ཤ་མུ་ཨེལ་གཉིས་པ། 16 - Tibetan Old Testament 2011

དཱ་བིད་དང་ཛི་བྷ།

¹ དཱ་བིད་རི་རྩེ་ནས་ཅུང་ཟད་ཕར་ཙམ་ཞིག་མར་འབབ་པ་དང་། མེ་ཕི་བྷོ་ཤེད་ཀྱི་གཡོག་པོ་ཛི་བྷ་དང་འཕྲད་དེ། ཡང་ཁོ་དང་མཉམ་དུ་བག་ལེབ་ ༢༠༠ དང་། རྒུན་འབྲུམ་གྱི་ཆག་པ་ ༡༠༠ དང་ཤིང་འབྲས་སོས་པའི་ཆག་པ་ ༡༠༠ ་དང་། རྒུན་ཆང་གི་རྐྱལ་པ་བཅས་བོང་བུ་གཉིས་ལ་བཀལ་ནས་འཁྱེར་ཡོང་ངོ་།

² རྒྱལ་པོ་དཱ་བིད་ཀྱི་ཁོ་ལ། འདི་ཚོ་ཚང་མ་ཁྱོད་ཀྱིས་ག་རེ་དོན་དུ་འཁྱེར་ཡོང་བ་ཡིན་ནམ་ཞེས་བཀའ་འདྲི་གནང་བ་དང་། ཛི་བྷས་ལན་དུ། བོང་བུ་འདི་ཚོ་ནི་རྒྱལ་པོའི་ནང་མི་རྣམས་ཀྱི་ཆེད་དུ་ཡིན་པ་དང་། བག་ལེབ་དང་ཤིང་འབྲས་རྣམས་ནི་མི་ཚོའི་ཁ་ཟས་དང་རྒུན་ཆང་འདི་ནི་ཁོ་ཚོ་འབྲོག་སྟོང་དུ་ཐང་ཆད་ནས་བསྡད་སྐབས་འཐུང་བའི་ཆེད་དུ་ཡིན་ནོ་ཞེས་སྨྲས་སོ།

³ རྒྱལ་པོས། ཁྱོད་ཀྱི་སྦྱིན་བདག་ས་ཨུལ་གྱི་ཚ་བོ་མེ་ཕི་བྷོ་ཤེད་དེ་གང་དུ་ཡོད་ཅེས་གསུངས་པ་དང་། ཛི་བྷས་ལན་དུ། ཁོང་ནི་ཡེ་རུ་ཤ་ལེམ་དུ་བཞུགས་ཡོད། ཨིསི་རཱཨེལ་པ་ཚོས་ཁོང་གི་པོ་བོ་ས་ཨུལ་གྱི་རྒྱལ་སྲིད་དེ་ཁོང་ལ་ཕྱིར་ལོག་སྤྲད་ཡོང་བསམ་ནས་བློ་གཏད་བྱེད་བཞིན་འདུག་ཞུས་པ་དང་།

⁴ རྒྱལ་པོས་ཛི་བྷ་ལ། མེ་ཕི་བྷོ་ཤེད་ལ་གང་ཡོད་པ་ཚང་མ་ཁྱོད་ཀྱི་ཡིན་ཞེས་གསུངས་པ་དང་། ཛི་བྷས་ལན་དུ། ང་ནི་རྒྱལ་པོ་ཁྱེད་ཀྱི་བྲན་གཡོག་ཡིན། ངས་དུས་ཀུན་ཏུ་རྒྱལ་པོ་ཐུགས་མཉེས་པའི་ཞབས་ཕྱི་ཞུ་ཐུབ་པར་ཤོག་ཅེས་ཞུས་སོ།

དཱ་བིད་དང་ཤིམ་ཨི།

⁵ དེ་ནས་རྒྱལ་པོ་དཱ་བིད་བྷ་ཧུ་རིམ་དུ་འབྱོར་བ་དང་། དེར་ས་ཨུལ་གྱི་ནང་མིའི་ཁོངས་ནས་གྷེ་རའི་བུ་ཤིམ་ཨི་ཟེར་བ་དེས་ཁོང་ལ་དམོད་པ་འདེབས་ཤིང་དེར་སླེབས་སོ།

⁶ དཱ་བིད་ནི་རང་གི་དམག་མི་རྣམས་དང་སྐུ་སྲུང་པ་ཚོས་མཐའ་བསྐོར་ནས་ཡོད་རུང་། ཤིམ་ཨིས་དཱ་བིད་དང་ལས་བྱེད་པ་རྣམས་ལ་རྡོ་བཞུས་སོ།

⁷ ཁོས་ཁོང་ལ་དམོད་པ་འདེབས་ཤིང་སྨྲས་པ། ཁྱོད་སྲོག་གཅོད་པ་ཁྲིམས་འགལ་ནག་ཉེས་ཅན། ཁྱོད་འདི་ནས་ཕར་སོང་ཞིག།

⁸ ཁྱོད་ཀྱིས་ས་ཨུལ་གྱི་རྒྱལ་སྲིད་འཕྲོག་བཅོམ་བྱས་ཤིང་། ཁོང་གི་ནང་མི་མང་པོ་བསད་པའི་རྐྱེན་གྱིས། ད་ལྟ་གཙོ་བོ་དཀོན་མཆོག་གིས་ཁྱོད་ལ་ཉེས་ཆད་གནང་བཞིན་པ་ཡིན། གཙོ་བོ་དཀོན་མཆོག་གིས་ཁྱོད་ཀྱི་རྒྱལ་སྲིད་དེ་ཁྱོད་རའི་བུ་ཨབ་ས་ལོམ་གྱི་ལག་ཏུ་གནང་ཡོད་པས། སྲོག་གཅོད་པ་ཁྱོད་ནི་འཇིག་ཅིང་བརླག་པར་འགྱུར།

⁹ ཛེ་རུ་ཡཱའི་བུ་ཨ་བྷི་ཤེས་རྒྱལ་པོ་ལ། རྒྱལ་པོ་ཆེན་པོ། ཤི་ཚར་བའི་ཁྱིས་ཁྱེད་ལ་དེ་བཞིན་དམོད་པ་འདེབས་བཅུག་པ་དེ་གང་ཡིན་ནམ། ང་ཕྱིན་ནས་ཁོའི་མགོ་དེ་བཅད་ཆོག་པའི་དབང་ཆ་གནང་དུ་གསོལ་ཞེས་ཞུས་སོ།

¹⁰ ཨ་བྷི་ཤེ་དང་ཁོའི་སྤུན་ཡོ་ཨབ་ལ་རྒྱལ་པོས། ཁྱོད་ཚོས་བྱུས་ཏོག་དེ་འདྲ་བྱེད་མི་དགོས། གལ་སྲིད་གཙོ་བོ་དཀོན་མཆོག་གིས་ཁོ་ལ་དེ་ལྟ་བུའི་དམོད་པ་འདེབས་ཆོག་བའི་བཀའ་གནང་ཡོད་པ་ཡིན་ན། ཁོས་དེ་འདྲ་བྱས་པ་དེ་གང་ཡིན་ནམ་ཞེས་འདྲི་རྩད་བྱེད་པའི་དབང་ཆ་སུ་ལ་ཡོད་དམ་ཞེས་གསུངས་སོ།

¹¹ དེ་ནས་དཱ་བིད་ཀྱིས་ཨ་བྷི་ཤེ་དང་རང་གི་ལས་བྱེད་པ་རྣམས་ལ། ང་རང་གི་བུ་ངོ་མས་ང་ལ་གསོད་ཐབས་བྱེད་བཞིན་ཡོད་པ་ཡིན་ན། བྷེན་ཡ་མིན་པ་དེས་གང་བྱེད་པ་དེ་ལ་ཁྱོད་ཚོ་ཡ་མཚན་བྱེད་དགོས་པ་དེ་གང་ཡིན་ནམ། གཙོ་བོ་དཀོན་མཆོག་གིས་ཁོ་ལ་དམོད་པ་འདེབས་ཆོག་པའི་བཀའ་གནང་ཡོད་པ་ཡིན་པས། ཁོ་ལ་དེ་བཞིན་བྱེད་དུ་ཆུག་ཅིག

¹² གཅིག་བྱེད་ན་གཙོ་བོ་དཀོན་མཆོག་གིས་ངའི་སྡུག་བསྔལ་ལ་གཟིགས་ཏེ་ཁོའི་དམོད་པའི་ཚབ་ཏུ་ང་ལ་བྱིན་རླབས་ཀྱང་གནང་བར་སྲིད་ཅེས་གསུངས་སོ།

¹³ དེ་ནས་དཱ་བིད་འཁོར་གཡོག་དང་བཅས་པ་རང་གི་ལམ་དུ་འགྲུལ་ཞིང་། ཤིམ་ཨི་ནི་རི་ཁུལ་གྱི་ལམ་བརྒྱུད་ནས་དེ་ཚོ་དང་མཉམ་དུ་ཕྱིན་པ་དང་། ཁོས་དེ་ཚོར་དམོད་པ་འདེབས་ཤིང་དེ་ཚོའི་ཐོག་ཏུ་ས་རྡོ་སོགས་དབྱུགས་བཞིན་ཕྱིན་པ་རེད།

¹⁴ དེ་ཚོ་ཡོར་དན་དུ་སླེབས་དུས་རྒྱལ་པོ་དང་ཁོང་གི་འཁོར་གཡོག་ཚང་མ་ཧ་ཅང་ཐང་ཆད་ཅིང་། དེར་ཁོ་ཚོ་ངལ་གསོ་རྒྱབ་ནས་བསྡད་དོ༎

ཨབ་ས་ལོམ་ཡེ་རུ་ཤ་ལེམ་དུ་འབྱོར་བ།

¹⁵ ཨབ་ས་ལོམ་དང་ཁོ་མཉམ་དུ་ཡོད་པའི་ཨིསི་རཱཨེལ་པ་ཚང་མ་ཡེ་རུ་ཤ་ལེམ་དུ་སླེབས་ཤིང་། ཡང་དེའི་ཁོངས་སུ་ཨ་ཧི་ཐོ་ཕེལ་ཡང་ཡོད་དོ།

¹⁶ དཱ་བིད་ཀྱི་བློས་འཁེལ་བའི་གྲོགས་པོ་ཧུ་ཤའི་ཀྱིས་ཨབ་ས་ལོམ་ལ་འཕྲད་དུས་སྐད་ཤུགས་ཆེན་པོས། རྒྱལ་པོ་ཆེན་པོ་སྐུ་ཚེ་བརྟན་པར་ཤོག། རྒྱལ་པོ་ཆེན་པོ་སྐུ་ཚེ་བརྟན་པར་ཤོག་ཅེས་ཞུས་སོ།

¹⁷ ཨབ་ས་ལོམ་གྱིས་ཁོ་ལ། དེ་སྔ་ཁྱོད་ཀྱི་གྲོགས་པོ་དཱ་བིད་ཀྱི་ཕྱོགས་སུ་ཡོད་པའི་ཁྱོད་ཀྱི་འཁུར་དང་ཞེན་སེམས་དེ་དག་ད་ལྟ་གང་དུ་ཕྱིན་པ་ཡིན་ནམ། ཁྱོད་ཁོ་དང་མཉམ་དུ་མ་ཕྱིན་པ་དེ་གང་ཡིན་ནམ་ཞེས་འདྲི་རྩད་བྱས་པས།

¹⁸ ལན་དུ་ཧུ་ཤེའི་ཀྱིས། ང་ནི་ཇི་ལྟར་འགྲོ་ཐུབ་བམ། གཙོ་བོ་དཀོན་མཆོག་དང་ཁོང་གི་མི་འབངས་རྣམས་དང་། དེ་བཞིན་ཨིསི་རཱཨེལ་པ་ཡོངས་ཀྱིས་འདེམས་བསྐོས་མཛད་པའི་སྐྱེ་བོ་དེའི་ཕྱོགས་གཏོགས་སུ་ངའང་ཡོད་པ་མ་ཟད། ང་ནི་ཁོང་དང་མཉམ་དུ་གནས་རྒྱུ་ཡིན་ཏེ།

¹⁹ གང་ལྟར་ཡིན་རུང་ང་ནི་རང་གི་སྦྱིན་བདག་དང་སྲས་ཀྱི་ཞབས་ཏོག་མ་ཞུས་པར་སུའི་ཞབས་ཏོག་ཞུ་བར་བྱ། སྔར་ངས་ཁྱེད་ཀྱི་ཡབ་ལ་ཞབས་ཏོག་ཞུས་པ་བཞིན་ད་ཁྱེད་ལའང་དེ་བཞིན་ཞབས་ཕྱི་ཞུ་རྒྱུ་ཡིན་ཞེས་སྨྲས་སོ།

²⁰ དེ་ནས་ཨབ་ས་ལོམ་ཨ་ཧི་ཐོ་ཕེལ་གྱི་ཕྱོགས་སུ་ཁ་སྒྱུར་ནས་སྨྲས་པ། ད་ང་ཚོའི་ལས་དོན་འཆར་གཞིའི་སྐོར་ཁྱེད་ཀྱིས་གྲོས་འཆར་གནང་རྒྱུ་གང་ཡོད་དམ་ཞེས་གསུངས་པས།

²¹ ལན་དུ་ཨ་ཧི་ཐོ་ཕེལ་གྱིས། ད་ཁྱོད་ཕྱིན་ནས་ཕོ་བྲང་སྲུང་ཆར་བཞག་པའི་ཁྱོད་ཀྱི་ཕའི་ཟུར་གྲོགས་མ་རྣམས་དང་ལུས་འབྲེལ་བྱོས་ཤིག དེའི་རྐྱེན་གྱིས་ཁྱོད་ཀྱི་ཕས་ཁྱོད་ལ་རང་གི་དགྲ་བོར་ངོས་འཛིན་བྱེད་པ་དེ། ཨིསི་རཱཨེལ་དུ་ཡོད་པའི་མི་ཚང་མས་ཤེས་པར་འགྱུར། ཡང་དེ་ལྟར་བྱས་པའི་སྒོ་ནས་ཁྱོད་ཀྱི་རྗེས་སུ་འབྲངས་མཁན་མི་ཚང་མར་སེམས་ཤུགས་སྐྱེད་དགོས་པའི་རྒྱུ་ཞིག་ཏུ་འགྱུར་ཡོང་ཞེས་སྨྲས་སོ།

²² དེ་ནས་ཁོ་ཚོས་ཨབ་ས་ལོམ་གྱི་དོན་དུ་ཕོ་བྲང་གི་ཐོག་ཁར་གུར་ཞིག་ཕུབ་ནས། མི་ཚང་མས་མཐོང་སར་ཨབ་ས་ལོམ་ནང་དུ་ཕྱིན་ནས་རང་གི་ཕའི་ཟུར་གྲོགས་མ་རྣམས་དང་ཉལ་ནས་ལུས་འབྲེལ་བྱས་སོ།

²³ སྐབས་དེར་ཨ་ཧི་ཐོ་ཕེལ་གྱིས་གྲོས་ཆར་བཤད་ཚད་ཚང་མ་དཀོན་མཆོག་གིས་བཀའ་དང་དབྱེར་མེད་པར་ཚང་མས་ངོས་འཛིན་ཞུ་གི་ཡོད་པས། དཱ་བིད་དང་ཨབ་ས་ལོམ་གཉིས་ཀྱང་ཁོང་གི་གྲོས་འཆར་ལ་ཉན་གྱི་ཡོད་པ་ཡིན་ནོ༎