརྟེན་ཨིསི་རཱཨེལ་གྱི་འགོ་དཔོན་ཚང་མ་དཱ་བིད་ཀྱི་རྩར་ཧེབ་རོན་དུ་ཡོང་ངོ། ཁོང་གིས་དེ་ཚོ་དང་མཉམ་དུ་མཐུན་འབྲེལ་གྱི་ཆིངས་ཡིག་དམ་པ་ཞིག་བཞག་ནས། དེ་ཚོས་ཁོང་ལ་བསྔོ་འབུལ་བྱས་ཏེ། ཁོང་ཨིསི་རཱཨེལ་གྱི་རྒྱལ་པོར་འཁོད་དོ།

⁴ དཱ་བིད་རྒྱལ་ཁྲིར་འཁོད་དུས་དགུང་ལོ་སུམ་ཅུར་ཕེབས་ཡོད་པ་དང་། ཁོང་གིས་ལོ་བཞི་བཅུའི་རིང་རྒྱལ་སྲིད་བསྐྱངས་སོ།

⁵ ཁོང་གིས་ཧེབ་རོན་གྱི་ཡ་ཧུ་དཱའི་ས་ཁུལ་དུ་ལོ་བདུན་དང་ཟླ་བ་དྲུག་བར་དང་། ཡེ་རུ་ཤ་ལེམ་དུ་ཨིསི་རཱཨེལ་ཡོངས་དང་ཡ་ཧུ་དཱའི་ཐོག་ལོ་སུམ་ཅུ་སོ་སུམ་བར་དུ་རྒྱལ་སྲིད་བསྐྱངས་སོ།

⁶ དུས་དེ་རན་སྐབས་རྒྱལ་པོ་དཱ་བིད་དང་ཁོང་གི་མི་རྣམས་ཡེ་རུ་ཤ་ལེམ་གྱི་གྲོང་ཁྱེར་དུ་དམག་འཐབ་བྱེད་ཕྱིར་ཐོན་ནོ། དེར་གནས་སྡོད་བྱེད་བཞིན་པའི་ཡ་བྷུ་སི་པ་རྣམས་ཀྱི་སེམས་ལ། དཱ་བིད་ཀྱིས་གྲོང་ཁྱེར་དེ་ནམ་ཡང་དབང་བསྒྱུར་བྱེད་ཐུབ་མི་ཡོང་ཞེས་བསམ་ནས་ཁོང་ལ་སྨྲས་པ། ཁྱེད་རང་གྲོང་ཁྱེར་འདིའི་ནང་ནམ་ཡང་འཛུལ་མི་ཐུབ། ལོང་བ་དང་ཞ་བོ་རྣམས་ཀྱིས་ཀྱང་ཁྱོད་ལ་བཀག་ཐུབ་ཅེས་སྨྲས་སོ།

⁷ (འོན་ཀྱང་དཱ་བིད་ཀྱིས་ཛི་ཡོན་དུ་ཡོད་པའི་དེ་ཚོའི་མཁར་རྫོང་དེ་དབང་བསྒྱུར་བྱས་པ་ཡིན་པས། གནས་དེ་ལ་དཱ་བིད་ཀྱི་གྲོང་ཁྱེར་ཞེས་བརྗོད་པ་ཡིན་ནོ།)

⁸ དེ་ཉིན་དཱ་བིད་ཀྱིས་རང་གི་མི་རྣམས་ལ། ཡ་བྷུ་སི་པ་རྣམས་ལ་གསོད་པར་ནུས་པའི་སྡང་དགྲ་བྱེད་པ་བཞིན། འདིར་ཡོད་པའི་སྐྱེ་བོ་སུ་ཞིག་གིས་དེ་ལྟར་བྱེད་ནུས་སམ། དེ་ལྟར་བྱེད་ནུས་མཁན་སུ་ཞིག་ཡོད་ན། ཆུའི་ཡུར་བུའི་ནང་དུ་འཛུལ་ནས་ཞ་བོ་དང་ལོང་བ་དེ་ཚོའི་ཐོག་ཏུ་འཐབ་རྒོལ་བྱོས་ཤིག དེར་བརྟེན་པས་ཞ་བོ་དང་ལོང་བ་རྣམས་གཙོ་བོ་དཀོན་མཆོག་གི་མཆོད་ཁང་ནང་དུ་འཛུལ་མི་ཆོག་ཅེས་ཟེར་སྲོལ་ཡོད་པ་ཡིན་ནོ།

⁹ མཁར་རྫོང་དེར་དབང་བསྒྱུར་བྱེད་པའི་རྗེས་སུ་དཱ་བིད་མཁར་རྫོང་དེའི་ནང་དུ་གནས་སྡོད་བྱས་པ་དང། དེའི་མིང་ལ་དཱ་བིད་ཀྱི་གྲོང་ཁྱེར་ཞེས་མིང་བཏགས་པ་ཡིན་ནོ། ཁོང་གིས་མཁར་རྫོང་དེའི་ཕྱོགས་བཞི་རུ་གྲོང་ཁྱེར་རྩིག་པ་དང་། རི་དེའི་ཤར་ཕྱོགས་སུ་སྤུངས་ནས་ཡོད་པའི་ས་གཞི་མཐོ་པོ་དེ་ནས་ཨར་ལས་འགོ་ཚུགས་སོ།

¹⁰ ཀུན་དབང་ལྡན་པའི་གཙོ་བོ་དཀོན་མཆོག་ཁོང་དང་མཉམ་དུ་འགྲོགས་ཡོད་པ་ཡིན་པས་ཁོང་ནི་རིམ་བཞིན་མངའ་ཐང་ཇེ་ཆེར་ཕྱིན་ནོ།

¹¹ ཊ་ཡར་གྱི་རྒྱལ་པོ་ཧི་རམ་གྱིས་དཱ་བིད་ཀྱི་རྩར་ཚོང་དོན་ཆེད་དུ་འཐུས་མི་རྣམས་བཏང་ཞིང་། ཕོ་བྲང་བཞེངས་བྱད་འགྱམ་ཤིང་དང་ཤིང་བཟོ་བ་དང་རྡོ་རྩིག་མཁན་བཅས་བརྫངས་སོ།

¹² དེ་ནས་དཱ་བིད་ཀྱི་སེམས་ལ། གཙོ་བོ་དཀོན་མཆོག་གིས་ང་ལ་ཨིསི་རཱཨེལ་གྱི་རྒྱལ་པོར་བསྐོས་གནང་བ་དང། ཉིད་ཀྱི་མི་འབངས་ཚོའི་ཆེད་དུ་ཉིད་ཀྱི་རྒྱལ་སྲིད་ཡར་རྒྱས་གོང་འཕེལ་དུ་གཏོང་བ་གནང་བཞིན་པའི་སྐོར་ལ་ཤེས་རྟོགས་བྱུང་ངོ་།

¹³ ཧེབ་རོན་ནས་ཡེ་རུ་ཤ་ལེམ་དུ་ཡོང་བའི་རྗེས་སུ། དཱ་བིད་ཀྱི་ཆུང་མ་དང་ཟུར་གྲོགས་མ་མང་པོ་ཞིག་བླངས་ཏེ། དེ་ཚོའི་སྒོ་ནས་ཕྲུ་གུ་མང་པོ་སྐྱེས་སོ།

¹⁴ ཡེ་རུ་ཤ་ལེམ་དུ་སྐྱེས་པའི་ཁོའི་ཕྲུ་གུ་རྣམས་ནི་གཤམ་གསལ་ལྟར་ཡིན་ནོ། ཤམ་མུ་ཨ། ཤོ་བྷབ། ན་ཐན། སོ་ལོ་མོན།

¹⁵ ཨི་བར། ཨེ་ལི་ཤུ་ཨ། ནེ་ཕེག། ཡ་ཕི་ཨ།

¹⁶ ཨེ་ལི་ཤ་མ། ཨེལ་ཡ་དྷ་དང་ཨེ་ལི་ཕེ་ལེཏ་བཅས་སོ༎

ཕེ་ལེ་ཤེད་པ་རྣམས་ཀྱི་ཐོག་ཏུ་རྒྱལ་ཁ་ཐོབ་པ།

¹⁷ དཱ་བིད་ཨིསི་རཱཨེལ་གྱི་རྒྱལ་པོར་འཁོད་པའི་གནས་ཚུལ་དེ་ཕེ་ལེ་ཤེད་པ་རྣམས་ཀྱིས་ཐོས་པ་དང་། ཁོང་ལ་འཛིན་བཟུང་བྱེད་ཕྱིར་དེ་ཚོའི་དམག་མི་རྣམས་བཏང་བས། དཱ་བིད་ཀྱིས་གཏམ་དེ་ཐོས་ནས་ལྕགས་རིས་བསྐོར་བའི་གནས་བཙན་པོ་ཞིག་ཏུ་ཕྱིན་ནོ།

¹⁸ ཕེ་ལེ་ཤེད་པ་རྣམས་རེ་ཕ་ཨིམ་གྱི་ལུང་གཤོང་དུ་སླེབས་ནས། གནས་དེ་དབང་བསྒྱུར་བྱས་སོ།

¹⁹ དེ་ནས་དཱ་བིད་ཀྱིས་གཙོ་བོ་དཀོན་མཆོག་ལ། ངས་ད་ལྟ་ཕེ་ལེ་ཤེད་པ་རྣམས་དང་འཐབ་རྒོལ་བྱེད་ན་ཁྱེད་ཀྱི་ང་ལ་རྒྱལ་ཁ་གནང་ངམ་ཞེས་ཞུས་པ་དང་། ལན་དུ་གཙོ་བོ་དཀོན་མཆོག་གིས། སོང་ལ་འཐབ་རྒོལ་བྱོས་ཤིག། ངས་ཁྱོད་ལ་རྒྱལ་ཁ་སྟེར་བར་བྱ་ཞེས་གསུངས་སོ།

²⁰ དེ་ནས་དཱ་བིད་བྷལ་པེ་ར་ཛིམ་དུ་ཕྱིན་ནས་ཕེ་ལེ་ཤེད་པ་རྣམས་ཀྱི་ཐོག་ཏུ་རྒྱལ་ཁ་ཐོབ་བོ། ཁོང་གིས། གཙོ་བོ་དཀོན་མཆོག་ནི་ངའི་དགྲ་བོ་རྣམས་ཀྱི་ཐོག་ཏུ་ཆུ་རུད་ལུད་པ་ལྟར་བློ་བུར་དུ་ཕེབས་པ་ཡིན་པས། གནས་དེའི་མིང་ལ་བྷལ་པེ་ར་ཛིམ་ཞེས་ཟེར་བ་ཡིན་ནོ།

²¹ ཕེ་ལེ་ཤེད་པ་རྣམས་བྲོས་འགྲོ་དུས་དེ་ཚོའི་སྐུ་འདྲ་རྣམས་དེར་ལུས་ཡོད་པ་དང་། དཱ་བིད་དང་ཁོང་གི་མི་ཚོས་དེ་ཚོ་འཁྱེར་ཕྱིན་ནོ།

²² དེ་རྗེས་ཕེ་ལེ་ཤེད་པ་རྣམས་རེ་ཕ་ཨིམ་གྱི་ལུང་གཤོང་དུ་ཕྱིར་ལོག་བྱས་ནས་ས་གནས་དེ་ཡང་སྐྱར་རང་དབང་དུ་བླངས་སོ།

²³ སླར་ཡང་དཱ་བིད་ཀྱིས་གཙོ་བོ་དཀོན་མཆོག་ལ་བཀའ་དགོངས་ཞུས་པར། ཁོང་གིས་བཀའ་ལན་དུ། གནས་འདི་ནས་ཁོ་ཚོར་འཐབ་རྒོལ་མ་བྱེད་པར། ཕྱོགས་གཞན་ནས་བསྐོར་ཏེ་ཤིང་སྡོང་གི་ཉེ་འགྲམ་ནས་འཐབ་རྒོལ་བྱེད་ཕྱིར་གྲ་སྒྲིག་བྱོས་ཤིག

²⁴ ཤིང་དེའི་རྩེ་མོ་ནས་འགྲུལ་བཤུད་བྱེད་པའི་རྐང་སྒྲ་ཐོས་མ་ཐག་ཏུ་འཐབ་རྒོལ་བྱོས་ཤིག གང་ལགས་ཟེར་ན། ང་ནི་ཕེ་ལེ་ཤེད་པའི་དམག་མི་རྣམས་འཕམ་པར་བྱེད་ཕྱིར་ང་ཁྱོད་ཀྱི་མདུན་དུ་འགྲོ་རྒྱུ་ཡིན།

²⁵ དཱ་བིད་ནས་གཙོ་བོ་དཀོན་མཆོག་གིས་བཀའ་གནང་བ་བཞིན་བྱས་པའི་རྐྱེན་གྱིས་ཕེ་ལེ་ཤེད་པ་རྣམས་གྷེ་བཱ་ནས་གྷེ་ཛེར་བར་དུ་ཕྱིར་འདེད་བྱེད་ཐུབ་པ་རེད༎