ཤ་མུ་ཨེལ་གཉིས་པ། 13 - Tibetan Old Testament 2011

ཨམ་ནོན་དང་ཏ་མཱར།

¹ དཱ་བིད་ཀྱི་བུ་ཨབ་ས་ལོམ་ལ་སྲིང་མོ་ཏ་མཱར་ཟེར་བ་ཞིག་ཡོད་ཅིང་། མོ་ནི་བྱད་གཟུགས་མཛེས་ཤིང་ཆང་ས་རྒྱབ་མེད་པ་ཡིན་ནོ། དཱ་བིད་ལ་ཨམ་ནོན་ཟེར་བའི་བུ་གཞན་ཞིག་ཡོད་པ་དེ་ནི་མོ་ལ་སེམས་ཆགས་ཡོད་དོ།

² ཨམ་ནོན་ནི་ཏ་མཱར་ལ་སེམས་ཆགས་ཆེ་བའི་རྐྱེན་གྱིས་ཁོ་ན་བ་ཡིན་ནོ། གང་ལགས་ཟེར་ན། ཁོ་ལ་བུ་མོ་དེ་ཐོབ་རྒྱུ་མ་སྲིད་པ་ཞིག་ཆགས་ཡོད་པ་ཡིན། མོ་ནི་ཁྱོ་དང་ལུས་འབྲེལ་མ་བྱས་པའི་བུ་མོ་ན་ཆུང་མ་ཞིག་ཡིན་ནོ།

³ འོན་ཀྱང་ཁོའི་གྲོགས་པོའི་མིང་ལ་ཡོ་ན་དྷབ་ཟེར་བ་མི་ཧ་ཅང་གྲུང་པོ་ཞིག་ཡོད་པ་དང། ཡོ་ན་དྷབ་ནི་དཱ་བིད་ཀྱིས་ཨ་ཇོ་ཤམ་མཱའི་བུ་ཡིན་ནོ།

⁴ ཡོ་ན་དྷབ་ཀྱིས་ཨམ་ནོན་ལ། ཁྱེད་རང་རྒྱལ་པོའི་སྲས་ཡིན་ནའང་དུས་རྒྱུན་དུ་མྱ་ངན་བྱེད་བཞིན་བསྡད་པ་དེ་གང་ཡིན་ནམ་ཞེས་སྨྲས་པ་དང་། ཁོས་ལན་དུ། ང་ནི་ངའི་སྤུན་ཨབ་ས་ལོམ་གྱི་སྲིང་མོ་ཏ་མཱར་ལ་སེམས་ཆགས་ཡོད་ཅེས་སྨྲས་སོ།

⁵ ཡོ་ན་དྷབ་ཀྱིས་ཁོང་ལ་སྨྲས་པ། ཁྱེད་རང་ནད་པ་ལྟར་ཉལ་སར་ཉལ་སྡོད་ཅིག ཁྱེད་ཀྱི་ཡབ་ཁྱེད་ལ་གཟིགས་པར་ཕེབས་དུས་ཁྱེད་ཀྱིས་ཁོང་ལ་འདི་ལྟར་སྨྲོས་ཤིག ཁྱེད་ཀྱིས་ཐུགས་རྗེ་གཟིགས་ནས་ངའི་སྲིང་མོ་ཏ་མཱར་ལ་ངའི་རྩར་ཕྱིན་ནས་ཁ་ཟས་སྤྲོད་བཅུག་ཅིག མོས་ངའི་མཐོང་སར་ཁ་ཟས་ཞིག་བཟོས་ནས་ང་ལ་སྟེར་བ་དེ་ངས་འདོད་ཀྱི་འདུག

⁶ དེ་བས་ན་ཨམ་ནོན་རྫུན་བཤད་ནས་ཉལ་སར་ཉལ་ནས་བསྡོད་དོ། རྒྱལ་པོ་དཱ་བིད་ཁོང་ལ་གཟིགས་པར་ཕེབས་དུས། ཨམ་ནོན་གྱིས་ཁོང་ལ། ཁྱེད་ཀྱིས་ཐུགས་རྗེས་གཟིགས་ཏེ་ཏ་མཱར་ངའི་མདུན་དུ་གཏོང་གནང་མཛོད། མོས་ངའི་མཐོང་སར་བག་ལེབ་འགའ་ཤས་བཟོས་ཏེ་རང་གི་ལག་པས་ང་ལ་སྤྲོད་དགོས་ཅེས་བཀའ་འཁྲོལ་གནང་བར་མཛོད་ཅེས་ཞུས་སོ།

⁷ དེ་ནས་དཱ་བིད་ཀྱིས་ཏ་མཱར་ལ་ཕོ་བྲང་དུ་ལོན་བཏང་ནས་སྨྲས་པ། ཁྱོད་རང་ཨམ་ནོན་གྱི་ནང་དུ་ཕྱིན་ནས་ཁོའི་དོན་དུ་ཁ་ཟས་བཟོས་ཤིག

⁸ མོ་དེར་ཕྱིན་པ་དང་ཨམ་ནོན་ཉལ་སའི་ནང་དུ་བསྡད་ཡོད་པ་མཐོང་སྟེ། གྲོ་ཞིབ་ཏོག་ཙམ་བླངས་ནས་དེ་བརྫིས་ཤིང་ཁོས་མཐོང་སར་བག་ལེབ་འགའ་ཤས་བཟོས་ནས།

⁹ ཁོ་ལ་སྤྲད་ཕྱིར་ཚལ་སླང་ནས་མར་བཏོན་ཀྱང་། ཁོས་ཟ་རོགས་མ་བྱས་སོ། ཡང་ཁོས། མི་ཚང་མ་ཕྱི་ལོགས་ལ་གཏོང་ཞིག་ཅེས་སྨྲས་པས། དེར་ཡོད་པའི་མི་ཆང་མ་ཕྱི་ལོགས་ལ་ཕྱིན་ནོ།

¹⁰ དེ་ནས་ཡང་ཁོས་ཏ་མཱར་ལ་སྨྲས་པ། བག་ལེབ་དེ་ལྟར་ངའི་ཉལ་ཁྲིའི་རྩར་འཁྱེར་ཡོང་ནས་ཁྱེད་རང་གི་ལག་པས་ངའི་ཁ་ལ་སྟེར་ཅིག་ཅེས་སྨྲས་པ་བཞིན། མོས་བག་ལེབ་དེ་དག་འཁྱེར་ནས་ཨམ་ནོན་གྱི་འགྲམ་དུ་ཕྱིན་ཏེ།

¹¹ མོས་བག་ལེབ་དེ་དག་ཨམ་ནོན་ལ་སྤྲད་བཞིན་པའི་སྐབས་སུ། ཁོས་མོའི་ལག་པ་ནས་བཟུང་སྟེ། ད་ང་དང་མཉམ་དུ་ཉལ་དགོས་ཅེས་སྨྲས་པ་དང་།

¹² མོས། དེ་ནི་མི་ལེགས་སོ། ང་ལ་དེ་ལྟ་བུའི་སྔོ་ལོ་འཕྱར་དགོས་པའི་ལས་ངན་བྱེད་པར་ཨུ་ཚུགས་མ་གནང་ཞིག དེ་ནི་བྱེད་མི་རུང་བས་ལས་ངན་ཞིག་ཡིན་པས།

¹³ ངས་མི་མང་གི་མདུན་དུ་ཇི་ལྟར་ངོ་བསྟན་ནུས་སམ། དེ་ཙམ་མ་ཟད་ཨིསི་རཱཨེལ་ཡོངས་སུ་ཁྱེད་ལ་མིང་རྗེས་ངན་པ་ཞིག་ཡོང་ངེས་སོ། དེ་ལས་ཁྱེད་ཀྱི་རྒྱལ་པོ་དང་བཀའ་མོལ་གནང་བ་ཡིན་ན། ཁོང་གིས་ང་ལ་ཁྱེད་ཀྱི་ཕྱག་ཏུ་ངེས་པར་གནང་བར་འགྱུར་ཞེས་སྨྲས་སོ།

¹⁴ འོན་ཀྱང་ཁོས་མོའི་ཁ་ལ་མ་ཉན་ནོ། ཁོང་ནི་མོ་ལས་སྟོབས་ཤུགས་ཆེ་བའི་རྐྱེན་གྱིས། ཁོས་ཏ་མཱར་ལ་དབང་སྒྱུར་གྱིས་མོ་དང་བཙན་གཡེམ་བྱས་སོ།

¹⁵ དེ་རྗེས་ཨམ་ནོན་གྱིས་ཏ་མཱར་ལ་ཧ་ཅང་སྡང་སེམས་བྱས་ཏེ། དེ་སྔ་མོ་ལ་བརྩེ་གདུང་གང་བྱས་པ་ལས་ལྷག་པར་ད་ཆ་མོ་ལ་སྡང་སེམས་ཆེ་བ་བྱས་པ་དང་། ཁོས་མོ་ལ། ཁྱོད་འདི་ནས་ཐོན་ཏེ་སོང་ཞིག་ཅེས་སྨྲས་པ་དང་།

¹⁶ མོས་ལན་དུ་ང་ནི་མི་འགྲོའོ། ང་ལ་འདི་བཞིན་ཕྱི་རུ་བཏོན་རྒྱུ་དེ་ནི། ཁྱེད་ཀྱིས་ད་ལྟ་ང་དང་ལས་ངན་གང་བྱས་པ་དེ་ལས་ཀྱང་ཉེས་སྡིག་ཆེ་བ་ཡིན་ནོ་ཞེས་སྨྲས་ཀྱང་། ཨམ་ནོན་གྱིས་མོའི་གཏམ་ལ་མ་ཉན་པར།

¹⁷ རང་གི་གཡོག་པོ་བོས་ཏེ་སྨྲས་པ། བུད་མེད་འདི་ངའི་མིག་གི་མ་མཐོང་སར་ཕར་འཁྲིད་ཅིག མོ་ལ་ཕྱི་ལོགས་ལ་བཏོན་ནས་སྒོ་ལ་ཨ་ཤིང་རྒྱོབ་ཅིག

¹⁸ གཡོག་པོ་དེས་མོ་ཕྱི་ལོགས་ལ་བཏོན་ཏེ་སྒོ་ལ་ཨ་ཤིང་རྒྱབ་བོ། སྐབས་དེར་ཏ་མཱར་གྱིས་རྒྱལ་པོའི་སྲས་མོ་ཆང་ས་མ་རྒྱབ་པ་ཚོས་གྱོན་གོས་རིང་ལ་ཕུ་དུང་ཡོད་པ་ཞིག་གྱོན་ཡོད་པ་ཡིན་ནོ།

¹⁹ མོས་རང་གི་མགོ་བོར་གོ་ཐལ་བླུགས་ཏེ་གྱོན་གོས་ཧྲལ་ཞིང་། ལག་པས་ངོ་གདོང་བཀབ་ནས་ངུ་བཞིན་ཕྱིན་ནོ།

²⁰ མོའི་གཅེན་པོ་ཨབ་ས་ལོམ་གྱིས་མོ་ལ་མཐོང་ནས་དྲིས་པ། ཨམ་ནོན་གྱིས་ཁྱོད་ལ་བཙན་གཡེམ་བྱས་བྱུང་ངམ་ཞེས་འདྲི་རྩད་བྱས་སོ། ད་སྲིང་མོ་ཁྱོད་རང་སེམས་ཁྲལ་མ་བྱེད་ཅིག ཁོ་ནོ་ཁྱོད་ཀྱི་ཨ་ཇོ་ཡིན་པས། གཏམ་དེ་སུ་ཞིག་ལ་མ་ལབ་ཅིག་ཞེས་སྨྲས་སོ། འོན་ཀྱང་མོ་ནི་མྱ་ངན་བྱས་ཤིང་རང་ཉིད་གཅིག་པོར་ཨབ་ས་ལོམ་གྱི་ནང་དུ་བསྡད་དོ།

²¹ རྒྱལ་པོ་དཱ་བིད་ཀྱིས་གནས་ཚུལ་དེ་ཐོས་ནས་ཧ་ཅང་ཁྲོས་ཤིང་།

²² ཨམ་ནོན་གྱིས་རང་གི་སྲིང་མོ་ཏ་མཱར་ལ་གཙན་གཡེམ་བྱས་པའི་རྐྱེན་གྱིས་ཨབ་ཤ་ལོམ་གྱིས་ཁོ་ལ་ཧ་ཅང་སྡང་དགྲ་བྱེད་དེ། ཁོ་དང་མཉམ་དུ་གཏམ་གླེང་མ་བྱས་སོ༎

ཨབ་ས་ལོམ་གྱིས་དགྲ་ཤ་ལེན་པ།

²³ དེ་ནས་ལོ་གཉིས་ཀྱི་རྗེས་སུ་ཨབ་ས་ལོམ་གྱིས་ཨེཕ་ར་ཡིམ་གྲོང་ཁྱེར་གྱི་ཉེ་འགྲམ་དུ་བྷལ་ཧ་ཛོར་དུ་རང་གི་ལུག་དེ་ཚོའི་བལ་འབྲེག་བཞིན་པའི་སྐབས་སུ། ཁོས་རྒྱལ་པོའི་སྲས་ཡོངས་རྫོགས་གནས་དེར་བོས་ཤིང་།

²⁴ ཁོ་རྒྱལ་པོ་དཱ་བིད་ཀྱི་དྲུང་དུ་བཅར་ནས་ཁོང་ལ། ཀྱེ་མངའ་བདག་ཆེན་པོ། ངས་རང་གི་ལུག་གི་བལ་འབྲེག་བཅུག་གིན་ཡོད་པས། ཁྱེད་དང་ཁྱེད་ཀྱི་ལས་བྱེད་པ་བཅས་པ་དུས་སྟོན་དེར་ཕེབས་ཐུབ་བམ་ཞེས་ཞུས་པ་དང་།

²⁵ རྒྱལ་པོས་ལན་དུ། ཀྱེ་ངའི་བུ་ངས་དེ་ལྟར་བྱེད་མི་ཐུབ། གལ་སྲིད་ང་ཚོ་ཚང་མ་ཡོང་བ་ཡིན་ན་ཁྱོད་ལ་དཀའ་ངལ་ཆེན་པོ་ཡོང་ངེས་ཞེས་གསུངས་མོད། འོན་ཀྱང་ཨབ་ས་ལོམ་གྱིས་ད་དུང་ཨུ་ཚུགས་བྱས་སོ། གང་ལྟར་ཡིན་རུང་རྒྱལ་པོ་ཕེབས་འདོད་མ་གནང་བར་ཨབ་ས་ལོམ་ལ་དེ་ནས་འགྲོ་དགོས་ཅེས་གསུངས་སོ།

²⁶ དེ་ནས་ཨབ་ས་ལོམ་གྱིས། ཁྱེད་རང་ཕེབས་མ་ཐུབ་ན་ངའི་སྤུན་ཨམ་ནོན་ལ་གཏོང་བར་མཛོད་ཅེས་ཞུས་པ་དང་། རྒྱལ་པོས། ཁོ་འགྲོ་དགོས་པ་དེ་གང་ཡིན་ནམ་ཞེས་གསུངས་མོད།

²⁷ འོན་ཀྱང་ཨབ་ས་ལོམ་གྱིས་ཨུ་ཚུགས་ནན་བསྐུལ་བྱས་པར་བརྟེན། དཱ་བིད་ཀྱིས་ཨམ་ནོན་དང་བུ་གཞན་རྣམས་འགྲོ་ཆོག་པའི་བཀའ་གནང་ངོ་། དེ་ནས་ཨབ་ས་ལོམ་གྱིས་རྒྱལ་པོར་དྲངས་འོས་པའི་མགྲོན་ཟས་རྒྱ་ཆེན་པོ་ཞིག་གྲ་སྒྲིག་བྱས་ཏེ།

²⁸ རང་གི་གཡོག་པོ་རྣམས་ལ་འདི་ལྟར་བཀའ་བསྒོས་བྱས་སོ། ཁྱོད་ཚོས་དོ་སྣང་བྱེད་ནས་ལྟོས་ཤིག ཨམ་ནོན་ཧ་ཅང་ར་བཟི་བའི་སྐབས་སུ། ངས་ཁོ་ལ་གསོད་ཅིག་ཅེས་བརྗོད་མ་ཐག་ཏུ་ཁྱོད་ཚོས་ཁོ་བསད་དགོས། ཁྱོད་ཚོས་ཞེད་སྣང་གང་ཡང་བྱེད་མི་དགོས། གང་ལགས་ཟེར་ན། དེའི་ཉན་འགན་ཚང་མ་ངས་འཁུར་ཆོག དེ་བས་ན་བློ་སྟོབས་སྐྱེད་ལ་སེམས་འཚབ་གང་ཡང་བྱེད་མི་དགོས།

²⁹ དེ་ནས་ཞབས་ཕྱི་ཚོས་ཨབ་ས་ལོམ་གྱིས་གང་སྨྲས་པ་བཞིན་བྱས་ཏེ། ཨམ་ནོན་བསད་པས། དཱ་བིད་ཀྱི་སྲས་དེ་འཕྲོས་ཚང་མ་དྲེལ་ཁར་བཞོན་ནས་བྲོས་ཕྱིན་པ་རེད།

³⁰ རྒྱལ་སྲས་རྣམས་ཕོ་བྲང་གི་ཕྱོགས་སུ་ཕྱིར་ལོག་བྱེད་བཞིན་པའི་སྐབས་སུ། ཨབ་ས་ལོམ་གྱིས་དཱ་བིད་ཀྱི་སྲས་ཚང་མ་གཅིག་ཀྱང་མ་ལུས་པར་བསད་བཞག་ཅེས་ཞུས་མ་ཐག་ཏུ།

³¹ རྒྱལ་པོ་ཡར་བཞེངས་ཏེ་མྱ་ངན་གྱིས་རང་གི་གྱོན་གོས་ཧྲལ་ཞིང་ས་ཁར་འགྱེལ་བ་དང་། དེར་ཁོང་དང་མཉམ་དུ་ཡོད་པའི་འཁོར་གཡོག་ཚང་མས་ཀྱང་དེ་བཞིན་རང་གི་གྱོན་གོས་ཧྲལ་ལོ།

³² འོན་ཀྱང་དཱ་བིད་ཀྱི་སྤུན་ཤམ་མཱའི་བུ་ཡོ་ན་དྷབ་ཀྱིས། ཀྱེ་རྒྱལ་པོ་ཆེན་པོ། ཁྱེད་ཀྱི་སྲས་ཨམ་ནོན་མ་གཏོགས་སྲས་གཞན་དག་བསད་མི་འདུག ཨབ་ས་ལོམ་གྱི་ངོ་ནས་ཀྱང་ཁྱེད་ཀྱི་མཁྱེན་ཐུབ་ཅིང་། སྔར་ཨམ་ནོན་གྱིས་ཏ་མཱར་ལ་བཙན་གཡེམ་བྱས་པ་ནས་བཟུང་ཨབ་ས་ལོམ་གྱིས་ཁོ་ལ་བསད་རྒྱུའི་ཐག་ཆོད་བྱས་ཡོད་པ་དེ། ཁྱེད་ཀྱིས་ཨབ་ས་ལོམ་གྱི་རྣམ་འགྱུར་རང་ནས་མཁྱེན་ཐུབ་པ་ཡོད།

³³ ཁྱེད་ཀྱི་སྲས་ཚང་མ་བསད་བཞག་ཅེས་པའི་གནས་ཚུལ་དེ་ལ་ཡིད་ཆེས་མ་གནང་ཞིག ཨམ་ནོན་གཅིག་རང་བསད་ཡོད་པ་ཡིན་ནོ།

³⁴ སྐབས་དེར་ཨབ་ས་ལོམ་ནི་བྲོས་ཕྱིན་པ་ཡིན་ཏེ། ས་སྲུང་དམག་མིས་མི་ཚོགས་ཆེན་པོ་ཞིག་ཧོ་རོ་ནེམ་གྱི་ལམ་ཕྱོགས་སུ་རི་ནས་མར་ཐུར་དུ་བབས་བཞིན་པ་མཐོང་བ་དང་། ཁོས་རྒྱལ་པོའི་དྲུང་དུ་བཅར་ནས་རང་གིས་གང་མཐོང་བ་དེའི་སྐོར་ལ་ཞུས་སོ།

³⁵ དེ་ནས་ཡོ་ན་དྷབ་ཀྱིས་དཱ་བིད་ལ། ཁྱེད་ཀྱི་བུ་རྣམས་ཕེབས་ཡོང་ཞེས་ངས་ཞུས་པ་བཞིན། དེ་ཚོ་ཕེབས་ཡོང་གི་འདུག་ཅེས་སྨྲས་སོ།

³⁶ ཁོས་གཏམ་དེ་བརྗོད་མ་ཐག་ཏུ་དཱ་བིད་ཀྱི་བུ་རྣམས་དེར་འབྱོར་ནས། སྐྱོ་སེམས་ཆེན་པོས་ངུས་པ་དང་། དེ་བཞིན་རྒྱལ་པོ་ལས་བྱེད་པ་དང་བཅས་པའང་མྱ་ངན་དྲག་པོས་རབ་ཏུ་བཤུམས་སོ།

^37-38 དེ་ནས་ཨབ་ས་ལོམ་བྲོས་ནས་གྷེ་ཤུར་གྱི་རྒྱལ་པོ་ཏལ་མཨེའི་རྩར་ཕྱིན་ནོ། ཁོང་ནི་ཨམ་མི་ཧུད་ཀྱི་བུ་ཡིན་པ་དང་། ཨབ་ས་ལོམ་ཁོང་དེར་ལོ་གསུམ་བར་དུ་བཞུགས་པ་རེད། དཱ་བིད་ནི་རང་གི་བུ་ཨམ་ནོན་གྱི་དོན་དུ་རྒྱུན་རིང་མྱ་ངན་བྱས་སོ།

³⁹ རྗེས་སུ་མྱ་ངན་སངས་པ་དང་། ཁོའི་སེམས་ནང་ཨབ་ས་ལོམ་དང་ཐུག་འཕྲད་ཡོང་བའི་རེ་འདོད་ཆེན་པོ་ལངས་སོ༎