ཤ་མུ་ཨེལ་གཉིས་པ། 18 - Tibetan Old Testament 2011

ཨབ་ས་ལོམ་འཕམ་པ་དང་བསད་པ།

¹ རྒྱལ་པོ་དཱ་བིད་ཀྱིས་རང་གི་མི་ཚང་མར་ཕྱོགས་གཅིག་ཏུ་བཀོང་ནས། དེ་ཚོར་ ༡, ༠༠༠ དང་ ༡༠༠ རེ་རེའི་ཚོགས་ཁག་བཟོས་ཏེ། ཚོགས་ཁག་དེ་ཚོའི་ཁར་དམག་དཔོན་རྣམས་བསྐོ་གཞག་བྱས་སོ།

² དེ་རྗེས་དམག་མི་དེ་ཚོ་སྡེ་ཁག་གསུམ་ལ་ཆ་བགོས་བྱས་ནས། ཡོ་ཨབ་དང་ཁོའི་སྤུན་ཨ་བྷི་ཤེ་དང་གྷད་ནས་ཡིན་པའི་ཨི་ཏེ་བཅས་སྡེ་ཁག་དེ་ཚོར་འགོ་དཔོན་དུ་བསྐོས་ཏེ། རྒྱལ་པོས་རང་གི་དམག་མི་རྣམས་ལ། ང་རང་ཉིད་ཁྱོད་ཚོ་དང་མཉམ་དུ་འགྲོ་གི་ཡིན་ཞེས་གསུངས་པ་རེད།

³ དེའི་ལན་དུ་ཁོ་ཚོས། ཁྱེད་རང་ང་ཚོ་དང་མཉམ་དུ་ཕེབས་མི་དགོས། གལ་ཏེ་ང་ཚོ་ཕྱི་ནུར་རྒྱབ་ཏེ་བྲོས་དགོས་བྱུང་ནའང་། ཡང་ན་ང་ཚོའི་དམག་ཚོགས་ཕྱེད་ཀ་ཙམ་བསད་པ་ཡིན་ནའང་། དེས་དགྲ་བོ་ལ་ཁྱད་པར་གང་ཡང་འབྱུང་མི་ཡོང་། འོན་ཀྱང་ཁྱེད་ནི་དམག་མི་ཁྲི་ཚོགས་དང་མཚུངས་པ་ཡིན་པས། ཁྱེད་གྲོང་ཁྱེར་རང་དུ་བཞུགས་ནས་ང་ཚོ་ལ་དཔུང་གྲོགས་གནང་ན་ལེགས་པ་འདུག་ཅེས་ཞུས་སོ།

⁴ དེ་ནས་རྒྱལ་པོས་དེ་ཚོ་ལ། ཁྱོད་ཚོའི་སེམས་ལ་གང་ལེགས་པ་དེ་རང་ངས་བྱའོ་ཞེས་གསུངས་ཏེ། ཁོང་རྒྱལ་སྒོའི་འགྲམ་དུ་བཞེངས་ནས་བཞུགས་པ་དང་། དམག་མི་རྣམས་སྟོང་ཕྲག་རེ་དང་བརྒྱ་ཕྲག་རེ་རེའི་ཚོགས་ཁག་བྱས་ཏེ། དེ་ནས་ཕྱིར་ཐོན་ནོ།

⁵ དེ་ནས་ཁོང་གིས་ཡོ་ཨབ་དང་ཨ་བྷི་ཤེ་དང་ཨི་ཏེ་ལ་བཀའ་བཀོད་གནང་གསལ། ཁྱོད་ཚོས་ངའི་ངོ་ལ་བསྟན་ནས་གཞོན་ནུ་ཨབ་ས་ལོམ་ལ་གནོད་འཚེ་མ་བྱེད་ཅིག དཱ་བིད་ཀྱོས་རང་གི་དམག་དཔོན་རྣམས་ལ་དེ་བཞིན་བཀའ་བསྒོས་གནང་བ་དམག་མི་ཚང་མས་ཐོས་སོ།

⁶ དཱ་བིད་ཀྱི་དམག་མི་རྣམས་གྲོང་གསེབ་ཀྱི་ཕྱོགས་སུ་ཐོན་ཏེ། ཨེཕ་ར་ཡིམ་གྱི་ཤིང་ནགས་སུ་ཨིསི་རཱཨེལ་པ་རྣམས་དང་འཐབ་རྒོལ་བྱུང་ཞིང་།

⁷ དཱ་བིད་ཀྱི་དམག་མིས་ཨིསི་རཱཨེལ་པ་རྣམས་འཕམ་པར་བྱས་སོ། དེ་ཉིན་དམག་འཁྲུགས་ཤུགས་ཆེན་པོ་བྱུང་བའི་རྐྱེན་གྱིས་ཨིསི་རཱཨེལ་པ་ ༢༠,༠༠༠ ཙམ་ལ་སྲོག་སྐྱོན་བྱུང་ཞིང་།

⁸ དམག་འཁྲུགས་དེ་ནི་གྲོང་གསེབ་ཁུལ་དུ་ཁྱབ་འཕེལ་ཕྱིན་ཏེ། དམག་སར་བསད་པ་ལས་ཀྱང་ཤིང་ནགས་ཁུལ་དུ་མི་མང་བ་ཤི་དགོས་བྱུང་ངོ་།

⁹ ཨབ་ས་ལོམ་གྱིས་དཱ་བིད་ཀྱི་མི་འགའ་ཤས་ལ་བློ་བུར་དུ་འཕྲད་པ་དང་། སྐབས་དེར་ཨབ་ས་ལོམ་ནི་དྲེལ་ཞིག་གི་ཁར་ཞོན་ཡོད་པས། དྲེའུ་དེ་བེ་ཤིང་ཆེན་པོ་ཞིག་གི་འོག་ནས་འགྲོ་དུས་ཨབ་ས་ལོམ་གྱི་མགོའི་སྐྲ་དེ་ཤིང་དེའི་ཡལ་གར་འཁོན་པ་དང་། དྲེལ་དེ་ནི་རྒྱུགས་ཕྱིན་པས། ཨབ་ས་ལོམ་ཤིང་གི་ཡལ་གར་འཁོན་ནས་གནམ་ལ་འཕྱར་ཞིང་ལུས་སོ།

¹⁰ དཱ་བིད་ཀྱི་མི་ཞིག་གིས་ཁོང་མཐོང་ནས་ཡོ་ཨབ་ལ། ངས་ཨབ་ས་ལོམ་ལ་བེ་ཤིང་ཞིག་གི་ཁར་འཁོན་ནས་བསྡད་ཡོད་པ་མཐོང་བྱུང་ཞེས་ཞུས་པ་དང་།

¹¹ དེའི་ལན་དུ་ཡོ་ཨབ་ཀྱིས། ཁྱོད་ཀྱིས་ཁོ་མཐོང་བ་ཡིན་ན། དེ་ཀ་རང་དུ་ཁོ་མ་བསད་པ་གང་ཡིན་ནམ། ངས་རང་ཉིད་ཀྱི་ཕྱོགས་ནས་ཁྱོད་ལ་དངུལ་དུམ་བུ་བཅུ་དང་དམག་མིའི་སྐེ་རགས་གཅིག་སྤྲད་པ་ཡོད་ཅེས་སྨྲས་སོ།

¹² འོན་ཀྱང་མི་དེས་ཡོ་ཨབ་ལ། ཁྱེད་ཀྱིས་ང་ལ་དངུལ་དུམ་བུ་ ༡,༠༠༠ གཅིག་སྤྲད་པ་ཡིན་ནའང་། ངས་རྒྱལ་པོའི་སྲས་ཀྱི་ཕྱོགས་སུ་མཛུབ་མོ་ཙམ་ཡང་འདེགས་པར་མི་བྱེད། རྒྱལ་པོས། ངའི་ངོ་ལ་བསྟན་ནས་གཞོན་ནུ་ཨབ་ས་ལོམ་ལ་གནོད་འཚེ་གང་ཡང་མ་བྱེད་ཅིག་ཅེས་ཁྱེད་དང་ཨ་བྷི་ཤེ་དང་ཨི་ཏེ་བཅས་ལ་བཀའ་གནང་བ་དེ་ང་ཚོ་ཚང་མས་ཐོས་ཡོད།

¹³ གལ་ཏེ་ངས་རྒྱལ་པོའི་བཀའ་ལ་མ་ཉན་པར་ཨབ་ས་ལོམ་བསད་པ་ཡིན་ནའང་། རྒྱལ་པོའི་དེའི་སྐོར་གྱི་གནས་ཚུལ་མ་ཐོས་པ་དང་ཡང་སྐབས་དེར་ཁྱེད་ཀྱིས་ང་ལ་སྲུང་སྐྱོབས་གནང་ཐུབ་པ་མེད།

¹⁴ དེ་ནས་ཡོ་ཨབ་ཀྱིས། ད་ངས་ཁྱོད་དང་མཉམ་དུ་དོན་མེད་གླེང་མོལ་བྱེད་དེ་དུས་ཚོད་འཕྲོ་བརླག་གཏོང་གི་མིན་ཞེས་སྨྲས་སོ། དེ་ནས་ཁོང་གིས་མདུང་གསུམ་བླངས་ནས། གསོན་པོར་བེ་ཤིང་ཁར་འཁོན་ཡོད་པའི་ཨབ་ས་ལོམ་གྱི་བྲང་ལ་བཙུགས་པ་དང་།

¹⁵ ཡོ་ཨབ་ཀྱི་དམག་མི་བཅུས་ཨབ་ས་ལོམ་དང་ཉེ་བར་སླེབས་ནས་ཁོ་བསད་དོ།

¹⁶ དེ་ནས་ཡོ་ཨབ་ཀྱི་དམག་འཐབ་འཚམས་འཇོགས་བྱེད་ཕྱིར་དམག་དུང་འབུད་དགོས་པའི་བཀའ་གནང་བ་དང་། ཁོང་གི་དམག་མི་ཚོས་ཨིསི་རཱཨེལ་པ་རྣམས་ཕྱིར་སྐྲོད་བྱས་རྒྱུ་བཞག་ནས་ཕྱིར་ལོག་ཡོང་ངོ་།

¹⁷ དེ་ཚོས་ཨབ་ས་ལོམ་གྱི་ཕུང་པོ་དེ་མར་སྤབ་ནས་ཤིང་ནགས་སུ་ས་དོང་གཏིང་རིང་ཞིག་གི་ནང་དུ་དབྱུགས་ཏེ། དེའི་ཁར་རྡོ་མང་པོས་བཀབ་ནས་བཞག་གོ། ཨིསི་རཱཨེལ་པ་ཚང་མ་བྲོས་ཏེ་རང་རང་སོ་སོའི་ནང་དུ་ལོག་ཕྱིན་ནོ།

¹⁸ རང་ཉིད་གསོན་པོར་ཡོད་དུས་ཨབ་ཤ་ལོམ་གྱིས་རྒྱལ་པོའི་ལུང་གཤོང་དུ་རང་གི་དྲན་རྟེན་ཞིག་བཟོས་ཡོད་དོ། གང་ལགས་ཟེར་ན། མ་འོངས་པར་རང་གི་མིང་བཤུལ་འཛིན་མཁན་བུ་གཅིག་ཀྱང་མེད་པས་ཕྱིར་རོ། ཁོང་གིས་དྲན་རྟེན་དེ་ནི་སོ་སོའི་མིང་ཐོག་རང་དུ་བཞག་ཡོད་པས། དེ་རིང་གི་བར་དུའང་གནས་དེའི་མིང་ལ་ཨབ་ཤ་ལོམ་གྱི་དྲན་རྟེན་ཞེས་བརྗོད་ཀྱི་ཡོད་པ་ཡིན་ནོ༎

དཱ་བིད་ལ་ཨབ་ས་ལོམ་ཤི་བའི་སྐོར་བཤད་པ།

¹⁹ དེ་ནས་ཛ་དཱོག་གི་བུ་ཨ་ཧི་མཱ་སེས་ཡོ་ཨབ་ལ། གཙོ་བོ་དཀོན་མཆོག་གིས་རྒྱལ་པོ་ལ་རང་གི་དགྲ་བོ་རྣམས་ལས་སྐྱབས་གནང་མཛད་ཡོད་ཅེས་པའི་འཕྲིན་བཟང་དེ་སྙན་མགྲོན་ཞུ་ཕྱིར། རྒྱལ་པོའི་དྲུང་དུ་ང་རྒྱུག་ནས་འགྲོ་ཆོག་པའི་བཀའ་གནང་བར་མཛོད་ཞུས་པ་དང་།

²⁰ ཡོ་ཨབ་ཀྱིས། དེ་རིང་ཁྱོད་ཀྱིས་འཕྲིན་བཟང་གང་འདྲ་ཞིག་ཀྱང་འཁྱེར་མི་དགོས། ཉིན་ཞག་རྗེས་མར་འཕྲིན་བཟང་དེ་བསྐྱལ་ནའང་ཆོག འོན་ཀྱང་དེ་རིང་ཁྱོད་ཀྱིས་དེ་ལྟར་མ་བྱེད་ཅིག གང་ལགས་ཟེར་ན། དེ་རིང་རྒྱལ་སྲས་གྲོངས་ཡོད་པའི་ཕྱིར་རོ་ཞེས་སྨྲས་སོ།

²¹ དེ་ནས་ཁོང་གིས་ཨི་ཐི་ཨོ་པི་ཡ་ཡུལ་ནས་ཡིན་པའི་རང་གི་བྲན་གཡོག་ཅིག་ལ། ད་ཁྱོད་ཀྱིས་གང་མཐོང་བ་དེ་རྒྱལ་པོ་ལ་ཞུས་ཤིག་ཅེས་གསུངས་པ་དང་། བྲན་གཡོག་དེ་མགོ་བོ་སྒུར་ཏེ་རྒྱུག་ཅིང་ཐོན་ཕྱིན་ནས།

²² ཨ་ཧི་མའ་སིས་ཡང་སྐྱར་ཨུ་ཚུགས་བྱེད་དེ་སྨྲས་པ། གནས་ཚུལ་བཟང་ངན་གང་བྱུང་ནའང་ངས་འཕྲིན་དེ་འཁྱེར་ནས་འགྲོ་གི་ཡིན། དེར་ཡོ་ཨབ་ཀྱིས། ཀྱེ་ངའི་བུ། ཁྱོད་ཀྱིས་དེ་ལྟར་བྱེད་འདོད་བྱེད་དགོས་པ་དེ་གང་ཡིན་ནམ། དེར་ཁྱོད་ལ་བྱ་དགའ་སོགས་ནི་གང་ཡང་ཐོབ་མི་ཡོང་ཞེས་སྨྲས་ཀྱང་།

²³ ཨ་ཧི་མཱསིས། སླར་ཡང་སྨྲས་པ། གནས་ཚུལ་བཟང་ངན་གང་འདྲ་ཞིག་བྱུང་རུང་ང་ནི་ངེས་པར་དུ་འགྲོ་གི་ཡིན། འོ་ན་སོང་ཞིག་ཅེས་ཡོ་ཨབ་ཀྱིས་སྨྲས་པ་དང་། ཨ་ཧི་མཱསི་ཡོར་དན་ལུང་གཤོང་བརྒྱུད་དེ་ལམ་ཐུར་དུ་མར་རྒྱུག་སྟེ། མྱུར་བར་བྲན་གཡོག་དེའི་སྔོན་དུ་ཕྱིན་ནོ།

²⁴ ཡང་དཱ་བིད་ནི་གྲོང་ཁྱེར་གྱི་རྒྱལ་སྒོ་ཕྱི་ནང་གཉིས་ཀྱི་བར་ལ་བཞུགས་ཡོད་པ་དང་། ས་སྲུང་པ་དེ་ལྕགས་རིའི་རྩེ་མོར་འཛེགས་ཏེ་རྒྱལ་སྒོའི་ཐོག་ཀར་ལང་ནས་བལྟས་པས། ཁོས་མི་ཞིག་རྒྱུག་ནས་ཡོང་བཞིན་པ་མཐོང་བ་དང་།

²⁵ ཁོས་དེའི་སྐོར་སྐད་ཤུགས་ཆེན་པོས་རྒྱལ་པོ་ལ་ཞུས་པས། རྒྱལ་པོས། གལ་ཏེ་མི་གཅིག་རང་ཡིན་ན་དེས་འཕྲིན་བཟང་པོ་ཞིག་འཁྱེར་ཡོང་བ་ཡིན་ཞེས་གསུངས་སོ། དེ་ནས་བང་ཆེན་དེ་ཐག་ཉེ་བར་སླེབས་པ་དང་།

²⁶ ས་སྲུང་པ་དེས་མི་གཞན་ཞིག་ཀྱང་རྒྱུག་ནས་ཡོང་བཞིན་པ་མཐོང་བས། སྐད་ཤུགས་ཆེན་པོས་སྒོ་སྲུང་པ་ལ། ལྟོས་ཤིག་མི་གཞན་ཞིག་ཀྱང་རྒྱུག་ནས་ཡོང་གི་འདུག་ཅེས་སྨྲས་པ་དང་། ལན་དུ་རྒྱལ་པོས། མི་འདིས་ཀྱང་འཕྲིན་བཟང་པོ་ཞིག་འཁྱེར་ཡོང་ཡོད་ཅེས་གསུངས་སོ།

²⁷ ས་སྲུང་པ་དེས། སྔོན་ལ་ཡོང་མཁན་དེའི་རྒྱུག་སྟངས་ལ་བལྟས་ན་ཁོ་ནི་ཨ་ཧི་མཱསི་དང་འདྲ་པོ་འདུག་ཅེས་སྨྲས་པས། ཡང་རྒྱལ་པོས་ལན་དུ། སྐྱེ་བོ་དེ་ནི་མི་བཟང་པོ་ཞིག་ཡིན་པས། དེས་འཕྲིན་བཟང་པོ་ཞིག་འཁྱེར་ཡོད་ཅེས་གསུངས་སོ།

²⁸ ཡང་ཨ་ཧི་མ་སིས་སྐད་ཤུགས་ཆེན་པོས་རྒྱལ་པོ་ལ་འཚམས་འདྲི་ཞུས་ཏེ། ཁོང་ལ་ཕྱག་འཚལ་ཞིང་། གཙོ་བོ་དཀོན་མཆོག་ཉིད་ཀྱི་དཀོན་མཆོག་ལ་བསྟོད་བསྔགས་འབུལ་དགོས། གང་ལགས་ཟེར་ན། རྒྱལ་པོ་ཁྱེད་ལ་ངོ་རྒོལ་ཞུ་མཁན་ཚོའི་ཐོག་ཏུ་ཁོང་གིས་ཁྱེད་ལ་རྒྱལ་ཁ་གནང་ཡོད་པ་ཡིན་ནོ།

²⁹ དེར་རྒྱལ་པོས། གཞོན་ནུ་ཨབ་ས་ལོམ་ཁམས་བཟང་ཡོད་དམ་ཞེས་བཀའ་འདྲི་གནང་བར། ཨ་ཧི་མཱ་སིས། ཀྱེ་རྒྱལ་པོ་ཆེན་པོ། ཉིད་ཀྱི་དམག་དཔོན་ཡོ་ཨབ་ཀྱིས་ང་ལ་འདིར་གཏོང་བ་གནང་དུས། ངས་སྐད་ཅོར་ཟང་ཟིང་ཆེན་པོ་ཞིག་མཐོང་བྱུང་བས། འོན་ཀྱང་དེའི་རྒྱུ་རྐྱེན་གང་ཡིན་པ་ནི་ངས་གསལ་པོར་ཤེས་རྟོགས་བྱེད་ཐུབ་མ་སོང་ཞེས་ཞུས་པ་དང་།

³⁰ རྒྱལ་པོས་ཁོ་ལ་དེར་ལང་ནས་སྡོད་ཅིག་ཅེས་གསུངས་བ་བཞིན། ཁོ་ཕྱིན་ནས་ཕྱོགས་གཅིག་ལ་ལངས་ནས་བསྡད་དོ།

³¹ དེ་ནས་ཨི་ཐི་ཨོ་པི་ཡ་ནས་ཡིན་པའི་བྲན་གཡོག་དེ་སླེབས་ནས། རྒྱལ་པོ་ལ། ཀྱེ་མི་དབང་ཆེན་པོ། ངས་ཁྱེད་ལ་ལོན་བཟང་པོ་ཞིག་འཁྱེར་ཡོད། ཁྱེད་ལ་ངོ་རྒོལ་ཞུ་མཁན་ཚང་མའི་ཐོག་ཏུ་གཙོ་བོ་དཀོན་མཆོག་གིས་ཁྱེད་ལ་རྒྱལ་ཁ་གནང་ཡོད་དོ།

³² རྒྱལ་པོས། གཞོན་ནུ་ཨབ་ས་ལོམ་དེ་ཁམས་བཟང་འདུག་གམ་ཞེས་འདྲི་རྩད་གནང་བས། ལན་དུ་བྲན་གཡོག་དེས། ཁོང་ལ་གང་བྱུང་བ་དེ་བཞིན་རྒྱལ་པོ་ཁྱེད་ཀྱི་དགྲ་བོ་རྣམས་དང་ཁྱེད་ལ་ངོ་རྒོལ་ཞུ་མཁན་ཚང་མའི་ཐོག་ཏུ་བྱུང་བ་ཡིན་ན་སྒྲིག་པ་ཡོད་ཅེས་ཞུས་སོ།

³³ རྒྱལ་པོ་ཤིན་ཏུ་ཐུགས་འཁྲུགས་ཏེ། རྒྱལ་སྒོའི་སྟེང་གི་གཟིམ་ཆུང་དུ་ཕེབས་ནས་སྤྱན་ཆབ་བསིལ་ཞིང་། ཀྱེ་ངའི་བུ། ངའི་བུ་ཨབ་ས་ལོམ། ངའི་བུ་ཨབ་ས་ལོམ། ཁྱོད་ཀྱི་ཚབ་ཏུ་ང་རང་ཤི་བ་ཡིན་ནའང་སྒྲིག། ཀྱེ་ངའི་བུ། ངའི་བུ་ཨབ་ས་ལོམ་ཞེས་གསུངས་ཤིང་མྱ་ངན་ཆེན་པོ་གནང་ངོ་༎