ཤ་མུ་ཨེལ་གཉིས་པ། 11 - Tibetan Old Testament 2011

དཱ་བིད་དང་བྷད་ཤེ་བྷ།

¹ དཔྱིད་ཀའི་མཇུག་ལ་རྒྱལ་པོ་རྣམས་དམག་ལ་འགྲོ་བའི་དུས་སྐབས་སུ། དཱ་བིད་ཀྱིས་ཡོ་ཨབ་དང་འགོ་དཔོན་གཞན་དང་ཨིསི་རཱཨེལ་པའི་དམག་མི་བཅས་ཕྱིར་བརྫངས་ཏེ། དེ་ཚོས་ཨམ་མོན་པ་རྣམས་འཕམ་པར་བྱས་ཏེ་གྲོང་ཁྱེར་རབ་བཱ་ཡོངས་སུ་མཐའ་བསྐོར་རོ། འོན་ཀྱང་དཱ་བིད་རང་ཉིད་ནི་ཡེ་རུ་ཤ་ལེམ་དུ་བསྡད་དོ།

² དགོང་དྲོའི་དུས་ཤིག་ན་དཱ་བིད་གཉིད་ལས་ཡར་ལངས་ཏེ། ཕོ་བྲང་གི་ཐོག་ཁར་ཕྱིན་ཏེ། དེར་ཕར་ཚུར་འཁྱམས་པའི་དུས་སུ་བུད་མེད་ཅིག་འཁྲུད་རྒྱབ་བཞིན་ཡོད་པ་མཐོང་བ་དང་། བུད་མེད་དེ་ནི་ཧ་ཅང་གི་གཟུགས་མཛེས་པོ་ཞིག་ཡོད་པ་ཡིན་པས།

³ མོ་སུ་ཡིན་པའི་སྐོར་རྩད་གཅོད་བྱེད་ཕྱིར་ཁོས་མི་ཞིག་བཏང་ངོ་། མོ་ནི་ཨེལ་ཡམ་གྱི་བུ་མོ་བྷད་ཤེ་བྷ་ཡིན་པ་དང་། ཧི་ཏི་པ་ཨུ་རི་ཡཱའི་ཆུང་མ་ཡིན་པ་དེ་ཤེས་སོ།

⁴ དེ་ནས་དཱ་བིད་ཀྱིས་བུད་མེད་དེ་རང་གི་རྩར་འཁྲིད་ཡོང་བའི་ཕྱིར་མི་བཏང་ནས། དེ་ཚོས་མོ་དཱ་བིད་ཡོད་སར་འཁྲིད་ཡོང་བ་དང་། ཁོས་མོ་དང་ལུས་འབྲེལ་བྱས་སོ། (སྐབས་དེར་མོ་ནི་ཟླ་མཚན་རྗེས་སུ་བྱེད་དགོས་པའི་དག་བྱང་གི་ཆོ་ག་བྱས་ཟིན་ཙམ་ཡིན་ནོ།) དེ་རྗེས་མོ་རང་གི་ཁང་ཁྱིམ་དུ་ལོག་ཕྱིན་ནོ།

⁵ རྗེས་སུ་མོས་རང་ཉིད་མངལ་དང་ལྡན་པར་འགྱུར་ཡོད་པ་དེ་ཤེས་ནས། དཱ་བིད་ལ་གནས་ཚུལ་དེ་བཤད་པར་ལོན་ཞིག་བཏང་ངོ་།

⁶ དེ་ནས་དཱ་བིད་ཀྱིས་ཡོ་ཨབ་ལ། ཧི་ཏི་པ་ཨུ་རི་ཡཱ་ངའི་རྩར་གཏོང་ཞིག་ཅེས་ལོན་བཏང་བ་བཞིན། ཡོ་ཨབ་ཀྱིས་ཨུ་རི་ཡཱ་ལ་དཱ་བིད་ཀྱི་རྩར་བཏང་ངོ་།

⁷ ཨུ་རི་ཡཱ་དེར་སླེབས་པའི་རྗེས་སུ་དཱ་བིད་ཀྱིས་ཁོ་ལ། ཡོ་ཨབ་དང་དམག་མི་རྣམས་ཁམས་བཟང་བདེ་ལོད་ཀྱི་འཚམས་འདྲི་བྱས་པ་དང། དམག་འཐབ་སྐོར་གྱི་གནས་ཆུལ་འདྲི་རྩད་བྱས་སོ།

⁸ དེ་རྗེས་དཱ་བིད་ཀྱིས་ཨུ་རི་ཡཱ་ལ། ད་ཁྱོད་རང་གི་ནང་དུ་ཕྱིན་ནས་ངལ་གསོ་རྒྱོབ་ཅིག་ཅེས་སྨྲས་པ་དང་། ཨུ་རི་ཡཱ་དེ་ནས་ཐོན་པ་དང་། དེ་རྗེས་དཱ་བིད་ཀྱིས་ཁོའི་ཁང་པར་ལག་རྟགས་ཤིག་བཏང་མོད།

⁹ འོན་ཀྱང་ཨུ་རི་ཡཱ་རང་གི་ཁང་པར་མ་ཕྱིན་པར། རྒྱལ་པོའི་སྐུ་སྲུང་པ་རྣམས་དང་མཉམ་དུ་ཕོ་བྲང་གི་རྒྱལ་སྒོར་ཉལ་ལོ།

¹⁰ དཱ་བིད་ཀྱིས་ཨུ་རི་ཡཱ་ནང་དུ་ཕྱིན་མེད་པའི་སྐོར་ཐོས་ནས། དཱ་བིད་ཀྱིས་ཁོ་ལ། ཁྱོད་དུས་ཡུན་རིང་པོའི་རྗེས་སུ་ཕྱིར་ལོག་བྱས་པ་ཡིན་པས། རང་གི་ནང་དུ་མ་ཕྱིན་པ་དེ་གང་ཡིན་ནམ་ཞེས་དྲིས་སོ།

¹¹ ལན་དུ་ཨུ་རི་ཡཱས། ཨིསི་རཱཨེལ་པ་རྣམས་དང་ཡ་ཧུ་དཱ་པ་རྣམས་དམག་སར་ཡོད་པ་དང། དམ་བཅའི་སྒྲོམ་དེའང་དེ་ཚོའི་ལག་ཏུ་ཡོད། ངའི་དམག་དཔོན་ཡོ་ཨབ་དང་ཁོང་གི་དམག་དཔོན་རྣམས་ཀྱང་ཐང་དུ་སྒར་རྒྱབ་ནས་བསྡད་ཡོད་པས། ང་ནི་རང་གི་ནང་དུ་ཕྱིན་ནས་ཟ་འཐུང་བྱེད་དེ་རང་གི་ཆུང་མ་དང་མཉམ་དུ་ཉལ་ནས་བསྡད་ཐུབ་བམ། དམ་པ་གང་ཡོད་པ་ཚང་མའི་ཐོག་ཏུ་ངས་མནའ་སྐྱེལ་ཏེ་བརྗོད་རྒྱུར། ངས་དེ་ལྟ་བུའི་ལས་ཀ་ནམ་ཡང་བྱེད་མི་ཡོང་ཞེས་ཞུས་སོ།

¹² དེ་བས་ན། དཱ་བིད་ཀྱིས་ཨུ་རི་ཡཱ་ལ། དེ་ལྟར་ཡིན་ན་ཁྱོད་རང་དེ་རིང་ཉིན་གང་འདིར་སྡོད་ཅིག སང་ཉིན་ངས་ཁྱོད་ལ་ཕྱིར་ལོག་གཏོང་གི་ཡིན་ཞེས་སྨྲས་པ་བཞིན། དེ་ཉིན་དང་དེའི་སང་ཉིན་བར་ཨུ་རི་ཡཱ་ཡེ་རུ་ཤ་ལེམ་དུ་བསྡད་དོ།

¹³ དཱ་བིད་ཀྱིས་ཁོ་ལ་དགོང་དྲོའི་ཁ་ཟས་སུ་བོས་ཏེ། ཆང་རག་བླུགས་ནས་ར་བཟི་རུ་བཅུག་གོ། འོན་ཀྱང་མཚན་མོ་དེ་ལའང་ཨུ་རི་ཡཱ་རང་གི་ནང་དུ་ཉལ་བར་མ་ཕྱིན་པར། ཕོ་བྲང་གི་སྐུ་སྲུང་དམག་མི་རྣམས་ཀྱི་ཉལ་ཁང་དུ་ཕྱིན་ནས་རང་གི་མལ་ཆས་གྱོན་ཏེ་ཉལ་ལོ།

¹⁴ དེའི་སང་ཞོག་དཱ་བིད་ཀྱིས་ཡོ་ཨབ་ལ་ཡི་གེ་ཞིག་བྲིས་ནས་ཨུ་རི་ཡཱའི་ལག་ཏུ་ཡི་གེ་བཏང་ངོ་།

¹⁵ ཡི་གེའི་ནང་བྲིས་གསལ། དམག་ཤུགས་ཆེན་པོ་འཐབ་པའི་སྐབས་སུ་ཨུ་རི་ཡཱ་མདུན་གྱི་དམག་གྲལ་དང་པོའི་ཁོངས་སུ་བཞག་སྟེ། ཁྱོད་ཚོ་ཕྱིན་ནུར་རྒྱབ་དགོས། དེ་ནས་ཁོ་ངེས་པར་བསད་པར་འགྱུར།

¹⁶ དེ་ནས་གྲོང་ཁྱེར་མཐའ་སྐོར་ནས་བསྡད་ཡོད་བའི་སྐབས་སུ་ཡོ་ཨབ་ཀྱིས་ཤེས་བཞིན་དུ་དགྲ་བོའི་ཉེན་ཁ་ཆེ་ཤོས་གང་དུ་ཡོད་སར་ཨུ་རི་ཡཱ་བཏང་ངོ་།

¹⁷ དགྲ་བོའི་དམག་མི་རྣམས་གྲོང་ཁྱེར་ནས་ཐོན་ཏེ། ཡོ་ཨབ་ཀྱི་དམག་མི་རྣམས་དང་འཐབ་རྒོལ་བྱས་པས། དཱ་བིད་ཀྱི་དམག་དཔོན་འགའ་ཤས་དང་ཨུ་རི་ཡཱའང་དེའི་ཁོངས་སུ་བསད་དོ།

¹⁸ དེ་ནས་ཡོ་ཨབ་ཀྱིས་དཱ་བིད་ལ་དམག་གི་སྐོར་གནས་ཚུལ་ཞིག་བཏང་ནས།

¹⁹ བང་ཆེན་དེ་ལ་སྨྲས་པ། ཁྱོད་ཀྱིས་རྒྱལ་པོ་ལ་དམག་གི་སྐོར་གནས་ཚུལ་ཚང་མ་ཞུས་ཟིན་པའི་རྗེས་ལ།

²⁰ ཁོང་ཐུགས་ཁྲོས་ནས། ཁྱོད་ཚོས་དམག་རྒྱབ་པར་དེ་ལྟ་བུའི་གྲོང་ཁྱེར་དང་ཐག་ཉེ་བར་ཕྱིན་པ་དེ་གང་ཡིན་ནམ། དེ་ཚོས་ལྕགས་རིའི་ནང་ནས་མདའ་རྒྱབ་ཡོང་ཞེས་བསམ་མ་བྱུང་ངམ།

²¹ སྔར་གྷིད་ཨོན་གྱི་བུ་ཨ་བྷི་མེ་ལེག་ཇི་ལྟར་བསད་པའི་སྐོར་ཁྱོད་ཚོས་དྲན་གྱི་མི་འདུག་གམ། གནས་ཚུལ་དེ་ནི་ཐེ་བེཛ་ཟེར་བར་བྱུང་བ་ཡིན་ཏེ། བུད་མེད་ཞིག་གིས་ལྕགས་རིའི་ཐོད་ནས་མར་རང་འཐག་འཕང་ནས་ཁོ་བསད་པ་ཡིན་པས། ཁྱོད་ཚོ་ལྕགས་རི་དང་ཉེ་བར་ཕྱིན་པ་གང་ཡིན་ནམ་ཞེས་རྒྱལ་པོས་འདྲི་རྩད་དེ་འདྲ་གནང་བ་ཡིན་ན། ཁྱེད་ཀྱི་དམག་དཔོན་ཨུ་རི་ཡཱའང་བསད་བཞག་ཅེས་སྨྲོས་ཤིག

²² དེ་ནས་བང་ཆེན་དེ་ཕྱིན་ནས་ཡོ་ཨབ་ཀྱིས་གང་སྨྲས་པ་བཞིན་དཱ་བིད་ལ་ཞུས་སོ།

²³ ཁོས་བརྗོད་གསལ། ང་ཚོའི་དགྲ་བོ་རྣམས་ནི་ང་ཚོ་ལས་ཀྱང་སྟོབས་ཤུགས་ཆེ་ཞིང་། དེ་ཚོ་ང་ཚོ་དང་ཐང་དུ་འཐབ་ཕྱིར་གྲོང་ཁྱེར་ནས་ཐོན་ཡོང་བ་དང་། ང་ཚོས་དེ་ཚོར་གྲོང་ཁྱེར་གྱི་རྒྱལ་སྒོ་བར་དུ་དེད་པ་ཡིན།

²⁴ དེ་རྗེས་ཁོ་ཚོས་ལྕགས་རིའི་ཐོད་ནས་ང་ཚོར་མདའ་རྒྱབ་པས། ཁྱེད་ཀྱི་དམག་དཔོན་འགའ་ཤས་དང་ཆབས་ཅིག་དམག་དཔོན་ཨུ་རི་ཡཱའང་བསད་བཞག་ཅེས་ཞུས་སོ།

²⁵ དེ་ནས་དཱ་བིད་ཀྱིས་བང་ཆེན་དེ་ལ། ད་ཁྱོད་ཕྱིན་ནས་ཡོ་ཨབ་ལ་སེམས་གསོ་གཏོང་ནས་འདི་ལྟར་སྨྲོས་ཤིག དམག་སར་སུ་ལ་བསད་ཡོང་ཞེས་སུས་ཀྱང་ནམ་ཡང་མི་ཤེས། དེ་བས་ན་སྔར་ལས་ཁྱོད་ཀྱིས་ཀྱང་དམག་འཐབ་ཤུགས་ཆེ་བ་ཞིག་རྒྱབ་ནས་གྲོང་ཁྱེར་དེ་དབང་དུ་བསྡུས་ཤིག་ཅེས་སྨྲས་སོ།

²⁶ བྷད་ཤེ་བྷས་རང་གི་ཁྱོ་ག་བསད་པའི་སྐོར་ཐོས་ནས། ཁོའི་དོན་དུ་མྱ་ངན་སྲུང་ཞིང་།

²⁷ མྱ་ངན་གྱི་དུས་མཚམས་ཟིན་པའི་རྗེས་སུ། དཱ་བིད་ཀྱིས་མོ་ལ་ཕོ་བྲང་དུ་བཀོང་ཞིང་། མོ་ནི་དཱ་བིད་ཀྱི་ཆུང་མར་འགྱུར་ནས་བུ་ཞིག་སྐྱེས་སོ། འོན་ཀྱང་དཱ་བིད་ཀྱིས་གང་བྱས་པའི་ལས་དེ་ལ་གཙོ་བོ་དཀོན་མཆོག་ཐུགས་མ་མཉེས་སོ༎