ཤ་མུ་ཨེལ་གཉིས་པ། 21 - Tibetan Old Testament 2011

ས་ཨུལ་གྱི་མི་བརྒྱུད་རྣམས་བསད་པ།

¹ དཱ་བིད་ཀྱིས་སྲིད་སྐྱོང་བྱེད་པའི་དུས་སྐབས་སུ་ལོ་གསུམ་གྱི་རིང་དུ་མུ་གེ་འཚབ་ཆེན་ཞིག་བྱུང་བས། དེའི་སྐོར་ལ་དཱ་བིད་ཀྱིས་གཙོ་བོ་དཀོན་མཆོག་ལ་དགོངས་སྐོར་ཞུས་པ་དང་། གཙོ་བོ་དཀོན་མཆོག་གིས་བཀའ་གནང་གསལ། ས་ཨུལ་དང་ཁོའི་ནང་མི་རྣམས་ནི་སྲོག་གཅོད་ཀྱི་གནོང་ཉེས་དང་ལྡན་པས། ཁོས་གྷི་བི་ཨོན་གྱི་མི་རྣམས་ཀྱང་བསད་ཡོད་པ་ཡིན་ནོ།

² གྷི་བི་ཨོན་གྱི་མི་རྣམས་ཨིསི་རཱཨེལ་པ་མ་ཡིན་ཏེ། དེ་ཚོ་ནི་ཨ་མོར་པ་ཆོའི་སྡེ་ཁག་ཆུང་ངུ་ཞིག་ཡིན་པ་དང་། སྔར་ཨིསི་རཱཨེལ་པ་ཚོས་དེ་ཚོར་སྲུང་སྐྱོབ་བྱེད་རྒྱུའི་དམ་བཅའ་བྱས་ཡོད་དོ། འོན་ཀྱང་ས་ཨུལ་གྱི་ཨིསི་རཱཨེལ་པ་དང་ཡ་ཧུ་དཱ་པ་ཚོའི་ཕྱོགས་ཞེན་བྱེད་ཀྱི་ཡོད་པ་ཡིན་པས། ཁོང་གིས་དེ་ཚོར་ཚར་བཅད་གནང་ཕྱིར་ཐབས་ཤེས་བྱེད་བཞིན་ཡོད་པ་ཡིན་ནོ།

³ དེ་བས་ན་དཱ་བིད་ཀྱིས་གྷི་བི་ཨོན་པ་རྣམས་བོས་ནས་ཁོ་ཚོར། ད་ངས་ཁྱོད་ཚོའི་ཆེད་དུ་གང་བྱེད་དགོས་སམ། ཁྱོད་ཚོའི་ཐོག་ཏུ་ང་ཚོས་བྱས་པའི་ནོར་འཁྲུལ་དེའི་གུན་ཚབ་ཏུ་ངས་ཁྱོད་ཚོར་ཕན་པའི་རོགས་ཤིག་བྱེད་འདོད་ཡོད། དེ་ལྟར་བྱས་པའི་རྐྱེན་གྱིས། ཁྱོད་ཚོས་གཙོ་བོ་དཀོན་མཆོག་གི་མི་འབངས་ལ་བྱིན་རླབས་སྤྲོད་ཐུབ་པ་ཡོང་བར་ཤོག་ཅེས་གསུངས་པ་དང་།

⁴ དེ་ཚོས་ལན་དུ་ཞུས་པ། ས་ཨུལ་དང་ཁོང་གི་ནང་མིའི་སྐོར་ལ་ང་ཚོས་འཐབ་རྩོད་གང་བྱེད་བཞིན་ཡོད་པ་དེ་ནི་གསེར་དང་དངུལ་གྱི་སེལ་ཐབས་བྱེད་མི་ཐུབ། ང་ཚོས་ཨིསི་རཱཨེལ་པ་སུ་ཞིག་ཀྱང་བསད་འདོད་བྱས་པ་མིན། དཱ་བིད་ཀྱིས། དེ་འདྲ་ཡིན་ན་ངས་ཁྱོད་ཚོའི་དོན་དུ་གང་བྱེད་ན་ལེགས་སམ་ཞེས་བཀའ་འདྲི་གནང་བས།

⁵ ཁོ་ཚོས་ལན་དུ། ས་ཨུལ་གྱི་ང་ཚོ་ཚར་གཅོད་གཏོང་ཐབས་བྱེད་ཀྱི་ཡོད། ང་ཚོ་ཨིསི་རཱཨེལ་ནང་དུ་མི་གཅིག་ཀྱང་གསོན་པོར་མ་ལུས་པའི་ཐབ་ངན་བྱེད་བཞིན་འདུག

⁶ དེ་བས་ན་ཁོང་གི་མི་བརྒྱུད་ཀྱི་ཁོངས་ནས་སྐྱེ་པ་བདུན་ང་ཚོའི་ལག་ཏུ་རྩིས་སྤྲོད་གནང་བར་མཛོད། གཙོ་བོ་དཀོན་མཆོག་གིས་འདེམས་བསྐོས་གནང་བའི་རྒྱལ་པོ་ས་ཨུལ་གྱི་གྲོང་ཁྱེར་གྷི་བི་ཨཱ་རུ་གཙོ་བོ་དཀོན་མཆོག་གི་སྤྱན་སྔར་ང་ཚོས་མི་དེ་ཚོ་རྐད་ལ་བསྡམས་ནས་འཕྱར་རྒྱུ་ཡིན་ཞེས་ཞུས་སོ། དེ་ནས་རྒྱལ་པོས་ལན་དུ། ངས་མི་དེ་ཚོ་ཁྱོད་ཚོར་རྩིས་སྤྲོད་ངེས་པར་བྱའོ་ཞེས་གསུངས་སོ།

⁷ འོན་ཀྱང་སྔར་ཁོང་དང་ཡོ་ན་ཐན་གཉིས་ཀྱི་བར་ལ་ཁ་ཆད་དམ་གཙང་ཞིག་བཞག་ཡོད་རྐྱེན་གྱིས། དཱ་བིད་ཀྱིས་ཡོ་ན་ཐན་གྱི་བུའམ་ས་ཨུལ་གྱི་ཚ་བོ་མེ་ཕི་བྷོ་ཤེད་དེ་ཚེ་ཐར་བཏང་ངོ་།

⁸ འོན་ཀྱང་ཁོང་གིས་ཨེ་ཡཱའི་བུ་མོ་རིཛ་པཱ་ལས་སྐྱེས་པའི་ས་ཨུལ་གྱི་བུ་གཉིས་ཀྱི་མིང་ལ་ཨར་མོ་ནི་དང་མེ་ཕི་བྷོ་ཤེད་ཅེས་པ་དེ་གཉིས་འཁྲིད་དོ། དེ་བཞིན་མེ་ཧོ་ལ་ནས་ཡིན་པ་བྷར་ཛི་ལའི་བུ་ཨད་རི་ཨེལ་གྱི་ཆུང་མའམ་ས་ཨུལ་གྱི་བུ་མོ་མེ་རབ་ནས་སྐྱེས་པའི་བུ་སྤུན་ལྔ་པོ་དེའང་ཁོང་གིས་འཁྲིད་དོ།

⁹ དེ་ནས་དཱ་བིད་ཀྱིས་གྷི་བི་ཨོན་པ་རྣམས་ཀྱི་ལག་པར་རྩིས་སྤྲོད་བྱས་ཤིང་། དེ་ཚོས་མི་དེ་དག་གཙོ་བོ་དཀོན་མཆོག་གི་སྤྱན་སྔར་རི་བོའི་སྒང་ལ་བརྐྱངས་ནས་བསད་དོ། དེ་བཞིན་མི་བདུན་ཆ་ཆབས་གཅིག་ཏུ་ཤི་བ་ཡིན་ནོ། མི་དེ་ཚོ་གསོད་སྐབས་སྟོན་ཀའི་ནམ་དུས་མཐའ་མ་ཡིན་པ་དང་། ནས་ཀྱི་བཙས་མ་བརྔས་རན་པའི་དུས་ཚོས་ཀྱི་ཐོག་མ་འཁེལ་ཡོད་པ་ཡིན་ནོ།

¹⁰ ཨེ་ཡཱའི་བུ་མོའམ་ས་ཨུལ་གྱི་ཟུར་གྲོགས་མ་མིང་ལ་རིཛ་པཱ་ཞེས་པའི་བུད་མེད་དེས་ཕུང་པོ་རྣམས་བཞག་སའི་བྲག་རོང་ཞིག་གི་ཁར་རྩ་རས་ཀྱི་གཡབ་ཞིག་བཟོས་ནས། བཙས་མ་བརྔས་པའི་ནམ་དུས་འགོ་འཛུགས་ནས་བཟུང་སྟོན་ཀའི་ཆར་ཤོད་འགོ་མ་ཚུགས་བར་དུ་དེར་བསྡད་ཅིང་། ཉིན་མོ་ནམ་མཁའི་འདབ་ཆགས་དང་། མཚན་མོ་ནགས་ཀྱི་གཅན་གཟན་རྣམས་ལས་ཕུང་པོའི་རུས་པ་དེ་ཚོར་སྲུང་སྐྱོབ་བྱས་སོ།

¹¹ རིཛ་པཱས་གང་བྱས་པ་དེ་དཱ་བིད་ཀྱིས་ཐོས་ནས།

¹² ཁོང་གྷིལ་ཨད་ཀྱི་ཡ་བྷེཤའི་ཡུལ་མི་རྣམས་ལས་ས་ཨུལ་དང་ཁོང་གི་བུ་ཡོ་ན་ཐན་གཉིས་ཀྱི་རུས་པ་དེ་ཚོ་འཁྱེར་ཡོང་བ་དང་། (སྔར་རི་བོ་གྷིལ་བོ་རུ་ས་ཨུལ་བསད་པའི་ཉིན་མོར་ཕེ་ལེ་ཤེད་པ་ཚོས་བྷེད་ཤཱན་གྱི་ཁྲོམ་སར་དེ་ཚོའི་ཕུང་པོ་རྣམས་ཡར་བརྐྱངས་ཡོད་ས་ནས་དེ་ཚོས་རུས་པ་བརྐུས་ནས་འཁྱེར་ཡོང་བ་ཡིན་ནོ།)

¹³ དཱ་བིད་ཀྱིས་ས་ཨུལ་དང་ཡོ་ན་ཐན་གྱི་རུས་པ་དང་མཉམ་དུ་ཡར་བརྐྱངས་ནས་བསད་པའི་མི་བདུན་གྱི་རུས་པའང་བསྡུ་སྒྲུག་བྱེད་བཅུག་གོ

¹⁴ དེ་རྗེས་ཁོ་ཚོས་རྒྱལ་པོས་བཀའ་གང་གནང་བ་ཚང་མ་སྒྲུབ་པའི་ཆེད་དུ། བྷེན་ཡ་མིན་སྡེ་རིགས་ཀྱི་ས་ཁུལ་དུ་ཡོད་པའི་ས་གནས་ཛེ་ལཱ་རུ་ཤ་ཨུལ་གྱི་ཕ་ཀི་ཤིའི་དུར་སར་ཕྱིན་ནས། ཤ་ཨུལ་དང་ཡོ་ན་ཐན་གྱི་རུས་པ་རྣམས་དེར་ས་སྦས་བཏང་ངོ་། དེ་རྗེས་ཁོ་ཚོས་རང་ཡུལ་གྱི་དོན་དུ་དཀོན་མཆོག་ལ་སྨོན་ལམ་གང་ཞུས་པ་རྣམས་ཁོང་གིས་གསན་ནས་དེར་བཀའ་ལན་གནང་གི་ཡོད་པ་ཡིན་ནོ༎

ཕེ་ལེ་ཤེད་པའི་མི་བོ་ཆེ་རྣམས་དང་འཐབ་པ།

¹⁵ ཕེ་ལེ་ཤེད་པ་རྣམས་དང་ཨིསི་རཱཨེལ་པ་རྣམས་ཀྱི་བར་ལ་དམག་འཁྲུགས་གཞན་ཞིག་བྱུང་ཞིང་། དཱ་བིད་རང་གི་དམག་མི་རྣམས་འཁྲིད་ནས་ཕེ་ལེ་ཤེད་པ་རྣམས་དང་འཐབ་པས། དཱ་བིད་ཧ་ཅང་ལུས་ཐང་ཆད་པ་དང་།

¹⁶ ཨིཤི་བྷི་བྷེ་ནོབ་ཅེས་པའི་མི་བོ་ཆེ་ཞིག་གིས་ལག་པར་ཀི་ལོ་གསུམ་དང་ཕྱེད་ག་ཙམ་གྱི་ལྗིད་ཚད་བྱས་པའི་རག་གི་མདུང་ཞིག་འཁྱེར་ཏེ། རྐེད་པར་རལ་གྲི་གསར་པ་ཞིག་བཏགས་ནས་རང་གི་སེམས་ལ། ངས་དཱ་བིད་བསད་ཐུབ་པ་འདུག་ཅེས་བསམས་སོ།

¹⁷ འོན་ཀྱང་ཛེ་རུ་ཡཱའི་བུ་ཨ་བྷི་ཤེས་དཱ་བིད་ལ་དཔུང་གྲོགས་བྱེད་ཕྱིར་ཡོང་ནས། མི་བོ་ཆེ་དེ་ལ་འཐབ་རྒོལ་བྱས་ཏེ་བསད་དོ། དེ་ནས་དཱ་བིད་ཀྱི་མི་ཚོས་དཱ་བིད་ལ་ད་ནས་བཟུང་ཁོ་ཚོ་དང་མཉམ་དུ་དམག་སར་ནམ་ཡང་འགྲོ་གི་མིན་ཞེས་པའི་དམ་བཅའ་བྱེད་དུ་བཅུག་ཅིང་། དེ་ཚོས། ཁྱེད་ནི་ཨིསི་རཱཨེལ་གྱི་རེ་འདོད་ངོ་མ་དེ་ཡིན་པས། སྐུ་ཉིད་ལ་རྐྱེན་ངན་བར་ཆད་སོགས་བྱུང་བ་དེ་ང་ཚོས་ནམ་ཡང་མི་འདོད་ཅེས་ཞུས་སོ།

¹⁸ དེ་རྗེས་སླར་ཡང་ཕེ་ལེ་ཤེད་པ་རྣམས་དང་གྷོབ་ཡུལ་དུ་དམག་འཁྲུགས་ཤིག་བྱུང་བ་དང་། དམག་འཁྲུགས་དེར་ས་གནས་ཧུ་ཤཱ་ནས་ཡིན་པ་སི་བྷི་ཀའི་ཀྱིས་མི་བོ་ཆེ་སཕ་ཟེར་བ་དེ་ལ་བསད་དོ།

¹⁹ གྷོབ་ཏུ་ཕེ་ལེ་ཤེད་པ་རྣམས་དང་དམག་འཁྲུགས་གཞན་ཞིག་བྱུང་ཞིང་། སྐབས་དེར་བྷེད་ལེ་ཧེམ་པ་ཡ་ཨིར་གྱི་བུ་ཨེལ་ཧ་ནན་གྱིས་གྷད་ཀྱི་གྷོ་ལི་ཡད་ཡང་བསད་པ་དང་། གྷོ་ལི་ཡད་ཀྱི་མདུང་གི་ཕྲ་སྦོམ་ནི་འཐགས་ཤིང་དང་འདྲ་བ་སྦོམ་པོ་ཡོད་པ་ཡིན་ནོ།

²⁰ གྷད་ཡུལ་དུའང་དམག་འཁྲུགས་ཤིག་བྱུང་ཞིང་། ་དེར་དམག་འཐབ་ལ་དགའ་བའི་མི་བོ་ཆེ་ཞིག་ཡོད་ཅིང་། དེའི་རྐང་ལག་གཉིས་ཀར་མཛུབ་མོ་དྲུག་རེ་ཡོད་པ་ཡིན་ནོ།

²¹ དེས་ཨིསི་རཱཨེལ་པ་རྣམས་ལ་ཚད་ཚད་འགྲན་བསྡུར་བྱས་པ་ཡིན་པས། དཱ་བིད་ཀྱི་གཅེན་པོ་ཤམ་མཱའི་བུ་ཡོ་ན་ཐན་གྱིས་ཁོ་བསད་པ་ཡིན་ཏེ།

²² མི་བོ་ཆེ་བཞི་པོ་དེ་ནི་གྷད་ཡུལ་གྱི་མི་བོ་ཆེའི་རིགས་བརྒྱུད་ལས་ཡིན་པ་དང་། དེ་ཚོ་ནི་དཱ་བིད་དང་ཁོང་གི་དམག་མི་ཚོས་བསད་པ་ཡིན་ནོ༎