ཤ་མུ་ཨེལ་གཉིས་པ། 15 - Tibetan Old Testament 2011

ཨབ་ས་ལོམ་གྱིས་ངོ་རྒོལ་གྱི་འཆར་གཞི་བཏིང་བ།

¹ དེ་རྗེས་ཨབ་ས་ལོམ་གྱིས་ཤིང་རྟ་འཁོར་ལོ་ཞིག་དང་རྟ་རྣམས་དང་ལམ་སྟོན་སྣེ་ཁྲིད་བྱེད་མཁན་མི་གྲངས་ལྔ་བཅུ་ཐམ་པ་བཅས་གྲ་སྒྲིག་བྱས་སོ།

² ཁོ་རང་སྔ་དྲོ་སྔ་པོ་ཡར་ལངས་ཏེ་གྲོང་ཁྱེར་གྱི་རྒྱལ་སྒོར་འགྲོ་བའི་ལམ་དུ་ལངས་ཤིང་། མི་སུ་ཞིག་རྒྱལ་པོའི་རྩར་ཁྲིམས་གཅོད་ཞུ་བར་འགྲོ་བཞིན་པ་མཐོང་བ་ཡིན་ན་དེ་ལ། ཁྱོད་ཡུལ་གང་ནས་ཡོང་བ་ཡིན་ནམ་ཞེས་འདྲི་བའི་ལན་དུ། མི་དེས་རང་ཉིད་སྡེ་རིགས་གང་གི་ཁོངས་ནས་ཡིན་པའི་སྐོར་བཤད་ཟིན་པ་དང་།

³ ཨབ་ས་ལོམ་གྱིས། ལྟོས་ཤིག་ཁྱོད་ལ་ཁྲིམས་གཅོད་དྲང་པོ་ཐོབ་འོས་པ་འདུག འོན་ཀྱང་ཁྱོད་ཀྱི་རྩོད་པ་དེའི་སྐོར་ལ་ཉན་མཁན་རྒྱལ་པོའི་སྐུ་ཚབ་ཞིག་ཀྱང་མི་འདུག

⁴ ཡང་ཁོས་མུ་མཐུད་དེ་བརྗོད་རྒྱུར། ང་ནི་ཁྲིམས་དཔོན་ཞིག་ཡིན་ན་ཅི་མ་རུང་། དེ་བཞིན་སུ་ཞིག་ལ་རྩོད་རྙོག་ཞིག་ཡོད་དེ། ཁོས་རྩོད་རྙོག་དེ་དག་ངའི་རྩར་འཁྱེར་ཡོང་བ་ཡིན་ན་ངས་ཁོ་ལ་ཁྲིམས་གཅོད་དྲང་པོ་བཅད་ཡོད། ཅེས་བརྗོད་ཀྱི་ཡོད་དོ།

⁵ ཡང་མི་དེས་ཕྱག་འཚལ་བར་མདུན་དུ་ཡོང་བ་ཡིན་ན། ཨབ་ས་ལོམ་གྱིས་ལག་པ་བརྐྱངས་ནས་ཁོ་ལ་འཐམ་ཞིང་ཁ་བསྐྱལ་གྱིས་ཡོད་པ་མ་ཟད།

⁶ དེ་བཞིན་རྒྱལ་པོའི་རྩར་ཁྲིམས་གཙོད་ཞུ་བར་ཡོང་མཁན་ཨིསི་རཱཨེལ་པ་ཚང་མར་ཨབ་ས་ལོམ་གྱིས་དེ་ལྟར་བྱེད་ཀྱི་ཡོད་པས། དེ་ཚོའི་བློ་སེམས་རང་གི་ཕྱོགས་སུ་བཀུགས་སོ།

⁷ དེ་ནས་ལོ་ངོ་བཞིའི་རྗེས་སུ་རྒྱལ་པོ་དཱ་བིད་ལ་ཨབ་ས་ལོམ་གྱིས། ཀྱེ་རྒྱལ་པོ་ཆེན་པོ་ངས་གཙོ་བོ་དཀོན་མཆོག་ལ་དམ་བཅའ་ཞིག་སྒྲུབ་པའི་ཕྱིར་ང་ཧེབ་རོན་དུ་འགྲོ་ཆོག་པའི་དགོངས་པ་གནང་བར་མཛོད།

⁸ སྔར་ང་རང་སི་རི་ཡའི་གྷེ་ཤུར་དུ་གནས་སྐབས་ངས་གཙོ་བོ་དཀོན་མཆོག་ལ་དམ་བཅའ་ཕུལ་དོན། གལ་སྲིད་ཁྱེད་ཀྱི་ང་ཡེ་རུ་ཤ་ལེམ་དུ་ཕྱིར་ལོག་འཁྲིད་ཕེབས་པ་ཡིན་ན་ངས་ཧེབ་རོན་དུ་ཁྱེད་ལ་བསྙེན་བཀུར་ཞུ་གི་ཡིན་ཞེས་ཞུས་ཡོད་ཅེས་སྨྲས་སོ།

⁹ རྒྱལ་པོས་དེ་ལ་ཁྱོད་ཞི་བདེའི་ངང་དུ་སོང་ཞིག་ཅེས་གསུངས་པ་དང་། ཨབ་ས་ལོམ་ཧེབ་རོན་དུ་ཕྱིན་ནོ།

¹⁰ འོན་ཀྱང་ཁོས་ཨིསི་རཱཨེལ་གྱི་སྡེ་རིགས་ཚང་མའི་ཁྲོད་དུ་བང་ཆེན་བཏང་ནས་ལོན་བསྐུར་གསལ། ཁྱོད་ཚོའི་དམག་དུང་འབུད་པའི་སྒྲ་ཐོས་མ་ཐག་ཏུ་སྐད་ཤུགས་ཆེན་པོས། ཨབ་ས་ལོམ་ནི་ཧེབ་རོན་གྱི་རྒྱལ་པོར་འཁོད་བཞག་ཅེས་སྨྲོས་ཤིག

¹¹ ཨབ་ས་ལོམ་གྱི་ཁ་ལ་ཉན་ནས་མི་ ༢༠༠ ཙམ་ཡེ་རུ་ཤ་ལེམ་ནས་ཁོ་དང་མཉམ་དུ་ཕྱིན་ནོ། འོན་ཀྱང་དེ་ཚོས་ཐབས་ཇུས་དེའི་སྐོར་ལ་གང་ཡང་མ་ཤེས་པར། སེམས་པ་རྣམ་དག་གིས་ཁོའི་རྗེས་སུ་ཕྱིན་ནོ།

¹² ཡང་དམར་མཆོད་འབུལ་བཞིན་པའི་སྐབས་སུ་ཨབ་ཤ་ལོམ་གྱིས་གྷི་ལོ་ནས་ཨ་ཧི་ཏོ་ཕེལ་ལའང་བོས་པར་བཏང་ཞིང་། ཨ་ཧི་ཏོ་ཕེལ་ནི་རྒྱལ་པོ་དཱ་བིད་ཀྱི་གྲོས་དཔོན་ཞིག་ཡིན་ནོ། དེ་བཞིན་རྒྱལ་པོར་རྒོལ་བའི་ཐབས་བྱུས་ངན་པ་དེའང་ཤུགས་ཇེ་ཆེར་ཕྱིན་ཞིང་། ཨབ་ཤ་ལོམ་གྱི་ཕྱོགས་གཏོགས་བྱེད་མཁན་ཁ་གྲངས་ཡང་མང་དུ་ཕྱིན་ནོ༎

དཱ་བིད་ཡེ་རུ་ཤ་ལེམ་ནས་བྲོས་པ།

¹³ བང་ཆེན་ཞིག་གིས་དཱ་བིད་ལ། ཨིསི་རཱཨེལ་པ་ཚོས་ཨབ་ས་ལོམ་ལ་དེ་ཚོས་ཤ་ཞེན་ཞུ་གི་འདུག་ཅེས་ལོན་སྤྲད་དོ།

¹⁴ དཱ་བིད་ཀྱིས་ཡེ་རུ་ཤ་ལེམ་དུ་རང་དང་མཉམ་དུ་ཡོད་པའི་ལས་བྱེད་པ་རྣམས་ལ། ང་ཚོ་ཨབ་ས་ལོམ་གྱི་ལག་ནས་ཐར་བར་འདོད་ན། ང་ཚོ་འདི་ནས་ད་ལྟ་ཉིད་དུ་ཐོན་དགོས། དེ་མིན་ཁོ་མགྱོགས་པོ་སླེབས་ནས། ང་ཚོར་དབང་བསྒྱུར་བྱེད་དེ་གྲོང་ཁྱེར་ནང་དུ་སུ་ཡོད་པ་ཚང་མ་བསད་ངེས་སོ་ཞེས་སྨྲས་པ་དང་།

¹⁵ དེའི་ལན་དུ། ཁོ་ཚོས་ཀྱེ་རྒྱལ་པོ་ཆེན་པོ། ང་ཚོས་ཁྱེད་ཀྱིས་ཅི་གསུང་བཀའ་སྒྲུབ་ཞུ་བར་གྲ་སྒྲིག་ཡོད་ཅེས་ཞུས་སོ།

¹⁶ རྒྱལ་པོ་རང་གི་འཁོར་གཡོག་དང་བཅས་པ་དེ་ནས་ཐོན་ཞིང་། ཕོ་བྲང་ལ་བལྟ་རྟོགས་བྱེད་ཕྱིར་རང་གི་ཟུར་གྲོགས་མ་བཅུ་རྗེས་ལ་བཞག་གོ

¹⁷ རྒྱལ་པོ་རང་གི་འཁོར་གཡོག་དང་བཅས་པ་གྲོང་ཁྱེར་ནས་ཐོན་སྐབས། མཐའ་མའི་ཁང་ཁྱིམ་ཞིག་ཏུ་ཡུན་ཙམ་ཞིག་བསྡད་པས།

¹⁸ རྒྱལ་པོའི་མདུན་ནས་ཁོང་གི་སྐུ་སྲུང་དམག་མི་རྣམས་འགྲོ་དུས་ཁོང་གི་ལས་བྱེད་པ་ཚང་མ་ཁོང་གི་ཉེ་འགྲམ་དུ་ལངས་ནས་བསྡད་པ་དང། གྷད་ནས་ཁོང་དང་མཉམ་དུ་ཡོང་བའི་དམག་མི་ ༦༠༠ ཡང་ཁོ་ཚོའི་མདུན་ནས་ཕྱིན་པས།

¹⁹ དེ་ཚོའི་འགོ་དཔོན་ཨིཏ་ཏས་ལ་རྒྱལ་པོས། ཁྱོད་ག་རེའི་དོན་དུ་ང་ཚོའི་རྗེས་སུ་ཡོང་གི་ཡོད། ཁྱོད་ཕྱིར་ལོག་བྱེད་ནས་རྒྱལ་པོ་གསར་པའི་མངའ་འོག་ཏུ་སྡོད་ཅིག ཁྱོད་ནི་ཕྱི་རྒྱལ་བ་ཞིག་ཡིན་པ་དང་རང་གི་ཡུལ་ནས་བྲོས་ཡོང་བའི་སྐྱབས་བཅོལ་བ་ཞིག་ཡིན་ནོ།

²⁰ ཁྱོད་འདིར་སླེབས་ནས་ཉིན་མ་མང་པོ་ཕྱིན་མེད་པས། ངས་ཁྱོད་རང་ང་དང་མཉམ་དུ་འཁྱམ་པར་ཅིའི་ཕྱིར་འཁྲིད་དགོས་སམ། ང་རང་གང་དུ་འགྲོ་དགོས་པ་དེའང་ངས་མི་ཤེས་སོོ། དེ་བས་ན་ཁྱོད་ཀྱིས་སོ་སོའི་ཡུལ་མི་རྣམས་འཁྲིད་ནས་ཕྱིར་ལོག་བྱོས་ཤིག གཙོ་བོ་དཀོན་མཆོག་གིས་ཁྱོད་ལ་བཀའ་འདྲིན་དང་དམ་ཚིག་ཅན་གནང་བར་ཤོག་ཅིག་ཅེས་གསུངས་སོ།

²¹ ཨིཏ་ཏས་ལན་དུ། ཀྱེ་རྒྱལ་པོ་ཆེན་པོ། ང་ནི་གཙོ་བོ་དཀོན་མཆོག་གི་མཚན་བརྗོད་དེ་མནའ་སྐྱེལ་ཞིང་ཁྱེད་ལ་ཞུ་རྒྱུར། ཁྱེད་གང་དུ་ཕེབས་སར་ངའང་རྟག་ཏུ་ཁྱེད་དང་མཉམ་དུ་འགྲོ་གི་ཡིན། ང་ནི་འཆི་བའི་གདོང་ལེན་བྱེད་དགོས་བྱུང་ནའང་ཁྱེད་དང་མཉམ་དུ་ངེས་པར་འགྲོ་གི་ཡིན་ཞེས་ཞུས་པ་དང་།

²² དཱ་བིད་ཀྱིས་ལན་དུ། ཡ་འོ་ན་འགྲོ་བོ་ཞེས་སྨྲས་པས། ཨིཏ་ཏས་རང་གི་མི་ཚང་མ་དང་དེ་ཚོའི་ནང་མི་ཚང་མ་འཁྲིད་ནས་དཱ་བིད་མཉམ་དུ་ཕྱིན་ནོ།

²³ དེ་བཞིན་དཱ་བིད་ཀྱི་མི་རྣམས་ཐོན་འགྲོ་དུས། མི་ཚོགས་ཀྱིས་སྐད་ཤུགས་ཆེན་པོས་ངུ་འབོད་བྱས་སོ། རྒྱལ་པོས་རང་གི་མི་རྣམས་འཁྲིད་དེ། ཀིད་རོན་གྱི་གྲོག་ཆུ་རྒལ་ཏེ། དེ་ཚོ་ཆབས་ཅིག་ཏུ་འབྲོག་སྟོང་གི་ཕྱོགས་སུ་ཐོན་ནོ།

²⁴ བླ་མ་ཛ་དཱོག་དང་ལེ་ཝི་པ་རྣམས་ཀྱང་དེར་ཡོད་ཅིང་། དེ་ཚོས་དམ་བཅའི་སྒྲོམ་དམ་པ་དེ་འཁྱེར་ཡོང་བ་དང་། དེ་ཚོས་དམ་བཅའི་སྒྲོམ་དེ་མར་བཞག་གོ། མི་ཚང་མ་གྲོང་ཁྱེར་ནས་ཕྱིར་མ་ཐོན་བར་དུ་ཁོ་ཚོས་སྒྲོམ་དེ་ས་ནས་ཡར་མ་ཀྱག་གོ སྐབས་དེར་བླ་མ་ཨ་བྷི་ཡཱ་ཏཱར་ཡང་དེར་ཡོད་པ་ཡིན་ནོ།

²⁵ དེ་ནས་རྒྱལ་པོས་བླ་མ་ཛ་དཱོག་ལ། དམ་བཅའི་སྒྲོམ་དེ་གྲོང་ཁྱེར་དུ་ཕྱིར་ལོག་གདན་འདྲེན་ཞུས་ཤིག གལ་སྲིད་གཙོ་བོ་དཀོན་མཆོག་ང་དང་ཐུགས་མཉེས་པོ་ཡོད་པ་ཡིན་ན། ནམ་ཞིག་ཁོང་གིས་ང་ལ་སྒྲོམ་དེ་གང་དུ་བཞག་ཡོད་པའི་གནས་དེ་མཇལ་ཐུབ་པའི་གོ་སྐབས་གནང་ཕྱིར་ང་ལ་ཕྱིར་ལོག་འཁྲིད་ཕེབས་པར་འགྱུར།

²⁶ འོན་ཀྱང་ཁོང་ང་དང་མཉམ་ཐུགས་མཉེས་པོ་མེད་པ་ཡིན་ན། ཁོང་གིས་ཐུགས་དགོངས་བཞིན་དུ་ང་ལ་གནང་བར་མཛོད།

²⁷ ད་དུང་ཁོང་གིས་ཛ་དཱོག་ལ། ད་ཁྱོད་ཀྱི་བུ་ཨ་ཧི་མཱསི་དང་ཨ་བྷི་ཡ་ཐར་གྱི་བུ་ཡོ་ན་ཐན་མཉམ་དུ་འཁྲིད་དེ་ཞི་བདེའི་ངང་རྒྱལ་སར་ཕྱིར་ལོག་བྱོས་ཤིག

²⁸ ང་ནི་ཁྱོད་ཀྱི་རྩ་ནས་ལོན་མ་འབྱོར་བར་དུ་འབྲོག་སྟོང་དུ་ཡོད་པའི་ཆུ་འཛོམས་སུ་སྒུག་ནས་སྡོད་ཀྱི་ཡིན་ཞེས་གསུངས་སོ།

²⁹ དེ་ནས་ཛ་དཱོག་དང་ཨ་བྷི་ཡ་ཐར་གཉིས་ཀྱིས་དམ་བཅའི་སྒྲོམ་དེ་ཡེ་རུ་ཤ་ལེམ་དུ་ཕྱིར་ལོག་གདན་དྲངས་ནས་དེར་གནས་སྡོད་བྱས་སོ།

³⁰ དཱ་བིད་ངུ་བཞིན་ཁ་སྐྱུར་ཤིང་གི་རི་བོར་འཛེགས་ཏེ། མྱ་ངན་གྱི་ཚུལ་དུ་མགོ་བོ་བཏུམ་ནས་རྐང་རྗེན་མར་འགྲུལ་བསྐྱོད་བྱས་པ་མ་ཟད། ཁོའི་རྗེས་སུ་འབྲངས་མཁན་མི་ཚང་མས་མགོ་བོ་བཏུམ་ཞིང་ངུ་འབོད་བྱས་སོ།

³¹ ཡང་ཨ་ཧི་ཐོ་ཕེལ་ནི་ཨབ་ས་ལོམ་གྱི་ངན་ཇུས་ཁོངས་སུ་ཕྱིན་པའི་སྐོར་དཱ་བིད་ཀྱིས་ཐོས་པའི་རྗེས་སུ་ཁོས་སྨོན་ལམ་འདེབས་གསལ། ཀྱེ་གཙོ་བོ་དཀོན་མཆོག་ཐུགས་རྗེ་གཟིགས་ཏེ་ཨ་ཧི་ཐོ་ཕེལ་གྱིས་གྲོས་འཆར་གང་བྱས་པ་དེ་ཚོ་མེད་ཁུངས་ལུང་མེད་པ་ཞིག་ཏུ་བཟོ་རོགས་གནང་ཞེས་ཞུས་སོ།

³² དེ་ནས་དཱ་བིད་རི་རྩེར་སླེབས་པ་དང་། དེར་མཆོད་ཁྲི་ཞིག་ཀྱང་ཡོད་པས། དེར་ཁོའི་བློས་འཁེལ་བའི་གྲོགས་པོ་མིང་ལ་ཧུ་ཤའི་ཟེར་བ་ཨར་ཀི་པ་མི་རིགས་ཁོངས་ནས་ཡིན་པ་དེས། རང་གི་གྱོན་གོས་ཧྲལ་ཞིང་མགོ་བོར་ཐལ་ལ་བྱུགས་ཏེ། ཁོང་ལ་ཐུགས་འཕྲད་བྱེད་ཕྱིར་ཡོང་ངོ་།

³³ དེ་ནས་དཱ་བིད་ཀྱིས་ཁོ་ལ་། ཁྱོད་ང་དང་མཉམ་དུ་ཡོང་བ་ཡིན་ནའང་ང་ལ་ཕན་ཆ་གང་ཡང་མེད།

³⁴ དེ་བས་ཁྱོད་ཀྱིས་ང་ལ་རོགས་བྱེད་འདོད་ཡོད་ན། ཁྱོད་རང་གྲོང་ཁྱེར་དུ་ཁྱེར་དུ་ཕྱིར་ལོག་བྱེད་ནས་ཨབ་ས་ལོམ་ལ། སྔར་ངས་ཁྱོད་ཀྱི་ཕ་ལ་ཞབས་ཕྱི་རྣམ་དག་གང་ཞུས་པ་བཞིན་ཁྱེད་ལའང་དེ་བཞིན་ཞབས་ཕྱི་ཞུ་རྒྱུ་ཡིན་ཞེས་ཨབ་ས་ལོམ་ལ་སྨྲོས་ཤིག ཨ་ཧི་ཐོ་ཕེལ་གྱིས་གྲོས་འཆར་བཞག་པ་དེ་ལ་ཁྱོད་ཀྱིས་ཐབས་གང་ས་ནས་ངོ་རྒོལ་བྱོས་ཤིག

³⁵ བླ་མ་ཛ་དཱོག་དང་བླ་མ་ཨ་བྷི་ཡ་ཐར་ཡང་དེར་ཡོད་པས། ཕོ་བྲང་ནང་ཁྱོད་ཀྱིས་གནས་ཚུལ་གང་ཐོས་པ་རྣམས་ཁོ་གཉིས་ལ་ཤོད་དགོས།

³⁶ ཁོ་གཉིས་ཀྱི་བུ་ཨ་ཧི་མཱ་སི་དང་ཡོ་ན་ཐན་གཉིས་ཀྱང་དེར་མཉམ་དུ་ཡོད་པས། ཁྱོད་ཀྱིས་ཐོས་པའི་གནས་ཚུལ་ཚང་མ་ཁོ་གཉིས་བརྒྱུད་དེ་ངའི་རྩར་གཏོང་ཤོག་ཅེས་སྨྲས་སོ།

³⁷ དེར་བརྟེན་དཱ་བིད་ཀྱི་གྲོགས་པོ་ཧུ་ཤའི་གྲོང་ཁྱེར་དུ་སླེབས་པ་དང་། ཨབ་ས་ལོམ་ཡང་སྐབས་དེར་གྲོང་ཁྱེར་དུ་སླེབས་བཞིན་ཡོད་པ་ཡིན་ནོ༎