ཤ་མུ་ཨེལ་གཉིས་པ། 12 - Tibetan Old Testament 2011

ན་ཐན་གྱིས་འཕྲིན་དང་དཱ་བིད་ཀྱི་འགྱོད་བཤག།

¹ དེ་ནས་གཙོ་བོ་དཀོན་མཆོག་གིས་ལུང་སྟོན་པ་ན་ཐན་དཱ་བིད་ཀྱི་རྩར་གཏོང་བ་གནང་ཞིང་། ན་ཐན་དཱ་བིད་ཡོད་སར་ཕྱིན་ནས་སྨྲས་པ། གྲོང་ཁྱེར་ཞིག་ལ་མི་གཉིས་ཡོད་པ་ལས། གཅིག་ནི་རྒྱུ་ནོར་དང་ལྡན་ཞིང་། གཞན་དེ་དབུལ་པོ་ཞིག་ཡོད་པ་ཡིན་ནོ།

² མི་ཕྱུག་པོ་དེ་ལ་བ་དང་ལུག་ཁྱུ་མང་པོ་ཡོད་པ་དང་།

³ འོན་ཀྱང་དབུལ་པོ་དེ་ལ་རང་གིས་ཉོས་པའི་ལུ་གུ་གཅིག་ལས་མེད་པ་ཡིན་ནོ། ཁོས་ལུག་གུ་འཚོ་སྐྱོང་བྱེད་ཅིང་། ཁང་པའི་ནང་དུ་རང་གི་བུ་ཕྲུག་རྣམས་དང་མཉམ་དུ་ཡར་འཚར་ལོང་བྱས་ཤིང་། ཁོས་དེ་ལ་རང་གི་ཁ་ཟས་ནས་སྤྲད་པ་དང་། རང་གི་ཕོར་པ་ལས་འཐུང་བཅུག་པ་དང་། ལུ་གུ་དེ་རང་གི་པང་དུ་བླངས་ཤིང་རང་གི་བུ་མོ་དང་དབྱེར་མེད་པ་བྱེད་ཀྱི་ཡོད་པ་ཡིན་ནོ།

⁴ ཉིན་ཞིག་མི་ཕྱུག་པོ་དེའི་ནང་མགྲོན་པོ་ཞིག་འབྱོར་བ་དང་། ཁོས་རང་གི་མགྲོན་པོའི་ཕྱིར་དུ་རང་གི་ཕྱུགས་ཟོག་གི་ནང་ནས་སེམས་ཅན་བསད་འདོད་མེད་པ་དང་། མི་དབུལ་པོ་དེའི་ལུག་དེ་བསད་དེ་སྐུ་མགྲོན་ལ་གསོལ་ཚིག་བཏང་བ་ཡིན་ནོ།

⁵ དཱ་བིད་མི་ཕྱུག་པོ་དེ་ལ་ཧ་ཅང་ཁྲོས་ཤིང་སྨྲས་པ། ང་ནི་སྐུ་གསོན་པོར་བཞུགས་པའི་གཙོ་བོ་དཀོན་མཆོག་གི་མཚན་ལ་མནའ་སྐྱེལ་རྒྱུར། དེ་ལྟ་བུའི་ལས་ངན་བྱེད་མཁན་མི་དེ་ནི་ངེས་པར་དུ་ཤི་དགོས་སོ།

⁶ ཁོས་སྙིང་རྗེ་མེད་པའི་ལས་ངན་དེ་འདྲ་བྱས་པར་བརྟེན། ཁོས་རྒྱུ་དངོས་གང་འདྲ་ཞིག་བླངས་པ་ཡིན་ནའང་དེའི་ཚབ་ཏུ་བཞི་ལྡབ་འཇལ་དགོས།

⁷ ན་ཐན་གྱིས་དཱ་བིད་ལ་སྨྲས་པ། མི་དེ་ནི་ཁྱེད་རང་ཡིན། ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་གིས་བཀའ་འཕྲིན་འདི་ལྟར་ཡོད། ངས་ཁྱོད་ལ་ཨིསི་རཱཨེལ་གྱི་རྒྱལ་པོར་བསྐོས་ཏེ། ས་ཨུལ་གྱི་ལག་ནས་སྐྱབས་པ་ཡིན།

⁸ ངས་ཁྱོད་ལ་ཁོའི་རྒྱ་ཁམས་དང་ཆུང་མ་རྣམས་ཀྱང་སྤྲད་པ་མ་ཟད། ཁྱོད་ལ་ཨིསི་རཱཨེལ་དང་ཡ་ཧུ་དཱའི་རྒྱལ་པོར་བསྐོས་པ་དང་། དེས་ཁྱོད་ལ་མ་འདང་བ་ཡིན་ན། ངས་ཁྱོད་ལ་དེའི་ཉིས་ལྡབ་ཅིག་སྤྲད་པ་ཡོད།

⁹ ཁྱོད་ཀྱིས་ངའི་བཀའ་མ་སྲུང་བ་དེ་གང་ཡིན་ནམ། ཁྱོད་ཀྱིས་དེ་ལྟ་བུའི་ལས་ངན་བྱེད་དགོས་པ་དེ་གང་ཡིན་ནམ། ཁྱོད་ཀྱིས་ཨུ་རི་ཡཱ་ལ་དམག་སར་བསད་བཅུག་པ་ཡིན། ཁྱོད་ཀྱི་ཁོ་ལ་ཨམ་མོན་པ་ཚོའི་ལག་པར་བསད་བཅུག་པ་དང་། ཁོའི་ཆུང་མའང་ཁྱོད་ཀྱིས་བླངས་སོ།

¹⁰ ཁྱོད་ཀྱིས་ངའི་བཀའ་ལ་བརྩི་མེད་བྱས་ཏེ་ཨུ་རི་ཡཱའི་ཆུང་མ་རང་གི་དོན་དུ་བླངས་པའི་རྐྱེན་གྱིས། ད་ཕྱིན་མི་རབས་རེ་རེའི་ནང་ཁྱེད་ཀྱི་མི་བརྒྱུད་འགའ་ཤས་རལ་གྲིས་འཆི་བར་འགྱུར།

¹¹ ངས་མནའ་སྐྱེལ་ནས་བརྗོད་རྒྱུར། ཁྱོད་ཀྱི་ནང་མིའི་ཁོངས་ནས་ཅིག་གིས་ཁྱོད་ལ་དཀའ་ངལ་ནང་དུ་ཚུད་པར་བྱེད་རྒྱུ་དང་། ཁྱོད་ཀྱི་ཆུང་མ་རྣམས་ངས་འཕྲོག་ནས་ཁྱོ་གཞན་ལ་སྤྲོད་རྒྱུ་ཡིན། ཁོས་དེ་ཚོར་ཉི་མའི་གུང་ལ་ཆགས་པ་བྱེད་པར་འགྱུར། གནས་ཚུལ་འདི་ནི་ཁྱེད་རང་ཉིད་ཀྱིས་མཐོང་བར་འགྱུར།

¹² ཁྱེད་ཀྱིས་གསང་བའི་ཐོག་ཏུ་སྡིག་པ་དེ་བྱས་པས། འོན་ཀྱང་ངས་ཨིསི་རཱཨེལ་པ་ཡོངས་ཀྱིས་མངོན་གསལ་དུ་མཐོང་ཕྱིར་ཉི་མའི་གུང་ལ་གནས་ཚུལ་དེ་བྱུང་བཅུག་རྒྱུ་ཡིན།

¹³ དེ་ནས་དཱ་བིད་ཀྱིས། ངས་གཙོ་བོ་དཀོན་མཆོག་གི་སྤྱན་སྔར་སྡིག་པ་བྱས་པ་ཡིན་ཞེས་སྨྲས་སོ། ལན་དུ་ན་ཐན་གྱིས། གཙོ་བོ་དཀོན་མཆོག་གིས་ཁྱོད་ལ་སྡིག་སེལ་གནང་བ་དང་། ཁྱོད་ཤི་མི་ཡོང་།

¹⁴ འོན་ཀྱང་ཁྱེད་ཀྱིས་ལས་ངན་དེ་ལྟར་བྱས་ནས་གཙོ་བོ་དཀོན་མཆོག་ལ་རྩིས་མེད་བྱེད་པའི་རྐྱེན་གྱིས་ཁྱེད་ཀྱི་ཕྲུ་གུ་དེ་ཤི་བར་འགྱུར་ཞེས་སྨྲས་སོ།

¹⁵ དེ་རྗེས་ན་ཐན་རང་གི་ཁྱིམ་དུ་ལོག་ཕྱིན་ནོ༎ ཨུ་རི་ཡཱའི་ཆུང་མར་སྐྱེས་པའི་དཱ་བིད་ཀྱི་ཕྲུ་གུ་དེ་ལ་གཙོ་བོ་དཀོན་མཆོག་གིས་ནད་གཞི་དྲག་པོ་ཞིག་གནང་བས།

དཱ་བིད་ཀྱི་ཕྲུ་གུ་གྲོངས་པ།

¹⁶ དཱ་བིད་ཀྱིས་དཀོན་མཆོག་ལ་ཕྲུ་གུ་དེ་དྲག་གསོ་བར་ཤོག་ཅེས་སྨོན་ལམ་འདེབས་ཤིང་། མཚན་མོ་རེ་བཞིན་རང་གི་ཁང་མིག་ཏུ་ཕྱིན་ཏེ་སྨྱུང་གནས་སྲུང་བ་དང་། མཚན་གང་ས་མཐིལ་ཁར་ཉལ་ནས་མཚན་བསྐྱལ་གྱི་ཡོད་དོ།

¹⁷ དེ་ནས་ལས་བྱེད་པ་རྣམས་ཕྱིན་ནས་ཁོང་ལ་ཡར་བསླང་ཐབས་སྣ་ཚོགས་བྱས་མོད། འོན་ཀྱང་ཁོང་ནི་མ་ཉན་པར་དེ་ཚོ་དང་མཉམ་དུ་ཁ་ཟས་གང་ཡང་མ་ཟས་སོ།

¹⁸ དེ་ནས་བདུན་ཕྲག་གཅིག་གི་རྗེས་སུ་ཕྲུ་གུ་དེ་ཤི་བས། ལས་བྱེད་པ་ཚོས་འཇིགས་སྣང་གིས་ཁོང་ལ་གནས་ཚུལ་དེ་ཞུ་མ་ནུས་པར། ཕན་ཚུན་གཅིག་གིས་གཅིག་ལ། དེ་སྔ་ཕྲུ་གུ་གསོན་པོར་ཡོད་དུས་ང་ཚོས་ཁོང་ལ་བཀའ་མོལ་ག་ཚོད་ཞུས་ནའང་བཀའ་ལན་གང་ཡང་གནང་གི་མེད་པས། ད་ང་ཚོས་ཕྲུ་གུ་དེ་གྲོངས་བཞག་ཅེས་ཇི་ལྟར་ཞུས་ནུས་སམ། ཁོང་གིས་རང་ཉིད་ཐོག་ཏུ་སྣོད་སྐྱོན་སོགས་ཀྱང་གཏོང་ཉེན་ཆེའོ་ཞེས་སྨྲས་སོ།

¹⁹ དེ་ནས་དཱ་བིད་ཀྱིས་དེ་ཚོ་ཕན་ཚུན་ཤབ་ཤོབ་སྨྲ་བ་མཐོང་ནས་ཕྲུ་གུ་གྲོངས་བཞག་ཅེས་བསམས་སོ། ཁོང་གིས་དེ་ཚོར་ཕྲུ་གུ་གྲོངས་སོང་ངམ་ཞེས་དྲིས་པར། དེ་ཚོས། ལགས་ཕྲུ་གུ་གྲོངས་སོང་ཞེས་ཞུས་སོ།

²⁰ དེ་ནས་དཱ་བིད་ས་མཐིལ་ལས་ཡར་ལངས་ཏེ། ཁྲུས་བྱས་ཤིང་སྐྲ་ཤད་རྒྱབ་སྟེ་ལུས་ལ་གོན་གྱོས་གསར་པ་བརྗེད་ནས། གཙོ་བོ་དཀོན་མཆོག་གི་མཆོད་ཁང་དུ་བཅར་ནས་མཆོད་འབུལ་བྱས་སོ། དེ་ནས་ཁོང་ཕོ་བྲང་དུ་ཕྱིར་ལོག་བྱས་པའི་རྗེས་སུ་ཁ་ཟས་སློང་སྟེ་འབྱོར་མ་ཐག་ཏུ་ཟས་སོ།

²¹ དེར་ཁོང་གི་ལས་བྱེད་པ་ཚོས་ཁོང་ལ། ཕྲུ་གུ་གསོན་པོར་ཡོད་དུས་ཁྱེད་ནི་ཁོའི་དོན་དུ་བཤུམས་པ་གནང་ཞིང་། ཁ་ཟས་ཀྱང་སྤངས་པ་གནང་མོད། འོན་ཀྱང་ད་ལྟ་ཕྲུ་གུ་གྲོངས་མ་ཐག་ཏུ་ཁྱེད་ཡར་བཞེངས་ནས་གསོལ་ཚིག་ཀྱང་གནང་། ཁྱེད་ཀྱི་ཕྱག་ལས་འདི་ལྟ་བུའི་གསང་དོན་དེ་ང་ཚོས་ཤེས་མི་ཐུབ་བེ་ཞེས་ཞུས་པར།

²² ལན་དུ་དཱ་བིད་ཀྱིས་གསུངས་པ། ཁོ་གསོན་པོར་གནས་ཡུན་རིང་དུ་ངས་ངུ་ཞིང་སྨྱུང་གནས་སྲུང་དགོས་དོན་ནི། གཙོ་བོ་དཀོན་མཆོག་གིས་ང་ལ་ཐུགས་རྗེས་གཟིགས་ཏེ་ཕྲུ་གུ་དེ་གསོན་མི་ཡོང་ངམ་ཞེས་བསམ་བྱུང་།

²³ འོན་ཀྱང་ད་ནི་ཁོ་ཤི་ཚར་བ་ཡིན་པས་ག་རེའི་དོན་དུ་ངས་སྨྱུང་གནས་སྲུང་དགོས་སམ། ངས་ཕྲུ་གུ་དེ་སླར་ཡང་གསོན་པོར་བྱེད་ཐུབ་བམ། ནམ་ཞིག་ང་ཁོ་ཡོད་སར་འགྲོ་རྒྱུ་ཡིན་མོད། འོན་ཀྱང་ཁོ་ནི་ང་ཡོད་སར་ནམ་ཡང་སླེབས་མི་ཐུབ་བོ༎

སོ་ལོ་མོན་འཁྲུངས་པ།

²⁴ དེ་ནས་དཱ་བིད་ཀྱིས་རང་གི་ཆུང་མ་བྷད་ཤེ་བྷ་ལ་སེམས་གསོ་བྱས་ཤིང་། རྗེས་སུ་ཁོས་མོ་དང་ལུས་འབྲེལ་བྱས་ཏེ། མོ་ལས་བུ་ཞིག་སྐྱེས་པ་དང་། དཱ་བིད་ཀྱིས་དེ་ལ་སོ་ལོ་མོན་ཞེས་མིང་བཏགས་སོ། གཙོ་བོ་དཀོན་མཆོག་གིས་ཕྲུ་གུ་དེ་ལ་ཐུགས་བརྩེ་གནང་གི་ཡོད་པས།

²⁵ ལུང་སྟོན་པ་ན་ཐན་ལ་ཕྲུ་གུ་དེའི་མིང་ཡེ་དྷི་དྷི་ཡ་ཞེས་འདོག་དགོས་པའི་བཀའ་གནང་ངོ་། གང་ལགས་ཟེར་ན། གཙོ་བོ་དཀོན་མཆོག་གིས་ཁོ་ལ་ཐུགས་བརྩེ་གནང་གི་ཡོད་པ་ཡིན་ནོ༎

དཱ་བིད་ཀྱིས་རབ་བཱ་གྲོང་ཁྱེར་དབང་དུ་བསྡུ་བ།

²⁶ སྐབས་དེར་ཡོ་ཨབ་ཀྱིས་ཨམ་མོན་གྱི་རྒྱལ་ས་རབ་བཱའི་ཐོག་ཏུ་དམག་འཐབ་བྱས་ཤིང་རང་གི་དབང་དུ་བསྡུ་གྲབ་ཡོད་དོ།

²⁷ ཁོས་དཱ་བིད་ཀྱི་རྩར་བང་ཆེན་རྣམས་བཏང་ནས་སྨྲས་པ། ངས་རབ་བཱའི་ཐོག་ཏུ་འཐབ་རྒོལ་བྱས་ནས་ཁོ་ཚོའི་ཆུ་ཡོང་ས་དེ་དབང་འཛིན་བྱས་ཡོད།

²⁸ ད་ཁྱེད་ཀྱིས་དམག་མི་འཕྲོས་རྣམས་འཁྲིད་ནས་གྲོང་ཁྱེར་དེ་ལ་འཐབ་རྒོལ་བྱེད་དེ་རང་དབང་དུ་བསྡུ་བར་མཛོད། གང་ལགས་ཟེར་ན། གྲོང་ཁྱེར་དབང་འཛིན་བྱེད་པའི་མིང་དང་མངའ་ཐང་ཆེན་པོ་དེ་ང་ལ་མི་དགོས།

²⁹ དེ་ནས་དཱ་བིད་ཀྱིས་དམག་མི་རྣམས་བསྡུ་བཀོང་བྱས་ཏེ་རབ་བཱ་རུ་ཕྱིན་ནས་དེའི་ཐོག་ཏུ་འཐབ་རྒོལ་གྱིས་གྲོང་ཁྱེར་དེ་རང་དབང་དུ་བླངས་སོ།

³⁰ ཨམ་མོན་པའི་ལྷ་མོ་ལེག་གིི་འདྲ་སྐུའི་མགོ་ལས་གསེར་གྱི་ཅོད་པན་དེ་མར་སྤབ་ནས་རང་གི་མགོར་གྱོན་ནོ། ཅོད་པན་དེ་ནི་གསེར་ཀི་ལོ་གསུམ་ཅུ་སོ་ལྔ་ལས་འགྲུབ་ཡོད་པ་མ་ཟད་རིན་ཐང་ཆེ་བའི་ཁྲ་རྒྱན་སོགས་རྒྱབ་ཡོད་པ་ཡིན་ནོ། དེ་ཙམ་མ་ཟད་ཁོང་གིས་གྲོང་ཁྱེར་དེ་ལས་འཕྲོག་བཅོམ་གྱི་རྒྱུ་དངོས་མང་པོ་ཞིག་བླངས་སོ།

³¹ ཡང་དེ་གའི་ཡུལ་མི་རྣམས་ལ་ཁོང་གི་སོག་ལེ་དང་ཏོག་ཙེ་དང་སྟ་རེ་སོགས་སྤྲད་དེ་ངལ་ལས་བྱེད་བཅུག་པ་དང་། ས་ཕག་བཟོ་བའི་ལས་ཀར་བཙན་བསྐུལ་བྱས་སོ། ཨམ་མོན་གྱི་གྲོང་ཁྱེར་གཞན་ཚོའི་ཡུལ་མི་རྣམས་ལའང་དེ་བཞིན་དུ་ངལ་རྩོལ་བྱེད་བཅུག་པ་དང་། དེ་རྗེས་ཁོང་རང་གི་དམག་མི་རྣམས་འཁྲིད་དེ་ཡེ་རུ་ཤ་ལེམ་དུ་ཕྱིར་ལོག་བྱས་སོ༎