ཤ་མུ་ཨེལ་གཉིས་པ། 3 - Tibetan Old Testament 2011

¹ ཤ་ཨུལ་གྱི་ཁྱིམ་ཚང་དང་དཱ་བིད་ལ་རྒྱབ་སྐྱོར་བྱེད་མཁན་དམག་ཚོགས་གཉིས་ཀྱི་བར་ལ་དམག་འཁྲུགས་ཡུན་རིང་བྱུང་བ་ཡིན་ནོ། དཱ་བིད་ཀྱི་སྟོབས་ཤུགས་ནི་ཇི་ཆེར་འཕེལ་ཞིང་། ཁོང་གི་དགྲ་བོའི་སྟོབས་ཤུགས་ནི་རིམ་བཞིན་ཉམས་གུད་དུ་ཕྱིན་ནོ༎

དཱ་བིད་ཀྱི་བུ་རྣམས།

² ཧེབ་རོན་དུ་དཱ་བིད་ལ་བུ་དྲུག་བྱུང་ཞིང་། གོ་རིམ་བཞིན་ཨམ་ནོན་གྱི་མ་ནི་ཨ་ཧི་ནོ་ཨམ་ཡིན་ཏེ། ཡང་མོ་ནི་ཡེཛ་རིལ་ནས་ཡིན་པ་དང་།

³ ཀི་ལི་ཨབ་ནི་ཀར་མེལ་ནས་ཡིན་པའི་འདས་པོ་ན་བྷལ་གྱི་ཆུང་མ་ཨ་བྷི་གེལ་ཡིན་ཏེ། དེ་བཞིན་གྷེ་ཤུར་གྱི་རྒྱལ་པོ་ཏལ་མཨེའི་བུ་མོ་མ་ཀཱའི་བུ་ནི་ཨབ་ས་ལོམ་ཡིན་ནོ།

⁴ ཨ་དྷོ་ནི་ཡཱའི་མ་ནི་ཧ་གྷིད་ཡིན་པ་དང་། ཤེ་ཕཏ་ཡཱའི་མ་ནི་ཨ་བྷི་ཏལ་དང་།

⁵ ཨི་ཐི་རེམ་གྱི་མ་ནི་ཨེག་ལ་ཡིན་ཏེ། བུ་དེ་དག་ཚང་མ་ཧེབ་རོན་དུ་སྐྱེས་པ་ཡིན་ནོ༎

ཨབ་ནེར་གྱིས་དཱ་བིད་ཀྱི་ཕྱོགས་གཏོགས་བྱས་པ།

⁶ དཱ་བིད་ཀྱི་དམག་མི་དང་ས་ཨུལ་གྱི་ཁྱིམ་ཚང་ལ་ཞེན་སེམས་བྱེད་པའི་དམག་མིའི་བར་ལ་དམག་འཐབ་བྱུང་བ་དང་། ས་ཨུལ་གྱི་རྗེས་འབྲངས་པ་ཚོའི་ནང་ནས་ཨབ་ནེར་ནི་སྟོབས་ཤུགས་ཇེ་ཆེར་ཕྱིན་ནོ།

⁷ ཉིན་ཞིག་ས་ཨུལ་གྱི་བུ་ཡིཤི་བྷོ་ཤེད་ཀྱིས་ཨབ་ནེར་ལ་ས་ཨུལ་གྱི་ཟུར་གྲོགས་མ་མིང་ལ་རིཛ་པཱ་ཞེས་པ་ཨེ་ཡཱའི་བུ་མོ་དེ་དང་མཉམ་དུ་ཉལ་བའི་སྐྱོན་འཛུག་བྱས་པས།

⁸ ཨབ་ནེར་ཤིན་ཏུ་ཁྲོས་ཤིང་། ངས་ས་ཨུལ་ལ་བསླུ་འཁྲིད་བྱེད་ཡོང་བསམ་གྱི་འདུག་གམ། ངས་ཡ་ཧུ་དཱའི་ཞབས་ཕྱི་ཞུ་ཡོང་ཞེས་བསམ་གྱི་འདུག་གམ་ཞེས་སྨྲས་སོ། ང་ནི་ཐོག་མ་ནས་ཁྱེད་ཀྱི་ཡབ་ས་ཨུལ་དང་ཁོང་གི་སྤུན་དང་གྲོགས་པོ་ཚོའི་ཕྱོགས་ཞེན་བྱེད་མཁན་ཞིག་ཡིན། དེ་ཙམ་མ་ཟད་ངས་ཁྱེད་ལ་དཱ་བིད་ཀྱི་ལག་ནས་སྐྱབས་པ་ཡིན། འོན་ཀྱང་དེ་རིང་ཁྱེད་ཀྱིས་ང་ལ་བུད་མེད་ཞིག་གི་སྐོར་ལ་སྐྱོན་བརྗོད་བྱས་བྱུང་།

^9-10 གཙོ་བོ་དཀོན་མཆོག་གིས་དཱ་བིད་ལ་ས་ཨུལ་དང་ཁོའི་རིགས་བརྒྱུད་ནས་རྒྱལ་སྲིད་འཕྲོག་སྟེ། དཱ་བིད་ལ་ཨིསི་རཱཨེལ་དང་ཡ་ཧུ་དཱ་གཉིས་ཀྱི་རྒྱལ་པོར་བསྐོས་ཏེ། ཡུལ་གྱི་མཐའ་མཚམས་གཅིག་ནས་གཞན་བར་དུ་དབང་ཆ་གནང་རྒྱུའི་ཞལ་བཞེས་གནང་ཡོད། ད་ཞལ་བཞེས་དེ་མ་སྒྲུབ་པ་ཡིན་ན་དཀོན་མཆོག་གིས་ང་ལ་ཚར་གཅོད་པར་ཤོག

¹¹ ཡིཤི་བྷོ་ཤེད་ནི་ཨབ་ནེར་ལ་ཧ་ཅང་འཇིགས་པས་གཏམ་ཚིག་གཅིག་ཀྱང་བཤད་མ་ཐུབ་བོ།

¹² ཨབ་ནེར་གྱིས་དཱ་བིད་ཡོད་སར་བང་ཆེན་ཁག་བཏང་བ་དང་། སྐབས་དེར་དཱ་བིད་ནི་ཧེབ་རོན་དུ་ཡོད་པ་ཡིན་ཏེ། འཕྲིན་ཚིག་དེའི་ནང་ཡུལ་འདིར་སུས་རྒྱལ་སྲིད་སྐྱོང་ངམ། ང་དང་མཉམ་དུ་ཆིངས་སྒྲིག་ཞིག་འཇོག་པ་གནང་ན་ངས་ཨིསི་རཱཨེལ་ཡོངས་རྫོགས་ཁྱེད་ཀྱི་ཁོངས་སུ་གཏོགས་པར་བྱེད་རྒྱུ་ཡིན་ཞེས་གསལ་ཡོད་པ་ཡིན་ནོ།

¹³ དེའི་ལན་དུ་དཱ་བིད་ཀྱིས། དེ་རང་ལེགས་སོ། ངས་ཁྱོད་དང་མཉམ་དུ་ཆིངས་ཡིག་འཇོག་རྒྱུར་དོན་གནད་ཅིག་ཡོད། དེ་ནི་ཁྱོད་རང་ང་ལ་འཕྲད་པར་ཡོང་དུས་ས་ཨུལ་གྱི་བུ་མོ་མི་ཀལ་ལ་ངའི་རྩར་ངེས་པར་དུ་འཁྲིད་ཡོང་དགོས།

¹⁴ ཡང་དཱ་བིད་ཀྱིས་ཨིཤི་བྷོ་ཤེད་ཀྱི་རྩར་རུ་བང་ཆེན་བཏང་ནས་སྨྲས་པ། ངའི་ཆུང་མ་མི་ཀལ་ང་ལ་ཕྱིར་ལོག་བྱེད་དགོས། ངས་མོ་མཉམ་དུ་ཆང་ས་རྒྱབ་དུས་ཕེ་ལེ་ཤེད་པའི་མི་བརྒྱ་ཐམ་པའི་མདུན་ལྤགས་བཅད་པ་ཡིན།

¹⁵ དེ་འདྲ་སོང་ཙང་ཨིཤི་བྷོ་ཤེད་མོའི་ཁྱོ་ག་ལེཤེ་ཀྱི་བུ་པལ་ཏི་ཨེལ་གྱི་ལག་ནས་བླངས་སོ།

¹⁶ པལ་ཏི་ཨེལ་ནི་མོའི་རྗེས་སུ་འབྲངས་ཤིང་། གྲོང་ཁྱེར་བྷ་ཧུ་རིམ་བར་དུ་ངུ་ཞིང་ཕྱིན་ནོ། འོན་ཀྱང་ཨབ་ནེར་གྱིས་ཁོང་ལ་རང་གི་ཁྱིམ་དུ་ཕྱིར་ལོག་བྱོས་ཤིག་ཅེས་སྨྲས་པ་བཞིན་ཁོས་དེ་བཞིན་དུ་བྱས་སོ།

¹⁷ དེ་ནས་ཨབ་ནེར་གྱིས་ཨིསི་རཱཨེལ་གྱི་འགོ་དཔོན་ཚོའི་རྩར་ཕྱིན་ནས་སྨྲས་པ། ཁྱོད་ཚོས་སྔོན་མ་ནས་དཱ་བིད་ལ་རང་གི་རྒྱལ་པོར་བསྐོ་འདོད་བྱས་པ་ཡིན་པས།

¹⁸ ད་ཆ་ཁྱོད་ཚོར་གོ་སྐབས་བཟང་པོ་ཞིག་ཐོབ་ཡོད། དཀོན་མཆོག་གིས་ངའི་མི་འབངས་ཨིསི་རཱཨེལ་པ་རྣམས་ཕེ་ལེ་ཤེད་པ་དང་དགྲ་བོ་གཞན་ཚོའི་ལག་ནས་སྐྱོབ་ཕྱིར་ངའི་བྲན་པོ་དཱ་བིད་ལ་བེད་སྤྱོད་གཏོང་གི་ཡིན་ཞེས་གསུངས་པ་དེ་དྲན་གསོ་བྱོས་ཤིག

¹⁹ དེ་བཞིན་ཨབ་ནེར་གྱིས་བྷེན་ཡ་མིན་གྱི་སྡེ་རིགས་དང་མཉམ་དུའང་གཏམ་གླེང་བྱས་ཏེ། བྷེན་ཡ་མིན་གྱི་སྡེ་རིགས་དང་ཨིསི་རཱཨེལ་པ་ཚོའི་མི་རྣམས་ནས་ཁས་ལེན་གང་བྱས་ཡོད་པ་དེའི་སྐོར་དཱ་བིད་ལ་ཞུས་པར་ཧེབ་རོན་དུ་ཕྱིན་ནོ།

²⁰ མི་ཉི་ཤུ་ཐམ་པ་འཁྲིད་ནས་ཨབ་ནེར་དཱ་བིད་ཡོད་སར་ཧེབ་རོན་དུ་འབྱོར་བ་དང་། དཱ་བིད་ཀྱིས་ཁོ་ཚོའི་ཆེད་དུ་གསོལ་མགྲོན་ཞིག་བཤམས་སོ།

²¹ ཨེབ་ནེར་གྱིས་དཱ་བིད་ལ། ད་ང་ཕྱིན་ནས་ཨིསི་རཱཨེལ་ཡོངས་རྫོགས་མི་དབང་ཁྱེད་ཀྱི་ཕྱོགས་སུ་བསྒྱུར་ཐབས་བྱེད་རྒྱུ་དང། དེ་ཚོས་ཁྱེད་ལ་རང་གི་རྒྱལ་པོར་ངོས་འཛིན་ཞུས་པའི་སྒོ་ནས། ཁྱེད་ཀྱི་དགོངས་དོན་ཆ་ཚང་སྒྲུབ་ཅིང་། ཁྱེད་ཀྱིས་ས་ཁུལ་ཚང་མའི་ཐོག་ཏུ་རྒྱལ་སྲིད་སྐྱོང་བར་འགྱུར། དེ་ནས་དཱ་བིད་ཀྱིས་ཨེབ་ནེར་ལ་སྲུང་སྐྱོབ་བྱེད་རྒྱུའི་འགན་ལེན་བྱས་ཏེ་ཁོ་འགྲོར་བཅུག་གོ།

ཨབ་ནེར་བསད་པ།

²² དེ་རྗེས་ཡོ་ཨབ་དང་དཱ་བིད་ཀྱི་ལས་བྱེད་པ་གཞན་རྣམས་དམག་འཐབ་བྱས་ནས་འཕྲོག་བཅོམ་བྱས་པའི་དངོས་རིགས་མང་པོ་ཞིག་མཉམ་དུ་འཁྱེར་ནས་ལོག་ཡོང་ངོ་། འོན་ཀྱང་སྐབས་དེར་ཨབ་ནེར་ནི་དཱ་བིད་དང་མཉམ་དུ་ཧེབ་རོན་དུ་མེད་པ་ཡིན་ནོ། གང་ལགས་ཟེར་ན། དཱ་བིད་ཀྱིས་ཨབ་ནེར་ལ་སྲུང་སྐྱོབ་བྱ་རྒྱུའི་འགན་ལེན་བྱས་ཏེ་བཏང་ཟིན་པས་ཕྱིར་རོ།

²³ དེ་ནས་ཡོ་ཨབ་དང་ཁོའི་མི་རྣམས་དེར་སླེབས་སྐབས། ཨབ་ནེར་རྒྱལ་པོ་དཱ་བིད་ཀྱི་རྩར་སླེབས་ཡོད་པ་དང་། ཁོ་ལ་སྲུང་སྐྱོབ་བྱེད་རྒྱུའི་འགན་འཁུར་དང་བཅས་ཕར་བཏང་བའི་སྐོར་ཁོ་ལ་བཤད་པས།

²⁴ ཡོ་ཨབ་རྒྱལ་པོའི་དྲུང་དུ་བཅར་ནས་སྨྲས་པ། ཁྱེད་ཀྱིས་དེ་འདྲ་ག་རེ་གནང་བ་ཡིན་ནམ། ཨབ་ནེར་ཁྱེད་ཀྱི་རྩར་སླེབས་ཡོད་པས། ཁོ་ལ་ཅིའི་ཕྱིར་འགྲོར་བཅུག་པ་ཡིན་ནམ།

²⁵ ཁོ་ནི་ཁྱེད་ལ་བསླུ་འཁྲིད་བྱེད་ཕྱིར་ཡོང་བ་ཡིན་པ་དང་། ཁྱེད་ཀྱི་མཛད་དོན་གང་ཅིའི་སྐོར་ཤེས་རྟོགས་བྱེད་རྒྱུ་དང་། ཁྱེད་རང་ག་པར་ཕེབས་ཀྱི་ཡོད་མེད་སྐོར་ཉམས་ཚོད་ལེན་ཕྱིར་ཡོང་བ་ཡིན་ནོ། དེ་ལྟར་ཡིན་པ་དེ་ཕལ་ཆེར་ཁྱེད་ཀྱིས་མཁྱེན་གྱི་ཡོད་ཤག་རེད།

²⁶ དཱ་བིད་ཀྱི་རྩ་ནས་ཐོན་པའི་རྗེས་སུ། ཡོ་ཨབ་ཀྱིས་བང་ཆེན་རྣམས་བཏང་ནས་ཨབ་ནེར་བཀོང་ཐབས་བྱས་པ་བཞིན། དེ་ཚོས་ཁོ་སི་རཱའི་ཁྲོན་པ་ནས་བཏོན་ཏེ་ཕྱིར་ལོག་འཁྲིད་ཡོང་ངོ་། འོན་ཀྱང་དེའི་སྐོར་ལ་དཱ་བིད་ཀྱིས་གང་ཡང་ཤེས་མེད་དོ།

²⁷ ཨབ་ནེར་ཧེབ་རོན་དུ་འབྱོར་བ་དང་། ཡོ་ཨབ་ཀྱིས་ཁོ་ལ་གསང་གཏམ་བཤད་ཚུལ་བྱས་ཏེ་རྒྱལ་སྒོའི་འགྲམ་དུ་ཟུར་དུ་འཁྲིད་ནས་ཁོའི་གྲོད་པར་གྲི་བཙུགས་སོ། སྔར་ཨབ་ནེར་གྱི་ཡོ་ཨབ་ཀྱི་སྤུན་ཨ་ས་ཧེལ་བསད་པ་ཡིན་པས། དེའི་དགྲ་ལེན་དུ་ཨབ་ནེར་ཡང་བསད་པ་ཡིན་ནོ།

²⁸ དཱ་བིད་ཀྱིས་གནས་ཚུལ་དེ་ཐོས་པ་དང་། ཨབ་ནེར་བསད་པའི་སྐོར་ལ་ངའི་འབངས་དང་ང་ལ་ཉེས་སྐྱོན་སོགས་གང་ཡང་མེད་པ་དེ་གཙོ་བོ་དཀོན་མཆོག་གིས་མཁྱེན་གྱི་ཡོད།

²⁹ དེའི་ཉེས་པར་ཡོ་ཨབ་དང་ཁོའི་ནང་མི་ཚང་མར་ཕོག་པར་ཤོག མི་རབས་རེ་རེར་ནང་མི་ནས་སྐྱེས་པ་སུ་ཞིག་ལ་མཛེ་ནད་དམ་པག་ནད་ཕོག་པའམ། བུད་མེད་འབའ་ཞིག་གིས་བྱེད་འོས་པའི་ལས་དོན་ཁོ་ན་བྱེད་ཐུབ་པའི་སྐྱེས་པའམ་དམག་སར་ཤི་དགོས་པའམ། ཁ་ཟས་མི་འདང་བའི་སྐྱེས་པ་འགའ་ཤས་བྱུང་བར་ཤོག

³⁰ དེ་བཞིན་ཡོ་ཨབ་དང་ཁོའི་སྤུན་ཨ་བྷི་ཤེ་སེ་རང་གི་སྤུན་ཨ་ཤེ་ཨེལ་ལ་ཨེབ་ནེར་གྱིས་གྷིབི་ཨོན་གྱི་དམག་སར་བསད་པའི་དགྲ་ཤ་བླངས་སོ༎

ཨབ་ནེར་དུར་སར་སྦས་པ།

³¹ དེ་ནས་དཱ་བིད་ཀྱིས་ཡོ་ཨབ་དང་ཁོའི་མི་རྣམས་ལ་ཁོ་རང་ཚོའི་གྱོན་གོས་ཧྲལ་ནས་རྩ་རས་གྱོན་ཏེ། ཨབ་ནེར་གྱི་དོན་དུ་མྱ་ངན་བྱེད་དགོས་པའི་བཀའ་གནང་སྟེ། རྒྱལ་པོ་དཱ་བིད་རང་ཉིད་ཕུང་པོའི་རྗེས་སུ་ཕེབས་སོ།

³² ཨབ་ནེར་ནི་ཧེབ་རོན་དུ་སྤས་པ་དང་། དུར་སར་རྒྱལ་པོ་དང་མི་ཚང་མས་སྐད་ཤུགས་ཆེན་པོ་འདོན་ནས་ངུས་འབོད་བྱས་སོ།

³³ དེ་ནས་དཱ་བིད་ཀྱིས་ཨབ་ནེར་གྱི་ཆེད་དུ་བཤུམ་པ་དང་མྱ་ངན་གྱི་མགུར་མ་འདི་བཏང་བ་ཡིན་ནོ། ཨབ་ནེར་གླེན་པ་བཞིན་དུ་ཅིའི་ཕྱིར་འཆི།

³⁴ ཁོ་ཡི་ལག་པ་གཉིས་ཀྱང་བསྡམས་མེད་ཅིང་། དེ་བཞིན་རྐང་པར་ལྕགས་སྒྲོག་བརྒྱབས་མེད་པས། ཁྲིམས་འགལ་ཅན་གྱིས་བསད་ལྟར་ཁོ་ནི་ཤི། ཁོང་གི་ཆེད་དུ་མི་རྣམས་སྐྱར་དུ་ངུས་སོ།

³⁵ དཱ་བིད་ཀྱིས་ཁ་ཟས་ཕྲན་བུ་ཞིག་བཞེས་ན་བསམ་ནས་མི་ཚོས་ཉི་མ་ཉིན་གང་ཐབས་ཤེས་བྱས་ནའང་། ཁོང་གིས་དམ་བཅའ་བརྩན་པོ་ཞིག་བཞེས་ཏེ། ངས་ཉི་མ་མ་བཞུར་གོང་ལ་ཁ་ཟས་སོགས་ཟས་པ་ཡིན་ན་དཀོན་མཆོག་གིས་ང་ལ་ཚར་གཅོད་གནང་བར་ཤོག་ཅེས་གསུངས་ཡོད་པ་ཡིན་པས།

³⁶ ཁོ་ཚོས་དེ་ཧ་གོ་ནས་ཧ་ཅང་དགའ་པོ་བྱུང་ངོ་། དོན་དམ་དུ་རྒྱལ་པོས་མཛད་སྤྱོད་གང་གནང་བར་མི་མང་ཚང་མས་དགའ་པོ་བྱས་སོ།

³⁷ དཱ་བིད་ཀྱི་མི་འབངས་ཡོངས་དང་ཨིསི་རཱཨེལ་པ་ཚང་མས་ཨབ་ནེར་བསད་པའི་སྐོར་ལ་རྒྱལ་པོར་ཐེ་བྱུས་གང་ཡང་མེད་པ་དེ་ཤེས་ཀྱི་ཡོད་པ་ཡིན་ནོ།

³⁸ རྒྱལ་པོས་རང་གི་ལས་བྱེད་པ་རྣམས་ལ་གསུངས་པ། དེ་རིང་གི་ཉིན་མོར་ཨིསི་རཱཨེལ་གྱི་འགོ་འཁྲིད་ཆེན་པོ་ཞིག་འདས་གྲོངས་ཕྱིན་པ་དེ་ཁྱོད་ཚོས་མི་ཤེས་སམ།

³⁹ ང་ནི་དཀོན་མཆོག་གིས་འདེམས་བསྐོས་གནང་བའི་རྒྱལ་པོ་ཞིག་ཡིན་ན་ཡང་། དེ་རིང་ང་ནི་རང་ཉིད་ལ་སྟོབས་མེད་ཉམས་ཆུང་ཞིག་ལ་འཚོར་སྣང་བྱེད་ཀྱི་ཡོད། ཛེ་རུ་ཡཱའི་བུ་འདི་ཚོ་ནི་ཧ་ཅང་གི་གཤིས་ཀ་རྩུབ་པོ་དང་དྲག་ངར་ཆེ་བས། གཙོ་བོ་དཀོན་མཆོག་གིས་ཁྲིམས་འགལ་བ་དེ་ཚོར་ཁོ་ཚོའི་ལས་ངན་དང་འཚམས་པའི་ཉེས་ཆད་གནང་བར་ཤོག།