ཤ་མུ་ཨེལ་གཉིས་པ། 19 - Tibetan Old Testament 2011

ཡོ་ཨབ་ཀྱིས་དཱ་བིད་ལ་སློབ་སོ་བཏང་བ།

¹ རྒྱལ་པོ་དཱ་བིད་ནི་ཨབ་ས་ལོམ་གྱི་དོན་དུ་ངུ་ཞིང་མྱ་ངན་བྱེད་ཀྱི་ཡོད་པའི་སྐོར་ཡོ་ཨབ་ཀྱིས་ཐོས་སོ།

² དཱ་བིད་ཀྱི་དམག་མི་ཡོངས་ཀྱི་ཕྱིར་དུ་དེ་ཉིན་རྒྱལ་ཁའི་དགའ་སྤྲོ་དེ་ནི་མྱ་ངན་དུ་འགྱུར་རོ། གང་ལགས་ཟེར་ན། རྒྱལ་པོས་རང་གི་བུའི་དོན་དུ་མྱ་ངན་བྱེད་བཞིན་ཡོད་པ་དེ་ཁོ་ཚོས་ཐོས་སོ།

³ དེ་ཚོ་དམག་ཤོར་ནས་ངོ་ཚ་ཞིང་བྲོས་འགྲོ་གི་ཡོད་པའི་དམག་མི་དང་འདྲ་བར་ཁུ་སིམ་མེར་གྲོང་ཁྱེར་ནང་དུ་ཕྱིར་ལོག་བྱས་སོ།

⁴ རྒྱལ་པོས་ངོ་གདོང་བཀབ་ནས་སྐད་ཤུགས་ཆེན་པོས་སྨྲེ་ངག་འདོན་ཞིང་། ཀྱེ་ངའི་བུ། ངའི་བུ་ཨབ་ས་ལོམ། ངའི་བུ་ཨབ་ས་ལོམ་ཞེས་བརྗོད་དོ།

⁵ དེ་ནས་ཡོ་ཨབ་ཕོ་བྲང་ནང་དུ་ཕྱིན་ནས་རྒྱལ་པོ་ལ། དེ་རིང་ཁྱེད་ཀྱིས་རང་གི་མི་རྣམས་ངོ་ཚ་དགོས་པ་བཟོས་བྱུང་། མི་དེ་ཚོས་ཁྱེད་དང་ཁྱེད་ཀྱི་བུ་རྣམས་དང་བུ་མོ་རྣམས་དང་ཆུང་མ་རྣམས་དང་ཁྱེད་ཀྱི་ཟུར་གྲོགས་མ་རྣམས་ཀྱི་སྲོག་སྐྱོབས་པ་ཡིན་ནོ།

⁶ རང་ལ་གཅེས་འཛིན་བྱེད་མཁན་རྣམས་ལ་ཁྱེད་ཀྱིས་སྡངས་སེམས་བྱེད་པ་དང་། རང་ལ་སྡང་སེམས་བྱེད་མཁན་རྣམས་ལ་བྱམས་པ་གནང་ངོ། ཁྱེད་ཀྱིས་སོ་སོའི་དམག་དཔོན་རྣམས་དང་དམག་མི་རྣམས་ལ་མཐོང་ཆུང་བརྩི་མེད་བྱེད་ཀྱི་ཡོད་པ་དེ་ནི་དེ་རིང་གསལ་པོར་མངོན་ནོ། ང་ཚོ་ཚང་མ་ཤི་ནས་ཨབ་ས་ལོམ་གཅིག་པོ་གསོན་པོར་ལུས་པ་ཡིན་ན། ཁྱེད་ཐུགས་མཉེས་པོ་ཡོང་ངེས་པ་དེ་ངས་གསལ་པོར་ཤེས་བྱུང་།

⁷ དེ་བས་ན་ཁྱེད་རང་ཕེབས་ནས་རང་གི་མི་རྣམས་ལ་སེམས་གསོ་བཀའ་མོལ་གནང་བར་མཛོད། གལ་སྲིད་དེ་ལྟར་མ་གནང་ན། ངས་གཙོ་བོ་དཀོན་མཆོག་གི་མཚན་བརྗོད་དེ་དམ་བཅའ་བཞག་ནས་བརྗོད་རྒྱུར། སང་ཞོགས་བར་དུ་ཁྱེད་ཀྱི་ཕྱོགས་སུ་མི་གཅིག་ཀྱང་ལུས་པར་མི་འགྱུར་ཞིང་། དེ་ནི་ཁྱེད་ཀྱི་མི་ཚེའི་ནང་གི་རྐྱེན་ངན་སྡུག་ཤོས་ཏུ་འགྱུར་ངེས་སོ་ཞེས་ཞུས་པ་དང་།

⁸ རྒྱལ་པོ་ཡར་བཞེངས་ཏེ་གྲོང་ཁྱེར་གྱི་རྒྱལ་སྒོའི་ཉེ་འགྲམ་དུ་བཞུགས་པས། ཁོང་གི་འཁོར་གཡོག་ཚོས་རྒྱལ་པོ་དེར་ཕེབས་ཡོད་པ་ཐོས་ནས། ཁོང་ལ་མཐའ་བསྐོར་ནས་བསྡད་དོ༎ སྐབས་དེར་ཨིསི་རཱཨེལ་པ་ཚང་མ་རང་རང་སོ་སོའི་ཁང་ཁྱིམ་དུ་བྲོས་ཕྱིན་ཡོད་དོ།

དཱ་བིད་ཡེ་རུ་ཤ་ལེམ་དུ་ཕྱིར་ལོག་བྱེད་པ།

⁹ དེ་ཚོས་ཡུལ་གྱི་ཕྱོགས་གང་སར་ཕན་ཚུན་རྩོད་གླེང་བྱེད་ཀྱི་ཡོད་དོ། དེ་ཚོས་བརྗོད་གསལ། རྒྱལ་པོ་དཱ་བིད་ཀྱིས་ང་ཚོར་དགྲ་བོ་ཚོའི་ལག་ནས་སྐྱབས་པ་གནང་ངོ། ཁོང་གིས་ཕ་ལེ་ཤེད་པའི་ལག་ནས་ང་ཚོ་ལ་སྐྱབས་པ་གནང་ཡོད། འོན་ཀྱང་ད་ཆ་ཁོང་ནི་ཨབ་ས་ལོམ་ལ་འཇིགས་ཏེ་རང་ཡུལ་སྤངས་ནས་བྲོས་ཕྱིན་པ་ཡིན་ནོ།

¹⁰ ང་ཚོས་ཨབ་ས་ལོམ་ལ་རང་གི་རྒྱལ་པོར་བསྔོ་འབུལ་བྱས་ཀྱང་། ཁོང་ནི་དམག་སར་བཀྲོངས་པ་ཡིན་པས། ད་ང་ཚོས་རྒྱལ་པོ་དཱ་བིད་ལ་གདན་འདྲེན་ཞུས་རྩིས་བྱེད་ན་མི་ལེགས་སམ།

¹¹ ཨིསི་རཱཨེལ་པ་ཚོས་གཏམ་གླེང་གང་བྱས་པའི་སྐོར་རྒྱལ་པོ་དཱ་བིད་ཀྱིས་གསན་པས། ཁོང་གིས་བླ་མ་ཛ་དཱོག་དང་ཨ་བྷི་ཡ་ཐར་གཉིས་ལ་ཡ་ཧུ་དཱའི་འགོ་དཔོན་རྣམས་ཀྱི་རྩར་འདྲི་རྩད་བྱས་པར་བཏང་ངོ་། རྒྱལ་པོ་ཕོ་བྲང་དུ་ཕྱིར་ལོག་བྱེད་ཆོག་སྐོར་ལ་རྒྱབ་སྐྱོར་བྱེད་མཁན་ཁོངས་ནས་ཁྱོད་ཚོ་རྗེས་སུ་ལུས་པ་དེ་གང་ཡིན་ནམ།

¹² ཁྱོད་ཚོ་ནི་ངའི་ཤ་ཁྲག་དང་འབྲེལ་བ་ཡོད་པའི་སྤུན་དང་ཉེ་དུ་རྣམས་ཡིན་པས། ང་ཕྱིར་ལོག་འཁྲིད་ཡོང་ཆོག་སྐོར་ལ་ཁྱོད་ཚོ་རྗེས་སུ་ལུས་པ་དེ་གང་ཡིན་ནམ།

¹³ དཱ་བིད་ཀྱིས་ཁོ་ཚོའི་བརྒྱུད་ཨ་མ་ས་ལའང་འདི་ལྟར་ལོན་བསྐུར་གསལ། ཁྱོད་ནི་ངའི་གཉེན་མཚན་ཡིན་པས། ད་ནས་བཟུང་ངས་ཁྱོད་ལ་ཡོ་ཨབ་ཀྱི་ཚབ་ཏུ་དམག་སྤྱིར་བསྐོ་རྒྱུ་ཡིན་ཏེ། གལ་སྲིད་ངས་ཁྱོད་ལ་གོ་གནས་དེ་མ་སྤྲད་པ་ཡིན་ན་དཀོན་མཆོག་གིས་ང་ལ་སྲོག་ཐོག་ཏུ་ཉེས་ཆད་གནང་བར་ཤོག

¹⁴ དཱ་བིད་ཀྱིས་གཏམ་གླེང་དེས་ཡ་ཧུ་དཱའི་མི་ཚང་མའི་སེམས་འཁུག་ཅིང་། དེ་ཚོས་ཁོང་ལ་ད་ཁྱེད་རང་ཉིད་ཀྱི་ལས་བྱེད་པ་རྣམས་དང་བཅས་པ་ཕྱིར་ལོག་ཕེབས་དགོས་ཅེས་པའི་འཕྲིན་ཡིག་ཞིག་བཏང་ངོ་།

¹⁵ རྒྱལ་པོ་ཕྱིར་ལོག་ཕེབས་དུས་ཡ་ཧུ་དཱའི་མི་ཚོས་ཁོང་ལ་གཙང་པོ་ཡོར་དན་དུ་མཇལ་འཕྲད་ཞུས་ཤིང་། ཡང་མི་དེ་ཚོ་ནི་རྒྱལ་པོ་གཙང་པོ་བརྒྱུད་དེ་ཕེབས་སྐབས་ཁོང་ལ་ཕེབས་བསུ་ཞུ་ཕྱིར་གྷིལ་གཱལ་དུ་སླེབས་ཡོད་དོ།

¹⁶ སྐབས་དེར་བྷེན་ཡ་མིན་གྱི་རིགས་བརྒྱུད་ནས་ཡིན་པ་མིང་ལ་ཤིམ་ཨི་ཞེས་པའམ་བྷ་ཧུ་རིམ་ནས་ཡིན་པ་གྷེ་རའི་བུ་དེ་རྒྱལ་པོ་དཱ་བིད་དང་མཇལ་འཕྲད་བྱེད་ཕྱིར་བྲེལ་ཚབ་ཆེན་པོའི་ངང་ཡོར་དན་དུ་བསླེབས་སོ།

¹⁷ ཡང་ཁོང་དང་མཉམ་དུ་བྷེན་ཡ་མིན་གྱི་སྡེ་རིགས་ལས་མི་གྲངས་ ༡,༠༠༠ དང་། ས་ཨུལ་གྱི་ནང་མིའི་གཡོག་པོ་ཛི་བྷ་ཞེས་པ་དེའང་རང་གི་བུ་བཅོ་ལྔ་དང་གཡོག་པོ་ཉི་ཤུ་ཐམ་པ་དང་བཅས་རྒྱལ་པོའི་གོང་དུ་ཡོར་དན་ལ་འབྱོར་བ་རེད།

¹⁸ དེ་ནས་རྒྱལ་པོའི་སྐུ་འཁོར་རྣམས་གཙང་པོ་རྒལ་ནས་ཕེབས་སྐབས། དེ་ཚོར་ལམ་འདྲེན་ཞུ་རྒྱུ་དང་རྒྱལ་པོའི་མཁོ་ཆས་དག་སྒྲུབ་པའི་ཕྱིར་དེ་ཚོ་གཙང་པོ་རྒལ་ནས་ཕྱིན་ནོ༎ རྒྱལ་པོ་གཙང་པོ་རྒལ་ནས་ཕེབས་རན་པ་དང་ཤི་མེ་ཡིས་ཁོང་གི་དྲུང་དུ་ཕྱག་བཙལ་ཞིང་རྒྱལ་པོ་ལ།

དཱ་བིད་ཀྱི་ཤིམ་ཨི་ལ་བྱམས་པ་བསྟན་པ།

¹⁹ ཀྱེ་རྒྱལ་པོ་ཆེན་པོ། སྐུ་ཉིད་ཡེ་རུ་ཤ་ལེམ་ནས་ཕེབས་དུས་ངས་དེ་ཉིན་གང་བྱས་པའི་ཉེས་སྡིག་རྣམས་ཀྱི་སྐོར་ཐུགས་དྲན་གསོ་བ་མ་གནང་རོགས་གནང་། དེ་དག་ཁྱེད་ཀྱི་ཐུགས་ལ་རྩ་བ་ནས་བཞག་པ་མ་གནང་རོགས་གནང་།

²⁰ ངས་ཉེས་སྡིག་གང་བྱས་པ་དེ་ངས་ངོས་ལེན་ཞུ་རྒྱུ་ཡིན། དེ་བས་ན་བྱང་ཕྱོགས་སྡེ་རིགས་ཁོངས་ནས་སྐུ་ཉིད་དང་མཇལ་འཕྲད་ཞུ་ཕྱིར་ཡོང་མཁན་སྐྱེ་བོ་དང་པོ་དེ་ནི་ང་རང་ཡིན་ནོ་ཞེས་ཞུས་སོ།

²¹ དེར་ཛེ་རུ་ཡཱའི་བུ་ཨ་བྷི་ཤེས། ཤིམ་ཨི་ལ་ཉེས་པ་སྲོག་ཐོག་ཏུ་གཏོང་དགོས། གང་ལགས་ཟེར་ན། གཙོ་བོ་དཀོན་མཆོག་གིས་འདེམས་བསྐོས་མཛད་པའི་རྒྱལ་པོ་ལ་ཁོས་དམོད་མོ་འདེབས་པས་ཕྱིར་རོ།

²² འོན་ཀྱང་ཨ་བྷི་ཤེ་དང་ཁོའི་སྤུན་ཡོ་ཨབ་ལ་དཱ་བིད་ཀྱིས། ཁྱོད་གཉིས་ལ་གྲོས་འདྲི་མཁན་སུ་འདུག་གམ། ཁྱོད་ཚོས་ངའི་ཐོག་ཏུ་དཀའ་ངལ་འཁྱེར་ཡོང་དགོས་བསམ་གྱི་འདུག་གམ། ད་ནི་ང་ཨིསི་རཱཨེལ་གྱི་རྒྱལ་པོར་འགྱུར་ཡོད་པས། དེ་རིང་ཨིསི་རཱཨེལ་པ་སུའང་ཤི་བར་མི་འགྱུར་རོ་ཞེས་གསུངས་སོ།

²³ ཡང་ཁོང་གིས་ཤི་མི་ལ། ཁྱོད་ཉེས་པ་སྲོག་ཐོག་ཏུ་ཅི་ནས་ཀྱང་འགྲོ་མི་དགོས་ཤེས་ཞལ་བཞེས་གནང་ངོ་༎

དཱ་བིད་ཀྱིས་མེ་ཕི་བྷོ་ཤེད་ལ་བྱམས་པ་བསྟན་པ།

²⁴ ས་ཨུལ་གྱི་ཚ་བོ་མེ་ཕི་བྷོ་ཤེད་ནི་རྒྱལ་པོ་དང་མཇལ་འཕྲད་བྱེད་ཕྱིར་སླེབས་པ་དང་། རྒྱལ་པོ་ཡེ་རུ་ཤ་ལེམ་ནས་ཕེབས་ཏེ་སླར་རྒྱལ་ཁ་ཐོབ་ནས་ཕྱིར་ལོག་མ་ཕེབས་བར་དུ་མེ་ཕི་བྷོ་ཤེད་ཀྱིས་རྐང་པའང་མ་བཀྲུས་པར་ཨ་ར་མ་གཞར་བ་མ་ཟད། ལུས་ཀྱི་གྱོན་གོས་སོགས་ཀྱང་མ་བཀྲུས་པར་གནས་ཡོད་དོ།

²⁵ མེ་ཕི་བྷོ་ཤེད་རྒྱལ་པོ་དང་མཇལ་འཕྲད་བྱེད་ཕྱིར་ཡེ་རུ་ཤ་ལེམ་ནས་འབྱོར་སྐབས། དཱ་བིད་ཀྱིས་ཁོང་ལ། མེ་ཕི་བྷོ་ཤེད་ཁྱོད་རང་ང་དང་མཉམ་དུ་མ་ཡོང་བ་དེ་གང་ཡིན་ནམ་ཞེས་དྲིས་པས།

²⁶ ཁོས་ལན་དུ། ཀྱེ་རྒྱལ་པོ་ཆེན་པོ། ང་ནི་རྐང་པ་སྐྱོན་ཅན་ཡིན་པ་རྒྱལ་པོ་ཁྱེད་ཀྱི་མཁྱེན་གསལ་ཡིན་པ་མ་ཟད། ང་ཁྱེད་དང་མཉམ་དུ་འགྲོ་དགོས་བསམ་ནས་རང་གི་གཡོག་པོ་ལ་བོང་བུར་སྒ་རྒྱབ་རོགས་བྱོས་ཤིག་ཅེས་སྨྲས་ཀྱང་། ཁོས་ང་ལ་གཡོ་བྱུས་བཏང་བྱུང་།

²⁷ ཁོས་མི་དབང་ཆེན་པོར་ངའི་སྐོར་ལ་རྫུན་གཏམ་ཞུས་པ་ཡིན་མོད། འོན་ཀྱང་ཁྱེད་ནི་དཀོན་མཆོག་གི་ཕོ་ཉ་ཞིག་དང་མཚུངས་པས། ཁྱེད་ཀྱི་ཐུགས་ལ་གང་ལེགས་པར་དགོངས་པ་དེ་རང་གནང་བར་མཛོད།

²⁸ ངའི་ཕ་བརྒྱུད་ཐམས་ཅད་ཁྱེད་ཀྱི་ཕྱག་འོག་ཏུ་ཤི་དགོས་པར་འོས་པ་ཡིན་ཀྱང་། ཁྱེད་ཀྱིས་ང་ལ་སྐུ་ཉིད་དང་ལྷན་དུ་གསོལ་ལྕོག་གཅིག་གི་ཁར་བསྡད་ནས་ཁ་ཟས་ཟ་ཆོག་པའི་གོ་སྐབས་གནང་བྱུང་། ད་ངས་རྒྱལ་པོ་ཁྱེད་ལ་དེ་ལས་ལྷག་པའི་བཀའ་དྲིན་ཞིག་གནང་རོགས་གནང་ཞེས་ཞུས་པའི་དབང་ཆ་ང་ལ་མེད།

²⁹ དེའི་ལན་དུ་རྒྱལ་པོས་གསུངས་པ། ད་ཁྱོད་ཀྱིས་དེ་ལས་ལྷག་པ་ཞིག་བཤད་དགོས་དོན་གང་ཡང་མི་འདུག ད་ཁྱོད་དང་ཛི་བྷ་གཉིས་ཀྱིས་ས་ཨུལ་གྱི་རྒྱུ་དངོས་རྣམས་ཆ་བགོས་རྒྱབ་ནས་བདག་འཛིན་བྱེད་དགོས་ཤེས་ངས་ཐག་བཅད་བྱས་ཟིན་པ་ཡིན།

³⁰ ལན་དུ་མེ་ཕི་བྷོ་ཤེད་ཀྱིས། རྒྱུ་དངོས་ཚང་མ་ཟི་བྷས་འཁྱེར་ནའང་ཆོག རྒྱལ་པོ་ཁྱེད་ཉིད་སྐུ་ལ་བར་ཆད་མེད་པར་ཁམས་བཟང་ཐོག་ཕྱིར་ལོག་ཕེབས་ཐུབ་པ་དེ་གས་ང་ལ་སྒྲིག་སོང་ཞེས་ཞུས་སོ༎

དཱ་བིད་ཀྱིས་བྷར་ཛི་ལའི་ལ་བྱམས་པ་བསྟན་པ།

³¹ གྷིལ་ཨད་ཡུལ་གྱི་ས་གནས་རོ་གེ་ལིམ་ནས་བྷར་ཛི་ལའི་ཀྱང་རྒྱལ་པོ་ལ་ཡོར་དན་ནས་ལམ་འདྲེན་ཞུ་ཕྱིར་སླེབས་ཤིང་།

³² བྷར་ཛི་ལའི་ནི་རང་ལོ་བརྒྱད་བཅུ་བསླེབས་པའི་མི་རྒན་ཞིག་ཡིན་པ་དང་། ཁོ་ནི་ཧ་ཅང་རྒྱུ་ནོར་ལོངས་སྤྱོད་ལྡན་པ་ཞིག་ཡིན་པས། དེ་སྔ་རྒྱལ་པོ་མ་ཧ་ནེམ་དུ་བཞུགས་སྐབས་ཁོས་རྒྱལ་པོའི་གསོལ་ཆས་སོགས་འབུལ་གྱི་ཡོད་དོ།

³³ རྒྱལ་པོས་ཁོ་ལ། ཁྱོད་ང་དང་མཉམ་དུ་ཡེ་རུ་ཤ་ལེམ་ལ་ཤོག་ཅིག་ངས་ཁྱོད་ལ་བལྟ་རྟོགས་ཆ་ཚང་བྱེད་ཀྱི་ཡིན་ཞེས་གསུངས་པས།

³⁴ དེའི་ལན་དུ་བྷར་ཛི་ལའི་གྱིས། ད་ང་ནི་རྒྱུན་རིང་པོར་གསོན་མི་ཡོང་། ང་ནི་མི་དབང་ཆེན་པོ་ཁྱད་དང་ལྷན་དུ་ཡེ་རུ་ཤ་ལེམ་ལ་བཅར་ནས་ཅི་ཞིག་བྱ།

³⁵ ང་ནི་རིང་ལོ་བརྒྱད་ཅུར་ལོན་ཟིན་པས། གནས་ཚུལ་གང་འདྲ་ཞིག་གིས་ཀྱང་ང་ལ་དགའ་འཚོར་སྦྱིན་མི་ཐུབ། བཟའ་བཏུང་གང་འདྲ་ཞིག་ལའང་བྲོ་བ་འཚོར་མི་ཐུབ་པ་མ་ཟད། གླུ་གཞས་བཏང་བ་སོགས་ཀྱང་གོ་ཐོས་བྱེད་མི་ཐུབ། དེ་བས་ན་ང་ནི་སྐུ་ཉིད་ཀྱི་ཁར་དཀའ་ངལ་གྱི་རྒྱུ་ཞིག་ཏུ་འགྱུར་རྒྱུ་ཡིན་པ་མ་ཟད།

³⁶ ང་ནི་དེ་ལྟ་བུའི་བྱ་དགའ་ཆེན་པོ་ཐོབ་འོས་པ་ཞིག་མ་ཡིན་ནོ། དེ་བས་ན་ང་ནི་ཁྱེད་དང་ལྷན་དུ་ཡོར་དན་རྒལ་ཏེ་ས་ཐག་ཐུང་ངུ་ཙམ་ཞིག་འགྲོ་ཆོག་པ་དང་།

³⁷ དེ་རྗེས་སོ་སོའི་ཁང་ཁྱིམ་དུ་ཕྱིར་ལོག་བྱེད་དེ། རང་གི་ཕ་མའི་དུར་ཁང་དང་ཉེ་བར་ཕྱིན་ནས་ཤི་ཆོག་པའི་དགོངས་ཁྲོལ་གནང་དུ་གསོལ། ངའི་བུ་ཀིམ་ཧམ་དེ་འདིར་ཁྱེད་ཀྱི་དྲུང་དུ་འཁྲིད་ཡོད་པས། ཁོས་རྒྱལ་པོ་ཁྱེད་ཀྱི་སྲི་ཞུ་ཞབས་ཏོག་ཞུ་ཕྱིར་ཁོ་ལ་སྐུ་ཉིད་དང་ལྷན་དུ་འཁྲིད་ཕེབས་ཏེ། ཁྱེད་ཀྱི་ཐུགས་ལ་གང་ལེགས་པར་དགོངས་པ་དེ་རང་གནང་བར་མཛོད་ཅེས་ཞུས་པ་དང་།

³⁸ དེར་རྒྱལ་པོས་ལན་དུ། ངས་ཁོ་འཁྲིད་ནས་ཁྱོད་ཀྱིས་གང་འདོད་པ་བཞིན་དུ་བྱེད་རྒྱུ་ཡིན། ཁྱོད་ཀྱིས་གང་དགོས་པ་དེ་བཞིན་ངས་བྱེད་རྒྱུ་ཡིན་ཞེས་གསུངས་སོ།

³⁹ དེ་རྗེས་དཱ་བིད་རང་གི་མི་ཚོགས་དང་བཅས་པ་ཡོར་དན་རྒལ་བ་དང་། ཁོང་གིས་བྷར་ཛི་ལ་ཡེ་ལ་འོ་བྱེད་ནས་བྱིན་རླབས་གནང་ངོ་། ཡང་བྷར་ཛི་ལ་ཡེ་ཀྱང་རང་གི་ཁང་ཁྱིམ་དུ་ཕྱིར་ལོག་བྱས་སོ༎

རྒྱལ་པོའི་སྐོར་ལ་ཡ་ཧུ་དཱ་དང་ཨིསི་རཱཨེལ་པ་ཚོས་རྩོད་གླེང་བྱེད་པ།

⁴⁰ ཡ་ཧུ་དཱའི་མི་ཚོགས་ཀུན་དང་ཨིསི་རཱཨེལ་པའི་མི་ཚོགས་ཕྱེད་ཀས་རྒྱལ་པོར་ལམ་འདྲེན་ཞུས་པས། ཁོང་གཙང་པོ་རྒལ་ཏེ་གྷིལ་གཱལ་དུ་ཕེབས་སྐབས། ཁོང་དང་ལྷན་དུ་ཀིམ་ཧམ་ཡང་ཡོད་པ་ཡིན་ནོ།

⁴¹ དེ་ནས་ཨིསི་རཱཨེལ་པ་ཚང་མས་རྒྱལ་པོའི་དྲུང་དུ་བཅར་ནས་ཞུས་པ། ཀྱེ་རྒྱལ་པོ་ཆེན་པོ། ང་ཚོའི་སྤུན་ཟླ་ཡ་ཧུ་དཱ་པ་ཚོས་སྐུ་ཉིད་དང་། ཉིད་ཀྱི་སྐུ་འཁོར་རྣམས་དང་། ཉིད་ཀྱི་མི་འབངས་རྣམས་ལ་ལམ་འདྲེན་ཞུས་ཏེ་ཡོར་དན་རྒལ་ནས་འཁྲིད་ཡོང་ཆོག་པའི་དབང་ཆ་དེ་ཁོ་ཚོ་གཅིག་པོར་ཡོད་ཅེས་ཇི་ལྟར་བསམ་པ་ཡིན་ནམ་ཞེས་ཞུས་པས།

⁴² ཡ་ཧུ་དཱའི་མི་རྣམས་ཀྱིས། རྒྱལ་པོ་ནི་ང་ཚོའི་ཁོངས་ནས་སྐྱེ་བོ་གཅིག་པ་ཡིན་པས། ང་ཚོས་ཁོང་ལ་ལམ་འདྲེན་ཞུས་པ་ཡིན་ན། དེར་ཁྱོད་ཚོས་ཁྲོ་བ་བྱེད་དགོས་དོན་གང་ཡང་མེད། དེ་ལྟར་བྱེད་པར་རྒྱལ་པོས་ང་ཚོ་ལ་ཁ་ཟས་དང་བྱ་དགའ་སོགས་གང་ཡང་གནང་མེད་ཅེས་སྨྲས་པ་དང་།

⁴³ དེའི་ལན་དུ་ཨིསི་རཱཨེལ་པ་ཚོས། ཁོང་ནི་ཁྱོད་ཚོའི་ཁོངས་ནས་གཅིག་པ་ཡིན་ནའང་། རྒྱལ་པོ་དཱ་བིད་ཀྱི་ཐོག་ཏུ་ཁྱོད་ཚོ་ལས་བཅུ་ལྡབ་ཀྱིས་དབང་ཆ་མང་བ་ང་ཚོར་ཡོད། དེ་བས་ན་ཁྱོད་ཚོས་ང་ཚོ་ལ་མཐོང་ཆུང་བྱེད་མི་དགོས། དེ་ཙམ་མ་ཟད་རྒྱལ་པོ་གདན་ཞུ་བྱེད་ཆོག་སྐོར་གྱི་གྲོས་གླེང་བྱེད་མཁན་དང་པོ་དེ་ང་ཚོ་ཡིན་པས། དེ་ནི་ཁྱོད་ཚོས་མ་རྗེད་པར་གྱིས་ཤིག་ཅེས་སྨྲས་ཀྱང་། རྒྱལ་པོ་སུ་ལ་དག་ཆོག་སྐོར་གྱི་རྩོད་གླེང་བྱེད་དུས་ནི་ཨིསི་རཱཨེལ་པ་རྣམས་ལས་ཡ་ཧུ་དཱའི་མི་རྣམས་ཀྱིས་ཁྲོ་སེམས་ཆེན་པོས་རྩོད་གཏམ་བྱས་སོ༎