ཤ་མུ་ཨེལ་གཉིས་པ། 20 - Tibetan Old Testament 2011

ཤེ་བྷས་ངོ་རྒོལ་བྱེད་པ།

¹ གྷིལ་གཱལ་དུ་ཤེ་བྷ་ཟེར་བའི་ཕན་མི་ཐོབ་པའི་མི་ཞིག་ཡོད་ཅིང་། ཁོ་ནི་བྷེན་ཡ་མིན་གྱི་སྡེ་རིགས་ལས་ཡིན་པ་བྷིག་རི་ཞེས་པའི་བུ་ཡིན་པ་དང་། ཁོས་དམག་དུང་འབུད་དེ་སྐད་ཆེན་པོས་སྨྲས་པ། དཱ་བིད་ལ་འཕམ་གུད་ཆེན་པོ་ཡོང་བར་ཤོག ང་ཚོ་ཁོའི་རྗེས་སུ་འབྲངས་ཀྱི་མིན། ཀྱེ་ཨིསི་རཱཨེལ་པ་རྣམས་ང་ཚོ་རང་རང་སོ་སོའི་ཁང་ཁྱིམ་དུ་ལོག་ནས་འགྲོ།

² དེ་ནས་ཨིསི་རཱཨེལ་པ་ཚོས་དཱ་བིད་ལ་སྤངས་ཏེ་ཤེ་བྷའི་རྗེས་སུ་འབྲངས་མོད། འོན་ཀྱང་ཡ་ཧུ་དཱ་པ་རྣམས་ནི་དཱ་བིད་ཀྱི་ཕྱོགས་གཏོགས་བྱས་ཏེ་ཁོང་དང་མཉམ་དུ་ཡོར་དན་ནས་ཡེ་རུ་ཤ་ལེམ་བར་རྗེས་སུ་འབྲངས་ནས་ཕྱིན་ནོ།

³ དཱ་བིད་ཡེ་རུ་ཤ་ལེམ་དུ་རང་གི་ཕོ་བྲང་ནང་བསླེབས་པ་དང་། ཕོ་བྲང་བལྟ་རྟོགས་བྱེད་ཕྱིར་བཞག་པའི་ཟུར་གྲོགས་མ་བཅུ་པོ་དེ་དག་ཕོ་བྲང་ནས་ཕྱིར་བཏོན་ཏེ། གནས་གཞན་ཞིག་ཏུ་སྲང་ཆ་དང་བཅས་བཞག་ཅིང་། ཁོང་གིས་དེ་ཚོའི་དགོས་མཁོ་ཚང་མ་སྒྲུབ་པ་གནང་མོད། འོན་ཀྱང་ཁོང་གིས་བུད་མེད་དེ་ཚོ་དང་མི་ཚེ་ཧྲིལ་བུར་ལུས་འབྲེལ་སོགས་གང་ཡང་མ་གནང་བས། ཁྱོ་ཤི་བའི་ཡུག་མོ་བཞིན་དུ་བཟང་བཙོན་ནང་མི་ཚེ་བསྐྱེལ་དགོས་བྱུང་བ་ཡིན་ནོ།

⁴ རྒྱལ་པོས་ཨ་མ་ས་ལ། ཁྱོད་ཡ་ཧུ་དཱའི་མི་རྣམས་བསྡུ་བཀོང་བྱེད་ནས་གནང་ཉིན་བར་ངའི་རྩར་ཡོང་དགོས་ཤེས་གསུངས་པ་བཞིན།

⁵ ཨ་མ་ས་ཡ་ཧུ་དཱ་པ་རྣམས་བོས་པར་ཕྱིན་མོད། འོན་ཀྱང་རྒྱལ་པོས་གསུངས་པའི་དུས་མཚམས་སུ་ཁོ་ཕྱིར་ལོག་བྱེད་མ་ཐུབ་བོ།

⁶ དེར་བརྟེན་པས་རྒྱལ་པོས་ཨ་བྷི་ཤེ་ལ། ཤེ་བྷས་ང་ཚོ་ལ་ཨབ་ས་ལོམ་ལས་ལྷག་པར་དཀའ་ངལ་ནང་དུ་ཚུད་པར་བྱེད་ཉེན་འདུག དེ་བས་ན་ཁྱོད་ངའི་མི་རྣམས་འཁྲིད་དེ་ཁོའི་རྗེས་སུ་སོང་ཞིག དེ་མིན་ཁོས་ལྕགས་རིས་བསྐོར་བའི་གྲོང་ཁྱེར་བཙན་པོ་རྣམས་རང་དབང་དུ་བླངས་ནས། ཁོ་ང་ཚོའི་ལག་ནས་ཤོར་ཉེན་ཆེ་བ་འདུག་ཅེས་གསུངས་སོ།

⁷ དེ་ནས་ཡོ་ཨབ་ཀྱི་དམག་མི་དང་རྒྱལ་པོའི་སྐུ་སྲུང་བ་རྣམས་དང་དེ་བཞིན་དམག་མི་གཞན་རྣམས་ཚང་མ་ཡེ་རུ་ཤ་ལེམ་ནས་ཨ་བྷི་ཤ་ཡི་དང་མཉམ་དུ་ཐོན་ཏེ། ཤེ་བྷ་ལ་རྗེས་འདེད་བྱེད་ཕྱིར་ཕྱིན་ནོ།

⁸ ཁོ་ཚོ་གྷི་བི་ཨོན་དུ་ཡོད་པའི་བྲག་རོང་ཆེན་པོའི་ཉེ་འགྲམ་དུ་སླེབས་པ་དང་ཨ་མ་ས་དེ་ཚོ་དང་ཐུག་འཕྲད་བྱེད་ཕྱིར་ཡོང་ཞིང་། ཡོ་ཨབ་ནི་དམག་ཆས་གྱོན་ཏེ། རྐེད་པར་ཤུབ་དང་ལྡན་པའི་རལ་གྲི་ཞིག་རྐེད་རག་གིས་བསྡམས་ཡོད། ཁོ་མདུན་དུ་ཐོན་ཡོང་སྐབས་རལ་གྲི་ཤུབ་ནས་མར་ཟག་གོ

⁹ ཡོ་ཨབ་ཀྱིས་ཨ་མ་ས་ལ། ཀྱེ་ངའི་གྲོགས་པོ། ཁྱོད་རང་སྐུ་ཁམས་བཟང་པོ་ཡོད་ཤག་རེད་ཅེས་འཚམས་འདྲི་བྱས་ཏེ། ཁོས་ཨ་མ་སཱ་ལ་འོ་བྱེད་ཕྱིར་ཡོ་ཨབ་ཀྱིས་རང་གི་ལག་པ་གཡས་པས་ཁོའི་ཨོག་ཚོམ་ནས་འཇུས་སོ།

¹⁰ ལག་པ་གཞན་དེར་ཡོ་ཨབ་ཀྱིས་རལ་གྲི་བཟུང་ཡོད་པ་དེ་ཨ་མ་སས་དོ་སྣང་མ་བྱས་པས། ཡོ་ཨབ་ཀྱིས་ཁོའི་གྲོད་པར་གྲི་བཙུགས་ཏེ་ནང་ཁྲོལ་ཚང་མ་ཕྱི་རུ་ཐོན་ནས་ས་ཁར་ཟག་པས། ཨ་མ་སཱ་དེ་མ་ཉིད་དུ་ཤི་བ་ཡིན་པས། ཡོ་ཨབ་ཀྱིས་ཡང་སྐྱར་གྲི་བཙུགས་དགོས་མ་བྱུང་ངོ་། དེ་རྗེས་ཡོ་ཨབ་དང་ཁོའི་སྤུན་ཨ་བྷི་ཤེ་གཉིས་ནི་ཤེ་བྷའི་རྗེས་སུ་འབྲངས་ཏེ་ཕྱིན་ནོ།

¹¹ ཡོ་ཨབ་ཀྱི་མི་ཞིག་གིས། ཨ་མ་སའི་ཕུང་པོའི་ཉེ་འགྲམ་དུ་ལངས་ཏེ་སྐད་ཤུགས་ཆེན་པོས། ཡོ་ཨབ་དང་དཱ་བིད་ཀྱི་ཕྱོགས་གཏོགས་བྱེད་མཁན་སུ་ཡིན་པ་རྣམས་ཡོ་ཨབ་ཀྱི་རྗེས་སུ་ཤོག་ཅིག་ཅེས་སྨྲས་པ་རེད།

¹² ཨ་མ་སའི་ཕུང་པོ་ཁྲག་གིས་གང་བ་དེ་ལམ་གྱི་དཀྱིལ་དུ་རིལ་ནས་ཡོད་པ་དང་། མི་ཚང་མ་ཕུང་པོའི་འགྲམ་དུ་ལང་ནས་བསྡད་ཡོད་པ་དེ་མི་དེས་མཐོང་ནས། ཕུང་པོ་དེ་གཞུང་ལམ་དཀྱིལ་ནས་འདྲུད་དེ་ཞིང་ཁའི་ནང་དུ་བཞག་སྟེ། དེའི་ཁར་གོས་ཤིག་གིས་བཀབ་ནས་བཞག་གོ

¹³ ཕུང་པོ་དེ་ལམ་ནས་ཕར་འཁྱེར་བའི་རྗེས་སུ་མི་ཚང་མས་ཤེ་བྷ་ལ་རྗེས་འདེད་བྱེད་ཕྱིར་ཡོ་ཨབ་ཀྱི་རྗེས་སུ་ཕྱིན་ནོ།

¹⁴ ཤེ་བྷ་ཨིསི་རཱཨེལ་གྱི་སྡེ་རིགས་ཚང་མའི་ས་ཁུལ་རྒལ་ནས། ཧ་བེལ་བྷེད་མ་ཀཱ་ཟེར་བའི་གྲོང་ཁྱེར་དུ་སླེབས་པ་དང་། བྷིག་རིའི་རིགས་རུས་ཀྱི་མི་ཚང་མ་ཕྱོགས་གཅིག་ཏུ་འཛོམས་ནས། ཁོའི་རྗེས་སུ་འབྲངས་ཏེ་གྲོང་ཁྱེར་ནང་དུ་ཕྱིན་ནོ།

¹⁵ ཤེ་བྷ་དེར་ཡོད་པའི་སྐོར་ཡོ་ཨབ་ཀྱི་མི་ཚོས་ཐོས་ནས། ཁོ་ཚོ་གྲོང་ཁྱེར་དེར་ཕྱིན་ཏེ་དེ་མཐའ་བསྐོར་ཞིང་། དེ་ཚོས་ལྕགས་རིའི་ཕྱི་ནས་སའི་སྟེགས་བཟོས་ཏེ་བསྐོར་བ་དང་། ལྕགས་རི་འགྱེལ་ཕྱིར་ལྕགས་རིའི་འོག་ནས་ས་འདྲུད་དོ།

¹⁶ གྲོང་ཁྱེར་དེའི་ནང་བུད་མེད་བློ་གྲོས་ལྡན་པ་ཞིག་ཡོད་དེ། མོས་ལྕགས་རིའི་སྒང་ནས་མར་བལྟ་བཞིན་སྐད་ཤུགས་ཆེན་པོས། འདིར་གསན་དང་། ཁྱོད་ཚོས་ཡོ་ཨབ་ངའི་རྩར་འཁྲིད་ཡོང་བ་ཡིན་ན། ངས་ཁོང་ལ་བཀའ་མོལ་ཞུ་རྒྱུ་ཞིག་ཡོད་ཅེས་སྨྲས་སོ།

¹⁷ ཡོ་ཨབ་མདུན་དུ་ཕྱིན་ནས། ཁྱེད་རང་ཡོ་ཨབ་ཡིན་ནམ་ཞེས་མོས་དྲིས་པ་དང་། ལན་དུ་ང་ནི་ཡོ་ཨབ་ཡིན་ཞེས་ཁོང་གིས་སྨྲས་སོ། དེ་ནས་མོས། ངའི་གཏམ་ལ་གསན་དུ་གསོལ་ཞེས་ཞུས་པ་དང་། ཁོང་གི་ལན་དུ། ངས་ཉན་གྱི་ཡོད་ཅེས་གསུངས་སོ།

¹⁸ བུད་མེད་དེས། གནའ་བོའི་གཏམ་དཔེ་རྙིང་པ་གཞིར་བཟུང་ལྟར། གྲོང་ཁྱེར་ཧ་བེེལ་དུ་ཕྱིན་ནས་གྲོས་གླེང་བྱོས་ཤིག་ཅེས་བརྗོད་སྲོལ་ཡོད་པ་བཞིན་མི་ཚང་མས་དེ་བཞིན་བྱེད་ཀྱི་ཡོད་དོ།

¹⁹ ང་ཚོའི་གྲོང་ཁྱེར་ནི་ཆེ་ཞིང་ཞི་བདེ་བ་དང་། ཨིསི་རཱཨེལ་གྱི་ནང་དུ་ཞན་སེམས་ཆེ་བའི་གྲོང་ཁྱེར་རླབས་ཆེན་ཞིག་ཡིན་པས། ཁྱེད་ཀྱིས་གྲོང་ཁྱེར་དེ་མེད་པར་བཟོ་འདོད་གནང་བ་དེ་གང་ཡིན་ནམ། གཙོ་བོ་དཀོན་མཆོག་གི་ཇི་ཡིན་པ་དེ་ལ་ཁྱེད་ཀྱིས་མེད་པར་གནང་འདོད་ཡོད་དམ་ཞེས་ཞུས་པས།

²⁰ ལན་དུ་ཡོ་ཨབ་ཀྱིས། དེ་འདྲ་ནི་རྩ་བ་ཉིད་ནས་མ་ཡིན། ངས་ནམ་ཡང་ཁྱོད་ཀྱི་གྲོང་ཁྱེར་དེ་མེད་པར་བཟོ་མི་ཡོང་།

²¹ ང་ཚོའི་འཆར་གཞི་ནི་དེ་འདྲ་མིན། བྷིག་རའི་བུའི་མིང་ལ་ཤེ་བྷ་ཟེར་བ་ཨེཕ་ར་ཡིམ་གྱི་རི་བརྒྱུད་ཁུལ་དུ་གནས་སྡོད་བྱེད་མཁན་སྐྱེ་བོ་ཞིག་གིས་རྒྱལ་པོ་དཱ་བིད་ལ་ངོ་རྒོལ་བྱས་པ་ཡིན་པས། མི་དེ་ང་ཚོའི་ལག་ཏུ་རྩིས་སྤྲོད་བྱེད་ན། ངས་ཁྱོད་ཚོའི་གྲོང་ཁྱེར་འདི་སྤངས་ནས་འགྲོ་གི་ཡིན་ཞེས་སྨྲས་སོ། མོས། ང་ཚོས་ཁོའི་མགོ་དེ་ལྕགས་རིའི་སྟེང་ནས་མར་ཁྱོད་ཚོ་ཡོད་སར་དབྱུགས་ཀྱི་ཡིན་ཞེས་སྨྲས་སོ།

²² དེ་ནས་མོ་གྲོང་ཁྱེར་གྱི་མི་ཚོའི་དཀྱིལ་དུ་ཕྱིན་ནས་རང་གི་གྲོས་འཆར་དེ་བཤད་པས། དེ་ཚོས་ཤེ་བྷའི་མགོ་བོ་དེ་བཅད་དེ་ལྕགས་རིའི་སྟེང་ནས་མར་ཡོ་ཨབ་ཡོད་སར་དབྱུགས་སོ། དེ་ནས་ཁོས་རང་གི་མི་རྣམས་ལ་གྲོང་ཁྱེར་སྤངས་ནས་འགྲོ་དགོས་པའི་བརྡ་བཏང་ཞིང་དམག་དུང་འབུད་པ་དང་། མི་རྣམས་རང་གི་ནང་དུ་ལོག་ཕྱིན་ཞིང་། ཡོ་ཨབ་ཀྱང་ཡེ་རུ་ཤ་ལེམ་དུ་རྒྱལ་པོའི་དྲུང་དུ་ལོག་ཕྱིན་ནོ༎

དཱ་བིད་ཀྱི་ལས་བྱེད་པ་རྣམས།

²³ ཡོ་ཨབ་ནི་ཨིསི་རཱཨེལ་གྱི་དམག་སྤྱི་ཡིན་པ་དང་། དཱ་བིད་ཀྱི་སྐུ་སྲུང་དམག་མིའི་སྡེ་དཔོན་ནི་ཡ་ཧུ་ཡ་དྷའི་བུ་བྷེ་ན་ཡཱ་ཡིན་ཏེ།

²⁴ ཨ་དྷོ་ནི་རམ་ནི་ངལ་རྩོལ་ཁྲལ་དཔོན་ཡིན་པ་དང་། ཨ་ཧི་ལུད་ཀྱི་བུ་ཡ་ཧོ་ཤ་ཕད་ནི་གཞུང་འབྲེལ་ཡིག་ཆའི་སྐོར་གྱི་དོ་དམ་པ་ཡིན་ཅིང་།

²⁵ དེ་བཞིན་ཤེ་ཝ་ནི་ཕོ་བྲང་གི་དྲུང་ཆེ་དང་། ཛ་དཱོག་དང་ཨ་བྷི་ཡ་ཐར་གཉིས་ནི་བླ་མ་ཡིན་ཅིང་།

²⁶ ཡ་ཨིར་གྲོང་ཁྱེར་ནས་ཡིན་པའི་ཨི་ར་ཞེས་པ་དེའང་དཱ་བིད་ཀྱི་བླ་མའིི་ཁོངས་ནས་གཅིག་ཡིན་ནོ༎