ཤ་མུ་ཨེལ་གཉིས་པ། 22 - Tibetan Old Testament 2011

དཱ་བིད་ཀྱི་རྒྱལ་ཁའི་མགུར་མ།

¹ གཙོ་བོ་དཀོན་མཆོག་གིས་དཱ་བིད་ལ་ས་ཨུལ་དང་དགྲ་བོ་གཞན་གྱི་ལག་ནས་སྐྱབས་པ་གནང་སྐབས་ཁོང་གིས་གཙོ་བོ་དཀོན་མཆོག་ལ་གཤམ་གསལ་ལྟར་མགུར་མས་བསྟོད་དབྱངས་ཕུལ་ལོ།

² གཙོ་བོ་དཀོན་མཆོག་ང་ཡི་སྲུང་སྐྱོབ་དང་། ང་ཡི་མཁར་རྫོང་བརྟན་པོ་ཡིན།

³ ང་ཡི་དཀོན་མཆོག་ང་ཡི་སྲུང་སྐྱོབ་ཡིན། ང་ནི་ཁོང་གི་ནང་ན་སྲུང་སྐྱོབ་ཐོབ། ཁོང་གིས་ང་ལ་ཕུབ་བཞིན་སྲུང་སྐྱོབ་མཛད། ང་ལ་སྐྱབས་ཤིང་ཉེན་མེད་བརྟན་པོར་བཞག། ཁོང་ནི་ང་ཡི་སྐྱབས་མགོན་ཡིན་པས་ན། ང་ལ་སྲུང་སྐྱོབས་དང་ནི་དྲག་ལས་རྣམས་ལས་སྐྱབས།

⁴ ངས་ནི་གཙོ་བོ་དཀོན་མཆོག་བོས་པས་ན། ང་ཡི་དགྲ་བོ་རྣམས་ལས་ཁོང་གིས་སྐྱབས། གཙོ་བོ་དཀོན་མཆོག་ལ་ནི་བསྟོད་བསྔགས་སོ།

⁵ འཆི་བའི་རྦ་རླབས་ང་ཡི་ཕྱོགས་བཞིར་འཁོར། འཇིག་པའི་རྦ་རླབས་ངའི་ཐོག་འཁོར་ཞིང་གནས།

⁶ འཆི་བའི་ཉེན་ཁས་ང་ལ་མཐའ་བསྐོར་ཞིང་། དུར་གྱི་ཞགས་རྙི་ངའི་ཆེད་བཙུགས་པར་བྱས།

⁷ ང་ལ་དཀའ་ངལ་བྱུང་བའི་དུས་སྐབས་སུ། ངས་ནི་གཙོ་བོ་དཀོན་མཆོག་ལ་བོས། ང་ཡི་དཀོན་མཆོག་ལ་སྐྱབས་གྲོགས་ཞུས། ཉིད་ཀྱི་མཆོད་ཁང་ནང་ནས་ཁོང་ཉིད་ཀྱིས། ང་ཡི་སྒྲ་ལ་གསན་ཆོག་མཛད་གནང་སྟེ། ང་ཡིས་སྐྱབས་ཞུས་ངུ་འབོད་ལ་ནི་ཁོང་གིས་གསན།

⁸ དཀོན་མཆོག་ཉིད་ནི་ཁྲོས་པས་རྐྱེན་གྱིས་ནི། ས་གཞི་འགུལ་ཞིང་གཡོ་བ་དྲག་པོ་བྱས། དེ་བཞིན་ནམ་མཁའི་རྨང་གཞི་ཡོངས་སུ་འགུལ།

⁹ ཁོང་གི་ཤངས་ནས་དུ་བ་འཐུལ་བ་དང་། ཞལ་ནས་འཚིག་པར་བྱེད་པའི་མེ་ལྕེ་དང་། འབར་ཞིང་ཡོད་པའི་མེ་ཧྲུག་དམར་པོ་ཐོན།

¹⁰ ཁོང་གི་ཞབས་ཀྱི་འོག་ཏུ་སྤྲིན་ནག་མཉམ། མཁའ་དབྱིངས་ཧྲལ་ནས་མར་འབབས་སོ།

¹¹ ཁོང་གི་ཀེ་རུབ་ཆིབས་ནས་མྱུར་དུ་འཕུར། རླུང་གི་ཤོག་པས་ལྡིང་ནས་འགྲུལ་བསྐྱོད་གནང།

¹² ཁོང་གིས་རང་ཉིད་མུན་པས་བཀབ་པར་མཛད། ཆར་ཆུ་ལྡན་པའི་སྤྲིན་པ་སྟུག་པོས་ཁོང་ལ་བསྐོར།

¹³ ཁོང་གི་དྲུང་ནས་གློག་འོད་འཁྱུག་པའི་སྐབས། འབར་བཞིན་ཡོད་པའི་མེ་ཧྲུག་དམར་པོ་ཐོན།

¹⁴ དེ་ནས་གཙོ་བོ་དཀོན་མཆོག་ཉིད་ཀྱིས་ནི། ནམ་མཁའི་གནས་ནས་འབྲུག་སྐད་བཀྱོན། ཀུན་དབང་ལྡན་པའི་དཀོན་མཆོག་ཁྱེད་ཉིད་ཀྱི། གསུང་སྐད་དེ་ནི་ཀུན་གྱིས་ཐོས་པར་བྱས།

¹⁵ ཁོང་གི་ཕྱག་མདས་དགྲ་རྣམས་སྟོར་བར་མཛད། གློག་འོད་འཁྱུག་པའི་དེ་ཚོ་བྲོས་ཤིང་རྒྱུག།

¹⁶ ཐུགས་ཁྲོ་ཆེན་པོས་འབྲུག་སྐད་ལྡིར་བ་བཞིན། གསུང་སྐད་ཆེན་པོས་བཀའ་བཀྱོན་མཛད་པའི་སྐབས། རྒྱ་མཚོའི་མཐིལ་རྣམས་ཡོངས་སུ་མངོན་པ་དང་། དེ་བཞིན་ས་གཞིའི་རླུང་རྣམས་མངོན་པར་བྱས།

¹⁷ མཐོ་རིས་གནས་ནས་གཙོ་བོ་དཀོན་མཆོག་གིས། ཕྱག་གཉིས་བརྐྱངས་ཏེ་བདག་ལ་ཐུགས་བཅག་མཛད། ཆུ་བོ་གཏིང་མཐའ་རིང་བའི་གནས་དེ་ནས། ཁོང་གིས་ང་ལ་བཏོན་གནང་མཛད་དེ་སྐྱབས།

¹⁸ ཁོ་བོའི་དགྲ་བོ་སྟོབས་ཤུགས་ཅན་རྣམས་དང་། ཁོ་བོར་སྡང་དགྲ་བྱེད་མཁན་དགྲ་ཀུན་ལས། ཁོང་གིས་ང་ལ་སྐྱབས་གྲོགས་དཔུང་གཉེན་མཛད། དེ་ཚོ་ང་ལས་ཧ་ཅང་སྟོབས་ཤུགས་ཆེ།

¹⁹ ང་ནི་དཀའ་ངལ་ནང་དུ་ཚུད་པའི་སྐབས། དེ་ཚོས་ངའི་ཁར་འཐབ་རྒོལ་བྱས་མོད་ཀྱང་། གཙོ་བོ་དཀོན་མཆོག་ང་ལ་སྲུང་སྐྱོབས་གནང་།

²⁰ ཁོང་གིས་ང་ལ་ཐུགས་མཉེས་མཛད་གནང་བས། ང་ལ་ཉེན་ཁའི་གནས་ལས་སྐྱབས་གྲོགས་མཛད།

²¹ ང་ནི་བཟང་པོའི་རྗེས་སུ་འབྲངས་པའི་རྐྱེན། གཙོ་བོ་དཀོན་མཆོག་ང་ལ་བྱ་དགའ་གནང། ང་ནི་ཉེས་མེད་ཁོང་གི་བྱིན་རླབས་གནང་།

²² གཙོ་བོ་དཀོན་མཆོག་ཁོང་གིི་ཁྲིམས་རྣམས་ང་ཡིས་སྲུང། ང་ཡི་དཀོན་མཆོག་ཁྱེད་ནས་ཁ་སྒྱུར་མེད།

²³ ཁོང་གི་བཀའ་ཁྲིམས་ཡོངས་སུ་བདག་གིས་སྲུང་། ངས་ནི་ཁོང་གི་བཀའ་དང་འགལ་མེད་དོ།

²⁴ ང་ནི་ཉེས་སྐྱོན་མེད་པ་ཁོང་གིས་མཁྱེན། ང་ནི་སྡིག་ལས་ཀུན་ལས་དབྱེད་ནས་ཡོད།

²⁵ ང་ནི་བཟང་པོའི་རྗེས་སུ་འབྲངས་པ་དང་། གནོང་ཉེས་མེད་པ་ཁོངགིས་མཁྱེན་ཙ་ན། ཁོང་གིས་ང་ལ་བྱིན་རླབས་གནང་བར་འགྱུར།

²⁶ ཀྱེ་གཙོ་བོ་ཁྱེད་ལ་དམ་གཙང་ཞུས་མཁན་ཚོར། ཁྱེད་ཀྱིས་དེ་ཚོར་དམ་གཙང་གནང་བར་མཛད། ཡང་དག་རྣམས་ལ་བཟང་པོར་མངོན།

²⁷ དམ་པ་རྣམས་ལ་ཁྱེད་ཀྱིས་དམ་པས་སྐྱོངས། ངན་པ་རྣམས་ལ་ཁྱེད་ཀྱི་དགྲ་ཤེད་མཛད།

²⁸ ཉམ་ཆུང་དུལ་སེམས་ཅན་ལ་ཁྱེད་ཀྱིས་སྐྱབས། ང་རྒྱལ་ཅན་ལ་ཁྱེད་ཀྱིས་དམའ་བར་མཛད།

²⁹ གཙོ་བོ་ཁྱེད་ནི་བདག་གི་འོད་ལགས་ཤིང་། ཁོ་བོའི་མུན་པ་ཉིད་ཀྱིས་སེལ་བར་མཛད།

³⁰ ཁྱེད་ཀྱིས་ང་ལ་དགྲ་བོར་འཐབ་པའི་སྟོབས། དེ་ཚོའི་སྲུང་ཆའི་ཐོག་ཏུ་ང་ལ་ནི། རྒྱལ་ཕྱིར་ནུས་སྟོབས་གནང་བར་མཛད།

³¹ དཀོན་མཆོག་ཁྱེད་ཀྱི་མཛད་འཕྲིན་ཡང་དག་ལགས། ཁོང་གི་བཀའ་རྣམས་བློས་འཁེལ་འོས་ལགས་སོ། ཁོང་ལས་སྲུང་སྐྱོབས་འཚོལ་མཁན་རྣམས་ལ་ནི། ཁོང་ཉིད་ཕུབ་བཞིན་སྐྱབས་ཡུལ་བརྟན་པོ་ལགས།

³² གཙོ་བོ་དཀོན་མཆོག་གཅིག་པོ་དཀོན་མཆོག་ལགས། དཀོན་མཆོག་གཅིག་པོ་ང་ཚོའི་སྲུང་སྐྱོབས་ཡིན།

³³ དཀོན་མཆོག་ང་ཡི་སྐྱབས་གནས་བཙན་པོ་ཡིན། ང་ཡི་འགྲུལ་ལམ་ཁོང་གིས་བརྟན་པོར་མཛད།

³⁴ ཤ་བ་བཞིན་དུ་གོམ་འགྲུལ་བརྟན་པོར་མཛད། ཁོང་གིས་ང་ལ་རི་ཁར་ཁམས་བཟང་བཞག།

³⁵ ཁོང་གིས་ང་ལ་དམག་སྦྱོང་སློབ་སྟོན་མཛད། དེས་ན་ང་ནི་མདའ་གཞུ་བཙན་ཤོས་སྤྱོད་ཐུབ་བོ།

³⁶ ཀྱེ་གཙོ་བོ་ཁྱེད་ཀྱིས་ང་ལ་སྲུང་ཞིང་སྐྱབས། ཁྱེད་ཀྱིས་སྐྱབས་ཀྱི་ང་ལ་རླབས་ཆེན་མཛད།

³⁷ ཁྱེད་ཀྱི་ང་ལ་བཙོན་ལས་ཚུད་འགྱུར་སྐྱབས་གནང་ངོ་། ང་ནི་ད་བར་ནམ་ཡང་ལྷུང་མེད་དོ།

³⁸ རང་གི་དགྲ་བོར་འདེད་ནས་འཕམ་པར་བྱས། དེ་ཚོ་ཚར་བཅད་མ་བྱེད་བར་དུ་མཚམས་མི་འཇོགས།

³⁹ དེ་ཚོར་ཉེས་བརྡུང་བྱས་པས་ཡར་མི་ལང་། འཕམ་གུད་བྱུང་ནས་ང་ཡི་མདུན་དུ་འགྱེལ།

⁴⁰ དམག་འཐབ་བྱེད་ཕྱིར་སྟོབས་ཤུགས་ཁྱེད་ཀྱིས་གནང་། དགྲ་བོའི་སྟེང་དུ་རྒྱལ་ཁ་ཁྱེད་ཀྱིས་གནང་།

⁴¹ དགྲ་རྣམས་ང་ཡི་རྩ་ནས་ཁྱེད་ཀྱིས་འདེད། ང་སེམས་ཅན་ལ་བདག་གིས་ཚར་གཅོད་བྱེད།

⁴² དེ་ཚོས་སྐྱབས་གྲོགས་ཞུས་ཀྱང་སྐྱབས་མཁན་མེད། དེ་ཚོས་གཙོ་བོར་འབོད་ཀྱང་ལན་མི་གནང་།

⁴³ དེ་ཚོར་རྐང་བརྫིས་ཕྱེ་མ་བཞིན་དུ་འགྱུར། ལམ་གྱི་འདམ་རྫབ་བཞིན་དུ་ང་ཡིས་བརྫིས།

⁴⁴ མི་འབངས་ལོག་ལྟ་ཅན་ལས་ང་ལ་སྐྱབས། མི་རིགས་རྣམས་ཀྱི་ཐོག་ཏུ་སྲིད་སྐྱོང་བརྟན་པོར་འཛོག། ངོ་ཤེས་མེད་པའི་མི་རྣམས་ངའི་འབངས་འགྱུར།

⁴⁵ ཕྱི་རྒྱལ་པ་ཚོས་ངའི་མདུན་ཕྱག་བཙལ་ཞིང་། དེ་ཚོས་ང་ཡི་བཀའ་ལ་བརྩི་སྲུང་བྱེད།

⁴⁶ དེ་ཚོས་སེམས་ཤུགས་ཡོངས་སུ་ཉམས་པ་དང་། མཁར་རྫོང་དག་ལས་འདར་བཞིན་ཡོང་བར་འགྱུར།

⁴⁷ གཙོ་བོ་དཀོན་མཆོག་གསོན་པོར་སྐུ་བཞུགས་པས། ང་ཡི་སྲུང་སྐྱོབ་མཁན་ལ་བསྟོད་བསྔོགས་ཤིག། ང་ལ་སྲུང་སྐྱོབ་གནང་མཁན་དཀོན་མཆོག་གི། མངའ་ཐང་ཆེན་པོའི་སྐོར་ལ་ཁྱབ་སྒྲགས་བྱོས།

⁴⁸ དགྲ་བོའི་ཐོག་ཏུ་ང་ལ་རྒྱལ་ཁ་གནང་། མི་རིགས་རྣམས་ནི་ང་ཡི་མངའ་འོག་ཏུ། དེ་དག་ཁོང་གིས་ང་ལ་གནང་བར་མཛད།

⁴⁹ དགྲ་བོའི་ལག་ནས་ང་ལ་སྐྱབས་གནང་ཞིང་། ཀྱེ་གཙོ་བོ་དཀོན་མཆོག་ཁྱེད་ཀྱིས་ང་ཉིད་ལ། དགྲ་བོའི་ཐོག་ཏུ་ང་ལ་རྒྱལ་ཁ་གནང་། མི་ངན་ཁྲོ་གཏུམ་ལག་ནས་སྐྱབས་གྲོགས་མཛད།

⁵⁰ དེས་ན་མི་རིགས་འདྲ་མིན་རྣམས་ཀྱི་དབུས། ངས་ནི་ཁྱེད་ལ་བསྟོད་བསྔགས་འབུལ་བཞིན་དུ། མགུར་དབྱངས་ལེན་ཏེ་ཁྱེད་ལ་བསྟོད་པ་འབུལ།

⁵¹ དཀོན་མཆོག་གིས་ནི་རང་གི་རྒྱལ་པོ་ལ། རྒྱལ་ཁ་ཆེན་པོ་རྣམས་ནི་གནང་བར་འགྱུར། ཉིད་ཀྱིས་འདེམས་བསྐོས་མཛད་པའི་སྐྱེ་བོ་ལ། ཁོང་གིས་བྱམས་སྐྱོངས་ཟད་མེད་གནང་བར་འགྱུར། དཱ་བིད་རང་དང་ཁོང་གི་རིགས་བརྒྱུད་ལ། དུས་རྒྱུན་དུ་དེ་ལྟར་གནང་བར་འགྱུར༎