ཤ་མུ་ཨེལ་གཉིས་པ། 4 - Tibetan Old Testament 2011

ཡིཤི་བྷོ་ཤེད་བསད་པ།

¹ ས་ཨུལ་གྱི་བུ་ཡིཤི་བྷོ་ཤེད་ཀྱི་ཧེབ་རོན་དུ་ཨབ་ནེར་བསད་པའི་སྐོར་ཐོས་ནས་ཁོ་འཇིགས་པས། ཨིསི་རཱཨེལ་པ་ཚང་མས་དོགས་ཟོན་བྱས་སོ།

² ཨིཤི་བྷོ་ཤེད་ལ་འཇབ་རྒོལ་བྱེད་མཁན་དམག་ཤོག་ཀྱི་འགོ་དཔོན་ཁག་གཉིས་ཡོད་པ་ཡིན་ཏེ། དེ་ཚོའི་ནང་ནས་གཅིག་གི་མིང་ལ་བྷ་ནཱ་དང་གཞན་དེའི་མིང་ལ་རེ་ཀབ་ཟེར་ཞིང་། དེ་ཚོ་ནི་བྷེན་ཡ་མིན་སྡེ་རིགས་ཀྱི་བྷི་རོད་ནས་ཡིན་པ་རིམ་མོན་གྱི་བུ་རྣམས་ཡིན་ནོ། (བྷི་རོད་ནི་བྷེན་ཡ་མིན་གྱི་ཆ་ཤས་སུ་ངོས་འཛིན་བྱེད་ཀྱི་ཡོད་པ་ཡིན་ནོ།

³ ས་གནས་དེའི་ཐོག་མའི་ཡུལ་མི་རྣམས་གྷིད་ཏེམ་དུ་བྲོས་ཕྱིན་ཏེ། དེ་ཚོ་ད་བར་ས་གནས་དེ་རང་དུ་བསྡད་ཡོད་པ་ཡིན་ནོ།)

⁴ ས་ཨུལ་གྱི་མི་བརྒྱུད་གཞན་ཞིག་ནི། ཡོ་ན་ཐན་གྱི་བུ་མེ་ཕི་བྷོ་ཤེད་ཅེས་པ་དེ་ཡིན་ཅིང་། སྔར་ཡོ་ན་ཐན་དང་ས་ཨུལ་གཉིས་བསད་པའི་སྐབས་སུ་ཁོ་ནི་རང་ལོ་ལྔ་ལ་སླེབས་ཡོད་པ་ཡིན་ནོ། གྲོང་ཁྱེར་ཡེཛ་རིལ་ནས་ཁོ་གཉིས་བསད་པའི་གནས་ཚུལ་ཐོས་མ་ཐག་ཏུ། ཕྲུ་གུའི་མ་མས་ཕྲུ་གུ་དེ་བླངས་ནས་བྲོས་ཕྱིན་པ་དང་། མོས་བྲེལ་ཟིང་ངང་དུ་ཕྲུ་གུ་དེ་སར་གཟག་པས། ཁོའི་རྐང་པར་སྐྱོན་ཤོར་བ་ཡིན་ནོ།

⁵ རེ་ཀབ་དང་བྷ་ནཱ་གཉིས་ཡིཤི་བྷོ་ཤེད་ཀྱི་ཁང་པར་ཕྱིན་ནས། ཁོ་གཉིས་དེར་ཉིན་གུང་མཚམས་སུ་འབྱོར་སྐབས་མེ་ཕི་བྷོ་ཤེད་ནི་ཉིན་གུང་གི་ངལ་གསོ་བརྒྱབ་ནས་བསྡད་ཡོད་དོ།

⁶ སྒོ་འགྲམ་དུ་བསྡད་ནས་གྲོ་ཚགས་བརྒྱབ་བཞིན་པའི་བུད་མེད་དེའང་གཉིད་ཙོག་ཐེབས་པས། རེ་ཀབ་དང་བྷ་ནཱ་གཉིས་སུ་ཞིག་གི་ཧ་མ་གོ་བར་ནང་དུ་ཐར་རོ།

⁷ ཁོ་ཚོ་ནང་དུ་འཛུལ་མ་ཐག་ཏུ་ཨིཤི་བྷོ་ཤེད་ཉལ་ནས་བསྡད་ཡོད་པའི་ཉལ་ཁང་ནང་དུ་ཕྱིན་ཏེ་ཁོ་བསད་དོ། དེ་ནས་ཁོ་ཚོས་ཁོའི་མགོ་བོ་བཅད་ནས་རང་དང་མཉམ་དུ་འཁྱེར་ཏེ་ཡོར་དན་གྱི་ལུང་གཤོང་བརྒྱུད་ནས་མཚན་གང་འགྲོ་བསྐྱོད་བྱས་སོ།

⁸ ཁོ་ཚོས་ཧེབ་རོན་དུ་རྒྱལ་པོ་དཱ་བིད་ལ་མགོ་དེ་ཕུལ་ནས་སྨྲས་པ། ཁྱེད་ལ་བཀྲོང་ཐབས་བྱེད་མཁན་ཁྱེད་ཀྱི་དགྲ་བོ་ཤ་ཨུལའི་བུ་ཡིཤི་བྷོ་ཤེད་ཀྱི་མགོ་བོ་དེ་འདིར་འཁྱེར་ཡོད། དེ་རིང་གཙོ་བོ་དཀོན་མཆོག་གིས་མི་དབང་ཆེན་པོ་ཁྱེད་ལ་ས་ཨུལ་དང་ཁོའི་བུ་བརྒྱུད་རྣམས་ཀྱི་ཐོག་ཏུ་དགྲ་ཤ་ལེན་ཆོག་པའི་གནང་བ་སྩལ་ཡོད་དོ།

⁹ དེར་དཱ་བིད་ཀྱིས་ལན་དུ། ང་ལ་ཉེན་ཁ་ཀུན་ལས་སྲུང་སྐྱོབ་མཛད་མཁན་སྐུ་གསོན་པོར་བཞུགས་ཡོད་པའི་གཙོ་བོ་དཀོན་མཆོག་གི་མཚན་བརྗོད་དེ་ངས་མནའ་སྐྱེལ་རྒྱུར།

¹⁰ ང་ཛིག་ལག་ཏུ་ཡོད་སྐབས་ས་ཨུལ་གྲོངས་པའི་སྐོར་གྱི་གནས་ཚུལ་འཁྱེར་ཡོང་མཁན་བང་ཆེན་དེའི་སེམས་ལ་ངས་གནས་ཚུལ་བཟང་པོ་ཞིག་འཁྱེར་ཡོང་ཡོད་ཅེས་བསམ་མོད། འོན་ཀྱང་ངས་ཁོ་ལ་འཛིན་བཟུང་བྱས་ཏེ་བསད་བཅུག་པ་ཡིན། ཁོའི་གནས་ཚུལ་དེའི་ཆེད་དུ་ངས་ཁོ་ལ་བྱ་དགའ་དེ་ལྟར་སྤྲད་པ་ཡིན་ནོ།

¹¹ རང་གི་ཁང་པར་ཉལ་ནས་བསྡད་ཡོད་པའི་མི་གནོང་མེད་ཅིག་བསད་མཁན་གྱི་གནས་སྟངས་ནི་དེ་བས་ཀྱང་སྡུག་པར་ཡོང་ངེས་སོ། ཁྱོད་ཀྱིས་ཁོའི་སྲོག་བཅད་པ་ཡིན་པས་ད་ངས་ཁྱོད་ལ་དགྲ་ཤ་ལེན་ཏེ། ཁྱོད་ཚོ་ས་གཞིའི་ངོས་ལས་བཤུལ་མེད་དུ་འཇིག་པར་བྱེད་རྒྱུ་ཡིན།

¹² དེ་ནས་དཱ་བིད་ཀྱིས་བཀའ་གནང་བས། དམག་མི་རྣམས་ཡོང་ནས་རེ་ཀབ་དང་བྷ་ནཱ་གཉིས་བསད་དེ་དེ་ཚོའི་རྐང་ལག་གཉིས་བཅད་ནས་ཧེབ་རོན་གྱི་རྫིང་བུའི་ཉེ་འགྲམ་དུ་ཡར་འཕྱར་ཞིང་། ཡིཤི་བྷོ་ཤེད་ཀྱི་མགོ་བོ་འཁྱེར་ནས་ཧེབ་རོན་དུ་ཨབ་ནེར་གྱི་དུར་སར་སྦས་སོ༎